Əbɨro 3 - Gabri Maja

Jesu gumu ɗɨn̰ Moyis

¹ Na toy di hɨn̰ wo̰ ma, ay karmɨnɨ ga ban̰aŋ dan̰ ga kandɨ, kɨŋ ga kɨŋ woy dan̰ cɨndɨgɨŋ nɔm ga Kumu təgɨŋ ɗe agɨŋ na wan̰ ɗarwa di a daa nii le sɨgɨŋ cɨndɨgɨŋ a cay Jesu. Ban na ba-gɨre-gɨye bɨ, mangɨl gɨ da ka-cay ka-bɔgɛ kɨbar gɨ da aye kudurɔ gɨ ni ba tee bɛrnɛdi le bɨ.

² Na cɨndi, Kumu dor Jesu na kɨya gɨye gɨ nee le bɨ, ban ɨre a cay tɨbay dɨŋ danayi hɨn̰ gɨ Moyis gɨ kan yege koldi hɨn̰: «Ban na ungo gɨ ɨre a cay tɨbayi dɨŋ leen̰ gɨye kɨya jɨbɨn̰ te kalaŋ ga da Kumu nɔm.»

³ Hɨn̰ gɨ kan ba hɨramge ba-gaɗe ƴaa ɗɨn̰ ƴaa gusi le, Jesu ɓal wɔɔ gusoŋ-tɔgɛ gɨ ɗɨn̰ gɨ da Moyis coŋ.

⁴ Na cɨndi, ƴaa gɨ ani ani kalɨn̰ ma orɨn̰ dan̰ ba gaɗedi. Ama ba gaɗe hɨnga nɔm na, na Kumu.

⁵ Gɨ ojɨ cay Moyis na, ban na ungo gɨ ɨre a cay tɨbayi dɨŋ jɨbɨn̰ te kalaŋ ga da Kumu nɔm. Ban na marɨna ba-gɨye bɨ, ba lɔɔ tɨmon̰ da kɔl gɨ Kumu kɨya tɔgɛ bɛrnɛdi kardi nee bɨ.

⁶ Ama Kɨris na, ban ɨre cay tɨbayi dɨŋ na hɨn̰ Kurondi gɨ bayi Kumu sii a cay ƴaadi dɨŋ. Ƴaa di nee le na na-gandi, hɨn̰ gɨ na na ƴɨma kardi aye kudurɔ usa bɨ, tɨga-pɨre cay hɨnga ga na ba beegɨŋ ɨrɨmedɨna cay nee bɨ.

Dɔrɛ gɨlale gɨ ojɨ cay te kalaŋ ga da Kumu

⁷ Na toy di hɨn̰ wo̰ ma, jagɨŋ kɔl gɨ Turnɔ ɗe-kuduroy-bɛrɛ ye: «Labɨde hɨn̰ gɨ kɨŋ na ja noy Kumu na,

⁸ Kɨŋ ɗɔɔ ba ɗɔɔ ɗugoygɨŋ dɨmbɨrwa, Hɨn̰ mon̰iigɨŋ ga san̰ge danayi, A boy wɔlɛ gɨ kɨŋ gɨwasii duroy dal dɨŋ le wo̰ naŋ.

⁹ A kɨɗɨn̰ ga nee le mon̰iigɨŋ solge gɨye-lɔɔnɨ gɨ ɨŋ lee le, Ama naa hɨn̰ wo̰ kalɨn̰ ma, Kan gɨwasaŋge, kɨya malɨn̰ge kɨbɨnɨ,

¹⁰ Ɓal ɨlge toy-poɗɨn̰. Na toy di hɨn̰ wo̰ ma kuduroy-hɔmɛ ləŋ, Cay kalaŋ ga nee le, Lee gɨ ɨŋ ye hɨn̰: “Ɨrɨmedɨge gɨre kayaŋ daa daa bɨ, Hɨnga ga ɨŋ gey gusɨge le dɨlage cay nee naŋ bɨrɨŋ bɨ.”

¹¹ Kuduroy-hɔmɛ ləŋ lee gɨ ɨŋ ɓɨse gusɨnɨ ye hɨn̰: “Kan kɨya dɨbe tɨbayige, Kɨɗɨn̰ dɔrɛ gɨlale kange gaŋ naŋ bɨrɨŋ.”»

¹² Karmɨnɨ ga ban̰aŋ dan̰ ga kandɨ, ɗagɨŋ muɗɔlɛ cay gusɨgɨŋ gɨŋ. Ɗe waŋ waŋ kalɨn̰ ma a duroygɨŋ ɗɔɔ kuduroy ɨsɨna naŋ le, kuduroy-dɨmbɨrwa orɨn̰ danayi bɨrɨŋ, dorii a te gɨyəŋ gɨ da Kumu gɨ som-bɨra gɨŋ le coŋ naŋ.

¹³ Ama dɨbagɨŋ bandɨ kuduroy gusɨgɨŋ dan̰ wɔlɛ pɨna pɨna. Sɨlagɨŋ kuɗa gɨ kɨɗɨn̰ ga magtubu ba ye: Labɨde na, duroy na labɨde kol cayna bɨ. Hɨn̰ wo̰ na dɨbagɨŋ bandɨ kuduroy gusɨgɨŋ, ɗe ɨsɨna nar cɨn̰ ungo duroygɨŋ dɨrsɨn̰ toyi a cay nee naŋ.

¹⁴ Kɨya wa na-gandi nɔm na bɨləŋgɨŋ na ka-bugoŋ pɨna dan̰ Kɨris. Naa hɨn̰ wo̰ leen̰ cɨndi na, kɨbanagɨŋ aye kudurɔ gɨ na ba orɨn̰gɨŋ a toy dɨŋ le, ɨrɨn̰ cay nee usa bɨrɨŋ gɨsɨn̰ kagadi gɨŋ.

¹⁵ Kɨya wa yege duroy magtubu dɨŋ hɨn̰: «Labɨde hɨn̰ gɨ kɨŋ na ja noy Kumu na, Kɨŋ ɗɔɔ ba ɗɔɔ ɗugoygɨŋ dɨmbɨrwa, Hɨn̰ gɨ mon̰iigɨŋ ga san̰ge danayi, A boy wɔlɛ gɨ kɨŋ gɨwasii duroy dal dɨŋ le wo̰ naŋ.»

¹⁶ «Kalaŋ ga jege noy Kumu bɨ san̰ge danayi le na ga ani ga? Na kalaŋ nɔm ga Moyis dorge a cay gɨsəŋ ga Ejɨpt gaŋ coŋ.

¹⁷ Kalaŋ ga Kumu lee kuduroy-hɔmɛ ɨlge toyi-poɗɨn̰ danage le na ga ani ga? Ban lee kuduroy-hɔmɛ na dan̰ kalaŋ ga leege ɨsɨna bɨ, ga gundɨge baa duroy daldɨŋ bɨ.

¹⁸ Kalaŋ ga Kumu ɓɨsɨ gusi bɨge gɨ kan na gɨ andaŋ a boy kɨɗɨn̰ dɔrɛ gɨlale kayi gaŋ naŋ le, na ga ani ga?» Na kan ga ka-kan̰e bɔgɛ kɔl le.

¹⁹ Na toy di hɨn̰ wo̰ ma, na solgɨŋ gɨ kan kɨya ɓalege andaŋ a boy kɨɗɨn̰ dɔrɛ gɨlale gaŋ le naŋ, kɨya cay kuduroy-dɨmbɨrwa toge.