2 Timote 1 - Gabri Maja

Pol leen̰ Timote lapɨya

¹ Na ɨŋ-bandi Pol, ba-gɨre-gɨye gɨ da Jesu-Kɨris gɨ dan̰ gɨyəŋ da kuduroy geye gɨ da Kumu. Beege gɨye gɨ ni tɔgɛ bɛrnɛ gɨ ojɨ cay sɔmɛ-bɨra gɨ dan̰ cɨndi gɨ Kumu ye gɨ ɗi na kɨya bɨni le kɔbɔŋ. Ni way sɔmɛ-bɨra gɨ cɨndi gɨ nee le, na kɨya cay bugoŋ pɨna dan̰ Jesu-Kɨris.

² Na ji-bandi kuronɨ Timote gɨ ɨŋ geyɨn̰ tɔgɨ, ma maŋ wal magtubu di kɛ le bɨn̰. Kuɗa gɨ Bayna Kumu dan̰ Ba-gulondɨna Jesu-Kɨris laage ɗarwa danan̰ bɨ, sɨlage cɨn̰-n̰age ton̰ bɨ, bɨn̰ge gusi-dɔbɛ bɨ.

Pol leen̰ Kumu ho’o kɨya cay Timote

³ Ɨŋ leen̰ Kumu gɨ ɨŋ lee gɨye bii dan̰ ɨrɨmenɨ gɨ arɨn̰ cərərə hɨn̰ gɨ mon̰ɨnɨ ba leen̰ge gɨye le ho’o. Kɨɗɨn̰ ga daa daa, duroy son̰do dan̰ tɨwa di ɨni bɨ, ɨŋ ɨrɨm kol can̰ boy ɔlɛ hɨnge gɨŋ na, ɨŋ leeyi ho’o.

⁴ Kɨɗɨn̰ ga ɨŋ hɨn a cay kaŋdi cɨndɨn̰ na, tabɨlaŋ sɔlɛdɨn̰ ləŋ gɨɗaŋ. Hɨn̰ gɨ ɨŋ na jɨga sɨlan̰ na, gusɨnɨ kɨya mɔŋ tɔgɨ.

⁵ Ɨŋ hɨn cay aye gɨ ji ay kuduron̰ leen̰ cɨndi gɨŋ le. Agɨn̰ Loyis bɨ, ƴon̰i Enis bɨ, ayge kuduroyge gɨ cɨndi tumon̰ bɨ, ɨŋ sol kuɗa gɨ aye kudurɔ kon̰ woy na hɨn̰ koge wo̰ bɨ.

⁶ Na toy di hɨn̰ wo̰ ma, ɨŋ hɨn kuduron̰ cay hɨnga ga Kumu bɨn̰ kalɨn̰, kɨɗɨn̰ ga ɨŋ ɗen̰ kɔbɔŋ can̰ le. Hɨnga ga ni bee kalɨn̰ le woy na hɨn̰ tɨwa wo̰ kuduron̰, kuɗa gɨ ji lama kubo daa ɗe ƴee.

⁷ Kɨya wa Kumu bɨnagɨŋ na Turnɔ di ni hɨndarɨn̰ cɨn̰ ungo naŋ. Ama dan̰ gɨyəŋ gɨ da Turnɔ ɗe-kuduroy-bɛrɛ le, ban bɨnagɨŋ tɔgɨ bɨ, geye bɨ, ƴɔmɛ gusɨna osɨwa cay hɨnga gaŋ bɨ.

⁸ Ji ɗɔɔ ba dɔɔ dasi cay lɔɔ tɨmon̰ ojɨn̰ cay Ba-gulondɨna naŋ. Ɨŋ-bandi gɨ ɨŋ woy dangay kol cayi le, ji ɗɔɔ dasi don̰ kol canɨ naŋ bɨ. Ama laa tabɨ danaŋ kɨya cay tɔgɛ bɛrnɛ Kɔl-gɨ-Ɗari dan̰ gɨyəŋ gɨ da dɔnɔ di Kumu bee.

