Əbɨro 11 - Gabri Maja

Aye kudurɔ

¹ Aye kudurɔ le na hɨnga ga ungo sol leen̰ cɨndi gɨ hɨnga ga ban ba bee ɨrɨmedi cay nee le, ɗi na kɨya wɔɔ. Hɨnga ga ungo baa sɔlɛ dan̰ cɨndi le, woy nee leen̰ cɨndi jɛɗɨ jɛɗɨ.

² Na kɨya cay aye kudurɔ koge ma, mon̰iinagɨŋ ga jɨne le Kumu lee tɨmon̰ kuɗa kol cayge.

³ Dan̰ gɨyəŋ gɨ da aye kudurɔ na, na sol gɨ Kumu si gɨɗɨgɨ-Kumu bɨ, cay gɨsəŋ dan̰ hɨnga nɔm ga boy nee bɨ, na dan̰ gɨyəŋ gɨ da kɔl gɨ andaŋ kɨbi bɨ. Lee gɨ cay gɨsəŋ dan̰ hɨnga nɔm ga ungo sol dan̰ cɨndi le, ɗa toyge na a cay hɨnga ga ungo sol dan̰ cɨndi gaŋ naŋ.

⁴ Dan̰ gɨyəŋ gɨ da aye kudurɔ na, Abɛl bɨn̰ Kumu hɨnga ga ni bogɨn̰ kɨbar ga kuɗa ɗɨn̰ hɨnga ga da Kayin ga bee. Kɨya cay aye kudurɔ gɨ ban orɨn̰ le, Kumu solii leen̰ ungo gɨ dan̰ durɔ ɗɨngar. Kɨya wa Kumu gusi koyi ba ƴɔɔ hɨnga ga ni be kayi le. Bɨ na dan̰ gɨyəŋ gɨ da aye kudurɔ ma, Abɛl na mara kalɨn̰ ma, hɨnga ga ban lee le woy te yɔɔ kɔl ban̰ nee ƴee.

⁵ Na dan̰ gɨyəŋ gɨ da aye kudurɔ ma Kumu, ay Inɔg dan̰ cɨndi, lee gɨ ban sɨla tɨma naŋ. Kalaŋ wayayige naŋ kɨya wa Kumu ayi. Magtubu di da Kumu ye daa waŋ gɨ tumɔ pa dɨm ma gɨ kan ba kɨya ayi ƴee na, ban naa ungo gɨ ƴee cɨn̰ Kumu.

⁶ Dɨle aye kudurɔ na, ungo kɨya ɓale ƴɔɔ cɨn̰ Kumu naŋ. Kɨya wa waŋ waŋ gɨ na sɨy gusi Kumu na, ojɨ gɨ ban bɨga kuduroyi cay Kumu gɨ Kumu na woy nee bɨ, gɨ ban naa ba bɨn̰ kalaŋ ga maliige le, cay kobɨge bɨ.

⁷ Na dan̰ gɨyəŋ gɨ da aye kudurɔ ma, Nɨwe je kɔl gɨ Kumu yeyi tumɔ ojɨn̰ cay hɨnga ga kɨya lɔɔ gusɨge. Ama ungo baa sɔlɛ dan̰ cɨndi ƴee. Ban aya kɔl gɨ andaŋ kɨbɨ Kumu laan̰ sɔrɛ naŋ. Lee gɨ ban gaɗɨ koburo gɨ gumu taa taa hɨn̰ ƴaa wo̰ kɨya poɗɨn̰ ka-ƴaadi bɨ, kuyoŋdi-gusi koyi bɨ. Na dan̰ gɨyəŋ gɨ nee le ma, Nɨwe lee gɨ kɔl ƴom cay kalaŋ ga a cay gɨsəŋ gaŋ. Kɨya cay kuduroyi ga ban bee a cay Kumu le, Kumu solii leen̰ ungo gɨ dan̰ durɔ ɗɨngar a cɨndi.

⁸ Na dan̰ gɨyəŋ gɨ da aye kudurɔ ma, Abɨraham je kɔl kɨbɨ Kumu, kɨɗɨn̰ ga Kumu teeyi. Lee gɨ ban say ɗe cay gɨsəŋ kayi coŋ orɨn̰ a cay gɨsəŋ ga Kumu ojɨ bii leen̰ cay gɨsəŋ kayi. Ban say or dɨle sɔlɛ kɨɗɨn̰ ga ban or jɨn̰ nee jɛɗɨ.

