2 Korɛ̰t 8 - Gabri Maja

Hɨnga ga ni bee dan̰ kuduroy-bɛrɛ

¹ Ay, karmɨni ga ban̰aŋ dan̰ ga kandɨ, ni gey gɨ kɨŋ na sɨla ɗarwa di Kumu ba lee dan̰ Ka-Daye ga a cay gɨsəŋ ga Masedɨwan gaŋ.

² Hɨnga ga ni dɔsɛ-ɗugɔ ga toyge kan̰dɨge kan̰dɨge gɨwasɨ ka-aye kudurɔ. Ama gusɨge mooge tɔgɨ duroy hɨnga ga ni dɔsɛ-ɗugɔ ga nee le. Hɨnga wɔɔdɨge unɔ na unɔ yɔd ama kan leege wandɨ cɨla.

³ Hɨnga ga kan beege le na hɨnga ga ojɨ cay togɨyge, lee gɨ ɨŋ ɓal lɔɔ tɨmon̰ toge. Kan beege ɗɨn̰ cay togɨyge bɨ, leege na dan̰ kuduroy geye koge bɨ.

⁴ Kan lɔɗɨdege toyni gɨɗaŋ gɨ ni na bɨge gɨyəŋ gɨ ni bugoŋ pɨna danani cay jɨbe te karmɨni ga woyge dan̰ cɨndɨge ga somge a cay ƴaa-di-gumu di Jerusalɛm dɨŋ.

⁵ Hɨnga ga kan leege le ɗɨn̰ ga ni ba bee ɨrɨmedɨni cay nee. Kan bɨn̰ge Ba-gulɔŋ gusɨge pa dɨm ma kardi nee bɨnige gusɨge dan̰ kuduroy geye gɨ da Kumu bɨ ƴee.

⁶ Na toy di hɨn̰ wo̰ ma mani olɨn̰ Titɨ gɨ ban na jɨga dɨɗe kɨbɨ gɨye gɨ da hɔgɛ hɨnga ga ni bee kalɨn̰ ga tumɔ ban ba ɗe toyge duroygɨŋ le danagɨŋ.

⁷ Na cɨndi, kɨŋ bɨle ka-wɔɔ hɨnga a te hɨnga nɔm. Kɨŋ bɨle ka-wɔɔ hɨnga a te aye kudurɔ gɨŋ bɨ, a te sɔlɛ yɔɔ kɔl gɨŋ bɨ, a te sɔlɛ-hɨnga gaŋ dan̰ gusi-hɨmbalwa di tɔɔ kan̰do kan̰do bɨ, dan̰ geye gɨ kɨŋ ba way gusɨni bɨ. Haw kɛ na, bɨlgɨŋ ka-wɔɔ hɨnga a te gɨye gɨ da hɔgɛ hɨnga ga ni leen̰ ɗarwa nee bɨ.

⁸ Ojɨn̰ cay hɔgɛ hɨnga ga ni jibe tɔɔ le, na dɔnɔ maŋ ɗa caygɨŋ naŋ. Ɨŋ yəgɨŋ na kol gusi-hɨmbalwa di da ka karme ga ɗaŋ aŋ na gɨwasɨgɨŋ. Ɨŋ bɨgɨŋ na gɨyəŋ ɗe agɨŋ na gɨlɨn̰ wandɨ togɨŋ leen̰ cɨndi.

⁹ Na cɨndi, kɨŋ sol ɗarwa di Ba-gulondɨna Jesu-Kɨris ƴom danana: Ban gɨ ba wɔɔ hɨnga le bɨləŋ ba-n̰age kol caygɨŋ, ɗe agɨŋ na bɨlɨn̰ ka-wɔɔ hɨnga dan̰ gɨyəŋ gɨ da n̰age di leeyi le.

¹⁰ Ojɨn̰ cay kɔl gɨ nee le aŋ yəgɨŋ ɨrɨmenɨ. Kuɗa gɨ kɨŋ dɨɗɨ kɨbɨ gɨye gɨ kɨŋ ay toy naga haw kɛ, kɨya wa kɨŋ na ga cay wase boy gɨye gɨ nee gɨŋ le. Ɗɨn̰ gɨ nee le na, kɨŋ na ga cay wase ga orɨn̰ dan̰ geye agɨŋ na leen̰ gɨye gɨ nee le.

¹¹ Haw kɛ na, kuɗa gɨ kɨŋ laa hɨnga ga nee le dɨɗɨn̰ kɨbi yɔd coŋ dan̰ gɨyəŋ gɨ da hɨnga ga woy kobɨgɨŋ le. Kɨŋ laa dan̰ gusi-hɨmbalwa bɨ, dan̰ kuduroy-geye kogɨŋ bɨ.

¹² Hɨn̰ gɨ kuduroy-geye kogɨŋ na kuɗa na, Kumu kɨya ƴɔɔ hɨnga ga kɨŋ ba kɨya bii le. Ji gɨ bee hɨnga ga ji ɨran̰ naŋ, naŋ. Ban gey gɨ kɨŋ na bii naa kandi-wɔɔ ga kɨŋ orɨn̰ ƴɔbɨ.

