2 Korɛ̰t 10 - Gabri Maja

Pol ye kɔl ƴen̰ cayi

¹ Ɨŋ-bandi Pol gɨ kalaŋ yege kol canɨ gɨ kɨɗɨn̰ ga ɨŋ na wɨya duroygɨŋ na ɨŋ na dobɨ canɨ dugo, ama kɔl hɨnge na osu kɨɗɨn̰ ga ɨŋ na wɨya hen̰ danagɨŋ. Ɨŋ olgɨŋ dan̰ guson̰ Kɨris gɨ ba lɔɔ ɗarwa bɨ, gɨ kaledi jal yɔd bɨ:

² Gɨ kɨŋ ɗɔɔ ba lɔɔ gɨ ɗe gɨ kɨɗɨn̰ ga ɨŋ na bugoŋ gusɨgɨŋ na, kɨŋ orɨn̰ danaŋ bɨrɨŋ gɨ ɨŋ gɨ yogɨŋ kɔl ga osɨdəŋ naŋ. Ɨŋ gey yogɨŋ kɔl na hɨn̰ kɔl gɨ ɨŋ ba kɨya yon̰ kalaŋ ga pɨna ga yege kol cayni gɨ ni na kobɨ naa hal gɨ da kalaŋ ga ɨndəŋ naŋ.

³ Na cɨndi, ni som na cay gɨsəŋ gaŋ, ama ni wɨrɨn̰a na hɨn̰ kalaŋ ga cay gɨsəŋ gaŋ naŋ.

⁴ Kɨya wa hɨnga ga ni kɨmbɨl ga ni ba leen̰ kɨmbɨl le, na hɨnga ga ni kɨmbɨl ga da kalaŋ ga ɨndəŋ naŋ. Ama na hɨnga ga ni leen̰ kɨmbɨl ga osɨdəŋ ga sayga na gusi Kumu bɨ, dan̰ gɨyəŋdɨge na ni mondɨn̰ ƴaa ga osɨdəŋ osɨdəŋ bɨ. Ni mondɨ ɨrɨme ga dan̰ gɨyəŋdɨge naŋ coŋ bɨ,

⁵ ni mondɨ hɨnga nɔm ga ɨrgan̰ dan̰ dɔgɛ jɔrgɔ gɨ narɨn̰ kalaŋ sɔlɛ Kumu le bɨ. Ni kɨya ƴɔmɛ cay tɨban̰ ɨrɨme gɨ da kalaŋ nɔm guyɔŋdu, ɗe kalaŋ ga nee le beege kɔl cay Kɨris.

⁶ Ama ni som cay tɨbayni dɨŋ ɨni ɗe hɨn̰ gɨ kɨŋ na gɨl jɔɔ kɔl kogɨŋ doŋ gɨ na kuɗa duroŋ cɨrɛɗ na, kalaŋ ga na ka-jɔɔ kɔl naŋ le, ni kɨya halge, kɨya cay hɨnga ga ɨsɨni ga kan lee le.

⁷ Kɨŋ ɗɔɔ ba hundɔrɔ sɔlɛ-hɨnga ga leen̰ cɨndi ga woy tumoygɨŋ. Hɨn̰ gɨ ungo na sɨla arɨn̰a gɨ ban naa ungo gɨ da Kɨris na, kuɗa gɨ ban ɨrɨm a cay hɨnga ga ba kɛ coŋ: Hɨn̰ gɨ ban naa ungo gɨ da Kɨris na, ni-gandi kalɨn̰ ma ni na ga da Kɨris bɨ.

⁸ Dɔnɔ di Ba-gulɔŋ bɨni ɗe ani na jɨbɨn̰ toygɨŋ ɗe agɨŋ na orɨn̰ dan̰ cɨndɨgɨŋ tumɔ. Ama na ɗe gɨ ani na mondɨgɨŋ naŋ le, hɨn̰ gɨ ɨŋ na gɨl gusɨnɨ tɔgɨ koldi ɗe na ɗɨn̰ cay kɨɗɨn̰ kalɨn̰ ma, dasi daŋ koldi naŋ.

⁹ Ɨŋ gey gɨ ungo gɨ sɔlɔŋ hɨn̰ ungo gɨ ba-loogɨŋ hundɔrɔ duroy magtubu tɨnge dɨŋ nɔm di ɨŋ wal bɨgɨŋ dɨŋ naŋ.

