2 Pɨyɛr 2 - Gabri Maja

Ka-gɨlɨn̰ kalaŋ hɨnga ga cɨndi naŋ

¹ Naa tumɔ, ka-yɔɔ-kɔl-gɨ-Kumu-ba-yɔɔ ga cɨndi naŋ woyge duroy te kalaŋ ga da Kumu. Haw kɛ kalɨn̰ ma, ka-gɨlɨn̰ kalaŋ hɨnga ga cɨndi naŋ woyge duroygɨŋ nee. Kan kɨya andaŋ duroygɨŋ dan̰ n̰ale kɨya gɨlɨn̰ kalaŋ hɨnga ga dan̰ gɨyəŋdɨge naŋ bɨ, hɨnga ga ɨsɨn tɔgɨ bɨ. Ba gɨlge hɨnga gɨ ba bɔyɛ cayge le, kan orge bɨrɨŋ kan̰ii coŋ bɨ. Kan malgage mundoŋ ɨrgan̰ a cay gusɨge koge gɨŋ gaŋ, ama mundoŋ koge le kɨya caga cɛd.

² Kondɨwadi kalaŋ kɨya kɔbɛge kardɨge kɨɗɨn̰ yɔyɛ gorɨn̰ daa gaŋ le bɨ, kɨya cay kalaŋ ga nee le, kan kɨya yagɨdege te gɨyəŋ gɨ da Kɔl gɨ cɨndi kol cay gɨye-lɔɔdɨge bɨ.

³ Kol lɔɔ te gursu di woy kuduroyge le, ka-gɨlɨn̰ kalaŋ hɨnga ga dan̰ gɨyəŋdɨge naŋ ga nee le, kɨya gɨlgɨŋge kɔl gɨ ni narɨn̰ cɨn̰-kɨɗɨn̰ dan̰ cɨn̰-muɗɔlɛ age na diigɨŋ. Ama kɨya bɔyɛge kɔl cayge mɨnde bɨ, kɨya mondɨgege muɗɔgɨ muɗɔgɨ mɨnde bɨ.

⁴ Na cɨndi ni sol gɨ ka-ƴɔbɛ ga daa nii ga tumɔ leege ɨsɨna le, Kumu sɨla cɨn̰-n̰age toge naŋ. Ama ban donge beege a kɨɗɨn̰ ga hɨnga ga ni tabɨ kɨya lɔɔge nee gaŋ. Saɗɨdɨgege dan̰ nare bɨ, amgege a boy umboŋ gɨ ɗɨgi gɨ ɨndi tɨlɨm gɨŋ, kɨya gamɨn̰ wɔlɛ gɨ ni bon̰ kɔl.

⁵ Cay gɨsəŋ ga jɨne ga kalaŋ ga ka-lɔɔ terɨn̰ ba somɨn̰ge nee le, Kumu ɗage kalɨn̰ naŋ. Ama ban lee gɨ kaŋ ƴee cay gɨsəŋ nɔm coŋ. Na Nɨwe gɨ ba-yɔɔ kɔl dan̰ durɔ ƴɔbɨ ma ban poɗii bɨ, ban poɗɨ kalaŋ ga ɗaŋ jurgum danayi bɨ.

⁶ Kumu boy kɔl a cay ƴaa-di-gumu di Sɔdɔm dan̰ Gɔmɔr bɨ, ulge dan̰ tɨwa muɗɔgɨ muɗɔgɨ coŋ. Bɨ ayge leen̰ hɨnga ga ni gɨle gɨ da kuduroy-hɔmɛ gɨ woy gam kalaŋ ga ka lɔɔ terɨn̰.

⁷ Lotɨ gɨ na ungo gɨ ba lɔɔ hɨnga ga dan̰ durɔ ɗɨngar le, Kumu dorii duroy nee coŋ. Gɨye-lɔɔ gɨ ni yɔyɛ gorɨn̰ daa gɨ da kalaŋ gɨ dɨlage hɨnga cay nee naŋ boy ɨlge gɨ da Lotɨ gɨŋ le, gɨlii-cɨn̰.