¹³ Ɨŋ ye hɨn̰ wo̰ na ɗe gɨ kɨŋ na hugan̰ hɨnga wɔɔdɨgɨŋ nɔm bɨn̰ kan ga ɗaŋ jalan̰ kuduroyge bɨ, kɨŋ na bɨl sɨma duroy n̰age dɨŋ naŋ. Ama ɨŋ gey gɨ kɨŋ gusɨna hɨnga wɔɔdɨgɨŋ bɨn̰ kan ga ɗaŋ ɗe ɓadɨldɨn̰ dɛj dɛj.

¹⁴ A tɨwa di haw kɛ dɨŋ na, kɨŋ orɨn̰ kondɨ lee gɨ kɨŋ ɓal gɨrɨn̰ kan ga somge duroy n̰age dɨŋ nee. Kardi nee hɨn̰ gɨ kan na ɨran̰ kunda ma kɨŋ-gandi kɨŋ na sɨma duroy n̰age dɨŋ na, kan kalɨn̰ ma kɨya ɓalege gɨrgɨŋ nee bɨ. Na toy di hɨn̰ wo̰ ma kɨŋ kɨya ɓadɨldɨn̰ dɛj dɛj.

¹⁵ Gɨ nee le, hɨn kuduroyna a cay kol dɔɔ gɨ walge duroy Magtubu di da Kumu dɨŋ gɨ ye hɨn̰: «Ban gɨ don kondɨ kalɨn̰ ma, bay dugo naŋ bɨ, ban gɨ don dḛ kalɨn̰ ma, wɨyii naŋ bɨ.»

Titɨ dan̰ ka-bogii

¹⁶ Laan̰nagɨŋ Kumu ho’o kol bee gɨ ban bɨn̰ Titɨ gusi-hɨmbalwa hɨn̰ gusi-hɨmbalwa tɨnge ɨŋ-bandi wo̰ kɨya jɨbɨn̰ toygɨŋ.

¹⁷ Titɨ ya əw na cay mɔlɛ koni ƴɔbɨ naŋ. Tumɔ kalɨn̰ ma ban dan̰ gusi gey ɔrɛ gusɨgɨŋ dan̰ gusi-hɨmbalwa.

¹⁸ Ungo gɨ ni ba kɨya gɨyii danayi le kɨŋ solii. Ka-aye kudurɔ ga a kɨɗɨn̰ ga da Ka-Daye gaŋ nɔm hɨramiige kol gɨye-lɔɔdi a te tɔgɛ bɛrnɛ Kɔl-gɨ-Ɗari gɨŋ.

¹⁹ Ɗɨn̰ gɨ nee le na, na kalaŋ ga Ka-Daye ba doriige ɗe ban na bɨgani a tɨrga dɨŋ kol gɨye gɨ da ƴɔɔ hɨnga ga ni bee gɨ kan beege kobɨni. Ni lee gɨye gɨ nee le na ɗe gɨ kalaŋ dɨbɨn̰ge gusoŋ-tɔgɛ cay Ba-gulɔŋ bɨ, na kɨya gɨlɨn̰ kalaŋ gɨ hɨnga ga ni ba mal lɔɔ le ni mal lɔɔdɨge na dan̰ kuduroy-bɛrɛ bɨ.

²⁰ Ni ɗe muɗɔlɛ a cay gusɨni gɨŋ, ɗe ani na dɨɗɨn̰ kɨbɨ gɨye gɨ da gursu di kondi di beenige kobɨni le dan̰ ɗarway, ɗe ani na bɨn̰ ungo gɨyəŋ gɨ ni yen̰ kɔl gɨ ɨsɨni a cayni naŋ.

²¹ Ni mal lɔɔ hɨnga ga ɗari na cɨn̰ Ba-gulɔŋ ƴɔbɨ naŋ, ama na cɨn̰ kalaŋ bɨ.

²² Kurɨndɨni gɨ ni ba gɨwasii kɨbɨ hɨnga ga kondɨ gaŋ bɨ, gɨl gɨ gusi na hɨmbalii gɨɗaŋ a kɨbɨ gɨye gɨŋ le, ni gɨyii ɗe or danage. Haw kɛ na gusi hɨmbalii gɨɗaŋ ɗɨn̰ gɨ tumɔ coŋ, kɨya wa ban bee kuduroy cɔb cɔb caygɨŋ.

²³ Gɨ ojɨn̰ cay Titɨ na, ban na ba-bɔgɔŋ bɨ, ba-lɔɔ gɨye danaŋ kol caygɨŋ bɨ. Ama ojɨn̰ cay karmɨni ga ɗaŋ ga orge danayi na, na kalaŋ ga Ka-Daye ba gɨyge bɨ, haldɨge kuɗa lee gɨ kalaŋ dɨbɨ gusoŋ-tɔgɛ cay Kɨris kol cayge bɨ.

²⁴ Hɨn̰ wo̰ na, gɨlgegɨŋ gɨ kɨŋ na geyge leen̰ cɨndi ɗe kalaŋ ga Ka-Daye ga a kɨɗɨn̰ gaŋ kɨɗɨn̰ gaŋ, solge. Kɨɗɨn̰ ga nee le na, kɔl gɨ ni ba dor ojɨn̰ caygɨŋ tumoyge le, kɨya bɔɔ-poy naŋ.