2 Korɛ̰t 12 - Gabri Maja

Hɨnga ga Pol sol bɨ buyoŋ cɨndi hɨn̰ dḛ wo̰ bɨ

¹ Gɨle gusu ɗarwadi unɔ, ama naa wa wa kalɨn̰ ma ɨŋ kɨya gɨle gusɨnɨ. Ɨŋ kɨya yɔ kol hɨnga ga Ba-gulɔŋ wasɨn̰ cayge bəŋ bɨ, hɨnga ga buyoŋ cɨnɨ hɨn̰ dḛ wo̰ bɨ.

² Ɨŋ sol ungo gɨ pɨna wo̰ gɨ bugoŋ pɨna dan̰ Kɨris, wɔlɛ gɨ pɨna wo̰ ɓal ɨlge mɔjɨ-cay-poɗɨn̰ labɨde, Kumu ayi orɨn̰ danayi bɨrɨŋ andɨn̰ a gɨɗɨgɨ-Kumu gɨ tɨba sɨbɨ gɨŋ gɨ Kumu somɨn̰ nee. Ama gɨlmi gɨ nee le, Kumu ayi na dan̰ kuyoŋdi-gusi wala dan̰ turnoyi kalɨn̰ ma ɨŋ sɨla naŋ, ban Kumu ba sɔlɛ.

³ Ɨŋ sol gɨ gɨlmi gɨ nee le Kumu ayi, ban ayi na dan̰ kuyoŋdi-gusi wala na dan̰ turnoyi kalɨn̰ ma ɨŋ sɨla naŋ, ban Kumu ba sɔlɛ nɔm.

⁴ Kumu ayi orɨn̰ danayi bɨrɨŋ andɨn̰ Paradɨs toy dɨŋ, lee gɨ ban je kɔl nɔm gɨ ɗɨn̰ yɔ. Na kɔl gɨ bɨn̰ge ungo gɨyəŋ gɨ ni jɔgɛ yɔ ɗaŋ naŋ.

⁵ Ɨŋ kɨya gɨle gusɨnɨ ojɨn̰ cay ungo gɨ nee le, ama gɨ ojɨn̰ canɨ na, ɨŋ kɨya gɨle gusɨnɨ ojɨn̰ na cay tɔgɨ di ɨŋ ɨran̰ naŋ ƴɔbɨ.

⁶ Hɨn̰ gɨ ɨŋ na gɨl gusɨnɨ kalɨn̰ ma ɨŋ na ungo ba dɨngale naŋ kɨya wa kɔl hɨnge na cɨndi. Ama ɨŋ kan̰ gɨle gusɨnɨ coŋ, ɗe ungo wo̰ ɨrɨme hɨnga ga ɗɨn̰ gɨ ban sol dan̰ cɨndi bɨ je dan̰ sɨmayi gusɨnɨ bɨ a gɨye-lɔɔnɨ gɨŋ kol canɨ naŋ.

⁷ Na cɨndi, hɨnga ga nee ga Kumu wasɨn̰ cayge bəŋ le dor turnoy kɨɗɨn̰, Kumu gey gɨ ɨŋ na gɨ gɨle gusɨnɨ koldɨge naŋ. Na toy di hɨn̰ wo̰ ma Kumu bəŋ hɨnga ga pɨna wo̰ ga gɨləŋ-cɨn̰ hɨn̰ gɨsɨm wo̰ a kuyonɨ gɨŋ gɨlɨn̰ hɨn̰ ba-ƴɔbɛ gɨ daa nii gɨ da sidan gɨ ɨre təŋ wo̰. Kumu bəŋ gɨle-cɨn̰ di nee le, ɗe ɨŋ na gɨ gɨlɨn̰ gusɨnɨ naŋ.

⁸ Ojɨn̰ cay gɨsɨm gɨ nee le, ɓal tɨba sɨbɨ ɨŋ ol Ba-gulɔŋ ɗe na dor gusɨnɨ coŋ.

