Əbɨro 2 - Gabri Maja

Pɔɗɛ gɨ gumu tɔgɨ

¹ Na toy di hɨn̰ wo̰ ma, ojɨ gɨ kɔl gɨ tumɔ na ba jegɨŋ dan̰ sɨmaynagɨŋ le, kuɗa gɨ ana aygɨŋ leen̰ hɨnga ga ni sɔrɛ naŋ, ɗe ana curoŋgɨŋ te gɨyəŋ gɨ ɗari gɨŋ coŋ naŋ.

² Na cɨndi, kɔl gɨ ka-ƴɔbɛ ga daa, jɨne ba teege bɛrnɛdi ojɨn̰ cay gasɨn̰-kɔl le, or kɨɗɨn̰di gaŋ. Kan ga hangɨɗɨge cayi, naŋ le jage kɔl naŋ le, wayge cay kɔbɔ gɨ ojɨ cay gɨye-lɔɔdɨge.

³ Pɔɗɛ gɨ gumu gɨ nee le, hɨn̰ gɨ na na sɨla laan̰ hɨnga naŋ na, kɛ kɔl gɨ ƴɔmɛ cayna naŋ na mɨna ga? Pɔɗɛ gɨ gumu gɨ nee le, Ba-gulɔŋ ban gusi koyi ay te tɔgɛ bɛrnɛdi tumɔ pa dɨm ma, kan ga jege koldi dan̰ sɨmayge yenige, lee gɨ or kɨɗɨn̰di gaŋ.

⁴ Kumu kalɨn̰ ma gɨl gɨ tɨmon̰ di kan na leege le naa cɨndi, dan̰ gɨyəŋ gɨ da hɨnga nɔm ga ɗɨn̰ cɨn̰-kɨɗɨn̰ bɨ, belin̰əŋ ga toyge kan̰dɨge kan̰dɨge bɨ, dan̰ gɨyəŋ gɨ da dɔnɔ di da Turnɔ ɗe-kuduroy-bɛrɛ gɨ hɨndi gosɨn dan̰ kuduroy geye kɔɔ bɨ.

Jesu haŋgɨ gɨyəŋ gɨ da pɔɗɛ

⁵ Na cɨndi, wɔlɛ gɨ hɨrɨwa dan̰ gɨye-lɔɔdi gɨ hɨrɨwa gɨ ni ba ye koldɨge le, Kumu dɨbage na te dɔnɔ di da ka-ƴɔbɛ ga daa nii gaŋ naŋ.

⁶ Ama a kɨɗɨn̰ ga pɨna gaŋ na, walge duroy Magtubu dɨŋ yege daa waŋ ye hɨn̰: «Ay Kumu, kɛ ungo gɨ ɨndi le na waŋ ma, Mɨn̰ gɨ hɨne cayi hɨn̰ wo̰ ga? Naŋ le, kurɨn̰ ungo le na waŋ ma, Mɨn̰ sol kardi hɨn̰ wo̰ ga?

⁷ Ji jɨgan̰ danayi dugo lee gɨ ka-ƴɔbɛ ga daa, Ɗiige dan̰ dɔnɔ dḛ. Ji dobii jagɨwa ga ni gusoŋ-tɔgɛ bɨ, Jagɨwa ga ni hurɔmɔ cayi bɨ.

⁸ Ji dobɨ hɨnga nɔm te tɨbayi dɨŋ bɨ.» Hɨn̰ gɨ Kumu na dɨba hɨnga nɔm a te dɔnɔ toy dɨŋ na, gɨl gɨ ban na ɗa hɨnga pɨna dɨle dɔbɛ cayge te dɔnɔ toyi dɨŋ naŋ. Ama haw kɛ na, na sɨla gɨ hɨnga nɔm na wɨya te dɔnɔ toyi dɨŋ naŋ ƴee.

⁹ Ama hɨnga ga na sol haw kɛ ba kɛ: Jesu le Kumu jɨgan̰ danayi dugo lee gɨ ka-ƴɔbɛ ga daa nii ɗiige gɨ ni tɨwa lam wo̰ bɨ kardi nee na, Kumu dobii jagɨwa ga ni gusoŋ-tɔgɛ bɨ, hurɔmɔ bɨ cayi, kɨya tɨma di gɨlii-cɨn̰. Na toy di hɨn̰ wo̰ ma, dan̰ gɨyəŋ gɨ da ɗarwa di da Kumu na, Jesu sol tɨma dan̰ tɨdi kol cay kalaŋ nɔm.

