2 Korɛ̰t 6 - Gabri Maja

¹ Naa hɨn̰ wo̰ na ni-gandi ga ni na ka-lɔɔ gɨye pɨna dan̰ Kumu le, ni lee n̰age toygɨŋ, kɨŋ ɗɔɔ ɗarwa di kɨŋ ba way gusi Kumu le bɨle hɨnga ga kalɨn̰ wo̰ dugo naŋ.

² Na cɨndi Kumu ye a duroy magtubu toy dɨŋ hɨn̰: «A boy tɨwa di ba kuɗa, Di ni leen̰ ɗarwa dɨŋ le, Ɨŋ je noy ɔlɛ kon̰. A boy wɔlɛ pɔɗɛ gɨŋ le, Ɨŋ gɨrɨn̰ daa.» Jagɨŋ, na tɨwa di ba kuɗa di Kumu kɨya leen̰ ɗarwa ba kɛ. Na wɔlɛ gɨ ni pɔɗɛ ba kɛ.

³ Ni gey lɔɔ hɨnga ga ɨsɨni wo̰ gɨ kɨya bɨle gundi sɨya dɔgɛ tɨbay ungo nayi naŋ, kɨya wa ni gey gɨ ungo na gɨ dɔrɛ kol gɨye gɨ ni lee ɨsɨn naŋ.

⁴ Dan̰ gɨyəŋ gɨ da haldɨni le, ni gɨl a duroy hɨnga nɔm gɨ ni naa ka-lɔɔ gɨye ga da Kumu. Ni hay mani hay-kuduroyni ƴee duroy dɔsɛ-ɗugɔ gaŋ bɨ, duroy hɨnga ga ni mɔndɛ kudurɔ gaŋ bɨ, duroy hɨnga ga osɨdəŋ osɨdəŋ gaŋ bɨ.

⁵ Tenige bɨ, beenige dangay dɨŋ bɨ, gosɨrge kalaŋ cayni bɨ, ni lee gɨye ga osɨdəŋ osɨdəŋ bɨ, ni narɨn̰ cɨndɨni kuŋ bɨ, ni hay kɨbɨni bɨ.

⁶ Ni gɨl gɨ ni na marɨne ka-lɔɔ gɨye gɨ da Kumu dan̰ gɨyəŋ gɨ da haldɨni gɨ duroŋ mɨra bɨ, sɔlɛ-hɨnga kani bɨ, dɨbe-ɗugɔ toni bɨ, ɗarwa toni bɨ. Na dan̰ gɨyəŋ gɨ da Turnɔ ɗe-kuduroy-bɛrɛ bɨ, geye koni gɨ leen̰ cɨndi bɨ,

⁷ kɔl gɨ cɨndi gɨ ni ye bɨ, dɔnɔ di da Kumu bɨ. Hal gɨ dan̰ durɔ ɗɨngar ma na hɨnga ga ni wɔrɨn̰ɛ kani ga ni orɨn̰ a kobɨni gɨ bara gɨŋ bɨ, a kobɨni gɨ masa gɨŋ bɨ.

⁸ Kalaŋ ga pɨna dɨbɨge gusoŋ-tɔgɛ cayni bɨ, kan ga ɗaŋ hagɨrnige bɨ. Kalaŋ ga pɨna yege kɔl gɨ ɨsɨni cayni bɨ, kan ga ɗaŋ yege kɔl gɨ ɗari cayni bɨ. Leenige leen̰ kalaŋ ka-yɔɔ-kɔl poy, ama ni na ka-yɔɔ kɔl gɨ cɨndi.

⁹ Leenige leen̰ kalaŋ ga ungo sɨlage naŋ, ama solnige kuɗa. Leenige leen̰ kalaŋ ga kɨya mare mɨnde, ama sɨlagɨŋ ni som-bɨra. Somdɨnige, ama dɨɗɨnige naŋ.

¹⁰ Leenige leen̰ kalaŋ ka-n̰age, ama gusɨni moni dan̰ wɔlɛ pɨna pɨna. Leenige leen̰ kalaŋ ga wɔɔdɨge unɔ, ama ni lee gɨ kalaŋ kondɨ wayge kandi-wɔɔ. Leenige leen̰ kalaŋ ga ɨran̰ dan̰ hɨnga naŋ, ama ni orɨn̰ dan̰ hɨnga nɔm.

¹¹ Kɨŋ-gandi karmɨni ga ban̰aŋ dan̰ ga kandɨ a cay ƴaa-di-gumu di Korɛ̰t, ni tɨlmɨgɨŋ cay hɨnga pɨna naŋ, ni yəgɨŋ kɔl na daa waŋ. Ni ɗe ɗugoyni wol bɨgɨŋ.

¹² Ni-gandi ni lɨgɨgɨŋ kɨbɨ gɨyəŋ naŋ, ama na kɨŋ-gandi ba lɨgɨni kɨbɨ gɨyəŋ kogɨŋ daa.

¹³ Ɨŋ yəgɨŋ kɔl na hɨn̰ karɨnɨ wo̰. Laanigɨŋ hɨnga ga ni ləgɨŋ. Hangagɨŋ ɗugoygɨŋ bɨni.

Bugoŋgɨŋ pɨna dan̰ ka-kan̰e Kumu naŋ

¹⁴ Kɨŋ ɗɔɔ ba bugoŋ pɨna dan̰ kalaŋ ga ayage kuduroyge naŋ, kɨya wa kɨŋ na pɨna naŋ. Kɛ kandi page ga toyge kan̰dɨge kɨya ɓale aye jugu pɨna yagɨn̰ ga? Kɛ kalaŋ ga dan̰ durɔ ɗɨngar kɨya bugoŋge dan̰ kalaŋ ga gɨye-lɔɔdɨge ɨsɨn ga? Kɛ asɨn̰a dan̰ dɨlɨm dayaŋge pɨna ga?

¹⁵ Kɛ Kɨris gɨ ɓale bugoŋ pɨna dan̰ Sidan ga? Kɛ ba-aye kudurɔ gɨ ɓale bugoŋ pɨna dan̰ ba-aye kudurɔ naŋ ga?

¹⁶ Kɛ na wa ba kɨya ɓale daye ƴaa-di-da-Kumu dan̰ kulan̰əŋ ga? Kɨya wa na-gandi na, na na ƴaa-di-da-Kumu gɨ som-bɨra dan̰ tumoyi hɨn̰ gɨ ban Kumu gusi ba ye duroy magtubu toy dɨŋ le, ban ye hɨn̰: «Ɨŋ kɨya sɔmɛ duroyge bɨ, Ɨŋ kɨya gɔrɛ duroyge bɨ, Ɨŋ kɨya bɨle Kumu koge bɨ, Kan kɨya bɨle na kalaŋ kange bɨ.»

¹⁷ Na toy di hɨn̰ wo̰ ma Ba-gulɔŋ Kumu ye hɨn̰: «Andaŋgɨŋ duroy kalaŋ ga nee le coŋ, Dɨragɨŋ gusɨgɨŋ coŋ gusɨge, Cɨlegɨŋ hɨnga pɨna wo̰ ga lee kɨni naŋ, Ɨni na ɨŋ kɨya ƴomgɨŋ gusɨnɨ.»

¹⁸ «Ɨŋ kɨya bɨle baygɨŋ bɨ, kɨŋ-gandi kalɨn̰ ma kɨŋ kɨya bɨle karɨnɨ ga ban̰aŋ dan̰ kandɨ bɨ. Ba-gulɔŋ gɨ dɔnɔdi ɗɨn̰ dɔnɔ nɔm ba yɔ hɨn̰ wo̰.»