2 Korɛ̰t 3 - Gabri Maja

Saɗe kɨbɨ pɨna ɓɨse gusu gɨ hɨrɨwa

¹ Gajanaŋ kɨŋ gɨ yɔ gɨ ni na ay naa te gɨle gusɨnɨ coŋ. Naŋ, na hɨn̰ wo̰ naŋ. Na cɨndi kalaŋ ga pɨna orɨn̰ge dan̰ n̰agedi magtubu di kɨya lɔɔ tɨmon̰ kol cayge, ko na magtubu di ni orɨn̰ bɨgɨŋ wala, ko na magtubu di ni orɨn̰ kɨɗɨn̰ ga ɗaŋ gaŋ. Ama hɨnga ga nee le ni ɨran̰ dan̰ n̰agedɨge naŋ.

² Kɨŋ-gandi gusɨgɨŋ, kɨŋ na magtubu toni. Kan walgɨŋge ɗugoyni bɨ, kalaŋ nɔm ɓalge sɔlɛ bɨ, ɓalge ɗɔngɨsɛ bɨ.

³ Ho’o, kɨŋ na magtubu di Kɨris wal dobɨ kobɨni gɨ ni na bɨn̰ kalaŋ le, gɨ nee le woy arɨn̰ cɨn̰ waŋ waŋ. Kɨŋ na magtubu di walage dan̰ kaŋdi hɨnga ga ɨndi naŋ, ama na di walge dan̰ Turnɔ di da Kumu di som-bɨra dan̰ tumɔɔ. Kɨŋ na kɔl gɨ walage duroy kɨbɨ garma gɨ habɨli gɨŋ naŋ, ama duroy ɗugon̰ ungo gɨŋ.

⁴ Ni ye kɔl gɨ nee le na kɨya kuduroyni ga ni bee a cay Kumu dan̰ gɨyəŋ gɨ da Kɨris.

⁵ Ni-gandi cay gusɨni ni ɨran̰ dan̰ tɔgɨ di ojɨ ɗe ani leen̰ gɨye gɨ nee le naŋ. Ni ɓal lɔɔ gɨye gɨ nee le kɨya wa na Kumu ba bɨni tɔgɨ.

⁶ Na ban ba bɨni dan̰ tɔgɨ di ojɨ ɗe ani na bɨlɨn̰ ka-gɨye bɨ, ani na leen̰ gɨye bɨn̰ Kumu a te saɗe kɨbɨ pɨna ɓɨse gusu gɨ hɨrɨwa gɨŋ bɨ. Saɗe kɨbɨ pɨna ɓɨse gusu gɨ hɨrɨwa gɨ nee le na gɨ da gasaŋ ga walge jɨne naŋ, ama na gɨ da Turnɔ di da Kumu di dor tumoyna. Kɨya wa gasaŋ ga walge a duroy magtubu dɨŋ le ɨrgan̰ na dan̰ tɨma, ama Turnɔ di da Kumu ɨrgan̰ na dan̰ sɔmɛ-bɨra gɨ dan̰ tumoyi.

⁷ Gasɨn̰-kɔl ga walge a garma gɨ habɨli gɨŋ le, andaŋ na dan̰ asɨn̰a di gumu. A wɔlɛdi gɨ nee gɨŋ le cɨn̰ Moyis asɨn̰ dan̰ asɨn̰a di te wɨn̰je gɨ da Ɨsɨrayɛl ɓalage dɨbe cɨndɨge a cɨndi solii naŋ. Ama naa hɨn̰ wo̰ kalɨn̰ ma na asɨn̰a di kɨya pɨde. Hɨn̰ gɨ gasɨn̰-kɔl gɨ gɨye-lɔɔdo orɨn̰ dan̰ kalaŋ na tɨma dɨŋ le, na andaŋ dan̰ asɨn̰a di hɨn̰ wo̰ na,

⁸ kɛ na mɨna ma gɨye-lɔɔ gɨ da Turnɔ di da Kumu le kɨya asɨn̰a ɗɨn̰ naŋ ga?

