2 Tesalonigɨ 1 - Gabri Maja

Pol leen̰ kalaŋ ga Tesalonigɨ lapɨya

¹ Pol dan̰ Silbɛ̰ bɨ, Timote bɨ ba gɨyɨn̰ge dan̰ magtubu bɨn̰ge Ka-Daye ga Tesalonigɨ ga bugoŋge pɨna dan̰ Bayna Kumu bɨ, Ba-gulondɨna Jesu-Kɨris bɨ.

² Kuɗa gɨ Baynagɨŋ Kumu dan̰ Ba-gulɔŋ Jesu-Kɨris laage kuduroy-ɗarwa danagɨŋ bɨ, bɨgɨŋge gusi-dɔbɛ bɨ.

Kɔl gɨ ojɨ cay bɔyɛ kɔl wɔlɛ gɨ Kɨris kɨya cagan̰

³ Karmɨnɨ ga ban̰aŋ dan̰ ga kandɨ, ojɨ gɨ ni leen̰ Kumu ho’o jɨn̰ tumɔ tumɔ kol caygɨŋ. Hɨnga ga nee le, na dan̰ gɨyəŋdɨge kɨya wa aye kudurɔ kogɨŋ or cɨndi jɨn̰ tumɔ tumɔ dan̰ togi togi bɨ, geye gɨ kɨŋ orɨn̰ duroygɨŋ le, malgɨ gusɨgɨŋ pɨna pɨna bɨ.

⁴ Na toy di hɨn̰ wo̰ ma, ni de jorgɨyni kol caygɨŋ, kɨɗɨn̰ ga ni dor koldɨgɨŋ a kɨɗɨn̰ gaŋ nɔm bɨn̰ Ka-Daye ga da Kumu. Kɨya wa kɨɗɨn̰ ga kan gɨlgɨŋge-cɨn̰ bɨ, hɨnga ga ni gɨwase leegɨŋ bɨ kalɨn̰ ma, kɨŋ ƴom kuduroygɨŋ osu bɨ, kɨŋ ɨre a cay aye kudurɔ kogɨŋ gɨŋ bɨ.

⁵ Hɨnga ga ni gɨle-cɨn̰ ga nee le nɔm, na hɨnga ga gɨl gɨ Kumu na boy kɔl naa dan̰ durɔ ɗɨngar. Kɨya hɨn̰ gɨ kɨŋ ba solɨn̰ cɨn̰-gɨle-cɨn̰ hɨn̰ wo̰ ɨni na, Kumu kɨya bɨlgɨŋ leen̰ kalaŋ ga ɓalge andaŋ a boy dɔɔ-ƴaa toy dɨŋ di kɨŋ ba way cɨn̰-gɨle-cɨn̰ kɔldɔ le.

⁶ Ho’o na gɨyəŋdi gɨ Kumu na jɨgen̰ dan̰ dɔsɛ-ɗugɔ daa bɨn̰ kalaŋ ga ka-dɔsɨdɛ ɗugoygɨŋ.

⁷ Na ban ma, wɔlɛ gɨ Ba-gulɔŋ Jesu kɨya andɨgaŋ gɨɗɨgɨ-Kumu gɨŋ dan̰ ka-ƴɔbɛ kayi ga daa nii ga orɨn̰ge dan̰ dɔnɔ kɨya ɨrgage na, kɨŋ ga kan gɨlgɨŋge-cɨn̰ bɨ, ni-gandi bɨ na, ban kɨya bɨna dɔrɛ gɨlale.

⁸ Ban kɨya ɨrga na duroy tɨwa di ƴee dɨŋ, kɨya gɔjɛ-baa cay kalaŋ ga sɨlage Kumu naŋ gaŋ bɨ, dan̰ kan ga ka-kan̰e bɔgɛ kɔl a cay Kɔl-gɨ-Ɗari gɨ da Ba-gulondɨna Jesu bɨ.

⁹ Hɨnga ga ni gɨle-cɨn̰ ga ba kɨya looge kɨya cay ɨsɨna koge le, na mundoŋ gɨ kan kɨya mundoŋge dan̰ tumoyge muɗɔg muɗɔg coŋ, hen̰ tumoyi Ba-gulɔŋ bɨ, hen̰ dan̰ gɨmɨn̰aw di da dɔnɔ toyi bɨ.

¹⁰ Hɨnga ga nee le, kɨya lɔɔ gusɨge kɨɗɨn̰ ga ban kɨya ɨrga duroy kalaŋ kayi ga woyge dan̰ cɨndɨge, ɗe kan na dɨbɨn̰ gusoŋ-tɔgɛ cayi. Wɔlɛdi gɨ nee le, ban kɨya ɨrga duroy kalaŋ ga beege kuduroyge cayi bɨ, kan nɔm cɨndɨge kɨya wɔyɛ cayi hɨrɨm bɨ. Kɨŋ-gandi kalɨn̰ ma, kɨŋ kɨya ɨre danage nee, kɨya wa kɨŋ bee kuduroygɨŋ a cay kɔl gɨ ni ba tee bɛrnɛdi bɨgɨŋ le bɨ.

¹¹ Na toy di hɨn̰ wo̰ ma, ni ol Kumu cɨndɨni tumɔ tumɔ kol caygɨŋ le, ɗe ban bɨlgɨŋ agɨŋ ɓalɨn̰ somɨn̰ sɔmɛ gɨ hɨrɨwa a te gɨyəŋ gɨ ban təgɨŋ nee le. Bɨ ni olii gɨ ban na bɨgɨŋ tɔgɨ ɗe agɨŋ na leen̰ hɨnga ga ɗadɨrdaŋ nɔm ga kuduroygɨŋ gey lɔɔ bɨ, ɗe aye kudurɔ kogɨŋ lee gɨye bɨ.

¹² Na hɨn̰ wo̰ ma, guson̰ Ba-gulondɨna Jesu kɨya wɔɔ gusoŋ-tɔgɛ kol caygɨŋ bɨ, kɨŋ kɨya wɔɔ gusoŋ-tɔgɛ kol cayi ban bɨ. Dan̰ gɨyəŋ gɨ da ɗarwa di da Kumu kona bɨ, da Ba-gulondɨna Jesu-Kɨris bɨ.