Əbɨro 6 - Gabri Maja

¹ Na toy di hɨn̰ wo̰ ma, kuɗa gɨ ana orgɨŋ dan̰ cɨndɨna tumɔ a te hɨnga ga ni gɨle ga ojɨ cay kalaŋ ga cɨndɨge nadɨrdaŋ a te Kɨris gaŋ bɨ. Kuɗa gɨ na sɔmdɛgɨŋ cay hɨnga ga ni gɨle ga cay wase gɨ ojɨ cay Kɨris le naŋ ɨni. Dɨle jɔgɛ tɨrabe hɨnga ga ni gɨle ga sayga toyge dɨŋ, hɨnga ga nee le ba kɛ: Ɗɔɔ kardi hɨnga ga kɨya orɨn̰ dan̰ kalaŋ tɨma dɨŋ bɨ, bɔgɛ kudurɔ cay Kumu bɨ,

² hɨnga ga ni gɨle ga ojɨ cay batɛm ga toyge kan̰dɨge kan̰dɨge bɨ, cay dɨbe-kɔbɔ cay kalaŋ bɨ, cay kalaŋ ga ma ga kɨya bɔyɛge lɨbe bɨ, cay bɔyɛ kɔl gɨ dan̰ tumoyi yɔd bɨ.

³ Kuɗa gɨ ana orgɨŋ dan̰ cɨndɨna tumɔ dan̰ hɨnga ga ni gɨle ga da kalaŋ ga cɨndɨge nadɨrdaŋ. Hɨn̰ gɨ Kumu na gey na, na hɨnga ga nee le ma mana kɨya lɔɔ.

⁴ Kalaŋ ga asɨn̰a gɨ da Kumu asɨn̰ kɨɗɨn̰ kuduroyge bɨ, wayge ɗarwa di sayga kobɨ Kumu kondɨ bɨ, wayge Turnɔ ɗe-kuduroy-bɛrɛ bɨ le,

⁵ kan talge kuɗadi kɔl gɨ da Kumu solge dɔnɔdi bɨ, ɨsɨbɨge belin̰əŋ di da dɔɔ-ƴaa da Kumu gɨ ba kɨya caga le haw kɛ solge bɨ.

⁶ Ma hɨn̰ wo̰ kalɨn̰ ma, hɨn̰ gɨ kalaŋ ga nee le na ɗage aye kudurɔ coŋ na, gɨyəŋ gɨ kan kɨya jɨgan̰ danage ɗe na bɨlɨn̰ge gɨye-lɔɔdɨge unɔ ɨni. Kɨya wa kalaŋ ga nee le, woy hɨn̰ gɨ kan gusɨge gaŋ na jɨgage gagɨl Kurɨn̰-Kumu a cay sɨya-gɨ-dagɨli gɨŋ ɗaŋ bɨ, wariige cɨn̰ kalaŋ ɗe na dɨbɨge dasi di gumu cayi a cɨn̰ kalaŋ wo̰ bɨ.

⁷ Hɨn̰ gɨ cay gɨsəŋ na sa kaŋdi Kumu ga ongɨ cay kamdɨge gaŋ kamdɨge gaŋ bɨ, kardi nee na andan̰ dan̰ kabɨn̰ hɨnga ga kɨya laa dan̰ kalaŋ ka-yage bɨ na, Kumu tor-kɨbi a cay gɨsəŋ gaŋ ga nee le.

⁸ Ama hɨn̰ gɨ naa gɨsɨm dan̰ gɨm na ba andaŋ nee na, na cay gɨsəŋ ga kɨya andaŋ hɨnga naŋ, ɓɨse gɨ da Kumu woyge mɨnde bɨ, kagadi gɨŋ na kan kɨya ulge mɔndɛ coŋ bɨ.

⁹ Ay karmɨni ga ni lee-toygɨŋ, ko hɨn̰ gɨ ni na yagɨŋ kɔl hɨn̰ wo̰ kalɨn̰ ma, ni sol kuduroyni kuɗa hɨn̰ gɨ kɨŋ na a te gɨyəŋ gɨ kuɗa gɨŋ, gɨ na gɨyəŋ gɨ ni pɔɗɛ.

¹⁰ Na cɨndi, Kumu na ba lɔɔ hɨnga dan̰ durɔ ɗɨngar dan̰ cɨndi. Kuduroyi kɨya hale gɨybəŋ a cay gɨye kogɨŋ gɨ kɨŋ lee kol cayi le naŋ bɨ, cay geye gɨ kɨŋ orɨn̰ kol cayi le naŋ bɨ. Kɨya wa kɨŋ gɨlii dan̰ hɨnga ga ni jɨbɨn̰ te karmɨgɨŋ ga woyge dan̰ cɨndɨge le bɨ. Bɨrɨŋ gɨsɨn̰ haw kɛ kalɨn̰ ma, kɨŋ woy te jɨbe toyge.

