Əbɨro 10 - Gabri Maja

Dɔnɔ da bɔgɛ kɨbar gɨ da Kɨris

¹ Gasɨn̰-kɔl gɨ da Moyis le gɨlnagɨŋ na turnoy hɨnga ga ɗari ga ba kɨya caga karu ƴɔbɨ. Ama kan na gusɨge ga leen̰ cɨndi naŋ ƴee. Dan̰ te gɨyəŋ gɨ da gasɨn̰-kɔl na, ojɨ gɨ kan kɨya ɨrgan̰ dan̰ hɨnga ga ni bogɨn̰ kɨbar ga pɨna hage ga nee le, tɨba nee nee, ɨlge dan̰ ɨlge. Hɨnga ga ni bogɨn̰ kɨbar ga nee le, kɨya ɓale dorɨn̰ mɨra kalaŋ ga geyge n̰ɨre Kumu dan̰ dɔrɛ mɨra di duroŋ cɨrɛɗ naŋ bɨrɨŋ.

² Naa hɨn̰ gɨ leen̰ cɨndi hɨnga ga ni bogɨn̰ kɨbar ga nee le, ni na dɨran̰ kalaŋ mɨra na, lɔɔdɨge ni kɨya ɨre dugo. Ama ɨr dugo naŋ. Kɨya wa hɨn̰ gɨ kalaŋ ga ka-lɔɔ gɨye bɨn̰ Kumu ni na waage dɔrɛ mɨra di duroŋ cɨrɛɗ cay pɨna ƴɔbɨ na, kan ni kɨya ɨrɨme a cay ɨsɨna koge gɨŋ naŋ bɨrɨŋ ɨni.

³ Ama ɨlge dan̰ ɨlge dan̰ gɨyəŋ gɨ da hɨnga ga ni bogɨn̰ kɨbar ga nee le, kalaŋ ɨrɨmge a cay ɨsɨna koge gɨŋ.

⁴ Kɨya wa kɨbardi sɨn̰əŋ ga ban̰aŋ bɨ, kugan̰əŋ bɨ, ɓala dɔrɛ ɨsɨna koge le coŋ naŋ bɨrɨŋ.

⁵ Na toy di hɨn̰ wo̰ ma, kɨɗɨn̰ ga Kɨris ɨre ɨrga cay gɨsəŋ gaŋ na, ban yen̰ Kumu hɨn̰: «Ji-bandi ji gey hɨnga ga ni bogɨn̰ kɨbar naŋ bɨ, Hɨnga ga ni aye be naŋ bɨ, Ama ji-bandi ji lee kuyonɨ bəŋ.

⁶ Naren̰əŋ ga dɨɗɨge kɨya ulege ɗəndəŋ bɨ, Hɨnga ga ni bogɨn̰ kɨbar kɨya cay ɨsɨna bɨ le, Ƴage cɨndɨn̰ naŋ.

⁷ Ɨni na na ɨŋ ye hɨn̰: “Kumu ɨŋ ba kɛ, ɨŋ ɨrga kɨya lɔɔ hɨnga ga kuduron̰ gey le, Dan̰ gɨyəŋ gɨ walɨn̰ge ojɨn̰ canɨ, Duroy magtubu di nɔngɨri dɨŋ.”»

⁸ Kɔl gɨ ban ye tumɔ pa dɨm ba kɛ: «Ji-bandi ji gey hɨnga ga ni bogɨn̰ kɨbar naŋ bɨ, hɨnga ga ni aye be naŋ bɨ, naren̰əŋ ga dɨɗɨge kɨya ule ɗəndəŋ naŋ bɨ, hɨnga ga ni bogɨn̰ kɨbar kɨya cay ɨsɨna naŋ bɨ, hɨnga ga nee le, ji geyge naŋ.» Hɨnga ga ni bogɨn̰ kɨbar ga Kumu jɨbɨ sɛdɨ coŋ ga kɛ le, na hɨnga ga ni bogɨn̰ kɨbar ga kalaŋ leege dan̰ gɨyəŋ gɨ da gasɨn̰-kɔl gɨ Moyis wal.

