Əbɨro 13 - Gabri Maja

Gɨye-lɔɔ gɨ ƴee cɨn̰ Kumu

¹ Kuɗa gɨ geye gɨ da ka-karme ɨra cɨndo tumɔ tumɔ.

² Ɗɔɔ gɨ kuduroygɨŋ hale gɨybəŋ a cay ƴɔmɛ kɨrge naŋ. Kɨya wa dan̰ gɨyəŋ gɨ da ƴɔmɛ kɨrge le, kalaŋ ga pɨna ƴomge ka-ƴɔbɛ ga daa nii gusɨge dɨle sɔlɛ.

³ Kuɗa gɨ kɨŋ hɨn a cay kan ga a dangay gɨŋ, hɨn̰ gɨ kɨŋ na woy naa dangay gɨŋ danage wo̰ bɨ. Kuɗa gɨ kɨŋ hɨn a cay kan ga kan gɨlgege cɨn̰ bɨ, kɨya wa kɨŋ-gandi kalɨn̰ ma kɨŋ orɨn̰ dan̰ kuyoŋdi-gusɨgɨŋ gɨ kɨya ɓale gɨle-cɨn̰ bɨ.

⁴ Kuɗa gɨ kalaŋ nɔm dɨbɨge hurɔmɔ a cay ƴɔɔ gɨŋ bɨ, ɗɔɔ gɨ kɨni cɨle gasɨlaŋ gɔrɛ ƴaa le naŋ bɨ. Kɨya wa Kumu kɨya bɔyɛ kɔl a cay ka-lɔɔ gɨye yɔyɛ gɨ toy kan̰di kan̰di bɨ, ka-yɔyɛ kandɨ wala ban̰aŋ ga da kamdɨge bɨ.

⁵ Ɗɔɔ gɨ haldɨgɨŋ wɔyɛ hɨn̰ hal gɨ da kalaŋ ka-lɔɔ te gursu naŋ. Ama ɗe gɨ hɨnga ga kɨŋ ba way haw kɛ le ɓalgɨŋ. Kɨya wa Ba-gulɔŋ gusi ye hɨn̰: «Ɨŋ kɨya ɗon̰ coŋ naŋ bɨ, kan̰ɨn̰ coŋ naŋ bɨ.»

⁶ Lee gɨ ni ɓal yɔ dan̰ bandɨ yɔ hɨn̰: «Ba-gulɔŋ na ba nɔgɛ tonɨ daa, Ɨŋ kɨya hundɔrɔ hɨnga pɨna naŋ. Ungo gɨ ɨndi kɨya ɓale gɨ ni lɔɔŋ na wa ga?»

⁷ Hɨngɨŋ a cay ka-dɔrɛ tumoygɨŋ ga tumɔ teege bɛrnɛ gɨ da kɔl gɨ da Kumu bɨgɨŋ le. Sɨlagɨŋ gɨyəŋ gɨ kan dɨɗɨn̰ kɨbɨ gɨye-lɔɔdɨge bɨ, ayan̰gɨŋ cay tɨban̰ aye kudurɔ koge.

⁸ Jesu-Kɨris woy ban̰di dɨŋ nagɨni bɨ, labɨde bɨ, ban kɨya sɔmɛ ban̰di dan̰ tumoyi bɨ.

⁹ Kɨŋ ɗɔɔ gɨ hɨnga ga ni gɨle ga hɨrɨwa ga caga ga toyge kan̰dɨge kan̰dɨge lɔɔgɨŋ gɨ kɨŋ gɨ kayaŋ naŋ. Kuɗa gɨ ɗe kuduroy ungo waa tɔgɨ na a te ɗarwa di da Kumu dɨŋ ƴɔbɨ. Ama na te dɔɔn̰əŋ gaŋ naŋ. Kalaŋ ga ka-kɔbɛ hɨnga ga ni gɨle ga nee le waage hɨnga pɨna toy nee naŋ.

¹⁰ Na-gandi, na orɨn̰ dan̰ kɨɗɨn̰ ga kan gaɗɨge kɨya bogɨn̰ kɨbar nee. Ama ka-bɔgɛ kɨbar ga leege gɨye duroy ƴaa-di-da-Kumu di leege dan̰ ɓala le, ɨran̰ge dan̰ gɨyəŋ gɨ ni aye hɨnga ga kan been̰ge kɨbar gɨ woy a cay kɨɗɨn̰ ga gaɗɨge ga ni bogɨn̰ kɨbar kanagɨŋ gaŋ le dɔɔ naŋ.

¹¹ Kɨya wa kuyoŋdi nare ga mangɨl gɨ da ka-cay ka-bɔgɛ kɨbar, orɨn̰ dan̰ kɨbardɨge a kɨɗɨn̰ ga woy dan̰ cɨndɨge cɨla coŋ, kɨya kuduroy jalɨwa a cay ɨsɨna gɨ da kalaŋ gɨŋ le. Kan ulge kuyoŋdɨge ga nee le ɗəndəŋ na a kardi kɨɗɨn̰ hɨnge gaŋ doŋ.

¹² Na toy di hɨn̰ wo̰ ma, Jesu kalɨn̰ ma way cɨn̰-gɨle-cɨn̰, a kardi cay ƴaa-di-gumu dɨŋ doŋ, kɨya dorɨn̰ te kalaŋ sige dan̰ cɨndɨge dan̰ kɨbardi gɨ bugoŋ dugo le.

