Əbɨro 12 - Gabri Maja

Kumu na Baynagɨŋ

¹ Na-gandi kalɨn̰ ma dɨmdɨrdi tɨmon̰ dan̰ kondiige nɨwɨrege cay nagɨŋ. Na toy di hɨn̰ wo̰ ma kuɗa gɨ hɨnga nɔm ga ba narnagɨŋ ɔrɛ dan̰ cɨndɨnagɨŋ tumɔ bɨ, ɨsɨna gɨ ba nongɨrdɨnagɨŋ haw wo̰ bɨ le, ɗagenagɨŋ coŋ. Bɨ gɨre gɨ kan ba molnagɨŋ gɨredi le, ɗe gɨ ana ƴomgɨŋ kuduroynagɨŋ osu gɨrɨn̰ bɨrɨŋ dɨɗɨn̰ kɨbi.

² Kuɗa gɨ cɨndɨnagɨŋ woy a cay Jesu. Na ban ma na ba ɗɔɔ te aye kudurɔ konagɨŋ bɨ, ba-orɨn̰ danayi bɨrɨŋ kagadi gɨŋ bɨ. Ban gey mare tɨma di a cay sɨya-gɨ-dagɨli gɨŋ, dɨlayi a cay dasi di woy ojɨ cay tɨma di nee le naŋ. Kɨya wa ban sol gusi-mɔwa di woy amii nee. Bɨ haw kɛ na, ban som na cay kali-tɨrɨmbala da Kumu dɨŋ a cay kobi gɨ bara gɨŋ.

³ Ho’o, ɨrɨmgɨŋ a cay Jesu. Ban ƴom kuduroyi duroy gɨle-cɨn̰ gaŋ nɔm ga kalaŋ ga ka-lɔɔ ɨsɨna leege danayi. Bɨ hɨn̰ wo̰ na, kɨŋ ɗɔɔ togɨygɨŋ duroŋ sɔd coŋ kɨya cay kuduroygɨŋ ga mundoŋ naŋ.

⁴ Gɨsɨn̰ haw kɛ kalɨn̰ ma kɨŋ ƴɨma gusɨgɨŋ usa kɨbɨ kɨmbɨl gɨŋ dan̰ ɨsɨna maran̰ naŋ ƴee.

⁵ Kɛ kuduroygɨŋ hal gɨybəŋ cay bandɨ di Kumu dobɨ kuduroygɨŋ hɨn̰ karɨndi wo̰ le ga? «Ay! Kuronɨ, sɔlɛ hale gɨ da Ba-gulɔŋ loon̰ hɨnga ga kalɨn̰ wo̰ naŋ bɨ, Ji ɗɔɔ kuduron̰ mundoŋ kɨɗɨn̰ ga ban ɗalɨn̰ naŋ bɨ.

⁶ Kɨya wa Ba-gulɔŋ hal na ungo gɨ ban geyii bɨ, Ungo gɨ ban solii ban somdi dan̰ bɨraw hɨn̰ kurondi wo̰ bɨ.»

⁷ Ƴɨmagɨŋ kuduroygɨŋ usa kɨya cay hale, kɨya wa Kumu ləgɨŋ leen̰ karɨndii. Kɛ na kɨye gɨ ani ma bayi gɨlii kɔl naŋ ga?

⁸ Hɨn̰ gɨ gɨle gɨ woy ojɨn̰ cay karɨndi pɨna pɨna le, kɨŋ na waa naŋ na, ban sɨlagɨŋ laan̰ karɨndii ga cɨndi naŋ. Ama kɨŋ na lawɨne.

⁹ Ɨrɨmgɨŋ ɗaŋ coŋ sɨla. Waŋ waŋ kalɨn̰ ma orɨn̰ dan̰ bay gɨ a cay gɨsəŋ gaŋ kɛ gɨ gɨlii kɔl. Bɨ ban̰an̰nagɨŋ ga nee le, na beegegɨŋ kɔl cayge. Hɨnga ga nee le, gɨlna leen̰ cɨndi cɨla gɨ ojɨ gɨ Bayna Kumu gɨ a gɨɗɨgɨ-Kumu gɨŋ, gɨ na kɨya wɔɔ sɔmɛ-bɨra kol cayi le, na na dɨbagɨŋ cay nagɨŋ dugo toyi.

¹⁰ Ban̰an̰nagɨŋ ga cay gɨsəŋ gaŋ kɛ, halnagɨŋge na gɨ ni tɨwa lam wo̰ ƴɔbɨ dan̰ gɨyəŋ gɨ da ɨrɨme gɨ kan ɨrɨm. Ama Kumu halnagɨŋ na kɨya ɗarwa tonagɨŋ ɗe ana na bɨləŋgɨŋ kalaŋ ga woy dan̰ cɨndɨge, hɨn̰ gɨ ban ba won̰ dan̰ cɨndi wo̰ bɨ.

