2 Timote 2 - Gabri Maja

Asɨgar gɨ da Jesu gɨ ba lɔɔ te tumoyi

¹ Naa hɨn̰ wo̰ na, kuronɨ, ɗarwa di Jesu-Kɨris ba lee dan̰ kan ga bugoŋ pɨna danayi le, ɨr cay nee usa.

² Hɨnga ga naa ji ba tɨrabɨ gusɨnɨ cɨn̰ tɨmon̰ ga kondi le, bɨga kobɨ kalaŋ ga kuduroyge pɨna ga ɓalge gɨlɨn̰ kalaŋ ga ɗaŋ jɨn̰ tumɔ bɨ.

³ Ji kalɨn̰ ma, laa tabɨ hɨn̰ asɨgar gɨ da Jesu-Kɨris gɨ kuduroy pɨna gɨ kuɗa.

⁴ Asɨgar gɨ lee gɨye koyi le dɨlayi dan̰ gɨye gɨ da kalaŋ ga na asɨgarn̰əŋ naŋ le, naŋ. Ban ɗe ɨrɨmedi na cay gumu koyi gɨ ba dobii asɨgar gɨŋ bɨ, gey gɨ ban na ba geyii ƴɔbɨ.

⁵ Ba-wɔɔ-tabe kalɨn̰ ma, kɨya wɔɔ cay kobi gɨ ni hɨrame na kɨɗɨn̰ ga ban na waa tabe dan̰ gɨyəŋdo dɨm.

⁶ Ba-yage gɨ lee gɨye gɨlalɨn̰ le, ba kɨya wɔɔ cɨn̰ gasa kayi cay wase.

⁷ Ɨrɨm a cay kɔl gɨ ɨŋ ba yen̰ kɛ le bɨ, Ba-gulondɨna kɨya bɨn̰ tɔgɨ di ni solɨn̰ duroy hɨnga nɔm.

⁸ Kuɗa gɨ ji hɨn cay Jesu-Kɨris ban na a te wɨn̰je gɨ da Dabid gɨ boy lɨbɨ duroy kalaŋ ga madɨrdaŋ gaŋ, hɨn̰ gɨ Kɔl-gɨ-Ɗari gɨ ɨŋ ba tee bɛrnɛ di le ba gɨlna.

⁹ Kɔl-gɨ-Ɗari gɨ nee le, ɨŋ way tabɨ kol cayi bɨrɨŋ saɗɨdaŋge haw kɛ dan̰ mɔrɨyɔŋ hɨn̰ gɨ ɨŋ naa ungo gɨ ba lɔɔ hɨnga ga ɨsɨni wo̰. Ama kɔl gɨ da Kumu le, ungo kɨya ɓale saɗɨdii naŋ bɨrɨŋ.

¹⁰ Na toy di hɨn̰ wo̰ ma, maŋ ƴom kuduronɨ osu duroy tabɨ dɨŋ, kɨya cay kan ga Kumu torge le, ɗe gɨ kan na poɗɨn̰ge te bugoŋ pɨna dan̰ Jesu-Kɨris bɨ, wan̰ hɨnga nɔm ga na gusoŋ-tɔgɛ gɨ dan̰ cɨndi bɨ.

¹¹ Kɔl gɨ kɛ le, na kɔl gɨ cɨndi: Hɨn̰ gɨ na na maragɨŋ danayi na, Na kɨya sɔmɛ dan̰ cɨndɨnagɨŋ danayi bɨ.

¹² Hɨn̰ gɨ nana ƴɨmagɨŋ usa na, Na kɨya dɔɔ-ƴaa danayi bɨ. Hɨn̰ gɨ nana man̰agɨŋ cay kɨbɨnagɨŋ, Gɨ na na sɨlayigɨŋ naŋ na, Ban kalɨn̰ ma kɨya man̰e cay kɨbi, Gɨ ɗi na sɨlanagɨŋ naŋ bɨ.

¹³ Hɨn̰ gɨ nana ɨr a cay te tumoynagɨŋ dɨŋ naŋ na, Ban na ɨre a cay te tumoyi dɨŋ, Kɨya wa ban ɓala lɔɔ hɨnga ga ɗaŋ, Ban̰di hɨnga ga andaŋ kɨbi le naŋ.

Ba-lɔɔ gɨye gɨ samiige

¹⁴ Gɨlge hɨnga ga kɛ le, ɗe kuduroyge hɨn cay nee. Halage tumoy Kumu ɗe kan ɗe bɔjɨn̰ɛ ojɨn̰ cay kɔl nɔm baa. Kɨya wa bɔjɨn̰ɛ gɨ nee le, kɨya andaŋ hɨnga naŋ, ama kɨya mɔndɛ na kan ga ka-jɔɔdi.

