Əbɨro 5 - Gabri Maja

¹ Mangɨl gɨ da ka-cay ka-bɔgɛ kɨbar gɨ ani ani gɨ kan doriige duroy kalaŋ le, gɨye-lɔɔdi na lɔɔ gɨye bɨn̰ Kumu kol cayge. Kan som na kɨya bɨn̰ Kumu hɨnga ga ni bee bɨ, bɔgɛ kɨbar bɨ, kɨya cay ɨsɨnan̰əŋ.

² Kan ga sɨlage duroy hɨnga naŋ bɨ, kayge gɨyəŋ bɨ le, ban ɓal sɔlɛ hɨnga sɔlɛdɨge. Kɨya wa ban kalɨn̰ ma, na ungo gɨ ɨndi gɨ tɔgɨ wɨyii hɨn̰ mɨgayi ungo gɨ ɨndi wo̰ bɨ.

³ Na toy di hɨn̰ wo̰ ma, kɨya cay tɔgɨ wɨye di nee le, ojɨ gɨ ban kɨya bee hɨnga ga ni bogɨn̰ kɨbar kɨya cay ɨsɨna gɨ da te kalaŋ ƴɔbɨ naŋ. Ama na kɨya cay ɨsɨna koyi ban gaŋ nee bɨ.

⁴ Gɨye gɨ da mangɨl gɨ da ka-cay ka-bɔgɛ kɨbar bɨ hurɔmɔ di woy kol caa bɨ le, na ungo ba kɨya ɓale dɨbe cay gusi koyi gɨŋ gaŋ naŋ. Na Kumu ma na ba tɔgɛ kalaŋ kɨbɨ nee, hɨn̰ gɨ ban ba teen̰ Aro̰ wo̰.

⁵ Gɨ da Kɨris kalɨn̰ ma, na hɨn̰ wo̰ bɨ. Na ban ba bɨle mangɨl gɨ da ka-cay ka-bɔgɛ kɨbar dɨbɨn̰ gusoŋ-tɔgɛ a cay gusi koyi gɨŋ gaŋ naŋ. Ama ban gɨ ba dɨbe gusoŋ-tɔgɛ a cayi le, na Kumu gɨ ye hɨn̰: «Ji na Kuronɨ, Ayɨn̰ toy labɨde na, ɨŋ ye daa waŋ ɨŋ na ban̰.»

⁶ Or pɨna dan̰ kɔl gɨ ɗaŋ gɨ ba kɛ: «Ji kɨya wɔyɛ ba-bɔgɛ kɨbar bɨrɨŋ dan̰ tumon̰, Hɨn̰ gɨ da Mɛlgisedɛg wo̰.»

⁷ Kɨɗɨn̰ ga Jesu ban̰ a cay gɨsəŋ gaŋ le, Kumu gɨ ba ɓale poɗii kɨbɨ tɨma dɨŋ le, ban olii bɨ woy kɨbi bɨ wɨlal dan̰ kaŋdi cɨndi bɨ. Bɨ Kumu je ɔlɛ koyi kol dɔbɛ gɨ ban dobɨ cayi bii.

⁸ Ban na Kurɨn̰-Kumu hayi, ama dan̰ gɨyəŋ gɨ da hɨnga ga ni gɨle-cɨn̰ nɔm ga leeyi le, ban tɨrabɨ jɔɔ kɔl kɨbɨ Kumu.

⁹ Kɨɗɨn̰ ga Kumu lee gɨ ban dɨɗɨ kɨbɨ gɨye koyi ɗəndəŋ coŋ ɨni na, kan nɔm ga jege kɔl kɨbi le, wayge pɔɗɛ gɨ dan̰ tumoyige kol cayi.

¹⁰ Kumu sii leen̰ mangɨl gɨ da ka-cay ka-bɔgɛ kɨbar na hɨn̰ gɨ da Mɛlgisedɛg wo̰.

Ungo gɨ baa kɨye te aye kudurɔ bɨ gɨ cɨndi naa bɨ

¹¹ Ni orɨn̰ dan̰ kɔl kondɨ gɨ ni yɔ cay hɨnga ga nee le, ama kɨɗɨn̰ dɔrɛ toyi osu tɔgɨ, kɨya wa kɨŋ bɨle kalaŋ ga sɨlage duroy kɔl haw naŋ.

¹² Kardi sɨngɨɗɨ ɨni, lee gɨ kɨŋ ni kɨya bɨle ka-gɨlɨn̰ kalaŋ hɨnga ɨni. Ama kɨŋ mal gɨ kalaŋ na jɨge gɨlgɨŋ hɨnga ga ni gɨle ga cay wase ga boy kɔl gɨ da Kumu gɨŋ ƴee coŋ. Kɨŋ or bɨrɨŋ orɨn̰ na dan̰ tabɨlaŋdi kobɨn̰ ga ni sɔɔ, ama kɨŋ ɨran̰ na dan̰ tabɨlaŋdi hɨnga ga ni dɔɔ ga osi naŋ.

¹³ Waŋ waŋ gɨ baa kɨbɨ kobɨn̰ gɨŋ ƴee le, na kɨye. Lee gɨ ban kɨya ɓale sɔlɛ duroy kɔl gɨ ojɨ cay hɨnga ga dan̰ durɔ ɗɨngar le naŋ.

¹⁴ Ama hɨnga ga ni dɔɔ ga osi le, woy na kɨya cay kalaŋ ga cɨndɨge naa te aye kudurɔ, kalaŋ ga nee le gɨlge dɔrɛ cɨn̰ hɨnga ga ɗari dan̰ ga ɨsɨni kɨya wa kan leedege daa daa.