⁹ Kardi nee ɨni na, ban ye hɨn̰: «Ɨŋ ba kɛ, ɨŋ ɨrga kɨya lɔɔ hɨnga ga kuduron̰ gey le. Hɨn̰ wo̰ na ban mondɨ hɨnga ga ni bogɨn̰ kɨbar ga ɨlgi le coŋ bɨ, ɗen̰ kayi ban̰di nee.»

¹⁰ Jesu-Kɨris lee hɨnga ga kuduroy Kumu gey ɗəndəŋ. Kuyoŋdi-gusi gɨ ban ay been̰ kɨbar cay pɨna ɗɔɔ dan̰ cɨndi le, dorna mɨra te ɨsɨna gɨŋ.

¹¹ Dan̰ wɔlɛ pɨna pɨna ka-bɔgɛ kɨbar nɔm ɨrege dan̰ tɨbayge daa kɨya loon̰ gɨye koge. Bɨdɨn̰ge Kumu hɨnga ga ni bogɨn̰ kɨbar ga toyge pɨna hage, ga kɨya ɓale dɔrɛ ɨsɨnan̰əŋ naŋ bɨrɨŋ le.

¹² Ama ban Jesu-Kɨris na, ay gusi been̰ kɨbar na cay pɨna ɗɔ ƴɔbɨ. Ɗe hɨnga ga ni bogɨn̰ kɨbar kayi na wɨya dan̰ tumoyge yɔd kɨya cay ɨsɨnan̰əŋ. Kardi nee ɨni na, ban som na kɨway Kumu cay kobi gɨ bara gɨŋ dan̰ tumoyi.

¹³ Haw kɛ na, ban som gam na gɨ Kumu na aya ka-baadi laan̰ hɨnga ga ni bogɨn̰ gondii cay nee.

¹⁴ Na toy di hɨn̰ wo̰ ma, kɨɗɨn̰ ga Jesu ba ay gusi been̰ kɨbar cay pɨna ɗɔɔ ƴɔbɨ le, ban lee gɨ kan ga ban dorge mɨra te ɨsɨna gɨŋ le, bɨləŋge kalaŋ ga kuɗa duroŋ cɨrɛɗ dan̰ cɨndɨge.

¹⁵ Turnɔ ɗe-kuduroy-bɛrɛ kalɨn̰ ma, ye gɨ hɨnga nɔm ga ni na ye koldɨge kɛ le, naa cɨndi. Kɨya wa kɔl gɨ hɨndi ba ye cay wase le ba kɛ:

¹⁶ «Ba-gulɔŋ ye ɗaŋ coŋ ye hɨn̰: “Kardi wɔlɛn̰əŋ ga nee le, Saɗe kɨbɨ pɨna ɓɨse gusu, Gɨ ɨŋ kɨya saɗe danage le ba kɛ: Ɨŋ kɨya wale gasɨn̰-kɔl hɨnge na ɗugoyge bɨ, Ɨŋ kɨya ɗɔɔ gasɨn̰-kɔl hɨnge na boy ɨrɨmedɨge gɨŋ bɨ.”»

¹⁷ Kardi nee ɨni na, ban ye hɨn̰: «Ɨŋ kɨya hɨne a cay ɨsɨnan̰əŋ kage gaŋ naŋ bɨrɨŋ bɨ, A cay hangɨɗe daa koge gɨŋ naŋ bɨrɨŋ bɨ.»

¹⁸ Kɨɗɨn̰ ga Kumu na ɗa kuduroy jala a cay ɨsɨna gɨ da kalaŋ gaŋ coŋ ɨni na, uja gɨ ungo kɨya aye hɨnga ga ni bogɨn̰ kɨbar be kɨya cay ɨsɨna naŋ ɨni.

Sɨynagɨŋ mɨnde gusi Kumu

¹⁹ Hɨn̰ wo̰ na karmɨnɨ ga ban̰aŋ dan̰ ga kandɨ, na ɓal gɨ ni andaŋ a kɨɗɨn̰ ga woy dan̰ cɨndɨge cɨla coŋ dɨle hundɔrɔ, kɨya cay kɨbardi Jesu.