⁹ Na dan̰ gɨyəŋ gɨ da aye kudurɔ ma, ban or sɔmɛ a cay gɨsəŋ ga Kumu ye gɨ ɗi na kɨya bii le, hɨn̰ kɨrga wo̰. Ban som a duroy ƴaa-ɓala gɨŋ. Kurondi Isag bɨ dan̰ kungay Jagob kalɨn̰ ma somge na ƴaa-ɓala gɨŋ bɨ. Kan kalɨn̰ ma Kumu ye gɨ hɨnga ga ɗi na kɨya lɔɔ bɨge ga nee le na woy ojɨ cayge bɨ.

¹⁰ Kɨya wa Abɨraham som gam na cay ƴaa-di-gumu di sige tɔɔ osu. Bɨ Kumu na ba ɔjɛ gɨyəŋ gɨ ni gaɗɨn̰ bɨ, ban na ba gaɗedo bɨ.

¹¹ Na dan̰ gɨyəŋ gɨ da aye kudurɔ le ma, hɨn̰ gɨ ɨlge gɨ da Sara na hala kalɨn̰ ma, Kumu lee gɨ hɨndi ɓal wɔɔ kɨye ma wan̰ kongɨn̰ɔɔ kardo. Kɨya wa hɨndi sol leen̰ cɨndi gɨ Kumu na kɨya lɔɔ hɨnga ga ban ye gɨ ɗi na kɨya lɔɔ le.

¹² Na toy di hɨn̰ wo̰ ma, ungo gɨ pɨna hayi gɨ tɨbayi woy kɨbɨ umboŋ tɨma dɨŋ mɨnde le, wɔɔ te wɨn̰je ga toyge kondɨ bajag bajag hɨn̰ dɛsɨɗɛŋ ga a gɨɗɨgɨ-Kumu gaŋ wo̰ bɨ, hɨn̰ kɨlay gɨ kɨbɨ kuray gɨ gumu taa taa gɨŋ gɨ ungo ɓala ɗɔngɨsɛ naŋ wo̰ bɨ.

¹³ Kalaŋ ga jɨne ga nee le nɔm mage na dan̰ aye kudurɔ koge. Dɨle wɔɔge hɨnga ga Kumu ye gɨ ɗi na kɨya bɨge le, ama kan solge mandɨge na hen̰ te ɨrga bɨ leen̰ge gusi-mɔwa koldɨge bɨ. Lee gɨ kan yege leen̰ cɨndi gɨ ke naa kɨrge bɨ ka-sɔmɛ cay tɨbayge dɨŋ bɨ.

¹⁴ Na cɨndi, kalaŋ ga yege kɔl hɨn̰ wo̰ na, kan gɨl doŋ yarara gɨ ke na mal naa cay gɨsəŋ kage ga ni somɨn̰ nee.

¹⁵ Hɨn̰ gɨ tabɨlaŋdi cay gɨsəŋ ga kan say ɗe kardɨge ni na laage na, kan ni ɓal jɔgɛ.

¹⁶ Leen̰ cɨndi na, kan geyge na cay gɨsəŋ ga kuɗa ɗɨn̰ kan ga kan ba say ɗe coŋ orɨn̰ge a gɨɗɨgɨ-Kumu gɨŋ. Na toy di hɨn̰ wo̰ ma, hɨn̰ gɨ kan na tɨga Kumu naa Kumu koge na, Kumu dasi dayi naŋ. Kɨya wa ban ƴom cay tɨbay cay ƴaa-di-gumu kol cayge.

¹⁷ Na dan̰ gɨyəŋ gɨ da aye kudurɔ ma, Abɨraham ƴom Isag kɨya bogɨn̰ kɨbar, kɨɗɨn̰ ga Kumu gɨwasii. Ban ƴom kurondi gɨ pɨna hayi kəɗ kəɗ kɨya bogɨn̰ kɨbar. Ban lee hɨnga ga nee le na kol cay kuroŋ gɨ nee le ma Kumu naa ye hɨn̰:

¹⁸ «Kongɨn̰iin̰ ga ɨŋ ba ye gɨ ɨŋ na kɨya bɨn̰ le, ji kɨya wayge na dan̰ gɨyəŋ gɨ da Isag.»

¹⁹ Kɨya wa Abɨraham ɗe a ɨrɨmedi gɨŋ, gɨ Kumu na ɓal bɔyɛ Isag lɨbe. Na toy di hɨn̰ wo̰ ma, ban jɨga way kurondi le daa. Lee gɨ kɔl gɨ da Isag woy gɨlɨn̰ na hɨn̰ kɨradi-kɔl gɨ ojɨ cay hɨnga ga kɨya lɔɔ gusɨge.

