2 Korɛ̰t 5 - Gabri Maja

Kuyoŋ-gusu gɨ a gɨɗɨgɨ-Kumu gɨŋ

¹ Kuyoŋdi-gusɨna na ƴaa tona di a cay gɨsəŋ gaŋ kɛ di woy gɨlɨn̰ hɨn̰ dabaŋ wo̰. Ama na solgɨŋ kuɗa hɨn̰ gɨ ƴaa di nee le na mundoŋ coŋ na, na orɨn̰ dan̰ hɨndi di kɨya sɔmɛ dan̰ tumɔɔ a gɨɗɨgɨ-Kumu gɨŋ. Ƴaa di nee le, na ƴaa di ungo gɨ ɨndi ba lɔɔ dan̰ kobi naŋ, ama na Kumu ba lɔɔ kol cayna.

² Haw kɛ na, na ɨle gusɨna a duroy kuyoŋdi-gusɨna gɨŋ gɨ woy gɨlɨn̰ hɨn̰ dabaŋ wo̰ le, kɨya wa na orɨn̰gɨŋ dan̰ tabɨlaŋdi sɔmɛ duroy ƴaa di woy a gɨɗɨgɨ-Kumu gɨŋ. Ho’o, woy gɨlɨn̰ na hɨn̰ gɨ na ba gey dobɨn̰ badɨge ga hɨrɨwa cay kamdɨge ga woy gusɨna wo̰.

³ Hɨn̰ wo̰ na kɨɗɨn̰ ga na kɨya bugoŋ a gɨɗɨgɨ-Kumu gɨŋ na, turnoyna kɨya sɔmɛ tɔɔ kalɨn̰ naŋ.

⁴ Na cɨndi kɨɗɨn̰ ga na ba som a te dabaŋdɨna gɨ a cay gɨsəŋ gaŋ kɛ ƴee le, na dor ule na kɨya gɨ na woy na duroy hɨnga ga nɨn̰wadɨge ɗɨn̰ togɨynagɨŋ gaŋ. Ho’o, na mala na gɨ ɗe kuyoŋdi-gusɨna gɨ a cay gɨsəŋ gaŋ kɛ na unɔ naŋ. Ama na orɨn̰ na dan̰ n̰agedi dɔbɛ kuyoŋdi-gusɨna gɨ a gɨɗɨgɨ-Kumu gɨŋ, ɗe hɨnga ga ba kɨya mare coŋ le, sɔmɛ-bɨra gɨ dan̰ tumoyi na ƴa cayge sɨmbaɗ.

⁵ Kumu kalɨn̰ ma ƴom cay tɨbayna kɨya cay sɔmɛ-bɨra gɨ nee le, ban bɨna dan̰ Turnoyi ɗe na bɨle hɨnga ga gɨl gɨ ban na bɨna hɨnga ga ɗari ga ban ƴom cay tɨbayge kol cay na le.

⁶ Dan̰ wɔlɛ pɨna pɨna le na sɨla hɨnga pɨna naŋ. Ɨni na, na sol hɨn̰ gɨ na na sɨmagɨŋ a boy kuyoŋdi-gusɨna gɨ kɛ gɨŋ ƴee na, na woy na hen̰ dan̰ Ba-gulɔŋ.

⁷ Na cɨndi, na godɨrde na dan̰ gɨyəŋ gɨ da aye kudurɔ kona wala na gudɨrda na dan̰ gɨyəŋ gɨ da hɨnga ga na sol dan̰ cɨndɨna naŋ.

⁸ Ho’o, na sɨlan̰ hɨnga pɨna naŋ, hɨnga ga mona tɔgɨ na, na gɨ na na ɗa kuyoŋdi-gusɨna gɨ ba kɛ coŋ ɨran̰ sɨman̰ gusi Ba-gulɔŋ.

⁹ Na toy di hɨn̰ wo̰ ma, hɨn̰ gɨ na na sɨma naa a boy kuyoŋdi-gusɨna gɨ a cay gɨsəŋ gaŋ kɛ wala, na na ɗay coŋ kalɨn̰ ma, hɨnga ga cɨla ɗɨn̰ hɨnga nɔm ga ɗaŋ na, na gey lɔɔ na hɨnga ga kɨya ƴɔɔ cɨn̰ Ba-gulɔŋ.

¹⁰ Kɨya wa naa wa wa kalɨn̰ ma, na-gandi nɔm na kɨya ɨregɨŋ tumoy Kɨris ɗe ban na bon̰ kɔl caynagɨŋ. Kɨɗɨn̰di ga nee gaŋ le na, waŋ waŋ kalɨn̰ ma kɨya wɔɔ hɨnga ojɨn̰ cay gɨye-lɔɔdi gɨ ɗari, naŋ le gɨ ɨsɨni, na hɨnga ga ban lee kɨɗɨn̰ ga ban ban̰ dan̰ kuyoŋdi-gusi a cay gɨsəŋ gaŋ kɛ.