¹⁰ Ho’o, hɨn̰ gɨ kalaŋ ga pɨna na hagɨraŋge yan̰ge kol canɨ hɨn̰: «Kɔl gɨ da Pol gɨ a duroy magtubu toy dɨŋ ye man̰ bɨ, osu bɨ. Ama kɨɗɨn̰ ga ban dan̰ gusi na ɨr duroyni na, ban ɨran̰ dan̰ dɔnɔ naŋ bɨ, kɔl koyi na kɔl gɨ maɗɨ wo̰ dugo bɨ.»

¹¹ Ɗa gɨ kalaŋ ga ka-yɔɔ-kɔl ga nee le sɨlage kuɗa, hɨnga ga ni ba wal koldɨge duroy magtubu tɨnge dɨŋ nɔm, kɨɗɨn̰ ga ni ba ban̰ hen̰ danagɨŋ le, ni kɨya looge kɨɗɨn̰ ga ni na ɨr duroygɨŋ.

¹² Ni-gandi ni ɓala gɨ ni se gusɨni a kɨway kalaŋ ga pɨna ga hɨram gusɨge le naŋ bɨrɨŋ. Ni gey gɨse gusɨni danage naŋ. Kan som gɨsɨ gusɨge dan̰ gusɨge koge bɨ, gɨsɨ gusɨge duroyge bɨ. Dan̰ gɨyəŋ gɨ nee le na, kan gɨl gɨ kan naa ka-matɨr.

¹³ Ama ni-gandi na, ni kɨya gɨle gusɨni tɔgɨ naŋ. Ni sol cay kɨɗɛlɛ koni. Ni ye na kol gɨye gɨ ni lee a cay gɨsəŋ ga na cay kɨɗɛlɛ gɨ Kumu ojɨ bɨni gaŋ. Na cɨndi, kɨŋ-gandi kalɨn̰ ma kɨŋ woy na a kɨɗɨn̰ gɨye gɨ Kumu ojɨ cayi bɨni gɨŋ.

¹⁴ Ni hɨngɨɗɨ cay kɨɗɛlɛ koni ɗa dugo kɨɗɨn̰ ga ni ba or bɨrɨŋ andaŋ tagɨŋ naŋ. Ni bɨləŋ na ga cay wase ga teege bɛrnɛ Kɔl-gɨ-Ɗari gɨ da Kɨris bɨgɨŋ.

¹⁵ Ni-gandi ni kɨya hɨngɨɗe cay kɨɗɛlɛ koni ɗɔɔ dugo ojɨn̰ cay kɔl gɨ ni ba kɨya yɔ a cay gɨyəŋ gɨ nɔm naŋ, na gɨ ni kɨya gɨle gusɨni a cay gɨye gɨ kalaŋ ga ɗaŋ leege naŋ. Ama ni bee ɨrɨmedɨni cay nee gɨ aye kudurɔ kogɨŋ kɨya sɔ cay mɨgay gɨŋ jɨn̰ tumɔ tumɔ bɨ, gɨye koni gɨ a duroygɨŋ le kalɨn̰ ma kɨya sɔ cay mɨgay gɨŋ jɨn̰ tumɔ tumɔ bɨ.

¹⁶ Kardi nee ɨni na, cay gɨsəŋ ga woy kardɨgɨŋ nii le, ni kɨya ɔrɛ nee tɔgɛ bɛrnɛ Kɔl-gɨ-Ɗari. Ni kɨya lɔɔ gɨye a kɨɗɨn̰ ga ani ani ga ungo gɨ ɗaŋ tɨga bɛrnɛ a nee tumoyni naŋ. Na toy di hɨn̰ wo̰ ma, ni kɨya gɨle gusɨni a kɨbɨ gɨye gɨ ungo gɨ ɗaŋ lee a kɨɗɨn̰ ga Kumu bii ojɨn̰ cayi gaŋ naŋ.

¹⁷ Magtubu di da Kumu ye hɨn̰: «Ungo gɨ na gey gɨle gusi na, Kuɗa gɨ ban gɨl gusi na, Naa kol gɨye gɨ Ba-gulɔŋ lee.»

¹⁸ Na cɨndi ungo gɨ Ba-gulɔŋ Kumu hɨramii le, ban ba-ƴɔɔ cɨn̰ Kumu. Ama ungo gɨ hɨram gusi koyi gaŋ le, ƴa cɨn̰ Kumu naŋ.