2 Timote 3 - Gabri Maja

Wɔlɛ gɨ te kɨɗɨn̰ kɨya ayaŋ

¹ Hɨnga ga ojɨ gɨ ji gɨ sɔlɛ kuɗa ba kɛ: Boy wɔlɛ gɨ te kɨɗɨn̰ kɨya ayaŋ na, hɨnga nɔm ga osɨdəŋ kɨya lɔɔ gusɨge.

² Kɨya wa kalaŋ kɨya bɨləŋge ka-kɨndare bɨ, kɨya lɔɔge te gursu tɔgɨ bɨ, kɨya gɨlege gusɨge bɨ, kɨya dɔgɛge-jorgɨyge bɨ, kɨya yagɨdege Kumu bɨ, kɨya bɨlege ka-baa ga da ka-wɔɔdɨge bɨ, kɨya sɔlɛge ɗarwa di ungo lee danage naŋ bɨ, kɨya hundɔrɔge kardi hɨnga ga woy dan̰ cɨndɨge ojɨn̰ cay Kumu naŋ bɨ.

³ Kɨya dolge cay ungo naŋ bɨ, kɨya kan̰ege kuduroy jalɨwa di kamdɨge ɨngɨrge bɨ, kɨya yɨlege kɨɗɨn̰ bɨ, kɨya ƴɔmɛ gusɨge cay hɨnga gaŋ naŋ bɨ, kɨya loon̰ge kamdige terɨn̰ dan̰ gusi-mɔwa bɨ, kɨya geyege hɨnga ga ɗari naŋ bɨ,

⁴ kɨya bɨləŋge ka-aye cay kamdɨge bɨ, kɨya lɔɔge hɨnga dɨle ɨrɨme toyge bɨ, dɔgɛ jɔrgɔ lɨgɨde cɨndɨge bɨ, kɨya geyege Kumu naŋ ama kɨya geyege na gusi-mɔwa toge ƴɔbɨ.

⁵ Gɨye-lɔɔdɨge gɨ doŋ kɨya gɨle gɨ kan naa ka-lɔɔ hɨnga ga bugoŋ pɨna dan̰ hɨnga ga Kumu gey le, ama kan na ka-man̰e dɔnɔ di woy boy nee coŋ. Kuɗa gɨ ji bɨl kardɨn̰ bɨn̰ kalaŋ ga nee le.

⁶ Kan na ka-andɨdaŋ duroy ƴaan̰əŋ gaŋ kardi kandɨ ga usage naŋ, kɨya looge ɗoge kan kɨya laydaŋge a boy boy toge dɨŋ. Kandɨ ga nee le, ɨsɨna ƴee kuduroyge bɨ, tabɨlaŋdi hɨnga ga toyge kan̰dɨge kan̰dɨge orɨn̰ danage hen̰ dan̰ Kumu bɨ.

⁷ Kandɨ ga nee le, geyge gɨ kan na gɨlge kɔl nee nee hage, ama kan ɓala sɔlɛ kɔl gɨ cɨndi naŋ bɨrɨŋ.

⁸ Hɨn̰ gɨ naa Janɛs dan̰ Jambɨrɛs ba kan̰in̰ge kɔl kardi Moyis wo̰ bɨ le, kalaŋ ga kɛ le kalɨn̰ ma kan̰ge kɔl gɨ cɨndi bɨ. Kan na kalaŋ ga ɨrɨmedɨge wɨya dan̰ durɔ naŋ bɨ, aye kudurɔ koge andaŋ hɨnga naŋ bɨ.

⁹ Kan kɨya ɔrɛ dan̰ cɨndɨge tumɔ naŋ, kɨya wa matɨr toge kɨya gɨle guso cɨn̰ kalaŋ nɔm, hɨn̰ gɨ da kalaŋ ga sɔɔ ga nee le bɨ.

Gɨle gɨ ni dɨɗɨn̰ kɨbɨ kɔl

¹⁰ Ama ji-bandi na, ji ay kardi hɨnga gɨle ga ɨŋ gɨlɨn̰ kalaŋ le bɨ, halnɨ bɨ, hɨnga ga ɨŋ ojɨ ga ni lɔɔ bɨ, aye kudurɔ hɨnge bɨ, dɨbe-ɗugɔ tɨnge bɨ, wandɨ tɨnge bɨ, kɨɗɨn̰ haye-kudurɔ kange bɨ.

¹¹ Ji sol tabɨ bɨ, n̰age bɨ, ga ɨŋ wayi a cay ƴaa-di-gumu di Antɨyɔs dɨŋ bɨ, Ikonɨyɔm dɨŋ bɨ, Listɨr dɨŋ bɨ le. Sɨla! Ɨŋ way n̰age tɔgɨ, ama Ba-gulɔŋ dɔrɔŋ kɨbɨ hɨnga ga nee le nɔm coŋ.

¹² Na cɨndi, kalaŋ nɔm ga geyge lɔɔ hɨnga ga bugoŋ pɨna dan̰ ga Kumu gey le, dan̰ te bugoŋ koge dan̰ Jesu-Kɨris na, kan kɨya dɨbɨge cɨn̰-gɨle-cɨn̰ bɨ.

¹³ Ama kalaŋ ga ɨsɨndəŋ bɨ, ka-nare kɨɗɨn̰ bɨ, kɨya lɔɔge hɨnga ga ɨsɨni dan̰ cɨndɨge tumɔ tumɔ bɨ, kan kɨya nare kamdɨge bɨ, kɨya nare gusɨge koge gaŋ bɨ.

¹⁴ Ama ji-bandi na, ji ɨr jaŋ cay hɨnga ga kan gɨlɨn̰ge bɨ, ga naa ji ba bee kuduron̰ cay nee kuɗa le bɨ. Kɨya wa ji sol kalaŋ ga ka-gɨlɨn̰ge hɨnga ga nee le kuɗa.

¹⁵ Kɨɗɨn̰ ga ji ban̰ karma ƴee le, ji sol Magtubu di da Kumu le. Magtubu le ɓal lɔɔ gɨ cɨndɨn̰ kɨya arɨn̰a. Bɨ cɨn̰-arɨn̰a di nee le, kɨya lɔɔ gɨ ji gɨ pɔɗɛ, dan̰ gɨyəŋ gɨ da kuduron̰ ga ji bee a cay Jesu-Kɨris.

¹⁶ Kɔl nɔm gɨ walge duroy Magtubu di da Kumu dɨŋ le, sayga na gusi Kumu dan̰ gɨyəŋ gɨ da Turnɔ. Kuɗa gɨlɨn̰ kalaŋ hɨnga bɨ, gɨlɨn̰ kalaŋ te hɨnga ga ɨra dan̰ gɨyəŋdɨge naŋ bɨ, jɨgan̰ dan̰ kalaŋ te gɨyəŋ gɨ ɗari gɨŋ bɨ, gɨlɨn̰ kalaŋ ɔrɛ gɨ dan̰ durɔ ɗɨngar bɨ,

¹⁷ ɗe gɨ kalaŋ ga da Kumu nɔm ƴomɨn̰ge cay tɨbayge kuɗa bɨ, wan̰ge hɨnga ga ni loon̰ gɨye nɔm ga kuɗa bɨ.