2 Korɛ̰t 13 - Gabri Maja

Hale gɨ karu gɛs bɨ lapɨya bɨ

¹ Na tɨba sɨbɨdi gɨ ɨŋ kɨya ɔrɛ tagɨŋ. Gɨ nee le kɨya wɔyɛ gɨlɨn̰a hɨn̰ kɔl gɨ walge duroy Magtubu di da Kumu dɨŋ di ye hɨn̰: «Kɨŋ kɨya bɔyɛ kɔl nɔm na dan̰ gɨyəŋ gɨ da kɔl gɨ kalaŋ sɔɔ naŋ le sɨbɨ, ga leege tɨmon̰ koldi.»

² Na kɔl gɨ ɨŋ yəgɨŋ tumɔ ɨni, kɨɗɨn̰ ga ɨŋ ba orɨn̰ tagɨŋ gɨ ni tɨba sɔɔdi le. Ama labɨde gɨ ɨŋ ba unɔ duroygɨŋ le, ɨŋ jɨga yen̰ kan ga leege ɨsɨna tumɔ bɨ woyge te lɔɔ mɨjagɨ bɨ, yen̰ te kalaŋ nɔm bɨ ɗe na solge pa dɨm, hɨn̰ gɨ ɨŋ na jɨga ɨra gusɨgɨŋ na ɨŋ kɨya hale ungo dan̰ te tumɔ di jali naŋ.

³ Kɨŋ gey gɨ ɨŋ na gɨlgɨŋ hɨnga ga gɨl gɨ Kɨris na yəgɨŋ kɔl dan̰ kɨbɨnɨ ɨŋ-bandi. Kɨŋ kɨya sɔlɛ-hɨngadɨge haw kɛ: Kɨris gɨ a gusɨgɨŋ le dɔnɔdi dḛ naŋ bɨ, ban gɨl dɔnɔ toyi duroygɨŋ leen̰ cɨndi bɨ.

⁴ Na cɨndi, Kɨris le ɗe te dɔnɔ toyi daa marɨn̰ a cay sɨya-gɨ-dagɨli gɨŋ, ama ban som-bɨra dan̰ gɨyəŋ gɨ da dɔnɔ di da Kumu. Dan̰ te bugoŋ gɨ ni bugoŋ pɨna danayi le na, ni-gandi ni ɨran̰ dan̰ dɔnɔ toni naŋ, ama ni kɨya sɔmɛ-bɨra danayi dan̰ gɨyəŋ gɨ da dɔnɔ di da Kumu bɨ, na dan̰ gɨyəŋ gɨ da dɔnɔ di nee le mani kɨya lɔɔ hɨn̰ wo̰ duroygɨŋ bɨ.

⁵ Ɨngɨrgɨŋ gusɨgɨŋ kogɨŋ, kɛ leen̰ cɨndi kɨŋ na ka-aye kudurɔ ga? Kɨbagɨŋ gusɨgɨŋ sɨla. Kɛ kɨŋ sɨla gɨ Jesu-Kɨris na wɨya gusɨgɨŋ naŋ ga? Leen̰ cɨndi duroy kɔbɛ gusɨgɨŋ gɨŋ le hɨn̰ gɨ kɨŋ na sɨla gɨ Kɨris na unɔ gusɨgɨŋ na, kɨŋ na ga gabaŋ.

⁶ Ama ɨŋ sol leen̰ cɨndi gɨ kɨŋ sol gɨ ni gabaŋ duroy kɔbɛ gusɨni gɨŋ naŋ.

⁷ Ni ol Kumu ɗe gɨ kɨŋ na gɨ lɔɔ hɨnga ga ɨsɨni pɨna naŋ. Ɔlɛ koni na ɗe gɨ kalaŋ na sɨlage cɨn̰-narwa toni naŋ, ama na ɗe gɨ kɨŋ na laan̰ hɨnga ga ɗari. Ko kalaŋ ga pɨna na yage gɨ ni na gabaŋ duroy kɔbɛ gusɨni gɨŋ kalɨn̰ ma kɨya andɨge hɨnga naŋ.

⁸ Kɨya wa ni ɨran̰ dan̰ dɔnɔ wo̰ di ni jɨbɨn̰ kɔl gɨ cɨndi coŋ naŋ. Ni orɨn̰ na dan̰ dɔnɔ di ni loon̰ gɨye kol cay kɔl gɨ cɨndi ƴɔbɨ.

⁹ Hɨn̰ gɨ ni-gandi ni na ɨran̰ dan̰ dɔnɔ naŋ, ma naa kɨŋ-gandi ƴɔbɨ na ba ɨran̰ na, ni lee gusi-mɔwa. Ni ol Kumu kol caygɨŋ ɗe agɨŋ na bɨləŋ ka-aye kudurɔ ga duroŋ cɨrɛɗ.

¹⁰ Na toy di hɨn̰ wo̰ ma, ɨŋ wal kɔl gɨ kɛ le nɔm gɨyɨn̰ bɨgɨŋ kɨɗɨn̰ ga ɨŋ baa hen̰ danagɨŋ. Na ɗe gɨ kɨɗɨn̰ ga ɨŋ na bugoŋ duroygɨŋ na, ɨŋ na gɨ wɔɔ hɨnga ga ni san̰ danagɨŋ naŋ ko ɨŋ na ɨran̰ dan̰ dɔnɔ di da Ba-gulɔŋ di bəŋ. Ba-gulɔŋ bəŋ dɔnɔ na gɨ ni jɨbɨn̰ toygɨŋ agɨŋ na orɨn̰ jɨn̰ tumɔ wala na gɨ ni mondɨgɨŋ naŋ.

¹¹ Ay, karmɨnɨ ga ban̰aŋ dan̰ ga kandɨ, kɔl gɨ ni ba kɨya yɔ gɨ ni kagadi ba kɛ: Laagɨŋ gusi-mɔwa bɨ ɨragɨŋ tumɔ te duroŋ cɨrɛɗ gɨŋ bɨ, dɨban̰gɨŋ gusɨgɨŋ bandɨ duroygɨŋ bɨ, kuɗa gɨ ɨrɨmedɨgɨŋ wɨya pɨna bɨ, sɨmagɨŋ dan̰ gusi-dɔbɛ bɨ. Na hɨn̰ wo̰ ma, Kumu gɨ na Ba-gulɔŋ geye bɨ, Ba-gulɔŋ gusi-dɔbɛ bɨ, kɨya bɔɔ danagɨŋ.

¹² Laan̰gɨŋ gusɨgɨŋ lapɨya duroygɨŋ dan̰ lapɨya di da ka-karme. Kan ga woyge dan̰ cɨndɨge nɔm danaŋ kɛ ləgɨŋge lapɨya.

¹³ Kuɗa gɨ ɗarwa di da Ba-gulondɨna Jesu-Kɨris bɨ, geye gɨ da Kumu bɨ, bugoŋ pɨna gɨ sayga gusi Turnɔ ɗe-kuduroy-bɛrɛ baa danagɨŋ nɔm bɨ.