¹¹ Na cɨndi, hale nɔm a cɨndɨnagɨŋ kɨya bee dan̰ gusi-mɔwa a kɨɗɨn̰do gaŋ naŋ, ama na cɨn̰-kula. Ama kardi nee na, kalaŋ ga kan gɨrɨn̰ danage daa dan̰ gɨyəŋ gɨ da hale le, wayge wɔɔdi hale gɨ nee le: Gusi-dɔbɛ bɨ, gɨye-lɔɔ gɨ dan̰ durɔ ɗɨngar bɨ.

Aye te tumɔ bɨ sɔgɛ sɨma bɨ

¹² Na toy di hɨn̰ wo̰ ma laagɨŋ bandɨ. Kobɨgɨŋ bɨ gɨbaygɨŋ bɨ gɨ ba madɨrdɨgɨŋ le laagegɨŋ ɗe osɨdəŋ.

¹³ Kɨŋ ɨra a te gɨyəŋ gɨ dan̰ durɔ ɗɨngar ɗe tɨbaygɨŋ di lee modo le n̰uroŋ naŋ, ama ɗe poɗɨ dɨm.

¹⁴ Malagɨŋ gɨyəŋ gɨ ni somɨn̰ dan̰ gusi-dɔbɛ dan̰ kalaŋ nɔm bɨ, gɨ ni somɨn̰ dan̰ kuduroy-bɛrɛ dan̰ cɨndɨgɨŋ tumɔ tumɔ bɨ. Kɨya wa dɨle hɨnga ga nee le na, ungo gɨ ba kɨya sɔlɛ cɨn̰ Ba-gulɔŋ unɔ bɨrɨŋ.

¹⁵ Ɗagɨŋ cɨndɨgɨŋ kardi gusɨgɨŋ, ɗe ungo duroygɨŋ dor gusi coŋ a te ɗarwa di da Kumu dɨŋ naŋ. Kuɗa gɨ ungo mɔndɛ kalaŋ kondɨwa hɨn̰ gɨ ban naa hɨya gɨ a duroygɨŋ gɨ wɔɔdi orɨn̰ dan̰ sɛm, di kɨya nɔɔ cay kalaŋ jɨn̰ tumɔ tumɔ wo̰ naŋ.

¹⁶ Ɗagɨŋ cɨndɨgɨŋ kardi gusɨgɨŋ ɗe ungo bɨle ba lɔɔ gɨye yɔyɛ gɨ toy kan̰di kan̰di, wala ba sɔlɛ-hɨnga ga woy dan̰ cɨndɨge loon̰ hɨnga naŋ, hɨn̰ Ejawi gɨ kɨya cay dɔɔ gɨ te ungo dɨŋ ƴɔbɨ le, ay gɨmɨn̰aw toyi di ojɨ cay kɨye gɨ wooyge cay wase le kɨl coŋ.

¹⁷ Kardi nee kɨŋ sol gɨ ban gey gɨ bayi na tɨra-kɨbi cayi, kɨya gɨ ɗi naa kɨye gɨ cay wase, ama ban jibii sɛdɨ gusi coŋ. Ɨle gɨ ban ɨle olɨn̰ bayi kalɨn̰ ma laa hɨnga bii naŋ ɨni. Kɨya wa gɨyəŋ gɨ Ejawi kɨya dorɨn̰ hɨnga ga ban ba lee le cayi coŋ unɔ ɨni.

¹⁸ Karɨn̰ Ɨsɨrayɛl sɨygɨge na gusi garma gɨ kan ɓal cɨle dan̰ kobɨge, kɨɗɨn̰ ga kan won̰ a duroy daldɨŋ. Ama kogɨŋ kɨŋ-gandi na wɨya na hɨn̰ wo̰ naŋ. Koge kan na, kan solge a cay garma gɨ Sɨnayi gɨŋ na tɨwa di gumu di uloŋ ɗɨgɨ ɗɨgɨ a cay nee bɨ, gɨrɨmbale ga wosɨ cɨn̰ tɨwa daa bɨ, dɨlɨm bɨ, kal gɨ gumu gɨ duroŋ bɨ.

¹⁹ Kan jege noy burun̰ji di ye bɨ, noy ungo kalɨn̰ ma ye nee bɨ. Kɨɗɨn̰ ga karɨn̰ Ɨsɨrayɛl jege noy ungo gɨ nee le na, kan̰ge jɔɔ kɔl gɨ ɗaŋ cay mɨgayi gɨŋ.

