2 Korɛ̰t 9 - Gabri Maja

Bee hɨnga ga ni jɨbɨn̰ te karme

¹ Leen̰ cɨndi na, uja gɨ ɨŋ gɨ wale magtubu gɨyɨn̰ bɨgɨŋ ojɨn̰ cay hɨnga ga ni jɨbɨn̰ te karme ga ni ba gey orɨn̰ bɨn̰ ka-karme ga woyge dan̰ cɨndɨge ga a cay ƴaa-di-gumu di Jerusalɛm dɨŋ naŋ.

² Ɨŋ sol gɨ gusɨgɨŋ hɨmbalgɨŋ gɨ ni jɨbe toyge. Lee gɨ ɨŋ dor kɔldɨgɨŋ ayɨn̰ canɨ daa tumoyi kalaŋ ga a cay gɨsəŋ ga Masedɨwan gaŋ hɨn̰: «Karmɨna ga a cay gɨsəŋ ga Agay ƴomge cay tɨbayge na naga hage gɨ ni bee hɨnga.» Gusi-hɨmbalwa togɨŋ dobɨ bandɨ kuduroy Ka-Daye gɨɗaŋ ɗe na beege hɨnga bɨ.

³ Haw kɛ ɨŋ gɨy ka-karme ga sɨbɨ dan̰ magtubu di kɛ le ɗe aŋ na solɨn̰ leen̰ cɨndi gɨ kɔl gɨ ba ye ojɨn̰ cay gusi-hɨmbalwa togɨŋ na wɨya poy naŋ. Ɨŋ gey gɨ kɨŋ ƴɨma cay tɨbaygɨŋ hɨn̰ gɨ ɨŋ ba ye tumɔ wo̰.

⁴ Hɨn̰ gɨ ɨŋ na bugoŋ gusɨgɨŋ dan̰ ka-karme ga pɨna ga a Masedɨwan ma kɨŋ na ƴɨma cay tɨbaygɨŋ naŋ na, ka-karme le kɨya sɔlɛge gɨ kɨŋ na ƴɨma cay tɨbaygɨŋ naŋ. Dasi kɨya dɨni kɨya kuduroyni ga ni ba bee caygɨŋ cɔb cɔb le ba poyi. Dasi kɨya doogɨŋ kɨŋ-gandi gɨɗaŋ bɨ.

⁵ Lee gɨ ɨŋ sol na, kuɗa tɔgɨ gɨ ɨŋ ɨngɨr ka-karme ɗe na or gusɨgɨŋ tumonɨ jugu, kɨya ƴomɨn̰ cay tɨbay hɨnga ga kɨŋ ba ye gɨ kɨŋ na kɨya bee le. Na hɨn̰ wo̰ ma hɨn̰ gɨ ɨŋ na bugoŋ na, hɨnga ƴom cay tɨbayge ɨni bɨ, hɨnga le kɨya gɨle gɨ kɨŋ na bee hɨnga naa dan̰ kuduroygɨŋ ga pɨna, ama naa dan̰ kobɨ osɨwa naŋ.

⁶ Hɨngɨŋ a cay kɔl gɨ ba kɛ gɨŋ: Hɨn̰ gɨ ungo na gɨsɨ dḛḛ wo̰ na, kɨya wale na dḛḛ wo̰ bɨ, hɨn̰ gɨ ungo na gɨsɨ hala, na kɨya wale na halwa bɨ.

⁷ Naa hɨn̰ wo̰ na kuɗa gɨ waŋ waŋ kalɨn̰ ma bee hɨnga hɨn̰ gɨ ban ojɨ a kuduroy. Ɗa gɨ kardi nee ban be dɨle ɨle gusi bɨ, wala hɨn̰ ungo gɨ ƴomiige dan̰ gu wo̰ naŋ bɨ, ama ɗa gɨ ban laa dan̰ gusi-mɔwa. Kɨya wa Kumu gey na ungo gɨ ba-bee hɨnga dan̰ gusi-mɔwa.

⁸ Kumu ɓal ba kɨya bɨgɨŋ ɗarwa di tɔɔ kan̰do kan̰do nɔm dan̰ kɔndɔ haa, ɗe agɨŋ orɨn̰ dan̰ hɨnga nɔm ga ɓalgɨŋ dan̰ wɔlɛ pɨna pɨna bɨ, ɗe toyge ga ba kondɨ tɔgɨ le, agɨŋ leen̰ gɨye gɨ ɗari nɔm bɨ.

⁹ Kɨya wɔyɛ gɨlɨn̰a na hɨn̰ kɔl gɨ walge duroy Magtubu di da Kumu dɨŋ ojɨn̰ cay ungo gɨ ba ɗarwa gɨ ye hɨn̰: «Ban gosɨnɨn̰ ka-n̰age hɨnga kondɨ bɨ, Hɨnga lɔɔdi ga dan̰ durɔ ɗɨngar, Woy dan̰ tumoyge bɨ.»

¹⁰ Kumu gɨ ba bɨn̰ ka-gɨse gasa gasi gɨse bɨ hɨnga ga ni dɔɔ bɨ le, kɨya bɨgɨŋ gasi gɨse bɨ, kɨya lɔɔ ɗe gɨ gasi gɨse le na wɔɔ hala bɨ, kɨya lɔɔ ɗe gɨ haldɨgɨŋ gɨ dan̰ durɔ ɗɨngar le na wɔɔ hala bɨ.

¹¹ Hɨn̰ wo̰ na kɨŋ kɨya wɔɔ kandi-wɔɔ dan̰ te gɨyəŋ gɨ toy kan̰di kan̰di ɗe agɨŋ ɓal be hɨnga kondɨ dan̰ tɨwa nɔm. Hɨn̰ wo̰ na kalaŋ kondɨ kɨya loon̰ge Kumu ho’o kɨya cay hɨnga ga ni bee-kalɨn̰ ga ni ba kɨya bɨge dan̰ gusondɨge.

¹² Kɨya wa gɨye gɨ ba woy kɛ gɨ kɨŋ ba woy te lɔɔ le, kɨya lɔɔ gɨ kalaŋ ga woyge dan̰ cɨndɨge na waage naa hɨnga ga n̰agedɨge leege ƴɔbɨ naŋ, ama kɨya lɔɔ gɨ kalaŋ kondɨ na laan̰ge Kumu ho’o bɨ.

¹³ Gɨye gɨ nee le, lee gɨ kalaŋ solge gɨ kɨŋ naa ka-aye kudurɔ ga leen̰ cɨndi. Kɨŋ gɨlge hɨn̰ gɨ kɨŋ na bee kɔl a cay Kɔl-gɨ-Ɗari gɨ da Kɨris gɨŋ hagɨŋ. Kɨŋ ƴom wandɨ dan̰ ka-aye kudurɔ ga a Jerusalɛm bɨ, dan̰ kalaŋ ga ɗaŋ nɔm nee bɨ, a te hɔgɛ hɨnga pɨna gaŋ bɨ. Na toy di hɨn̰ wo̰ ma kan kɨya hɨramege Kumu tɔgɨ.

¹⁴ Kan kɨya ɔlɛ Kumu kol caygɨŋ. Kuduroyge woy kəgəgə caygɨŋ kol ɗarwa di gumu di Kumu ƴom danagɨŋ.

¹⁵ Kuɗa gɨ kalaŋ laan̰ Kumu ho’o kol hɨnga ga ɗɨn̰ yɔ koldɨge ga Kumu bɨn̰ kalaŋ kalɨn̰ le.