2 Pɨyɛr 3 - Gabri Maja

Kɔl gɨ ojɨ cay caga gɨ da Ba-gulɔŋ Jesu-Kɨris

¹ Karmɨnɨ ga ɨŋ lee-toygɨŋ, magtubu di woy kɛ le na di ni cay sɔɔdo di ɨŋ wal gɨyɨn̰ bɨgɨŋ. Bɨ duroy magtubu nɔm ga nee le sɔɔɗɨmɔŋ na, ɨŋ mal na lɨbe ɨrɨme gɨ dan̰ durɔ ɗɨngar gɨ woy kuduroygɨŋ le, ɗe agɨŋ hɨnɨn̰ cay hɨnga ga ni gɨle le.

² Ɨrɨmgɨŋ a cay kɔl gɨ ka-yɔɔ-kɔl-gɨ-Kumu-ba-yɔɔ ga woyge dan̰ cɨndɨge yege tumɔ le bɨ, cay te tumɔ da Ba-gulɔŋ bɨ Ba-pɔɗɛ kalaŋ bɨ ga ka-gɨre-gɨye kagɨŋ gɨlgɨŋge le bɨ.

³ Hɨnga ga ojɨ gɨ kɨŋ kɨya sɔlɛ cay wase ba kɛ: A kagadi wɔlɛ gɨŋ na, kalaŋ ka-lɔɔ hɨnga ga tabɨlaŋdɨge woy kuduroyge kɨya andaŋge. Kan kɨya asɨgɨŋge,

⁴ yon̰ hɨn̰: «Ban naa ya gɨ ɗi na kɨya jɨga naŋ ga? Ma, ban ba ani ga? Mon̰inagɨŋ nɔm mage, ama hɨnga nɔm woy kɨɗɨn̰dɨge gaŋ ayɨn̰ toyi gɨ ɗen̰ge cay gɨsəŋ.»

⁵ Hɨnga ga kuduroyge hal gɨybəŋ cay nee ba kɛ: Tumɔ ɓɨragɨ le, Kumu ɗe gɨɗɨgɨ-Kumu bɨ cay gɨsəŋ bɨ na dan̰ kɔl gɨ andaŋ kɨbi. Cay gɨsəŋ andaŋ na duroy kaŋ gaŋ bɨ, Kumu lee cay gɨsəŋ na dan̰ kaŋ bɨ.

⁶ Bɨ dan̰ gɨyəŋ gɨ da kɔl gɨ da Kumu gɨ nee le, kaŋ ƴee cay gɨsəŋ ga tumɔ nɔm mondɨn̰ cay gɨsəŋ ga tumɔ coŋ.

⁷ Ama gɨɗɨgɨ-Kumu gɨ haw kɛ bɨ, cay gɨsəŋ ga haw kɛ bɨ le, kɔl gɨ da Kumu gɨ pɨna hayi gɨ nee le ba amge gamɨn̰ tɨwa, ɗe tɨwa na ulge coŋ. Amge gamɨn̰ na wɔlɛ gɨ ni bon̰ kɔl cay ka-lɔɔ ɨsɨna bɨ, kɨya mondɨge coŋ bɨ.

⁸ Karmɨnɨ ga ɨŋ lee-toygɨŋ, hɨnga pɨna woy nee gɨ kuɗa gɨ kuduroygɨŋ gɨ hale gɨybəŋ cay nee naŋ. Hɨnga le ba kɛ: Gɨ ojɨ cay Ba-gulɔŋ na, wɔlɛ gɨ pɨna woy gɨlɨn̰ na hɨn̰ ɨlge gɨ dubu wo̰ bɨ, ɨlge gɨ dubu woy gɨlɨn̰ na hɨn̰ wɔlɛ pɨna wo̰ bɨ.

⁹ Ba-gulɔŋ aya cayi kɨya lɔɔ hɨnga ga ban ye gɨ ɗi na kɨya lɔɔ le naŋ. Kalaŋ ga yege gɨ ban na ay naa cayi le, sɨlage toy kuɗa naŋ. Golgo gɨ ni yɔ Ba-gulɔŋ na dɨbɨ ɗugoyi naa kol caygɨŋ. Ban gey gɨ ungo pɨna wo̰ kalɨn̰ ma na gɨ mundoŋ naŋ. Ban gey gɨ kalaŋ nɔm na bɨlge gɨye-lɔɔdɨge.