²⁰ Kɨya wa kan ɓalage gɨ ni ƴɔmɛ kuduroyge jon̰ge te tumɔ di ban ay bɨge le naŋ. Ban yege hɨn̰: «Ungo gɨ na cɨl garma le ko naa nare kalɨn̰ ma kan na kɨya wɨrɨn̰diige dan̰ oru dɨɗiige coŋ.»

²¹ Hɨnga ga kan ba sol a wɔlɛdi gɨ nee gɨŋ le, dor turnoyge gɨɗaŋ lee gɨ Moyis or bɨrɨŋ yɔ hɨn̰: «Hundɔrɔ ləŋ tɔgɨ bɨ, ɨŋ sayde paɗɨ paɗɨ bɨ.»

²² Ama kɨŋ-gandi na, kɨŋ sɨygɨ na gasɨbi garma gɨ Sin̰o gɨŋ bɨ, na gasɨbi cay ƴaa-di-gumu da Kumu gɨ som-bɨra dan̰ tumoyi bɨ, dan̰ Jerusalɛm di gɨɗɨgɨ-Kumu gɨŋ bɨ, dan̰ ka-ƴɔbɛ ga daa dubu-dubu ga dayaŋge nee kɨya leen̰ kɨdɨrɛ bɨ.

²³ Kɨŋ sɨygɨ na gusi Ka-Daye ga da karɨn̰aŋ ga woogege cay wase ga da Kumu bɨ, ga walge gusondɨge gɨɗɨgɨ-Kumu gɨŋ bɨ, kɨŋ sɨygɨ na gusi Kumu gɨ ba-bɔyɛ kɔl cay kalaŋ nɔm bɨ, gusi turnɔ da kalaŋ ga dan̰ durɔ ɗɨngar ga madɨrdaŋge ga woyge a gɨɗɨgɨ-Kumu gɨŋ gɨ Kumu bɨlge kuɗudaŋge duroŋ cɨrɛɗ bɨ.

²⁴ Kɨŋ-gandi na, kɨŋ sɨygɨ na gusi Jesu gɨ dan̰ gɨyəŋ gɨ da kɨbardi gɨ gɨre dugo le. Kumu leen̰ saɗe kɨbɨ pɨna ɓɨse gusu gɨ hɨrɨwa dan̰ kalaŋ. Kɨbardi le ye kɔl kuɗa ɗɨn̰ gɨ da kɨbardi Abɛl.

²⁵ Hɨn̰ wo̰ na, ɗagɨŋ muɗɔlɛ cay gusɨgɨŋ gɨŋ. Kɨŋ ɗɔɔ ba kan̰e jɔɔ kɔl gɨ da ban gɨ ba-yɔɔ kɔl danagɨŋ le naŋ. Kɨya wa Moyis sogɨ sɨmay karɨn̰ Ɨsɨrayɛl a cay gɨsəŋ gɨŋ kɛ, ama kan ga kan̰ge jɔɔ kɔl koyi le wayge hale. Koni ni-gandi na Kumu som na gɨɗɨgɨ-Kumu gɨŋ yen̰ kɔl danani. Hɨn̰ gɨ ni na bɨl kardɨni bii na, kɛ ni kɨya wɔɔ wɨdɨlde gɨ ɗɨn̰ a wɔlɛdi gɨ nee gɨŋ le naŋ ga?

²⁶ Tumɔ noyi yɨbagde cay gɨsəŋ yɨbag yɨbag. Ama haw kɛ na ban ye kɔl gɨ ɗi ye gɨ ɗi na kɨya lɔɔ naa gɨ ba kɛ: «Ɨŋ kɨya yɨbagde cay gɨsəŋ tɨba pɨna coŋ ƴee, ama na cay gɨsəŋ ƴɔbɨ naŋ, ɨŋ kɨya yɨbagde gɨɗɨgɨ-Kumu nee bɨ.»

²⁷ Ama kɨɗɨn̰ ga ban ye hɨn̰ cay pɨna ƴee coŋ le, gɨl na gɨ hɨnga ga Kumu ba si le na kɨya yɨbagdaŋ bɨ, kaɗɨn̰e bɨ. Hɨn̰ wo̰ na kan ga ba kɨya yɨbabdaŋ naŋ ƴɔbɨ ba kɨya bɔɔ.

²⁸ Na hɨn̰ wo̰ ma, ɗa gɨ na laan̰gɨŋ Kumu ho’o kɨya gɨ ban bɨna dɔɔ-ƴaa di osu di kɨya yɨbagdaŋ naŋ. Kuɗa gɨ na laan̰ Kumu ho’o, laan̰ gɨye bii dan̰ gɨyəŋ gɨ kɨya ƴɔɔ-cɨndi, dan̰ dɔbɛ caa bɨ, bɔgɛ kɔl bɨ.

²⁹ Kɨya wa Kumu kona na tɨwa di pam kɨɗɨn̰.