⁹ Ama Ba-gulɔŋ yəŋ hɨn̰: «Ɗarwa tɨnge ɓalɨn̰. Dɔnɔ tɨnge kɨya gɨle guso ɗəndəŋ gusi ungo gɨ ɨran̰ dan̰ dɔnɔ naŋ.» Na toy di hɨn̰ wo̰ ma ɨŋ kɨya gɨle gusɨnɨ dan̰ gusi-mɔwa gɨɗaŋ cay dɔnɔ di ɨŋ ɨran̰ naŋ, ɗe dɔnɔ di da Kɨris gɨl guso doŋ kol canɨ.

¹⁰ Na toy di hɨn̰ wo̰ ma, ɨŋ lee gusi-mɔwa kɨɗɨn̰ ga ɨŋ ɨran̰ dan̰ dɔnɔ naŋ bɨ, kɨɗɨn̰ ga yagɨdaŋge bɨ, lənge hɨnga ga ni jəŋge bɨ, gɨləŋge cɨn̰ bɨ, lənge hɨnga ga osɨdəŋ osɨdəŋ bɨ, kɨya cay Kɨris. Kɨya wa kɨɗɨn̰ ga ɨŋ na ɨran̰ dan̰ dɔnɔ naŋ na, na kɨɗɨn̰di ga nee gaŋ le ƴɔbɨ ma maŋ way dɔnɔ.

Pol sol kɨya cay kalaŋ ga Korɛ̰t

¹¹ Sɨlagɨŋ, ɨŋ yəgɨŋ kɔl hɨn̰ ungo gɨ ba dɨngale wo̰. Kɨŋ-gandi ba orɨn̰ danaŋ ɗe gɨ ɨŋ yen̰ kɔl gɨ nee le. Kalaŋ ga ojɨ gɨ ni kɨya lɔɔge tɨmon̰ di ɗari ojɨn̰ canɨ le na kɨŋ-gandi. Ko ɨŋ naa hɨnga naŋ kalɨn̰ ma, ka-gɨre-gɨye ga kɨŋ ye gɨ kan naa ga gɨmdəŋ le ɗəŋge dan̰ hɨnga pɨna naŋ.

¹² Hɨnga ga gɨl gɨ ɨŋ naa ba-gɨre-gɨye le, lee gusɨge duroygɨŋ lee gɨ kɨŋ sol dan̰ cɨndɨgɨŋ. Kan ba kɛ: Na dɨbe-ɗugɔ duroy hɨnga ga ni gɨwase gaŋ nɔm bɨ, na hɨnga ga ni beli ga gɨl bɨ, na hɨnga ga ɗɨn̰ cɨn̰-kɨɗɨn̰ bɨ, na hɨnga ga ni lɔɔ ga dan̰ dɔnɔ bɨ.

¹³ Naa hɨn̰ wo̰ na, hɨnga ga Ka-Daye ga ɗaŋ wayge ma kɨŋ-gandi kɨŋ waa naŋ le na wa ga? Kɛ na nɨn̰e gɨ ɨŋ nɨygɨŋ naŋ le ƴɔbɨ naŋ ga? Hɨn̰ gɨ ɨŋ na laa naa hɨnga ga dan̰ gɨyəŋdɨge naŋ danagɨŋ na, ɨŋ olgɨŋ gɨ kɨŋ ɗa kuduroygɨŋ jala canɨ koldɨge.

¹⁴ Sɨlagɨŋ ɨŋ ƴom cay tɨbanɨ gɨ ni ɔrɛ tagɨŋ. Gɨ kɛ na gɨ ni tɨba sɨbɨdi ɨni, ama ɨŋ kɨya nɨn̰gɨŋ naŋ. Kɨya wa hɨnga ga ɨŋ mal le na hɨnga wɔɔdɨgɨŋ naŋ, ama ɨŋ geygɨŋ na kɨŋ-gandi gusɨgɨŋ. Leen̰ cɨndi na, na karɨn̰aŋ ba-ame hɨnga wɔɔdɨge kɨya cay kandɨge naŋ, ama na karɨn̰aŋ kandɨge ba-ame hɨnga wɔɔdɨge kɨya cay karɨndɨge.