¹⁰ Wɔlɛ gɨ da Ba-gulɔŋ le, kɨya ɨrga na hɨn̰ gɨ da ba-hase wo̰. Wɔlɛdi gɨ nee le, gɨɗɨgɨ-Kumu dan̰ noy hɨnga ga pɨna wo̰ ga ye lee hundɔrɔ tɔgɨ kɨya kaɗɨn̰a bɛɗ. Hɨnga ga Kumu ɗege ga tɨwa woy boy nee le, kɨya mundoŋge coŋ bɨ, cay gɨsəŋ dan̰ hɨnga nɔm ga boy nee, kɨya unɔge coŋ bɨ.

¹¹ Hɨn̰ gɨ hɨnga nɔm na kɨya kaɗɨn̰a bɛɗ hɨn̰ wo̰ na, gɨye lɔɔdɨgɨŋ gɨ wɔyɛ na mɨna ga? Kuɗa sɔmɛ dan̰ gɨye-lɔɔ gɨ bugoŋ pɨna dan̰ Kumu bɨ, dan̰ gɨye-lɔɔ gɨ woy dan̰ cɨndi bɨ.

¹² Gamagɨŋ bɨ, sɨbɨrgɨŋ wɔlɛ caga gɨ da Kumu bɨ. Wɔlɛdi gɨ nee le, kan kɨya mɔndɛ gɨɗɨgɨ-Kumu na dan̰ tɨwa bɨ, hɨnga ga Kumu ɗege ga tɨwa di daa woy boy nee le, kɨya mundoŋge coŋ bɨ.

¹³ Kumu ye gɨ ɗi na kɨya bɨna gɨɗɨgɨ-Kumu gɨ hɨrɨwa bɨ, cay gɨsəŋ ga hɨrɨwa bɨ, ga kɨya bɨləŋ kɨɗɨn̰ sɔmɛ ga da hɨnga ga dan̰ durɔ ɗɨngar. Na hɨnga ga nee le ma, mana som gamgɨŋ.

¹⁴ Karmɨnɨ ga ɨŋ lee-toygɨŋ, na hɨnga ga nee le ma magɨŋ gam gusi Kumu. Na toy di hɨn̰ wo̰ ma, ƴɨmagɨŋ gusɨgɨŋ usa ɗe agɨŋ somɨn̰ dan̰ gusi-dɔbɛ bɨ, dɔrɛ mɨra bɨ, ɗe masadɨgɨŋ unɔ tumoy Kumu bɨ.

¹⁵ Ɨrɨmgɨŋ a cay sɨngɨɗɨwa gɨ da dɨbe ɗugɔ da Ba-gulondɨna bɨ, ban ay cayi na ɗe gɨ kalaŋ na poɗɨn̰ge bɨ. Kɔl gɨ nee le gɨlɨn̰ na dan̰ kɔl gɨ da kurɨndɨna Pol gɨ ni lee-toyi ba wal bɨgɨŋ dan̰ gɨyəŋ gɨ da cɨn̰-muɗɔlɛ di Kumu bii le.

¹⁶ Ban ye kɔl gɨ nee le, duroy magtubu toyi dɨŋ nɔm. Kɔl gɨ woy duroy magtubu toyi dɨŋ le, tɔgɛ bɛrnɛdi hɨmbaɗa naŋ. Kalaŋ ga pɨna ga tɨrabage hɨnga naŋ bɨ, ga aye kudurɔ koge usa naŋ bɨ, bɨlege kɔl koyi hɨn̰ gɨ kan ba bɨlɨn̰ge kɔl gɨ woy duroy Magtubu di da Kumu di ɗaŋ wo̰. Na hɨn̰ wo̰ ma, kan mondɨn̰ge gusɨge koge gaŋ.

¹⁷ Kɨŋ karmɨnɨ ga ɨŋ lee-toygɨŋ, kɨŋ sol kɔl gɨ nee le tumɔ hagɨŋ ɨni. Na toy di hɨn̰ ma ɗagɨŋ muɗɔlɛ cay gusɨgɨŋ gɨŋ bɨ, ɗɔɔgɨŋ poy di da kalaŋ ga gɨye-lɔɔ ga ɨsɨni dɨlage hɨnga naŋ orɨn̰ danagɨŋ a te gɨyəŋ koge gɨŋ naŋ bɨ, mɔndɛgɨŋ osɨwa gɨ da aye kudurɔ kogɨŋ naŋ bɨ.

¹⁸ Ama ɨragɨŋ dan̰ cɨndɨgɨŋ tumɔ te ɗarwa dɨŋ bɨ, te sɔlɛ gɨ da Jesu-Kɨris Ba-gulondɨna bɨ, Ba-pɔɗɨna bɨ le. Gusoŋ-tɔgɛ na koyi haw kɛ bɨ, bɨrɨŋ dan̰ cɨndi bɨ! Ɗa-ɗe-woy-hɨn̰-wo̰!