⁹ Na Kumu ba pɔɗɨna bɨ, tɔgɨna gɨ na na bɨləŋ kalaŋ kayi bɨ. Bɨ hɨn̰ gɨ Ban na laa na, ban laa na kɨya cay gɨye-lɔɔdɨna gɨ dan̰ durɔ naŋ. Ama na kɨya gɨ ban ojɨ hɨn̰ wo̰ dan̰ kuduroy geye koyi, kɨya cay ɗarwa toyi. Ɗarwa di nee le, ban bɨna na tumɔ ɓɨragɨ pa dɨm ma ban ɗen̰ hɨnga nɔm ƴee, dan̰ bugoŋ gɨ na bugoŋgɨŋ pɨna dan̰ Jesu-Kɨris.

¹⁰ A boy tɨwa di na ba somɨn̰gɨŋ nee haw kɛ le, ban gɨl ɗarwa toyi dan̰ caga gɨ da ungo gɨ ba-poɗɨnagɨŋ. Ban na Jesu-Kɨris. Jesu mondɨ dɔnɔ da tɨma coŋ dan̰ gɨyəŋ gɨ da Kɔl-gɨ-Ɗari. Ban haŋgɨ cay sɔmɛ-bɨra gɨ kɨya mundoŋ naŋ.

¹¹ Kumu bəŋ gɨye tɔgɛ bɛrnɛ Kɔl-gɨ-Ɗari gɨ nee le kɔbɔŋ. Lee gɨ ɨŋ na ba-gɨre-gɨye bɨ, ba-gɨlɨn̰ kalaŋ hɨnga bɨ.

¹² Na toy di hɨn̰ wo̰ ma, hɨnga ga ni tabɨ ga nee le ləŋ, ama dasi daŋ koldɨge naŋ. Kɨya wa ɨŋ sol ungo gɨ ɨŋ ay kuduronɨ bii bɨ, ɨŋ sol kuɗa gɨ ban ɓal ame hɨnga ga ban day bəŋ kɔbɔŋ le, bɨrɨŋ gɨsɨn̰ wɔlɛdi gɨ ni bon̰ kɔl gɨŋ.

¹³ Ji je kɔl gɨ cɨndi danaŋ: Aya laan̰ hɨnga ga ni dɔrɛ an̰ leen̰ gɨye, dan̰ aye kudurɔ bɨ, geye bɨ, gɨ ni ba orɨn̰ dan̰ gɨyəŋ gɨ da bugoŋ pɨna dan̰ Jesu-Kɨris le.

¹⁴ Gama gɨle hɨnga ga kuɗa ga gɨlɨn̰ge bɨ, been̰ge kobɨn̰ bɨ le ɗɔmɔmɔ, dan̰ gɨyəŋ gɨ da Turnɔ ɗe-kuduroy-bɛrɛ di woy kuduroynagɨŋ.

¹⁵ Hɨn̰ gɨ ji ba sol le, kalaŋ ga a cay gɨsəŋ ga Aji nɔm ɗəŋge coŋ. Pijɛl dan̰ Ɛrmojɛn na danage bɨ.

¹⁶ Kuɗa gɨ Ba-gulɔŋ sɨla cɨn̰-n̰age di da kalaŋ ga a duroy ƴaa di da Onesipɔr dɨŋ, kɨya wa ban dɔbɔŋ bandɨ kuduronɨ daa daa. Dasi dayi kɨya cay dangay tɨnge naŋ bɨ.

¹⁷ Lee gɨ kɨɗɨn̰ ga ban bugoŋ a cay ƴaa-di-gumu di Rɔm dɨŋ na, ban mal cay tɨbanɨ dan̰ gusi hɨmbalwa bɨrɨŋ wayaŋ.

¹⁸ Kuɗa gɨ Ba-gulɔŋ baa danayi bɨ, sɨla cɨn̰-n̰age toyi wɔlɛ gɨ ni bon̰ kɔl gɨŋ bɨ. Hɨnga nɔm ga ban lee bəŋ a cay ƴaa-di-gumu di Epɛs dɨŋ le, ji sol kuɗa ɗɨn̰ kalaŋ ga ɗaŋ coŋ.