¹¹ Ama kuduroy geye koni na gɨ waŋ waŋ kalɨn̰ ma duroygɨŋ gusi-hɨmbalayi cɨndi tumɔ tumɔ bɨrɨŋ dɨɗɨn̰ kɨbi. Kɨɗɨn̰ ga nee le, hɨnga ga kɨŋ bee ɨrɨmedɨgɨŋ cay nee gɨ na kɨya ɨrga le, kɨya ɔrɛ kɨɗɨn̰dɨge gaŋ nɔm.

¹² Ni gey gɨ kɨŋ na gɨ bɨləŋ ka-dabɨr naŋ, ama gɨ kɨŋ na aya cay tɨbay ka-aye kudurɔ bɨ, ƴɨman̰ kuduroygɨŋ usa bɨ. Na kan ga nee le ba kɨya wɔɔge hɨnga ga Kumu ye gɨ ɗi na kɨya lɔɔ le.

Kumu ɨre ɗɛg a cay kɔl gɨ ban ye gɨ ɗi na kɨya lɔɔ

¹³ Kumu ye gɨ ɗi na kɨya lɔɔ hɨnga bɨn̰ Abɨraham. Kɨɗɨn̰ ga Kumu lee na, ungo gɨ ɗaŋ gɨ gumu ɗii gɨ ban kɨya ɓɨse gusi dan̰ gusondi unɔ. Lee gɨ ban ɓɨsɨ gusi dan̰ gusondi koyi ban gaŋ,

¹⁴ ye hɨn̰: «Na cɨndi, ɨŋ kɨya tɔrɛ-kɨbɨnɨ can̰ bɨ kongɨn̰iin̰ kɨya kondɨwage bajag bajag cɨndɨge tumɔ tumɔ bɨ.»

¹⁵ Kɨɗɨn̰ ga Abɨraham ƴom kuduroyi gamɨn̰ ɨni na, ban wayi hɨnga ga Kumu ye gɨ ɗi na kɨya bii le.

¹⁶ Kɨɗɨn̰ ga kalaŋ na ɓɨsɨ gusɨge na, ɓɨsege na dan̰ guson̰ ungo gɨ gumu ɗige bɨ, ɓɨse na hɨnga ga lee gɨ ungo bee kuduroy a cay kɔl yɔ gɨ da ungo bɨ, lee gɨ te man̰e-kɔl ayaŋ bɨ.

¹⁷ Na toy di hɨn̰ wo̰ ma, Kumu gey gɨ ka-wɔɔ hɨnga ga Kumu ye gɨ ɗi na kɨya bee le, na sɨlage duroy arɨn̰a gɨɗaŋ gɨ cay gasɨndi ga ban ay le, ɗi na kɨya bɨle naŋ. Na kɨya cay kɔl gɨ nee le ma, ban dɨɗɨ kɨbɨ hɨnga ga ban ye gɨ ɗi na kɨya bee le dan̰ ɓɨse gusi.

¹⁸ Hɨn̰ wo̰ na tumɔ dan̰ kɔl gɨ ban ye gɨ ɗi na kɨya lɔɔ bɨ, ɗaŋ coŋ dan̰ ɓɨse gɨ ban ɓɨse gusi bɨ. Hɨnga ga sɔɔ ga nee le, kɨya bɨle ɗaŋ naŋ bɨ Kumu kɨya yɔ poy cay nee naŋ bɨrɨŋ bɨ. Ɨni na, na-gandi ga ba ɗe hɨnga nɔm coŋ kɨya ƴomɨn̰ hɨnga ga na ba bee ɨrɨmedɨna cay nee gɨ ban ba ɗe tumoyna le, na orɨn̰ dan̰ hɨnga ga dobɨ bandɨ kuduroyna tɔgɨ gɨɗaŋ.

¹⁹ Hɨnga ga na bee ɨrɨmedɨna cay nee ga nee le, na hɨnga ga saɗɨ sɔmɛ-bɨra kona dugo kɨɗɨn̰ pɨna ɗɛgɛgɛ wo̰. Na hɨnga ga leen̰ cɨndi bɨ ɨre osu bɨ. Hɨnga ga na bee ɨrɨmedɨna cay nee le, or bɨrɨŋ andaŋ ƴen̰ a kardi badɨge ga kan bon̰ge duroy ƴaa di Kumu woy duroy nee.

²⁰ Ho’o, na kɨɗɨn̰ ga nee gaŋ le ma Jesu or tumoyna andaŋ a duroy ƴaa di da Kumu di woy a gɨɗɨgɨ-Kumu gɨŋ kɨya cayna. Kɨya gɨ ban bɨle mangɨl gɨ da ka-cay ka-bɔgɛ kɨbar dan̰ tumoyi hɨn̰ gɨ da Mɛlgisedɛg wo̰.