⁹ Hɨn̰ gɨ gɨye gɨ lee gɨ kɔl ƴom cayi kalaŋ tumoy Kumu na ɨran̰ dan̰ asɨn̰a na, kɛ na mɨna ma gɨye gɨ lee gɨ kalaŋ bɨləŋge kalaŋ ga dan̰ durɔ ɗɨngar tumoy Kumu le, gɨ orɨn̰ dan̰ asɨn̰a di ɗɨn̰ naŋ ga?

¹⁰ Na cɨndi, tumɔ asɨn̰a di jɨran̰de woy bɨ, haw kɛ asɨn̰a di jɨran̰de di ɗaŋ di ɗoo coŋ ɨrga bɨ, kayoo.

¹¹ Hɨn̰ gɨ hɨnga ga sɨma kardɨge sɨngɨɗɨ naŋ asɨn̰adɨge na wɨya nee na, kɛ na mɨna ma hɨnga ga kɨya sɔmɛ dan̰ tumoyge le, asɨn̰adɨge gɨ kondɨwa ɗɨn̰ tɔgɨ naŋ ga?

¹² Na toy di hɨn̰ wo̰ ma hɨnga ga ni ba bee ɨrɨme dɨ ni cay nee le, ni ɓal ƴɔɔ kɔldɨge dan̰ cɨn̰ bandɨ.

¹³ Ni-gandi ni kɨya lɔɔ hɨn̰ gɨ da Moyis wo̰ naŋ. Ban tool cɨndi dan̰ kɨbɨ badɨge narɨn̰ te wɨn̰je gɨ da Ɨsɨrayɛl solɨn̰ gɨyəŋ te ayaŋ gɨ da jɨran̰de.

¹⁴ Ama kan ga nee le ɨrɨmedɨge lugoŋ. Bɨrɨŋ gɨsɨn̰ labɨde hɨn̰ gɨ kan na ɗɨngɨsa kɔl gɨ da saɗe kɨbɨ pɨna ɓɨse gusu gɨ ɨlgi bɨge na, kɨbɨ badɨge ga tool cɨn̰ le woy ɨrɨmedɨge gɨŋ narge sɔlɛ duroy kɔl kuɗa. Kɨbɨ badɨge le kɨya ayaŋ na hɨn̰ gɨ kan na bugoŋ pɨna dan̰ Kɨris dɨm.

¹⁵ Ho’o, bɨrɨŋ gɨsɨn̰ labɨde hɨn̰ gɨ kan na ɗɨngɨsa magtubu di da Moyis bɨge na, kɨbɨ badɨge ga tool ɗugoyge woy nee ƴee.

¹⁶ Ama hɨn̰ gɨ ungo na bɨl gusi guson̰ Ba-gulɔŋ na, kɨbɨ badɨge ga tool ɗugoyi le kɨya ayaŋ coŋ bɨ, ban kɨya sɔlɛ duroy kɔl kuɗa.

¹⁷ Ba-gulɔŋ le na Turnɔ di da Kumu, kɨɗɨn̰ ga Turnoy Ba-gulɔŋ woy a nee le, na kɨɗɨn̰ ga ni somɨn̰-dan̰-ca kalɨn̰.

¹⁸ Na-gandi nɔm ga ayge kɨbɨ badɨge ga tool cɨndɨna a cɨndɨna coŋ le, na gɨl asɨn̰a gɨ da Ba-gulɔŋ doŋ. Na hɨn̰ wo̰ ma bɨlnage ɗe ana na woy gɨlɨn̰ hɨn̰ Ba-gulɔŋ wo̰ bɨ, san̰ a boy asɨn̰a di pɨnaa dɨŋ orɨn̰ boy asɨn̰a di ɗaŋ di gumu ɗɨn̰ di tumɔ bɨ le. Na hɨnga ga nee le ma na, gɨye-lɔɔ gɨ da Turnoy Ba-gulɔŋ gɨ lee kol cayna.