2 Timote 4 - Gabri Maja

¹ Wɔlɛ pɨna Jesu-Kɨris kɨya jɨga. Ban kɨya jɨga kɨya dɔɔ-ƴaa bɨ, bɔyɛ kɔl cay kalaŋ ga somge-bɨra bɨ, kalaŋ ga madɨrdaŋ bɨ. Na toy di hɨn̰ wo̰ ma maŋ olɨn̰ tumoy Kumu bɨ, tumoy Jesu-Kɨris bɨ.

² Tɨga bɛrnɛ di da kɔl gɨ da Kumu bɨ, lɨɗɨda toy nee duroy wɔlɛ nɔm ko kalaŋ na gey jɔɔge wala, gey jɔɔge naŋ kalɨn̰ ma, ji yage mɨjag. Halage bɨ, sayan̰ danage bɨ, dɨbage bandɨ kuduroyge bɨ. Gɨlge hɨnga dan̰ dɨbe-ɗugɔ di duroŋ cɨrɛɗ bɨ.

³ Kɨya wa wɔlɛ tɨlga nee gɨ kalaŋ kɨya geyege gɨle hɨnga ga cɨndi naŋ, ama kɨya lɔɔge na hɨnga ga kuduroyge gey. Lee gɨ kan kɨya daye kalaŋ ga ka-gɨlge hɨnga nɔm dan̰ kondɨwayge ga ka-gɨlge hɨnga ga kɨya mooge.

⁴ Kan kɨya lɨgɨdege sɨmayige daa cay kɔl gɨ cɨndi, ama bɨlege gusɨge na gusi dɔrɛ te hɨnga ga toyge bɨ cayge bɨ unɔ gaŋ.

⁵ Ama ji-bandi na ƴɨma-gusɨn̰ usa a cay hɨnga nɔm ga kɛ le. Ji haya kuduron̰ duroy hɨnga ga ni gɨle-cɨn̰ gaŋ. Gɨye gɨ ni tɔgɛ bɛrnɛ kɔl-gɨ-Ɗari gɨ Kumu bɨn̰ le, ji laayi kuɗa.

⁶ Wɔlɛ hɨnge gɨ ni ɗon̰ cay gɨsəŋ ga kɛ coŋ le, woy mɨnde. Sɔmɛ-bɨra hɨnge woy na hɨn̰ cɛrɛ di suru gɨ kan beege cay hɨnga ga ni bogɨn̰ kɨbar gaŋ wo̰.

⁷ Ɨŋ worɨn̰ wɔrɨn̰ɛ gɨ kuɗa bɨ, ɨŋ dɨɗɨ kɨbɨ gɨre hɨnge bɨ, ɨŋ gam aye kudurɔ hɨnge bɨ.

⁸ Haw kɛ na, hɨnga ga ni cay kɔbɔ ga da ka-aye banga woy gamaŋ: Hɨnga ga nee le, na jagɨwa ga ni an̰ banga gɨ da gɨye-lɔɔ gɨ or dan̰ durɔ ɗɨngar, gɨ Ba-gulɔŋ, ba-bɔyɛ kɔl gɨ dan̰ durɔ, kɨya bəŋ wɔlɛ gɨ ni bon̰ kɔl gɨŋ le. Ban kɨya bəŋ na ɨŋ-bandi ƴɔbɨ naŋ, ama kɨya bɨn̰ kalaŋ nɔm ga kol caga koyi mooge tɔgɨ, ma somge kɨya gamiige le bɨ.

Hɨnga lɔɔ ga ni kagadɨge

⁹ Ji mala gɨyəŋ ɨre haw wayaŋ.