⁸ Kɨya wa ungo gɨ ba lɔɔ hɨnga ga dan̰ durɔ ɗɨngar gɨ som duroyge gɨ nee le, dan̰ wɔlɛ pɨna pɨna ɨrɨmedi gɨ woy dan̰ durɔ ɗɨngar le sol cɨn̰-gɨle-cɨn̰, kɨya cay gɨye-lɔɔdɨge gɨ ɨsɨn gɨ ban sol bɨ je bɨ.

⁹ Hɨn̰ gɨ na wɨya hɨn̰ wo̰ na, ni sol gɨ Ba-gulɔŋ ɓal dɔrɛ kalaŋ ka-lɔɔ hɨnga ga dan̰ durɔ ɗɨngar kɨbɨ hɨnga ga ni gɨybe gaŋ bɨ, ɓal game kalaŋ ga ka-lɔɔ hɨnga ga dan̰ durɔ ɗɨngar naŋ kɨya lɔɔge hɨnga ga homi a wɔlɛ gɨ ni bon̰ kɔl gɨŋ bɨ.

¹⁰ Naa wo̰ na leen̰ cɨndi, kalaŋ ga ka-kɔbɛ tabɨlaŋdi hɨnga ga mɨdagi ga leege bɨ, ka hagɨre dɔnɔ di da Ba-gulɔŋ bɨ le, ban kɨya lɔɔge hɨnga ga homi. Ka-gɨlɨn̰ kalaŋ hɨnga ga cɨndi naŋ ga nee le, kan na kalaŋ ga hɨndarage hɨnga naŋ bɨ, ka-dɔrɛ n̰ərə bɨ. Ka-ƴɔbɛ ga daa nii ga ojɨ gɨ ni dɨbe gusoŋ-tɔgɛ cayge le kalɨn̰ ma, kan hɨndarage kardɨge naŋ, ama yagɨdɨgege.

¹¹ Ka-ƴɔbɛ ga daa nii ga osɨge ɗɨn̰ ka-gɨlɨn̰ kalaŋ hɨnga ga cɨndi naŋ ga nee le bɨ, dɔnɔ toge ɗɨn̰ toge bɨ le, dɨbɨge kɔl gɨ ɨsɨni cay ka-gɨlɨn̰ kalaŋ hɨnga ga cɨndi naŋ ga nee le tumoy Ba-gulɔŋ naŋ.

¹² Ama kalaŋ ga nee le, leege hɨnga dɨle ɨrɨme hɨn̰ kɨmɛnɛ ga coŋ ga kan woogege kɨya ƴomgege bɨ, dɨɗɨgege bɨ wo̰. Kan yagɨdege hɨnga ga kan sɨlage naŋ le. Kan kɨya mare na tɨma di gɨlɨn̰ hɨn̰ da kɨmɛnɛ ga coŋ wo̰.

¹³ Hɨnga ga ni gɨle-cɨn̰ ga kɨya looge le kɨya wɔyɛ na cay kobɨge, kɨya cay hɨnga ga dan̰ gɨyəŋdɨge naŋ ga kan leege le. Kɨya wa tabɨlaŋdi hɨnga ga woy kuduroyge le, kan leege na cɨn̰ tɨwa dɨŋ. Sɔmɛdɨge a kɨɗɨn̰ dayaŋ kagɨŋ gaŋ dii dasi bɨ, lee kɨni bɨ. Kan wayge gusi-mɔwa toge na a te lɔɔ hɨnga ga ɨsɨni ga tabɨlaŋdɨge woy kuduroyge. Kɨɗɨn̰ ga kan diidege hɨnga kagɨŋ danagɨŋ na, gusɨge mooge a cay nare cɨn̰-kɨɗɨn̰ kage.

¹⁴ Tama di ani ani di kan kɔbɔɔ dan̰ cɨndɨge le, kan won̰ge danaa a ɨrɨmedɨge gɨŋ bɨ, lɔɔ hɨnga ga ɨsɨni sɨlge naŋ bɨrɨŋ bɨ. Kan gɨybɨge boy toge ƴomɨn̰ge kalaŋ ga togɨyge unɔ bɨ. Tɨrabe lɔɔ te gursu le, kan solge tɔgɨ bɨ, ɓɨse gɨ da Kumu woy cayge.

