2 Korɛ̰t 2 - Gabri Maja

¹ Lee gɨ hɨnga ga ɨŋ ba ojɨ kuduronɨ ba kɛ: Ɨŋ kɨya jɔgɛ ɔrɛ tagɨŋ gɨ ni mɔndɛ kuduroygɨŋ naŋ ɨni.

² Kɨya wa hɨn̰ gɨ ɨŋ na mɨnda kuduroygɨŋ na, kɛ na waŋ ba kɨya lɔɔ gɨ ɗe gusɨnɨ na mɔŋ ga? Kɛ na kan ga ɨŋ mondɨ kuduroyge le ƴɔbɨ naŋ ga?

³ Kɔl gɨ naa ɨŋ ba wal duroy magtubu dɨŋ le, ɨŋ wal na ɗe gɨ ɨŋ na bugoŋ gusɨgɨŋ na, kalaŋ ga ojɨ gɨ kan na laa ɗe gusɨnɨ na mɔŋ le na bɨlge ka-mɔndɛ kuduronɨ naŋ. Kɨya wa ɨŋ sol kuɗa gɨ kɨŋ-gandi le, hɨn̰ gɨ gusɨnɨ na mɔŋ na, kɨŋ-gandi kalɨn̰ ma gusɨgɨŋ kɨya moogɨŋ bɨ.

⁴ Hɨn̰ gɨ kuduronɨ na mundoŋ tɔgɨ bɨ hɨnga na dɨsa ɗugonɨ bɨ kalɨn̰ ma, ɨŋ jɨbɨ kɨbɨnɨ walɨn̰ magtubu bɨgɨŋ dan̰ kaŋdi cɨnɨ. Na kɨya mondɨn̰ kuduroygɨŋ naŋ ama na ɗe gɨ kɨŋ na sɨlan̰ gɨ ɨŋ na lee-toygɨŋ.

Pol ɗe kuduroy jal cay ba-mɔndɛ kuduroy

⁵ Hɨn̰ gɨ ungo na mɨnda kuduroygɨŋ na, ban mɨnda na kuduronɨ ɨŋ-bandi pɨna dan̰ kan̰nɨ naŋ, gɨ ni leen̰ cɨndi na, na kɨŋ-gandi nɔm ma ban mondu kuduroygɨŋ. Ama na ɗɔɔ ba orɨn̰ dan̰ kɔl le hen̰.

⁶ Ojɨn̰ cay ungo gɨ nee le, sɔ gɨ kɨŋ ba say dan̰ kondɨwaygɨŋ adɨldii le, ɓal.

⁷ Naa hɨn̰ wo̰ na, kuɗa gɨ haw kɛ kɨŋ ɗa kuduroygɨŋ jala cayi bɨ, kɨŋ jala kuduroy bɨ. Kɨŋ laa hɨn̰ wo̰ ɗe ban somɨn̰ duroy cɨn̰-kula gɨ kɨya ɗɨn̰ cayi naŋ.

⁸ Na toy di hɨn̰ wo̰ ma maŋ dobɨ bandɨ kuduroygɨŋ gɨ kɨŋ na gɨlii ɗe ban sol gɨ kɨŋ na geyii.

⁹ Na toy di hɨn̰ wo̰ ma maŋ walɨn̰ dan̰ magtubu bɨgɨŋ, ɨŋ gey na gɨwase kuduroygɨŋ solɨn̰ kɛ kɨŋ na gɨ jɔɔ kɔl kɨbɨnɨ ojɨn̰ cay hɨnga nɔm ga?

¹⁰ Waŋ waŋ gɨ kɨŋ na ɗa kuduroygɨŋ jala cayi na, ɨŋ-bandi kalɨn̰ ma ɨŋ ɗe kuduronɨ jal cayi bɨ. Waŋ waŋ gɨ ɨŋ ba ɗe kuduronɨ jal cayi, a cay hɨnga ga dan̰ gɨyəŋdɨge naŋ ga ban lee le, ojii na kuduroy jalɨwa, hɨn̰ gɨ leen̰ cɨndi, hɨnga ga dan̰ gɨyəŋdɨge naŋ na wɨya nee. Ɨŋ ɗe kuduronɨ jal cayi na kol caygɨŋ tumoy Kɨris.

