2 Tesalonigɨ 2 - Gabri Maja

Ba-Kuduroy-Ɨndɨwa

¹ Karmɨnɨ ga ban̰aŋ dan̰ ga kandɨ, kɔl gɨ ojɨ cay jɨga gɨ da Ba-gulondɨna Jesu-Kɨris bɨ, cay dayaŋ kona gusii bɨ le, ni olgɨŋ gɨ:

² Hɨn̰ gɨ ungo na ya hɨn̰ wɔlɛ gɨ da Ba-gulɔŋ na bugoŋ ɨni na, kɨŋ ɗɔɔ caygɨŋ bɨrɨn̰e cɛd naŋ bɨ, hundɔrɔgɨŋ naŋ bɨ. Bɔgɛgɨŋ kuduroygɨŋ cay kɔl koyi gɨŋ naŋ, ko ban na ya gɨ ɗi na ye naa kɔl gɨ Kumu ba yɔ, wala na duroy tɔgɛ bɛrnɛ dɨŋ. Ko kan na gɨlgɨŋ magtubu hɨn̰ ni-gandi naa ba wale wo̰ kalɨn̰ ma, ɨrɨmegɨŋ gɨ naa ni-gandi naŋ.

³ Ɗɔɔ gɨ ungo dan̰ jɨba toy nare cɨndɨgɨŋ naŋ pa pa. Kɨya wa tumɔ pa dɨm ma ɗe wɔlɛ gɨ da Ba-gulɔŋ na bugoŋ na, naa wa wa kalɨn̰ ma, kalaŋ kɨya jɨbe kɔl gɨ da Kumu sɛdɨ coŋ pa dɨm ma kardi nee, Ba-Kuduroy-Ɨndɨwa gɨ ba kɨya mundoŋ yɔd coŋ le, kɨya gɨle gusi doŋ ƴee.

⁴ Ban na ba baa gɨ da hɨnga nɔm ga kalaŋ solge leen̰ kumu koge. Ban lee gusi leen̰ gumu a cay hɨnga nɔm ga kalaŋ n̰ɨrege. Ban kɨya ɗɔɔ kali toyi a duroy ƴaa-di-da-Kumu dɨŋ bɨ yɔɔ hɨn̰: «Ɗi naa Kumu.»

⁵ Kɨɗɨn̰ ga ɨŋ baa duroygɨŋ le ɨŋ yəgɨŋ koldi, kɛ kɨŋ hɨn cay nee naŋ ga?

⁶ Ama, hɨnga ga nar ba kuduroy-ɨndɨwa ɗe na gɨl gusi doŋ haw kɛ na, kɨŋ sol. Ama, na wɔlɛ gɨ Kumu gɨsɨ dɨm ma Ba-Kuduroy-Ɨndɨwa gɨ nee le, kɨya gɨle gusi doŋ ƴee.

⁷ Haw kɛ kalɨn̰ ma, dɔnɔ di da Ba-Kuduroy-Ɨndɨwa ɨre lee gɨye dan̰ wɔsɛ. Ama kɨya lɔɔ ɨsɨna gɨɗaŋ nee na wɔlɛ gɨ ungo ba-narii lɔɔ gɨye koyi cɨn̰ tɨwa dɨŋ, na unɔ dɨm.

⁸ Na wɔlɛdi gɨ nee le ma, Ba-Kuduroy-Ɨndɨwa le kɨya gɨle gusi bɨ, Ba-gulɔŋ Jesu kɨya dɨɗii dan̰ habe gɨ kɨya andaŋ kɨbi bɨ, dan̰ dɔnɔ di da cagadi bɨ.

⁹ Ba-Kuduroy-Ɨndɨwa le, kɨya ɨrga dan̰ dɔnɔ di da Sidan bɨ, dan̰ dɔnɔ ga toyge kan̰dɨge kan̰dɨge gɨ ni leen̰ hɨnga ga ni beli bɨ, hɨnga ga ɗɨn̰ cɨn̰-kɨɗɨn̰ bɨ, kɨya narɨn̰ cɨn̰ kalaŋ.

¹⁰ Ba-Kuduroy-Ɨndɨwa gɨ nee le, kɨya ɨrga lɔɔ hɨnga ga ɨsɨni ga toyge kan̰dɨge kan̰dɨge ga ni narɨn̰ kalaŋ ga kɨya mundoŋ coŋ. Kɨya wa kan kan̰ge ƴɔɔ bɨ geye kɔl gɨ cɨndi bɨ gɨ ni ba kɨya ɓale poɗɨge le.

¹¹ Na toy di hɨn̰ wo̰ ma, Kumu gɨyɨn̰ dan̰ dɔnɔ di kɨya kaye ungo cayge ɗe kan na been̰ kuduroyge cay kɔl gɨ ni poy gɨŋ.

¹² Ɗe kan na bɨyan̰ge kɔl a cay kalaŋ nɔm ga bɨgage kuduroyge a cay kɔl gɨ cɨndi gɨŋ naŋ, ama ga hɨnga ga dan̰ durɔ ɗɨngar naŋ ba mooge.

Tɔrɛ gɨ ojɨ cay pɔɗɛ

¹³ Ama, kɨŋ-gandi karmɨni ga ban̰aŋ dan̰ ga kandɨ ga Ba-gulɔŋ geygɨŋ le, ojɨ gɨ ni na laan̰ Kumu ho’o jɨn̰ tumɔ tumɔ kol caygɨŋ. Kɨya wa Kumu torgɨŋ na tumɔ pa dɨm ma sɨn̰ cay gɨsəŋ ƴee ɗe gɨ ay na poɗɨgɨŋ dan̰ gɨyəŋ gɨ da Turnoyi di sɨgɨŋ dan̰ cɨndɨgɨŋ bɨ, dan̰ gɨyəŋ gɨ da aye kudurɔ bɨn̰ kɔl gɨ cɨndi bɨ.

¹⁴ Kumu təgɨŋ na kɨya pɔɗɛ gɨ nee le dan̰ gɨyəŋ gɨ da Kɔl-gɨ-Ɗari koni gɨ ni tee bɨgɨŋ, ɗe agɨŋ na wan̰ gusoŋ-tɔgɛ gɨ da Ba-gulondɨna Jesu-Kɨris.

¹⁵ Hɨn̰ wo̰ na, karmɨnɨ ga ban̰aŋ dan̰ ga kandɨ, ƴɨmagɨŋ gusɨgɨŋ usa bɨ, hada di ni loon̰ hɨnga ga ni ba gɨlgɨŋ dan̰ kɨbɨni naŋ le, ga ni ba wal bɨgɨŋ le, ƴɨmagɨŋ kardi usa bɨ.

¹⁶ Bayna Kumu geyna bɨ, ban bɨna hɨnga ga ka-dɔbɛ bandɨ kuduroyna ga ka-wɔyɛ dan̰ tumoyge kalɨn̰ bɨ, hɨnga ga ni bogɨn̰ ɨrɨmedɨna cay nee ga osu bɨ. Ni ɨngɨrɨn̰ Kumu bɨ Ba-gulondɨna Jesu-Kɨris dan̰ gusi koyi bɨ,

¹⁷ na walɨn̰a kuduroygɨŋ dan̰ bandɨ. Kuɗa gɨ ban bɨgɨŋ tɔgɨ di ni leen̰ hɨnga ga ɗari daa daa dan̰ gɨye-lɔɔdɨgɨŋ bɨ, dan̰ kɔl yɔdɨgɨŋ bɨ.