²⁰ Jesu haŋgɨ gɨyəŋ gɨ hɨrɨwa gɨ orɨn̰ danana a sɔmɛ-bɨra gɨ dan̰ tumɔɔ dɨŋ di gay kɨbɨ badɨge ga boy duroy ƴaa andɨn̰ kɨɗɨn̰ ga woy dan̰ cɨndɨge cɨla gaŋ. Ban lee hɨnga ga nee le, na dan̰ gɨyəŋ gɨ da kuyoŋdi-gusi gɨ ban ay be hɨn̰ hɨnga ga ni bogɨn̰ kɨbar wo̰.

²¹ Leen̰ cɨndi, na orɨn̰gɨŋ dan̰ mangɨl gɨ da ka-bɔgɛ kɨbar pɨna gɨ siige a cay ƴaa-di-da-Kumu dɨŋ.

²² Hɨn̰ wo̰ na, ɗe gɨ ana sɨygɨŋ mɨnde gusi Kumu dan̰ ɗugoynagɨŋ pɨna bɨ, dan̰ aye kudurɔ gɨ osi kəŋ kəŋ bɨ, dan̰ ɗugoynagɨŋ di duroŋ mɨra te ɨrɨmedɨna gɨ ɨsɨn nɔm bɨ, dan̰ kuyoŋdi-gusɨnagɨŋ gɨ pɨlge dan̰ kaŋ ga arɨn̰ cərərə bɨ.

²³ Ɗe gɨ ana gamgɨŋ hɨnga ga na bee ɨrɨmedɨnagɨŋ a cay nee, ma na ye koldɨge le osu. Kɨya wa Kumu gɨ ba-yɔɔ gɨ ɗi na kɨya lɔɔ hɨnga ga ban ye gɨ ɗi na kɨya lɔɔ le, na ba ɨre a cay gasɨndi gaŋ.

²⁴ Ɗe gɨ na na sɨla kardi gusɨnagɨŋ ɗe ana jɨbɨn̰gɨŋ te gusɨnagɨŋ daa a te lɔɔ wandɨ bɨ, lɔɔ gɨye ga da hɨnga ga ɗari gaŋ bɨ.

²⁵ Na ɗɔɔ ba ɗɔɔ kɨɗɨn̰ dayaŋ kana coŋ naŋ, hɨn̰ gɨ kalaŋ ga pɨna ba sunoŋge toy nee wo̰. Ama dɨbanagɨŋ bandɨ kuduroy gusɨnagɨŋ, kɨya wa kɨŋ sol wɔlɛ gɨ da Ba-gulɔŋ wɨyga mɨnde ɨni.

²⁶ Gɨlnage sɔlɛ kɔl gɨ cɨndi. Ma hɨn̰ wo̰ kalɨn̰ ma, na na laa ɨsɨna dan̰ kuduroy geye kona cɨndɨna tumɔ tumɔ na, hɨnga ga ni bɔgɛ kɨbar ga ɗaŋ wo̰ ga kɨya dɔrɛ ɨsɨna kona unɔ.

²⁷ Hɨnga pɨna hage ga baa tumoynagɨŋ le, na game bɔyɛ kɔl gɨ gumu gɨ kɨya caga dan̰ hundɔrɔ gɨ gumu bɨ, tɨwa di kɨya ule ka-baa ga da Kumu kayi bɨ.

²⁸ Na solgɨŋ gɨ waŋ waŋ gɨ na hangɨɗa gasɨn̰-kɔl gɨ da Moyis na, kɨya dɨɗiige dɨle sɔlɛ cɨn̰-n̰age toyi, hɨn̰ gɨ tɨmon̰ won̰ sɔɔ, naŋ le sɨbɨ na laage tɨmon̰ cay ɨsɨna koyi gɨŋ le.

²⁹ Kɛ kɨya osɨwa cɨla coŋ kɨya ungo gɨ ba hagɨre Kurɨn̰-Kumu naŋ ga? Kɨya wa kɨbardi Jesu gɨ Kumu leen̰ saɗe kɨbɨ pɨna ɓɨse gusu gɨ hɨrɨwa le, ungo le sol leen̰ hɨnga ga kalɨn̰ wo̰ dugo. Na kɨbar gɨ nee le ba lɔɔ gɨ ungo gɨ nee le, bɨlɨn̰ ungo gɨ woy dan̰ cɨndi. Bɨ ban say yagɨde Turnɔ di da Kumu di lee gɨ ban sol ɗarwa toyi le. Na cɨndi, ojɨ gɨ ungo gɨ nee le, na waa cɨn̰-gɨle-cɨn̰ gɨɗaŋ cɨla coŋ.