¹⁵ Ƴɨma kuduron̰ usa laan̰ gɨye an̰ ɨrɨn̰ tumoy Kumu, hɨn̰ ungo gɨ hɨnga ga ni same samii bɨ, ba-lɔɔ gɨye gɨ dasi daayi cay gɨye-lɔɔdi naŋ bɨ, hɨn̰ ungo gɨ ba-dɔrɛ kɔl gɨ cɨndi dan̰ gɨyəŋdi bɨ.

¹⁶ Ama ji na, are-kɔl ga badɨ dugo gɨ ɨra dan̰ aye kudurɔ pɨna naŋ le, ƴɨma gusɨn̰ cay nee coŋ. Kɨya gɨ na kan ga arge kɔl nɔm ga hɨn̰ wo̰ le, kɨya ɗɔɔge gɨye-lɔɔ gɨ bugoŋ pɨna dan̰ Kumu dḛ dḛ coŋ jɨn̰ tumɔ tumɔ.

¹⁷ Kɔl koge woy na hɨn̰ ɨya-ba̰ra̰ di dii jɨn̰ tumɔ tumɔ wo̰. Himene dan̰ Pilɛt woyge na hɨn̰ kalaŋ ga nee le bɨ.

¹⁸ Kan cɨroŋge te gɨyəŋdi kɔl gɨ cɨndi yen̰ge hɨn̰: «Bɔyɛ lɨbe gɨ kalaŋ boyge lɨbɨ le, naa hɨnga ga na lee gusɨge ɨni.» Lee gɨ kalaŋ ga pɨna ɗege aye kudurɔ koge coŋ kol cayge.

¹⁹ Ama te ƴaa di Kumu ɗe som osɨ le, woy dan̰ gɨyəŋdo. Walge kɔl nɔm gɨ kɛ le boy nee yen̰ge hɨn̰: «Ba-gulɔŋ sol kalaŋ ga na kayi bɨ.» Ye ɗaŋ coŋ hɨn̰: «Waŋ waŋ gɨ na tɨga guson̰ Ba-gulɔŋ na, Ɗe hɨnga ga dan̰ gɨyəŋdɨge naŋ coŋ bɨ.»

²⁰ Kɔjɛ ga woy a duroy ƴaa di gumu dɨŋ le, leege ga pɨna na dan̰ lɔr bɨ, dan̰ nare gɨ ni arja̰ bɨ, ƴɔbɨ naŋ. Ga ɗaŋ leege na dan̰ sɨya bɨ, dan̰ gun̰u bɨ. Lee gɨ ga pɨna woy na kɨya gɨye gɨ dan̰ wɔlɛ gɨ ni kɨdɨrɛ bɨ, ga ɗaŋ woy na kɨya gɨye gɨ ni wɔlɛ pɨna pɨna bɨ.

²¹ Ungo gɨ na dɨran̰ gusi mɨra kɨya cay kɨni gɨ nee le na, ban kɨya bɨləŋ na kɔjɛ ga woy kɨya gɨye gɨ da wɔlɛ gɨ ni kɨdɨrɛ bɨ, gɨ doriige sige dan̰ cɨndi bɨ, gɨ woy na kɨya loon̰ gɨye gɨ da Ba-gulondi gɨ ƴomge cay tɨbayi kuɗa ojɨn̰ cay gɨye nɔm gɨ kuɗa bɨ.

²² Dɨra gusɨn̰ coŋ gusi tabɨlaŋdi hɨnga ga lee marɨne. Ama mala na gɨye-lɔɔ gɨ dan̰ durɔ ɗɨngar bɨ, aye kudurɔ bɨ, geye bɨ, gusi-dɔbɛ bɨ, dan̰ kalaŋ nɔm ga teege guson̰ Ba-gulɔŋ dan̰ kuduroyge ga arɨn̰ cərərə.

²³ Ama ɗa man̰e-kɔl ga badɨ badɨ coŋ bɨ, dɨngali coŋ bɨ. Kɨya wa ji sol gɨ kɨya ɨrgan̰ dan̰ bɔjɨn̰ɛ.

²⁴ Ama kuɗa gɨ marɨna ba-gɨye gɨ da Ba-gulɔŋ bɔjɨn̰dɛ naŋ. Kuɗa gɨ ban sɨma dan̰ gusi-dɔbɛ dan̰ kalaŋ nɔm bɨ, ɓala gɨlɨn̰ kalaŋ hɨnga bɨ, haya kuduroyi cay are-kɔl gɨ da ka-cɨbe cay kalaŋ dan̰ kɔl nɔm bɨ.

²⁵ Ban kɨya hale ka-jɨbe kɔl kɨbi coŋ le, dan̰ kaledi ga jal jɔm. Gajanaŋ Kumu da lɔɔ gɨ kan da bɨle gɨye-lɔɔdɨge bɨ, sɔlɛ kɔl gɨ cɨndi bɨ.

²⁶ Kɨɗɨn̰ ga nee le, cɨndɨge kɨya hangaŋ, lɔɔ gɨ kan kɨya dɔrɛ gusɨge coŋ a boy boy da Haban̰ di ƴomge, di kan leen̰ge hɨnga ga kuduroyge gey le.