¹⁰ Leen̰ cɨndi, Kumu gɨ ba se hɨnga nɔm bɨ, gɨ hɨnga nɔm woy ojɨ cayi bɨ le, gey orɨn̰ dan̰ karɨn̰ Kumu dan̰ kondige boy gusoŋ-tɔgɛ koyi gɨŋ. Kɨya cay hɨnga ga nee le, ban̰ Kumu gɨ ban na laa ɗe ban gɨ ba haŋge gɨyəŋ gɨ da pɔɗɛ le, na duroŋ cɨrɛɗ jɨn̰ daa dan̰ gɨyəŋ gɨ da n̰age toyi.

¹¹ Jesu ba dorɨn̰ kalaŋ mɨra te ɨsɨna koge gɨŋ bɨ, kan ga ban dorge mɨra te ɨsɨna koge gɨŋ bɨ le, kan nɔm toge dɨŋ bayge na pɨna. Na toy di hɨn̰ wo̰ ma, dasi dayi di ni togɨge karmii ga ban̰aŋ dan̰ ga kandɨ naŋ.

¹² Na cɨndi, Jesu ye hɨn̰: «Ɨŋ kɨya andɨn̰ dan̰ gusondɨn̰ tumoy karmɨnɨ bɨ, Ɨŋ kɨya hɨramɨn̰ duroy Ka-Daye gaŋ bɨ.»

¹³ Jesu jɨga ye ɗaŋ coŋ ye hɨn̰: «Ɨŋ-bandi na, ɨŋ kɨya bɔgɛ kuduronɨ cay Kumu ɗɔɔ ƴɔbɨ.» Bɨ ɗaŋ coŋ ban ye hɨn̰: «Ɨŋ ɨre kɛ, ɨŋ-bandi bɨ, karɨn̰aŋ ga Kumu ba bəŋ danage bɨ.»

¹⁴ Hɨn̰ gɨ karɨn̰aŋ na ɨran̰ge dan̰ kuyoŋdi-gusɨge bɨ, dan̰ kɨbar bɨ na, Jesu kalɨn̰ ma bɨle woy na hɨn̰ kan wo̰ bɨ. Lee gɨ ban orɨn̰ dan̰ kuyoŋdi-gusi hɨn̰ koge wo̰ bɨ. Ban lee hɨn̰ wo̰ na ɗe gɨ ay na mondɨn̰ dɔnɔ di da Haban̰ dan̰ gɨyəŋ gɨ da tɨmaydi. Haban̰ le na hɨndi di orɨn̰ dan̰ dɔnɔ di da tɨma kɔbɔ le.

¹⁵ Ama Jesu ma hɨn̰ wo̰ na kɨya dorɨn̰ kalaŋ nɔm ga sɔmɛ-bɨra koge nɔm na a te guyɔŋdu da hundɔrɔ tɨma dɨŋ bogɨge daa.

¹⁶ Na cɨndi, ban ɨre na kɨya jɨbe te ka-ƴɔbɛ ga daa nii naŋ, ama ban ɨrga na kɨya jɨbe te kalaŋ ga a te wɨn̰je gɨ da Abɨraham gɨŋ.

¹⁷ Na toy di hɨn̰ wo̰ ma, ojɨ gɨ naa wa wa kalɨn̰ ma, Jesu na bɨl gɨlɨn̰ hɨn̰ karmii wo̰ te hɨnga nɔm, ɗe ban na bɨlɨn̰ mangɨl gɨ da ka-cay ka-bɔgɛ kɨbar bɨ, gɨ ba sɔlɛ cɨn̰-n̰age di da kalaŋ bɨ, gɨ ɨre kɨbɨ gɨye koyi gɨŋ tumoy Kumu ɗe Kumu na ɗe kuduroyi jal cay ɨsɨna gɨ da te kalaŋ.

¹⁸ Haw kɛ na Jesu ɓal jɨbe te kan ga hɨnga gɨybɨge, kɨya wa ban kalɨn̰ ma hɨnga ga ni gɨybe naa gɨybii bɨ, ban sol cɨn̰-gɨle-cɨn̰ bɨ.