³⁰ Ho’o, na sol ban gɨ ba yɔ hɨn̰: «Na ɨŋ-bandi ma na ba gɔjɛ-baa bɨ, na ɨŋ-bandi ma na ba bɨn̰ kalaŋ cay kobɨge kɨya cay gɨye-lɔɔdɨge bɨ.» Ban ye ɗaŋ coŋ ye hɨn̰: «Ba-gulɔŋ kɨya bɔyɛ kɔl cay te kalaŋ kayi.»

³¹ Bɔɔ kobɨ Kumu gɨ ba-sɔmɛ-bɨra dan̰ tumoyi na hɨnga ga dɨmbɨre tɔgɨ.

³² Kuɗa gɨ kuduroygɨŋ hɨn a cay hɨnga ga ləgɨŋ cay wase le. Kɨɗɨn̰ ga kɔl gɨ cɨndi gɨ da Kumu ba haŋgɨ cɨndɨgɨŋ le, a boy wɔlɛdi gɨ nee gɨŋ le, kɨŋ way tabɨ kondɨ kardi nee. Ama kɨŋ ɨre osu kɨbɨ kɨmbɨl gɨŋ le.

³³ Kɨɗɨn̰ ga pɨna na, kan yagɨdɨgɨŋge bɨ gɨlgɨŋge-cɨn̰ bɨ, cɨn̰ kalaŋ. Kɨɗɨn̰ ga pɨna na, kɨŋ bugoŋ pɨna dan̰ kalaŋ ga kan gɨlge-cɨn̰ duroy n̰age toge dɨŋ hɨn̰ wo̰ bɨ.

³⁴ Kɨya wa gɨ kɨŋ sol cɨn̰-n̰age da kan ga kan ƴomgege dangay dɨŋ bɨ, kɨŋ jɨbɨ toyge daa bɨ. Kɨɗɨn̰ ga kalaŋ donge hɨnga wɔɔdɨgɨŋ na, kɨŋ lee gusi-mɔwa kɨya gɨ kɨŋ sol gɨ kɨŋ na orɨn̰ dan̰ hɨnga wɔɔ ga kuɗa cɨla ɗɨn̰ na woy tumoygɨŋ, hɨnga ga ni wɔɔ ga nee le, kɨya wɔyɛ dan̰ tumoyge.

³⁵ Naa hɨn̰ wo̰ na, kɨŋ ɗɔɔ ba kaye bandɨ togɨŋ naŋ: Kɨya wa hɨnga ga ni cay kobɨgɨŋ ga gumu woy ojɨ cay bandɨ di nee le.

³⁶ Haw kɛ na, kuɗa gɨ kɨŋ ƴɨma kuduroygɨŋ usa ɗe agɨŋ leen̰ hɨnga ga Kumu gey bɨ, wan̰ hɨnga ga ban ye gɨ ɗi na kɨya bɨgɨŋ le.

³⁷ Kɨya wa Magtubu di da Kumu ye hɨn̰: «Baa tɨwa lam wo̰ ƴee, baa lam wo̰ ƴɔbɨ na, Ban gɨ ojɨ gɨ kɨya ɨrga le, kɨya caga. Ban kɨya aye cayi naŋ.

³⁸ Ungo gɨ na ungo hɨnge gɨ dan̰ durɔ ɗɨngar le, Kɨya sɔmɛ-bɨra leen̰ cɨndi kɨya cay aye kudurɔ. Ama hɨn̰ gɨ ban na dɨra toyi karu na, Gusɨnɨ kɨya mɔŋ danayi naŋ.»

³⁹ Ama na-gandi na, na na kalaŋ ga kɨya dɔrɛ toynagɨŋ karu ɗe ana na orɨn̰gɨŋ mundoŋ gɨŋ naŋ. Na na kalaŋ ga ka-aye kudurɔ bɨ, na orgɨŋ na te gɨyəŋ gɨ ni pɔɗɛ gɨŋ bɨ.