¹⁰ Kɨya wa Demas ɗəŋ coŋ, kɨya hɨnga ga cay gɨsəŋ gaŋ ga haw kɛ le moyi tɔgɨ, lee gɨ ban tolɨn̰ Tesalonigɨ. Bɨ Kərəsa̰s tol Galasi bɨ, Titɨ tol Dalmasi bɨ,

¹¹ ama na Lug ba bɔɔ danaŋ kɛ ƴɔbɨ. Kuɗa gɨ Marg ɨre danan̰, kɨya wa ban kɨya jɨbe tonɨ boy gɨyen̰əŋ gaŋ.

¹² Ɨŋ gɨy Tisig a cay ƴaa-di-gumu di Epɛs.

¹³ Kɨɗɨn̰ ga ji kɨya ɨrga na, badɨge-kal ga ɨŋ ba ɗe a Tɨrowas a da Karpus le, eye kobɨn̰ ɨren̰ bəŋ. Dɨna magtubun̰əŋ bɨ, ama ga ni ɓala na hale gɨybəŋ cay nee naŋ pa pa.

¹⁴ Alegjandɨr ba-dɔsɛ le, ləŋ ɨsɨna tɔgɨ. Ama Ba-gulɔŋ ba kɨya bii cay kobi ojɨn̰ cay gɨye-lɔɔdi gɨ ɨsɨni gɨ ban ləŋ le.

¹⁵ Ji-bandi kalɨn̰ ma ɗa muɗɔlɛ cay gusɨn̰ gɨŋ kol cayi bɨ, kɨya wa kɔl nɔm gɨ ni ye le ban kan̰ kɨbɨni coŋ dan̰ togi.

¹⁶ Wɔlɛ bɔyɛ kɔl hɨnge gɨŋ gɨ cay wase gɨ ɨŋ dorɨn̰ kɔl ƴen̰ canɨ le, ungo pɨna wo̰ ɨra karɨnɨ naŋ, ama kan nɔm ɗəŋge coŋ. Kuɗa gɨ Kumu ɗɔɔ kɔl gɨ nee le ƴɔmɛ cayge naŋ.

¹⁷ Ama Ba-gulɔŋ ɨre karɨnɨ. Ban bəŋ tɔgɨ, lee gɨ ɨŋ teen̰ bɛrnɛ Kɔl-gɨ-Ɗari ɗəndəŋ bɨn̰ kalaŋ ga toyge na Jubɨ naŋ, ɗe jege kɔldɔ pɨraŋ daa bɨ. Ban bɔɗɔŋ a kɨbɨ gusugon̰əŋ gaŋ coŋ bɨ.

¹⁸ Ba-gulɔŋ kɨya bɔɗɔŋ duroy hɨnga nɔm ga ɨsɨnde gaŋ coŋ bɨ. Ban kɨya pɔɗɔŋ kɨya cay dɔɔ-ƴaa toyi di daa nii bɨ. Gusoŋ-tɔgɛ na koyi, ɨlge dan̰ ɨlge! Ɗa-ɗe-woy-hɨn̰-wo̰.

Lapɨya di da kɔl kagadi

¹⁹ Laan̰ Pɨrisil dan̰ Agilas lapɨya bɨ, laan̰ kalaŋ ga a duroy ƴaa gɨ da Onesipɔr gaŋ kalɨn̰ ma lapɨya bɨ.

²⁰ Erasɨ baa a Korɛ̰t. Bɨ ɨŋ ɗe Tɨropim a cay ƴaa di Mile dɨŋ kɨya hɔmɨn̰ɛ leeyi.

²¹ Mele gɨyəŋ haw ɨre tumoy kɨbɨ kal wayaŋ. Ubulus bɨ, Pudḛs bɨ, Linus bɨ, tɨmdɨni Kɨlodɨya bɨ, karmɨni ga ban̰aŋ dan̰ ga kandɨ nɔm bɨ, leen̰ge lapɨya.

²² Kuɗa gɨ Ba-gulɔŋ baa dan̰ turnon̰ bɨ, kuɗa gɨ ɗarwa di da Kumu baa danagɨŋ nɔm bɨ.