¹⁵ Kan ɗege gɨyəŋ gɨ dan̰ durɔ ɗɨngar coŋ, lee gɨ kan kayaŋge. Kan ayge gɨyəŋ gɨ Balam kurɨn̰ Bosor ba ay le. Balam gɨ nee le, lee gusi-mɔwa kɨya cay gursu di ni cay-kɔbɔ di ban way te gɨye-lɔɔdi gɨ dan̰ durɔ ɗɨngar naŋ gɨ ban lee le.

¹⁶ Ama Kumu san̰ danayi kɨya cay gasɨn̰-kɔl gɨ ban hangɨɗɨ. Kura̰ di na nare gɨ ni nɔɔ di ya kɔl naŋ le, ay tumoy ungo yen̰ kɔl bɨ narɨn̰ ba-yɔɔ-kɔl-gɨ-Kumu-ba-yɔɔ leen̰ gɨye gɨ da ungo gɨ ba dɨngale.

¹⁷ Ka-gɨlɨn̰ kalaŋ hɨnga ga cɨndi naŋ ga nee le, woyge gɨlɨn̰ na hɨn̰ cɨn̰ kaŋ ga kaŋdɨge gɨr naŋ wo̰ bɨ, woyge gɨlɨn̰ na hɨn̰ gɨrɨmbale ga kal dorge sugudɨge coŋ wo̰ bɨ. Kumu ƴom cay tɨbay kɨɗɨn̰ ga ɨndi diŋ-diŋ ojɨn̰ cayge.

¹⁸ Kɔl yɔɔdɨge na kɔl gɨ ni gɨlɨn̰ gusɨge bɨ, na kɔl ga gɨmdəŋ kalɨn̰ wo̰ bɨ. Tabɨlaŋ di ni lɔɔ hɨnga ga ɨsɨni ga woy kuduroyge le, kan gɨybɨge boy toge dan̰ hɨnga ga ni ƴomɨn̰ kalaŋ ga andaŋge kobɨ kalaŋ ga ka-lɔɔ hɨnga ga dan̰ gɨyəŋdɨge naŋ ga haw kɛ ƴee le.

¹⁹ Kan ayge tumoyge bɨge yegege hɨn̰ gɨ kan na kɨya andaŋ kɨbɨ guyɔŋdu dɨŋ coŋ, ama kan kalɨn̰ ma na gɔyɔŋ ga da gɨye-lɔɔ gɨ kɨya orɨn̰ dan̰ ungo dɨbii kɨbɨ tɨma dɨŋ. Kɨya wa ungo na guyɔŋ gɨ da hɨnga ga ɗɨn̰ cayi.

²⁰ Kan ga solge Jesu-Kɨris gɨ na Ba-gulondɨna bɨ ba-pɔɗɨna bɨ le, ɗege hɨnga ga mɨdagi ga a cay gɨsəŋ gaŋ coŋ. Ama hɨn̰ gɨ kan na jɨga ɗa gusɨge bɨn̰ hɨnga ga mɨdagi ga nongɨrdɨge ɗaŋ bɨ, dii cayge ɗaŋ coŋ bɨ na, sɔmɛdɨge gɨ kagadi gɨŋ le, kɨya ɨsɨna tɔgɨ ɗɨn̰ gɨ tumɔ ƴee.

²¹ Hɨn̰ gɨ tumɔ kan ni na sɨla gɨyəŋ gɨ ni lɔɔ hɨnga ga dan̰ durɔ ɗɨngar naŋ na, golgo ɗɨn̰ gɨ kan sol pa dɨm ma bɨlɨn̰ge kardɨge bɨn̰ te tumɔ da Kumu di kan bɨge le.

²² Hɨnga ga andaŋ cayge le, gɨlɨn̰ na hɨn̰ kɨradi-kɔl gɨ cɨndi gɨ ye hɨn̰: «Coo jogɨ dɔɔ budɔlɛ koyi ɗaŋ» bɨ, «Gɔsɨyɔŋ pɨl kaŋ cərərə coŋ ma jogɨ bɨɗe gusoo a duroy kurbo gɨŋ ɗaŋ» bɨ.