3 Ja̰ 1 - Gabri Maja

Ja̰ leen̰ ka-aye kudurɔ lapɨya

¹ Na ɨŋ-bandi gɨ muɗoli ba wale magtubu di kɛ le, gɨyɨn̰ bɨn̰ ji-bandi Gayus gɨ ɨŋ geyɨn̰ dan̰ kuduronɨ ga pɨna le.

² Ay, ji gɨ ɨŋ lee-ton̰, ɨŋ ol Kumu ɗe hɨnga nɔm na kuɗa bɨn̰ bɨ, gɨ gusɨn̰ na haban̰ hɨn̰ gɨ turnon̰ ba habɨn̰ wo̰ bɨ.

³ Gusɨnɨ mɔŋ tɔgɨ kɨya gɨ Karmɨnagɨŋ ga ban̰aŋ dan̰ ga kandɨ ga pɨnaa ɨrgage bugoŋge kɛ, leege tɨmon̰ gɨ ji na ɨre osu a cay kɔl gɨ cɨndi gɨŋ bɨ, ji na gor naa te kɔl gɨ cɨndi gɨŋ bɨ.

⁴ Kɨɗɨn̰ ga ɨŋ je gɨ karmɨnɨ na gorge a te gɨyəŋ gɨ da kɔl gɨ cɨndi gɨŋ na, hɨnga ga nee le bəŋ gusi-mɔwa di ɗɨn̰ hɨnga nɔm ga a cay gɨsəŋ gaŋ.

Gayus ɨre osu a cay tɨbayi dɨŋ

⁵ Ay, ji gɨ ɨŋ lee-ton̰, ji gɨl gɨ ji naa ungo gɨ ba ɨre osɨwa a cay tɨbayi dɨŋ, kɨya gɨ kɨɗɨn̰ ga karmɨna ga ɨrgage gusɨn̰ le, ko ji na sɨlage naŋ kalɨn̰ ma, ji jɨbɨ toyge.

⁶ Kan tumɔ leege tɨmon̰ da wandɨ di ji ƴom danage duroy Ka-Daye. Ji jɨbɨ toyge dan̰ jɨbe gɨ kɨya ƴɔɔ cɨn̰ Kumu, ɗe kan orɨn̰ tɨrga toge cɨndɨge tumɔ.

⁷ Na cɨndi, na kol tɔgɛ bɛrnɛ di da Kɨris ma kan bugoŋge gɨyəŋ orɨn̰ge kɨya loon̰ gɨye dɨle ƴon̰ hɨnga kobɨ kalaŋ ga toyge na Jubɨ naŋ, naŋ.

⁸ Na-gandi na, ojɨ gɨ na na ƴɨma kalaŋ ga hɨn̰ wo̰ le gusɨna, ɗe gɨl gɨ na na bugoŋ danage ojɨn̰ cay kɔl gɨ cɨndi.

Dɨyotɨrɛp bɨ Demetrɨyus bɨ

⁹ Ɨŋ wal kɔl magtubu dɨŋ gɨyɨn̰ bɨn̰ Ka-Daye, ama Dɨyotɨrɛp kan̰ ƴɔɔ kɔl kona kɨya wa ban gey wɔyɛ mɨjag na ba cay Ka-Daye.

¹⁰ Na toy di hɨn̰ wo̰ ma, kɨɗɨn̰ ga ɨŋ na bugoŋ na, ɨŋ kɨya dɔrɛ te hɨnga ga ban ɨre ye kol cayna le, bɨn̰ ka-karme. Ban wadɨlde kɔl gɨ ni poy ɗe a cayna. Gɨ nee le kalɨn̰ ma ɓalayi naŋ. Ban gusi koyi gaŋ kalɨn̰ ma, kan̰ ƴɔmɛ ka-karme gusi coŋ bɨ. Kalaŋ ga geyge ƴomgege gusɨge kalɨn̰ ma, ban narge coŋ bɨ, tayge coŋ a duroy Ka-Daye bɨ.

¹¹ Ay, ji gɨ ɨŋ lee-ton̰, ƴɔlɛ hɨnga ga ɨsɨni naŋ, ama ƴɨla na hɨnga ga ɗari. Ungo gɨ na laa hɨnga ga ɗari na, ban na ungo gɨ da Kumu. Ungo gɨ na laa hɨnga ga ɨsɨni na, ban sɨla Kumu naŋ.

¹² Kol cay Demetrɨyus na, kalaŋ nɔm leege tɨmon̰ di ɗari kol cayi. Bɨ kɔl gɨ cɨndi kalɨn̰ ma, lee tɨmon̰ di ɗari kol cayi bɨ. Ama ni-gandi kalɨn̰ ma, ni lee tɨmon̰ di ɗari kol cayi bɨ. Ji Gayus, ji sol gɨ tɨmon̰ di ni ba lee le naa cɨndi.

Lapɨya di ni dɨɗɨn̰ kɨbɨ kɔl

¹³ Ɨŋ orɨn̰ dan̰ kɔl kondɨ gɨ ni yon̰, ama ɨŋ gey wale nɔm a duroy magtubu dɨŋ naŋ.

¹⁴ Ɨŋ ojɨ gɨ ni ɔrɛ solgɨŋ mɨnde, ɗe ana na arɨn̰ kɔl wo̰ wo̰ dan̰ kɨbɨna.

¹⁵ Kuɗa gɨ gusi-dɔbɛ baa danan̰. Ka-pogɨn̰ɨn̰ leen̰ge lapɨya. Ji laan̰ ka-pogɨn̰ɨn̰ ga woyge danan̰ lapɨya pɨna pɨna dan̰ gusondɨge gusondɨge.