²⁰ Na dan̰ gɨyəŋ gɨ da aye kudurɔ ma, Isag tor-kɨbi a cay Jagob bɨ, cay Ejawi bɨ, ojɨn̰ cay hɨnga nɔm ga ba kɨya lɔɔ gusɨge kardi nee le.

²¹ Na dan̰ gɨyəŋ gɨ da aye kudurɔ ma, kɨɗɨn̰ ga Jagob baa mɨnde kɨya mare le, ban tor-kɨbi a cay kongɨn̰ii ga da karɨn̰ Jɨsɛb pɨna pɨna nɔm. Ɨni na, ban jɨbɨ jor koyi ɨsɨgɨn̰ gusi bɨ, n̰ɨrɨn̰ Kumu.

²² Na dan̰ gɨyəŋ gɨ da aye kudurɔ ma, kɨɗɨn̰ ga Jɨsɛb baa mɨnde kɨya mare na, ye kol duroŋ gɨ da te wɨn̰je gɨ da Ɨsɨrayɛl gɨ kɨya duroŋge a cay gɨsəŋ ga Ejɨpt gaŋ coŋ. Lee gɨ ban ay noy bɨge ojɨn̰ cay hɨnga ga kan kɨya lɔɔ dan̰ isidi gundi.

²³ Na dan̰ gɨyəŋ gɨ da aye kudurɔ ma, kɨɗɨn̰ ga kan woon̰ge Moyis na, kandi ka-woyi wosiige kɨdɨrɛ sɨbɨ. Kɨya wa kan solge gɨ kuroŋ le, lee marɨna tɔgɨ. Lee gɨ hɨndarage hangɨɗe cay gasɨn̰-kɔl gɨ kɨlma wal gɨ ni lɔɔ le naŋ.

²⁴ Na dan̰ gɨyəŋ gɨ da aye kudurɔ ma, kɨɗɨn̰ ga Moyis bɨləŋ bara ɨni na, kan̰ gɨ kalaŋ na gɨ togiige kɨye gɨ da tɨrmi Parawo̰.

²⁵ Ama ban ojɨ gɨ ni wɔɔ tabɨ dan̰ te kalaŋ ga da Kumu, ɗɨn̰ gɨ ni lɔɔ gusi-mɔwa di kardo sɨngɨɗɨ naŋ duroy sɔmɛ-bɨra duroy ɨsɨna gɨŋ.

²⁶ Ban ɗe a ɨrɨmedi gɨŋ gɨ yagɨde gɨ ban na kɨya wɔɔ kɨya cay Kɨris ban gɨ Kumu dorii le, naa hɨnga ga kɨledɨge kondɨ tɔgɨ ɗɨn̰ kandi-wɔɔ ga a cay gɨsəŋ ga Ejɨpt gaŋ nɔm. Kɨya wa ban ɗe ɨrɨmedi na a cay hɨnga ga ni cay-kɔbɔ ga woy tumoyi.

²⁷ Na dan̰ gɨyəŋ gɨ da aye kudurɔ ma, ban say ɗe cay gɨsəŋ ga Ejɨpt coŋ, dɨle hundɔrɔ kuduroy-hɔmɛ da kɨlma. Ban ɨre osu kobɨn̰ Kumu hɨn̰ ungo gɨ ɨre sol Kumu gɨ ungo ɓala solii dan̰ tɨdi naŋ wo̰.

²⁸ Na dan̰ gɨyəŋ gɨ da aye kudurɔ ma, Moyis lee kɨdɨrɛ gɨ ni Pakɨ bɨ ayɨn̰ noy bee gɨ kan na wɨjdɨ kɨbar kɨbɨ-ƴaa gɨŋ bɨ, ɗe ba-ƴɔbɛ gɨ daa nii ba-mɔndɛ kalaŋ na da dɨɗe karɨn̰ Ɨsɨrayɛl ga woogege cay wase naŋ.

²⁹ Na dan̰ gɨyəŋ gɨ da aye kudurɔ ma, karɨn̰ Ɨsɨrayɛl haɗɨge kuray gɨ gumu taa taa gɨ yɨle, hɨn̰ cay gɨsəŋ ga hayi wo̰. Ama kɨɗɨn̰ ga kalaŋ ga Ejɨpt geyge lɔɔ hɨn̰ koge wo̰ bɨ na, kaŋ soyge.

³⁰ Na dan̰ gɨyəŋ gɨ da aye kudurɔ ma, bɨrɨm gɨ kan gaɗɨge dan̰ garma kɨya tolɨn̰ cay ƴaa di Jerigo le, laydaŋ dugo kɨɗɨn̰ ga karɨn̰ Ɨsɨrayɛl gorge nɨwɨrdege cay daa wɔlɛ jurgum.