¹⁵ Kol caygɨŋ na, ɨŋ kɨya mɔndɛ hɨnga nɔm ga orɨn̰ dan̰ gusi-mɔwa bɨ, ɨŋ kɨya bee gusɨnɨ kol caygɨŋ nee bɨ coŋ. Hɨn̰ gɨ ɨŋ na geygɨŋ tɔgɨ hɨn̰ wo̰ na, kɛ kɨŋ kɨya geyəŋ dḛ wo̰ hagɨŋ ga?

¹⁶ Leen̰ cɨndi, ɨŋ-bandi ɨŋ nɨn̰gɨŋ naŋ. Ama kalaŋ yege gɨ cɨnɨ na naa tɔgɨ, lee gɨ ɨŋ na ƴomgɨŋ na dan̰ jɨba.

¹⁷ Kɛ dan̰ gɨyəŋ gɨ da karme ga ɨŋ ba gɨyge gusɨgɨŋ le, ɨŋ dii kardɨgɨŋ dan̰ ungo pɨna duroyge ga?

¹⁸ Ɨŋ ol Titɨ ɗe na or gusɨgɨŋ bɨ, kurɨndɨni gɨ kɨŋ ba solii le ɨŋ gɨyii ɗe na or danayi bɨ. Kɛ Titɨ dii kardɨgɨŋ duroy hɨnga gaŋ pɨna ga? Naŋ. Kɛ ni gura danayi na te ɨrɨme gɨ pɨna gɨŋ naŋ ga? Kɛ ni gura na te gɨyəŋ gɨ pɨna gɨŋ naŋ ga?

¹⁹ Gajanaŋ kɨŋ da yɔ a kuduroygɨŋ gɨ ɨŋ ni na ye kɔl gɨ nee le nɔm na kɨya ƴon̰ naa cayni toni gaŋ a tumoygɨŋ. Naŋ, na hɨn̰ wo̰ naŋ. Ni yəgɨŋ kɔl na te bugoŋ pɨna dan̰ Kɨris tumoy Kumu. Ay karmɨni ga ni lee-toygɨŋ, hɨnga nɔm ga ni ba lee le, na kol caygɨŋ ƴɔbɨ ɗe agɨŋ na malgɨn̰ te aye kudurɔ gɨŋ.

²⁰ Haw kɛ na ɨŋ hɨndar gɨ kɨɗɨn̰ ga ɨŋ na bugoŋ gusɨgɨŋ na, kɨŋ da wɔyɛ hɨn̰ gɨ ɨŋ gey wo̰ naŋ bɨ, ɨŋ-bandi kalɨn̰ ma ɨŋ da wɔyɛ hɨn̰ gɨ kɨŋ gey wo̰ naŋ bɨ. Gajanaŋ ɨŋ da wɔɔ duroygɨŋ bɔjɨn̰ɛ bɨ, cɨn̰-pɨɗɨma bɨ, kuduroy-hɔmɛ bɨ, jangɨ bɨ, yɔdɔ kɔl gɨ ɨsɨni kardi ungo bɨ, yɨle kɨɗɨn̰ bɨ, dɔgɛ-jɔrgɔ bɨ, lɔɔdɔ hɨnga ga dan̰ gɨyəŋdɨge naŋ bɨ.

²¹ Gajanaŋ kɨɗɨn̰ ga ɨŋ na bugoŋ gusɨgɨŋ na, Kumu kɨya dɨbe dasi canɨ ɗaŋ coŋ tumoygɨŋ bɨ, ɨŋ da ɨle kɨya cay kondɨwadi kalaŋ ga tumɔ leege ɨsɨna ma bɨlge kardɨge bɨn̰ lɔɔ hɨnga ga ni dasi naŋ bɨ, bɨn̰ yɔyɛ gɨ dan̰ gangɨ caa naŋ bɨ, bɨn̰ yɔyɛ gorɨn̰ daa naŋ bɨ.