2 Korɛ̰t 7 - Gabri Maja

¹ Ay karmɨnɨ ga ban̰aŋ dan̰ ga kandɨ ga ɨŋ lee-toygɨŋ, kuɗa gɨ na ɨrɨmgɨŋ cay hɨnga ga Kumu ba ye gɨ ɗi na kɨya lɔɔ le. Na toy di hɨn̰ wo̰ ma kuɗa gɨ kɨŋ dɨran̰ gusɨgɨŋ mɨra cay hɨnga nɔm ga ni kɨni ga ojɨ cay kuyoŋdi-gusu bɨ, ɨrɨme bɨ. Kuɗa gɨ na wɨya dan̰ cɨndɨna kɨya wa na na kalaŋ ga ka-hundɔrɔ Kumu.

Gusi-mɔwa di da Pol

² Hangagɨŋ ɗugoygɨŋ bɨni! Ni laan̰ ungo pɨna hɨnga ga dan̰ gɨyəŋdɨge naŋ, naŋ bɨ, ni mɨnda hɨnga ga da ungo pɨna naŋ bɨ, ni da kardi ungo pɨna naŋ bɨ.

³ Ɨŋ ye kɔl gɨ nee le na kɨya dɨbɨn̰ kɔl caygɨŋ naŋ. Hɨn̰ gɨ tumɔ ɨŋ ba ye le ni geygɨŋ tɔgɨ bɨ hɨnga pɨna ga kɨya poyna unɔ. Gɨ na na sɨma naa bɨraa, mara naa maree, na na pɨna.

⁴ Ɨŋ ye kɔldɨgɨŋ daa daa dan̰ gusi-mɔwa. Gusɨnɨ mɔŋ kol caygɨŋ gɨɗaŋ. Kɨŋ dobɨ bandɨ kuduronɨ dan̰ bandɨ di ɗɨn̰ cɨn̰-kɨɗɨn̰. Ɨŋ orɨn̰ dan̰ gusi-mɔwa a duroy hɨnga ga ni dɔsɛ-ɗugɔ kani nɔm ga ni ba way le.

⁵ Na cɨndi, kɨɗɨn̰ ga ni bugoŋ a cay gɨsəŋ ga Masedɨwan gaŋ na, ni dɨra gɨlale naŋ bɨrɨŋ. Gɨle-cɨn̰ ba cayni dan̰ gɨyəŋ gɨ toy kan̰di kan̰di: Ni worɨn̰dɨde dan̰ kalaŋ ga ɗaŋ bɨ, hundɔrɔ woy kuduroyni bɨ.

⁶ Ama Kumu gɨ ba dɔbɛ bandɨ kuduroy kan ga togɨyge unɔ le, dobɨ bandɨ kuduroyni dan̰ caga gɨ da kurɨndɨni Titɨ.

⁷ Bandɨ di ni orɨn̰ le uja na cay caga gɨ da Titɨ ƴɔbɨ naŋ, kɔl gɨ ban yeni ojɨn̰ caygɨŋ le dobɨ bandɨ kuduroyni gɨɗaŋ. Ban dorni te gɨyəŋ gɨ kɨŋ dobɨn̰ bandɨ kuduroyi. Ban yeni gɨ tabɨlaŋdi sɔlɛnɨ na ləgɨŋ tɔgɨ bɨ, kɨŋ na ɨləŋ tɔgɨ dan̰ kandi cɨndɨgɨŋ bɨ, na homgɨŋ tɔgɨ kol canɨ bɨ, lee gɨ gusɨnɨ mɔŋ tɔgɨ koldi ƴee coŋ.

⁸ Hɨn̰ gɨ magtubu di ɨŋ wal gɨyɨn̰ bɨgɨŋ le, na laa gɨ kɨŋ na ɨl kalɨn̰ ma, ɨŋ ɨrɨm kɔldɔ karu naŋ. Na cɨndi, tumɔ ɨŋ ɨrɨm kɔldɔ karu hange. Ama haw kɛ ɨŋ sol gɨ magtubu tɨnge le lee gɨ kɨŋ ɨle, ama kɨŋ ɨle na gɨ ni tɨwa lam wo̰.

