2 Korɛ̰t 4 - Gabri Maja

Na kojɨ kandi-wɔɔ boy pɨray gɨŋ

¹ Kumu sol cɨn̰-n̰age toni, lee gɨ ban bɨni gɨye gɨ nee le. Na toy di hɨn̰ wo̰ ma, gusɨni marani naŋ.

² Ni-gandi ni kan̰ hɨnga ga ni dasi ga leege kɨɗɨn̰ wɔsɛdɨge gaŋ coŋ bɨ, ni laa hɨnga dan̰ jɨba naŋ bɨ, ni tɨba kɔl gɨ da Kumu dan̰ poy pɨna naŋ bɨ. Ama na kɔl gɨ cɨndi ma mani ye cɨn̰ tɨwa dɨŋ, ni mal na gɨ kalaŋ nɔm na laa tɨmon̰ a cay haldɨni gɨ ɗari tumoyi Kumu.

³ Ama hɨn̰ gɨ hɨnga na tɨla cɨn̰ Kɔl-gɨ-Ɗari gɨ ni ba tee bɛrnɛdi le na, tol na cɨn̰ kan ga kɨya kayaŋge a te gɨyəŋ gɨŋ coŋ.

⁴ Kan ayage kuduroyge naŋ, na kɨya gɨ kumu gɨ a cay gɨsəŋ gaŋ lɨgɨde cɨndɨge ɗe na somɨn̰ge duroy dɨlɨm dɨŋ. Lee gɨ kan ɓalage sɔlɛ asɨn̰a gɨ da Kɔl-gɨ-Ɗari gɨ gɨl gusoŋ-tɔgɛ gɨ da Kɨris gɨ na gɨln̰a da Kumu le naŋ.

⁵ Na cɨndi, kɨɗɨn̰ ga ni ba tee bɛrnɛ le, ni tɨga na bɛrnɛ di uja cayni naŋ, ama ojɨ na cay Jesu-Kɨris gɨ na Ba-gulɔŋ. Gɨ ojɨ cayni ni-gandi na, ni ye gɨ ni naa marɨne kagɨŋ ka-gɨye kol Jesu.

⁶ Kɨya wa Kumu gɨ tumɔ ba yɔ hɨn̰: «Ɗa gɨ asɨn̰a na asɨn̰a kɨɗɨn̰ duroy dɨlɨm dɨŋ le», ban asɨn̰ ɗugoyna ɗe ana na solɨn̰ asɨn̰a di da Kumu di jɨran̰de a cɨn̰ Kɨris.

⁷ Ama na-gandi ga na kojɨ kandi-wɔɔ ga nee le, na woy gɨlɨn̰ na hɨn̰ pɨray gun̰u wo̰, ɗe kalaŋ solɨn̰ gɨ dɔnɔ di ɗɨn̰ cɨn̰-kɨɗɨn̰ di ni ba leen̰ gɨye le, na sayga na gusi Kumu wala naa gusɨni ni-gandi naŋ.

⁸ Ni-gandi le jəŋgɨnige a kɨɗɨn̰ gaŋ nɔm, ama kan kɨya ƴomnige dugo naŋ. Ni-gandi le ni waa cay tɨbayni naŋ, ama ɗugoyni adɨldani naŋ.

⁹ Kalaŋ gɨlnige-cɨn̰, ama Kumu ɗani coŋ naŋ. Laydɨnige, ama tɨɗabage kɨbɨni naŋ.

¹⁰ Jesu gɨl-cɨn̰ bɨ ma bɨ. Na-gandi kalɨn̰ ma, na kɨya gɨle-cɨn̰ hɨn̰ ban wo̰ a kɨɗɨn̰ gaŋ nɔm, ɗe sɔmɛ-bɨra gɨ da Jesu gɨl gusi kuyoŋdi-gusɨna gɨŋ bɨ.

¹¹ Na-gandi na somgɨŋ-bɨra, ama daa daa na somgɨŋ kɨbɨ tɨma dɨŋ kol cay Jesu. Hɨnga ga nee le lee gusɨge ɗe sɔmɛ-bɨra gɨ da Jesu na laa gusi a kuyoŋdi-gusɨna gɨ ba kɨya mare gɨŋ le bɨ.

¹² Na toy di hɨn̰ wo̰ ma, ni-gandi ni som duroy tɨma dɨŋ ɗe agɨŋ na wan̰ sɔmɛ-bɨra gɨ dan̰ tumoyi.

¹³ Walge duroy Magtubu di da Kumu dɨŋ yege hɨn̰: «Ɨŋ bee kuduronɨ cay nee, na toy di hɨn̰ wo̰ ma maŋ yen̰ kɔl.» Ni-gandi kalɨn̰ ma ni orɨn̰ dan̰ aye kudurɔ gɨ gɨlɨn̰ hɨn̰ aye kudurɔ gɨ nee le bɨ. Ni-gandi ni bee kuduroyni cay nee, na toy di hɨn̰ wo̰ mani yen̰ kɔl.

¹⁴ Kɨya wa ungo gɨ ba bɔyɛ Ba-gulɔŋ lɨbii le ni sol gɨ ni-gandi kalɨn̰ ma, ban kɨya boyni lɨbni dan̰ Jesu pɨna bɨ, kɨya ɗoni a gusi mɨnde pɨna danagɨŋ bɨ.

¹⁵ Hɨnga nɔm ga ba andaŋ cayni le na kol caygɨŋ, ɗe ɗarwa di da Kumu andaŋ gusi kondɨwadi kalaŋ jɨn̰ tumɔ tumɔ. Hɨn̰ wo̰ na kondɨwadi kalaŋ kɨya loon̰ge Kumu ho’o bɨ, dɨbege gusoŋ-tɔgɛ cayi bɨ.

Sɔmɛ-bɨra dan̰ gɨyəŋ gɨ da aye kudurɔ

¹⁶ Na toy di hɨn̰ wo̰ ma, ni ɗa gusɨni marani naŋ. Na cɨndi, kuyoŋdi-gusɨna togii na duroŋ dḛ dḛ kalɨn̰ ma, sɔmɛ-bɨra gɨ hɨrɨwa woy te sɔ cay mɨngay gɨŋ dan̰ wɔlɛ pɨna pɨna.

¹⁷ Dɔsɛ-ɗugɔ di ni ba wayoo haw kɛ le hɨmbal bɨ, kardo kɨya sɨngɨɗɨwa naŋ bɨ. Ama dɔsɛ-ɗugɔ di nee le n̰an na, na kɨya cay gusoŋ-tɔgɛ gɨ ɗɨn̰ cɨn̰-kɨɗɨn̰ gɨ toy kɨya ayaŋ naŋ.

¹⁸ Na hɨnga ga ungo sol dan̰ cɨndi ma mani ɗa cɨndɨni cay nee naŋ. Ama ni ɗe cɨndɨni na cay hɨnga ga ungo ɓala sɔlɛ dan̰ cɨndi naŋ. Kɨya wa hɨnga ga ungo sol dan̰ cɨndi le, na hɨnga ga kardɨge kɨya sɨngɨɗɨwa naŋ. Ama hɨnga ga ungo ɓala sɔlɛ dan̰ cɨndi naŋ le, na hɨnga ga kɨya wɔyɛ dan̰ tumoyge.