Əbɨro 4 - Gabri Maja

¹ Kumu yenagɨŋ gɨ ɗi na kɨya bɨna hɨnga ga ban yena koldɨge: Na kɨya andaŋ kɨɗɨn̰ dɔrɛ gɨlale kayi gaŋ bɨ, hɨnga ga ban kɨya bɨna ga nee le, woy ban̰dɨge gaŋ jaŋ ƴee. Na toy di hɨn̰ wo̰ ma, kuɗa gɨ na ɗe cɨn̰-muɗɔlɛ cay gusɨnagɨŋ, ɗe ungo pɨna wo̰ duroygɨŋ dɔgɛ andaŋ a te gɨyəŋ gɨ ni andɨn̰ kɨɗɨn̰ dɔrɛ gɨlale gaŋ le coŋ naŋ.

² Kɨya wa na-gandi kalɨn̰ ma, kan tee bɛrnɛ Kɔl-gɨ-Ɗari bɨna hɨn̰ wɔlɛ gɨ kan ba teen̰ bɛrnɛ bɨn̰ kalaŋ ga a duroy daldɨŋ wo̰ bɨ. Ama kɔl gɨ kan ba je le, laa danage naŋ. Kɨya wa kɨɗɨn̰ ga kan ba jege le, kan ƴage dan̰ aye kudurɔ naŋ.

³ Na-gandi ga na ba ay kuduroynagɨŋ le, na kɨya andaŋ a kɨɗɨn̰ dɔrɛ gɨlale gaŋ ga Kumu ye koldɨge yen̰ hɨn̰: «Kɨɗɨn̰ ga kuduroy-hɔmɛ ləŋ le ɨŋ ɓɨse gusɨnɨ ye hɨn̰: “Kan kɨya dɨbe tɨbayge, Kɨɗɨn̰ dɔrɛ gɨlale kange gaŋ naŋ bɨrɨŋ.”» Na sol gɨ dɔrɛ gɨlale woy nee kɨya gɨ te gɨye koyi le ayaŋ ayɨn̰ toy gɨ ban sɨn̰ cay gɨsəŋ.

⁴ Kɨya wa dorge kɔl ojɨ cay wɔlɛ gɨ jurgum duroy Magtubu di da Kumu dɨŋ ye hɨn̰: «Kumu dɨɗɨ kɨbɨ gɨye koyi nɔm bɨ, wɔlɛ jurgumdi gɨŋ na ban dor gɨlale.»

⁵ Ɗaŋ coŋ, a duroy magtubu di nee dɨŋ le, yege hɨn̰: «Kan kɨya dɨbe tɨbayge a kɨɗɨn̰ dɔrɛ gɨlale kange gaŋ le naŋ bɨrɨŋ.»

⁶ Na toy di hɨn̰ wo̰ ma kan ga jege Kɔl-gɨ-Ɗari gɨ nee cay wase le, andaŋge a kɨɗɨn̰ dɔrɛ gɨlale gaŋ le naŋ, kɨya cay kan̰e lɔɔ tumɔ toge. Lee gɨ gɨyəŋ woy hangɨwa kɨya cay kalaŋ ga ɗaŋ, ɗe na andaŋge boy nee.

⁷ Na toy di hɨn̰ wo̰ ma, Kumu dor wɔlɛ gɨ ɗaŋ coŋ, ban te wɔlɛ gɨ nee, na «labɨde.» Ɨlge kondɨ kardi nee na, ban ye kɔl dan̰ kɔl gɨ andaŋ kɨbɨ Dabid gɨ kɨŋ ba jeyii haw kɛ ojɨn̰ cay wɔlɛ gɨ nee le. Ban ye hɨn̰: «Labɨde hɨn̰ gɨ kɨŋ na ja noy Kumu na, kɨŋ ɗɔɔ ba ɗɔɔ ɗugoygɨŋ dɨmbɨrwa naŋ.»

⁸ Na cɨndi hɨn̰ gɨ Josɨwe na ɨran̰ dan̰a karɨn̰ Ɨsɨrayɛl a kɨɗɨn̰ dɔrɛ gɨlale gaŋ na, Kumu ni kɨya yɔ koldi wɔlɛ gɨ ɗaŋ coŋ kardi nee naŋ ɨni.