⁹ Haw kɛ na ɨŋ lee gusi-mɔwa. Ɨŋ laa gusi-mɔwa na kɨya ɨle kogɨŋ naŋ. Ɨŋ lee gusi-mɔwa na kɨya gɨ ɨle kogɨŋ le orɨn̰ danagɨŋ gɨ kɨŋ bɨle haldɨgɨŋ. Ɨle kogɨŋ le Kumu ay leen̰ gɨye, na toy di hɨn̰ wo̰ ma mani dɨbgɨŋ gasɨra dɨŋ naŋ.

¹⁰ Kɨya wa ɨle gɨ da ungo gɨ Kumu ay leen̰ gɨye le, kɨya wɔɔ na hal gɨ bɨli gɨ kɨya orɨn̰ dan̰ ungo dobii kɨɗɨn̰ pɔɗɛ gaŋ bɨ, ungo gɨ ɨrɨmde koldi karu naŋ bɨ. Ama ɨle gɨ da ungo gɨ a cay gɨsəŋ gaŋ kɛ, gɨ sɔlɛ ba ɨrgan̰ le, wɔɔ na tɨma.

¹¹ Kumu ay ɨle kogɨŋ leen̰ gɨye, haw kɛ na sɨlagɨŋ hɨnga ga ɨle kogɨŋ ba lee! Kɨŋ ɨre cɨn̰ kandi lɔɔ gaŋ dan̰ kuduroygɨŋ ga pɨna. Kɨŋ say haw wo̰ dor kɔl dorɨn̰ kɔl caygɨŋ bɨ, kuduroygɨŋ mundoŋ kol ɨsɨna bɨ. Kɨŋ hɨndar hɨnga ga ɨsɨna kɨya ɨrgan̰ bɨ, tabɨlaŋnɨ say ləgɨŋ tɔgɨ bɨ. Kuduroygɨŋ say lee gɨ kɨŋ ɗal ba-lɔɔ ɨsɨna le. Ɨni na, kɨŋ gɨl dan̰ te gɨyəŋ nɔm gɨ kɨŋ na unɔ a boy kɔl gɨ nee gɨŋ le.

¹² Na cɨndi, wɔlɛ gɨ nee le ɨŋ wal magtubu gɨyɨn̰ bɨgɨŋ, ama ɨŋ wala na kɨya cay ungo gɨ ba-lɔɔ ɨsɨna le naŋ bɨ, cay ungo gɨ leeyige ɨsɨna le naŋ bɨ. Ɨŋ wal na kɨya gɨle gɨ kɨŋ na som pɛɗɛɗɛ gɨ ni lɔɔ hɨnga kol cayni. Sɔmɛ gɨ kɨŋ ba som pɛɗɛɗɛ kol cayni le, woy cɨn̰ tɨwa dɨŋ ɗen̰ ɗen̰ cɨndɨgɨŋ bɨ, cɨn̰ Kumu bɨ.

¹³ Na toy di hɨn̰ wo̰ ma gɨye-lɔɔdɨgɨŋ jal ɗugoyni. Ni waa na jale kudurɔ ƴɔbɨ naŋ, Titɨ gɨ kɨŋ-gandi nɔm kɨŋ lee gɨ kuduroy ba-dugo le, gusi-mɔwa toyi bɨni gusi-mɔwa gɨɗaŋ bɨ.

¹⁴ Kɨŋ lee gɨ canɨ ayaŋ daa kɨɗɨn̰ ga ɨŋ ba yen̰ Titɨ kɔldɨgɨŋ, kɔl hɨnge gɨ nee le daŋ dasi naŋ. Hɨn̰ gɨ kɔl nɔm gɨ ni ba yəgɨŋ naa cɨndi na, kɔl nɔm gɨ ɨŋ ba ye kol caygɨŋ tumoy Titɨ kalɨn̰ ma bɨle na gɨ cɨndi bɨ.

¹⁵ Geye gɨ da Titɨ gɨ woy kol caygɨŋ kondɨ ɗɨn̰ gɨ tumɔ ƴee, kɨɗɨn̰ ga kuduroyi hɨn a cay jɔɔ gɨ kɨŋ-gandi nɔm kɨŋ je kɔl kɨbɨni bɨ, ƴɔmɛ gɨ kɨŋ ƴomni gusɨgɨŋ dan̰ bɔgɛ kɔl bɨ dan̰ lɔɔ pag pag togɨŋ bɨ na.

¹⁶ Gusɨnɨ mɔŋ tɔgɨ kɨya wa ɨŋ ɓal bɔgɛ kuduronɨ caygɨŋ ojɨn̰ cay hɨnga nɔm.