¹¹ Ɨŋ ɗe kuduronɨ jal cayi ɗe Sidan na wayɨn̰ gɨyəŋ gɨ ni narɨn̰ cɨndɨni naŋ. Na cɨndi Sidan le, na sol ɨrɨmedo nɔm.

Pol som dan̰ sɔlɛ kuduroy a Tɨrowas

¹² Ɨŋ bugoŋ a cay ƴaa-di-gumu di Tɨrowas kɨya togɨn̰-bɛrnɛ di da Kɔl-gɨ-Ɗari gɨ da Kɨris. Kɨɗɨn̰ ga ɨŋ bugoŋ na, Ba-gulɔŋ haŋgɨ kɨbɨ gɨyəŋ dɨbɨ hangɨwa ɗe gɨ ɨŋ na tɨgan̰ bɛrnɛ.

¹³ Ama ɗugonɨ ba dugo naŋ, kɨya cay kurɨnɨ Titɨ gɨ ojɨ gɨ kɨya bɔgɔŋ orɨn̰ tagɨŋ le, ɨŋ wayayi naŋ. Na toy di hɨn̰ wo̰ ma ɨŋ say gusi karmɨni ga Tɨrowas, orɨn̰ cay gɨsəŋ ga Masedɨwan gaŋ.

Aye banga te bugoŋ pɨna dan̰ Jesu-Kɨris

¹⁴ Kumu gɨ ba lɔɔ gɨ na ay banga dan̰ tɨwa nɔm kol bugoŋ gɨ na bugoŋ pɨna dan̰ Kɨris le, ɨŋ leeyi ho’o. Kumu lee gɨ ni or tɔgɛ bɛrnɛ di da Kɔl-gɨ-Ɗari a kɨɗɨn̰ gaŋ nɔm bɨn̰ kalaŋ ɗe solɨn̰ge te sarnay Kɨris. Te sarnay Kɨris gɨ kalaŋ sol le, woy gɨlɨn̰ na hɨn̰ sɔŋ ɨdɨr gɨ tɨnadi ɗɔ̰ kuɗa ƴee kɨɗɨn̰ nɔm wo̰.

¹⁵ Na cɨndi, na woy gɨlɨn̰ na hɨn̰ sɔŋ ɨdɨr gɨ gasɨmdi ɗɔ̰ tɨna mon̰ Kɨris bɨn̰ Kumu wo̰. Nana sɔŋ ɨdɨr gɨ ɗɔ̰ tɨna kuɗa duroyna na-gandi ga na woy te gɨyəŋ gɨ ni pɔɗɛ gɨŋ bɨ, duroy kan ga curoŋge a te gɨyəŋ gɨŋ bɨ.

¹⁶ Ojɨ cay kan ka-curoŋ te gɨyəŋ gɨŋ le, na ɗɔ̰wa̰ gɨ kɨya orɨn̰ dan̰ ungo tɨma dɨŋ. Ojɨ cay kan ka-wɔyɛ te gɨyəŋ gɨ ni somɨn̰-bɨra gɨŋ le, na ɗɔ̰wa̰ gɨ kɨya lɔɔ gɨ ungo kɨya somɨn̰-bɨra. Kɛ na waŋ ba kɨya ɓale lɔɔ gɨye gɨ hɨn̰ wo̰ le ga?

¹⁷ Kalaŋ kondɨ ayge kɔl gɨ da Kumu leen̰ge hɨnga ga ni gɨyaw, ama ni-gandi ni laa hɨn̰ wo̰ naŋ. Dan̰ bugoŋ gɨ ni bugoŋ pɨna dan̰ Kɨris le, ni dor kɔl gɨ sayga gusi Kumu dɨle orɨn̰ dan̰ ɨrɨme gɨ ɗaŋ a kuduroyni tumoy Kumu.