³¹ Na dan̰ gɨyəŋ gɨ da aye kudurɔ ma, Rahab di ni ajɨba le, dɨɗooge dan̰ ka-baa ga da Kumu naŋ. Kɨya wa hɨndi ƴom ka-sɔbɨrɛ-kɨɗɨn̰ a taa dan̰ gusi-dɔbɛ.

³² Na koldi wa ma maŋ kɨya yɔ coŋ ga? Tɨwa ɓala gɨ ni dorɨn̰ te kɔl gɨ da Jɨdɨn̰o bɨ, Barakə bɨ, Samso̰ bɨ, Jɨpte bɨ, Dabid bɨ, Samɨyɛl bɨ, ka-yɔɔ-kɔl-gɨ-Kumu-ba-yɔɔ bɨ, dan̰ sɨngɨɗɨwayi naŋ.

³³ Na dan̰ gɨyəŋ gɨ da aye kudurɔ ma, kalaŋ ƴeedege dɔɔ-ƴaan̰əŋ bɨ, diidege cay ƴaan̰əŋ dan̰ gɨye-lɔɔ gɨ dan̰ durɔ ɗɨngar bɨ, wayge hɨnga ga Kumu ye gɨ ɗi na kɨya bɨge le bɨ. Kan lɨgɨdege kɨbɨ gusugon̰əŋ bɨ,

³⁴ baydege man̰edi tɨwa bɨ, andɨdaŋge kɨbɨ tɨma da pəlɨm dɨŋ bɨ, kɨɗɨn̰ ga hɔmɨn̰ɛ leege na wayge dɔnɔdɨge bɨ, leege bandɨ kɨmbɨl gɨŋ bɨ, jɨbge te asɨgarn̰əŋ ga cay gɨsəŋ ga ɗaŋ gaŋ sɛdɨ coŋ bɨ.

³⁵ Na dan̰ gɨyəŋ gɨ da aye kudurɔ ma, kandɨ ga pɨna jɨga wayge kalaŋ kage ga madɨrdaŋge dan̰ gɨyəŋ gɨ da bɔyɛ lɨbe. Kan ga ɗaŋ kan ɗɨndɨrdɨge ɗege kɨbɨ tɨma dɨŋ bɨ. Kan kan̰ge gɨ kan na dɨrage daa kɨbɨ tɨma dɨŋ, ɗe hɨn̰ gɨ kan na mardɨrdaŋge na, kan na bɨya lɨbɨ bɨ, sɨman̰ dan̰ cɨndɨge sɔmɛ gɨ kuɗa ɗɨn̰ gɨ tumɔ.

³⁶ Ka-aye kudurɔ ga pɨna kan sogdɨgege bɨ, somdɨgege dan̰ bɨraw bɨ, kan ga pɨna kan saɗɨdɨgege dan̰ mɔrɨyɔŋ bɨ beegege dangay dɨŋ bɨ.

³⁷ Kan ga pɨna kan worɨn̰digege dan̰ oru dɨɗɨgege bɨ, wadɨldɨgege dugo dan̰ si bɨ, dɨɗɨgege dan̰ pəlɨm bɨ. Kan badɨdege bɨ, saɗɨdege na sumu tuu bɨ dɨmangɨ bɨ gusɨge. Hɨnga-wɔɔdɨge unɔ bɨ, hɨnga ga ni kuduroy-hɔmɛ wayge bɨ, kalaŋ gɨlge cɨn̰ bɨ.

³⁸ Kalaŋ ga nee le, na kalaŋ ga cay gɨsəŋ kalɨn̰ ma ɓala gɨ kan ni kɨya sɔmɛ nee gɨ ni tɨwa lam wo̰ naŋ! Kan badɨdege duroy daldɨŋ bɨ, cay garman̰əŋ gaŋ bɨ, duroy umboŋ garman̰əŋ gaŋ bɨ, umboŋ ga te gɨsəŋ gaŋ bɨ.

³⁹ Kumu lee tɨmon̰ di ɗari a cay kalaŋ ga nee le nɔm, kol cay aye kudurɔ koge. Ama kan waage hɨnga ga Kumu ye gɨ ɗi na kɨya bɨge le naŋ.

⁴⁰ Kɨya wa ayɨn̰ toy tumɔ hayi Kumu ojɨ hɨnga ga kuɗa ɗɨn̰ kol cay nagɨŋ. Na toy di hɨn̰ wo̰ ma, ban gey gɨ kalaŋ ga nee le na bɨləŋge kuɗa duroŋ cɨrɛɗ dɨle na-gandi naŋ. Ama ban gey gɨ na na bugoŋgɨŋ pɨna a nee.