Kɨris na ba bɔgɨna pɨna dan̰ Kumu

¹¹ Na-gandi na sol gɨ, na wa ma na hundɔrɔ Ba-gulɔŋ. Lee gɨ na mal na gɨ ni gɨlɨn̰ kalaŋ ɗe na solge kɔl gɨ cɨndi. Kumu solna kuɗa bɨ, ɨŋ ɨrɨm gɨ kɨŋ solni kuduroygɨŋ kuɗa bɨ.

¹² Ni-gandi, ni gey na gɨle gusɨni ɗaŋ coŋ bɨgɨŋ naŋ. Ama ni-gandi ni gey bɨgɨŋ na gɨyəŋ ɗe agɨŋ na leen̰ tɨmon̰ ojɨn̰ cayni dan̰ caygɨŋ di ayaŋ daa. Hɨn̰ wo̰ na, kɨŋ kɨya ɓale dɨbe kɔl nee bɨn̰ ka-gɨle gusɨge dan̰ hɨnga ga woy cɨn̰ kalaŋ ƴɔbɨ, wala na dan̰ hɨnga ga woy a ɗugoy ungo gaŋ naŋ.

¹³ Hɨn gɨ kalaŋ na ya gɨ cayni na laa gɨye naŋ na, na kɨya cay Kumu ama kan sɨlage naŋ. Ama na wɨya hɨn̰ gɨ cayni na laa gɨye na, na kɨya caygɨŋ kɨŋ-gandi.

¹⁴ Kɨya wa na geye gɨ da Kɨris ba orɨn̰ danani ma mani leen̰ hɨn̰ wo̰, ni-gandi ga ni sol kuɗa gɨ na ungo pɨna hayi ƴɔbɨ ba mare a ban̰di kundɨwa gɨ da kalaŋ le. Hɨn̰ wo̰ na kan nɔm mage danayi.

¹⁵ Ban ma na kɨya cay kalaŋ nɔm ɗe kan ga somge-bɨra le na sɨmage-bɨra na kol cayge ke naŋ, ama na kol cay ban gɨ ma ma boy lɨbɨ kol cayge le.

¹⁶ Na toy di hɨn̰ wo̰ ma, ni sɨla ungo pɨna dan̰ gɨyəŋ gɨ da kalaŋ ga ɨndəŋ naŋ. Hɨn̰ gɨ jɨne ni na sɨla Kɨris dan̰ gɨyəŋ gɨ da kalaŋ ga ɨndəŋ kalɨn̰ ma, haw kɛ na ni sɨlayi na hɨn̰ wo̰ naŋ.

¹⁷ Hɨn̰ gɨ ungo na bugoŋ pɨna dan̰ Kɨris na, ban na ungo gɨ hɨrɨwa. Sɨla, hɨnga ga ɨlgi pɨde coŋ ɨni bɨ, hɨnga nɔm bɨle na ga hɨrɨwa bɨ.

¹⁸ Hɨnga ga nee le nɔm sayga na gusi Kumu gɨ ba bogɨna pɨna danayi dan̰ gɨyəŋ gɨ da Kɨris bɨ, gɨ ba bogɨna gɨye bɔgɛ kalaŋ pɨna danayi, kobɨna bɨ.

¹⁹ Na cɨndi, tumɔ Kumu lee gɨye dan̰ gɨyəŋ gɨ da Kɨris been̰ kalaŋ pɨna danayi, dɨle ɗɔngɨsɛ kardi hɨnga ga dan̰ gɨyəŋdɨge naŋ ga kan leege le. Gɨye bɔgɛ kalaŋ pɨna danayi gɨ nee le, Kumu gusi ba bogɨni kobɨni.

²⁰ Na Kɨris ba gɨyni gusɨgɨŋ kɨya yon̰ kɔl danagɨŋ dan̰ gusondi. Hɨn̰ gɨ naa Kumu gusi na ba ƴɔlɛ kɨbɨni dobɨn̰ bandɨ kuduroygɨŋ wo̰. Ni lee n̰age toygɨŋ dan̰ guson̰ Kɨris kɨya cay hɨnga ga kɛ le: Kɔgɨɗɔ, kɨŋ ɗɔɔ ba kan̰e bugoŋ pɨna dan̰ Kumu naŋ.

²¹ Tumɔ le Kɨris ɨran̰ dan̰ ɨsɨna cayi naŋ, ama Kumu bɨli leen̰ ba-lɔɔ ɨsɨna. Ɗe gɨ dan̰ gɨyəŋ gɨ da Kɨris na, na na bɨlɨn̰ kalaŋ ga dan̰ durɔ ɗɨngar cɨn̰ Kumu kol cay gɨye-lɔɔdi gɨ nee le.