¹³ Na toy di hɨn̰ wo̰ ma, ɗe gɨ ana andaŋgɨŋ orgɨŋ a kardi gulɔŋ gɨŋ doŋ, ɗe kan dɨbɨn̰ge dasi cay nagɨŋ hɨn̰ koyi wo̰ bɨ.

¹⁴ Kɨya wa a cay gɨsəŋ gaŋ kɛ le, na ɨran̰ dan̰ cay ƴaa di kɨya sɔmɛ dan̰ tumɔɔ naŋ. Ama na malgɨŋ na cay ƴaa-di-gumu di kɨya caga ƴee.

¹⁵ Hɨn̰ wo̰ na, dan̰ gɨyəŋ gɨ da Jesu, hɨramanagɨŋ Kumu daa daa. Gɨ nee le ma na hɨnga ga ni bogɨn̰ kɨbar ga na biigɨŋ kɨɗɨn̰ ga na yəgɨŋ kɔl dan̰ gusondi waŋ daa gɨ ban na Ba-gulɔŋ.

¹⁶ Kɨŋ ɗɔɔ ba hale gɨybəŋ cay lɔɔ ɗarwa naŋ. Jɨbɨgɨŋ te gusɨgɨŋ duroygɨŋ bɨ, kɨya gɨ na hɨnga ga ni bogɨn̰ kɨbar ga hɨn̰ wo̰ le ba-ƴɔɔ cɨn̰ Kumu.

¹⁷ Jagɨŋ kɔl kɨbɨ ka-dɔrɛ tumoygɨŋ bɨ dɨbagɨŋ caygɨŋ dugo bɨge bɨ. Kɨya wa kan sige cɨndɨge kardɨgɨŋ dan̰ tɨwa nɔm na kɨya dorɨn̰ kardi gɨye kogɨŋ bɨn̰ Kumu. Hɨn̰ gɨ kɨŋ na ja kɔl kɨbɨge na, kan kɨya lɔɔge gɨye koge dan̰ gusi-mɔwa, ama naa hɨn̰ wo̰ naŋ na kan kɨya lɔɔ gɨye koge le dan̰ ɨle kuduroyge. Gɨ nee le kɨya ande hɨnga bɨgɨŋ naŋ.

¹⁸ Ulagɨŋ Kumu kol cayni. Ni sol leen̰ cɨndi gɨ ɨrɨmedɨni gɨlni hɨnga ga ɨsɨni kol cayni naŋ. Kɨya wa ni gey kɔbɛ gɨye-lɔɔ gɨ ɗari a te hɨnga nɔm.

¹⁹ Kɔgɨɗɔ, ulagɨŋ Kumu hala ɗe aŋ jogɨ andaŋ duroygɨŋ cɛd ɗaŋ.

Ɔlɛ

^20-21 Kuɗa gɨ Kumu gɨ ba-bee gusi-dɔbɛ bɨ, ba bɔyɛ Ba-gulondɨna Jesu-Kɨris lɨbe duroy kalaŋ ga madɨrdaŋ bɨ, bɨgɨŋ tɔgɨ di ni loon̰ ɗarwa ɗe agɨŋ ɓalɨn̰ loon̰ kuduroy geye koyi. Kuɗa gɨ ban laa gɨye gɨ moy a gusɨgɨŋ dan̰ gusoŋ Jesu-Kɨris gɨ na ba-dɔrɛ tumoy gamge gɨ gumu. Na kɨbar gɨ da sadɨga toyi ma na te saɗe kɨbɨ pɨna ɓɨse gusu, gɨ woy dan̰ tumoyi gɨ ban lee duroy kalaŋ ga ɨndəŋ dan̰ Kumu. Kuɗa gɨ gusoŋ-tɔgɛ woy kɨya cay Jesu-Kɨris ɨlge dan̰ ɨlge! Ɗa-ɗe-woy-hɨn̰-wo̰.

Dɨɗe kɨbɨ kɔl bɨ lapɨya bɨ

²² Ay! Karmɨnɨ ga ban̰aŋ dan̰ ga kandɨ, ɨŋ olgɨŋ gɨ kɨŋ ƴa kɔl gɨ ɨŋ ba gɨyɨn̰ bɨgɨŋ kɨya dobɨn̰ bandɨ kuduroygɨŋ le, dan̰ dɨbe-ɗugɔ. Ɨŋ wal kɔl bɨgɨŋ na dḛ wo̰ ƴɔbɨ.

²³ Ɨŋ gey gɨ kɨŋ sɨla gɨ kurɨndɨna Timote le doriige dangay dɨŋ dibiige daa ɨni. Hɨn̰ gɨ ban na ɨre haw gusɨnɨ na, ni kɨya ɔrɛ pɨna solgɨŋ.

²⁴ Laan̰gɨŋ ka-dɔrɛ tumoygɨŋ nɔm lapɨya bɨ, kalaŋ ga woyge dan̰ cɨndɨge nɔm lapɨya bɨ. Kalaŋ ga a cay gɨsəŋ ga Itali gaŋ ləgɨŋge lapɨya bɨ.

²⁵ Kuɗa gɨ ɗarwa di da Kumu baa danagɨŋ nɔm.