⁹ Na hɨn̰ wo̰ ma, kɨɗɨn̰ dɔrɛ gɨlale ga da te kalaŋ ga da Kumu woy nee. Kɨɗɨn̰ dɔrɛ gɨlale ga nee le, woy gɨlɨn̰ hɨn̰ kɨɗɨn̰ dɔrɛ gɨlale ga da Kumu gɨ wɔlɛ jurgum gɨŋ wo̰.

¹⁰ Ho’o ungo gɨ na andaŋ a kɨɗɨn̰ dɔrɛ gɨlale ga da Kumu gaŋ na, dor gɨlale a kɨbɨ gɨye-lɔɔdi gɨŋ hɨn̰ gɨ Kumu ba dorɨn̰ gɨlale a kɨbɨ gɨye-lɔɔdi gɨŋ wo̰ bɨ.

¹¹ Naa hɨn̰ wo̰ na, kuɗa gɨ ana ongulgɨŋ gusɨnagɨŋ daa andɨn̰ a kɨɗɨn̰ dɔrɛ gɨlale ga nee gaŋ le. Laanagɨŋ ɗe gɨ ungo pɨna duroyna kayaŋ kɨya cay lɔɔ te tumɔ naŋ, hɨn̰ gɨ da mon̰iinagɨŋ wo̰ naŋ.

¹² Na cɨndi, kɔl gɨ da Kumu le na kɔl gɨ som-bɨra bɨ, togii woy nee bɨ, ƴee ɗɨn̰ pəlɨm di ƴee gasɨndo sɔɔ bɨ. Hɨndi andaŋ kuduroy ungo, or bɨrɨŋ pɔyɛ kɨɗɨn̰ ga ungo habedi bɨ, turnoy bɨ dayaŋge nee gaŋ daa. Bɨ or bɨrɨŋ pɔyɛ kɨɗɨn̰ ga gurɨyadi dan̰ sɔŋ gɨ a duroy isidi dayaŋge nee gaŋ daa bɨ. Kɔl gɨ da Kumu boy kɔl a cay hɨnga nɔm ga ungo ojɨ lɔɔ bɨ, cay ɨrɨme gɨ woy a kuduroy ungo gɨŋ bɨ.

¹³ Hɨnga nɔm ga Kumu si le, pɨna wo̰ ga wosɨ gusɨge cɨndi wo̰ unɔ. Hɨnga nɔm woy cɨn̰-tɨwa dɨŋ ɗen̰ ɗen̰ cɨndi bɨ, tɨla gusɨge cɨndi naŋ bɨ. Na ban ma ojɨ gɨ na kɨya dɔrɛ kardi gɨye-lɔɔdɨna bii bɨ.

Jesu na mangɨl gɨ da ka-cay ka-bɔgɛ kɨbar

¹⁴ Naa hɨn̰ wo̰ na, kuɗa gɨ ɗe ana ƴom aye kudurɔ gɨ na ba ye koldi le osu. Kɨya wa na orɨn̰ dan̰ mangɨl gɨ da ka-cay ka-bɔgɛ kɨbar gɨ gumu. Mangɨl gɨ da ka-cay ka-bɔgɛ kɨbar gɨ nee le, na Jesu, Kurɨn̰-Kumu gɨ gay gɨɗɨgɨ-Kumu orɨn̰ bɨrɨŋ andɨn̰ gusi Kumu.

¹⁵ Na cɨndi, na orɨn̰ dan̰ mangɨl gɨ da ka-cay ka-bɔgɛ kɨbar gɨ ɓal gɨle-cɨn̰ danana duroy gabaŋ kona. Hɨnga nɔm ga ba gɨybɨnagɨŋ le, gɨybii bɨ ama ban laa ɨsɨna naŋ.

¹⁶ Naa hɨn̰ wo̰ na, kuɗa gɨ na sɨye bongi kali-tɨrɨmbala di da ɗarwa dɨle hundɔrɔ coŋ bɨrɨŋ ɗe ban solɨn̰ cɨn̰-n̰age tonagɨŋ. Bɨ ana wan̰ ɗarwa di a gusii di kɨya jɨbe toyna a duroy hɨnga ga na or n̰agedɨge a boy tɨwado dɨŋ.