2 Ja̰ 1 - Gabri Maja

Lapɨya da Ja̰

¹ Na ɨŋ-bandi gɨ muɗoli ba wale magtubu di kɛ le gɨyɨn̰ bɨn̰ tama di Kumu dɔrɔɔ, dan̰ karɨndo. Ɨŋ geyge leen̰ cɨndi. Na ɨŋ-bandi ƴɔbɨ ba geyge naŋ, ama kalaŋ nɔm ga solge kɔl gɨ cɨndi le, geygege bɨ.

² Ni-gandi ni geygɨŋ kɨya cay kɔl gɨ cɨndi gɨ woy a kuduroynagɨŋ bɨ, gɨ kɨya sɔmɛ dan̰ tumoyi bɨ.

³ Kuɗa gɨ ɗarwa bɨ, sɔlɛ cɨn̰-n̰age bɨ, gusi-dɔbɛ bɨ, ga ba sayga gusi Baynagɨŋ Kumu bɨ, gusi Jesu-Kɨris gɨ na Kurɨn̰ Baynagɨŋ Kumu bɨ, baa dananagɨŋ dan̰ kɔl gɨ cɨndi bɨ, dan̰ geye bɨ.

Kɔl gɨ cɨndi bɨ geye bɨ

⁴ Gusɨnɨ mɔŋ tɔgɨ yɔd kɨɗɨn̰ ga ɨŋ usɨbɔŋ dan̰ karɨnde ga pɨna bɨ, ɨŋ solge te gɔrɛ a te kɔl gɨ cɨndi gɨŋ hɨn̰ gɨ Baynagɨŋ ba an̰ te tumoyi bɨnagɨŋ wo̰.

⁵ Ay tama, ɨŋ or n̰age guse gɨ ana geygɨŋ gusɨnagɨŋ. Kɔl gɨ da geye gɨ ɨŋ ba lee magtubu bɨne koldi le, na te tumɔ di hɨrɨwa naŋ ɨni. Ama na hɨndi di na ba je kɔldɔ a toy dɨŋ ɓɨrag le.

⁶ Geye gɨ nee le na, na kɔbɛ te tumɔn̰əŋ ga da Kumu. Hɨndi na te tumɔ di kɨŋ ba je kɔldɔ a toy dɨŋ ɓɨrag bɨ, te tumɔ di ye gɨ kɨŋ na gey gusɨgɨŋ bɨ.

Ka-gɨle hɨnga ga ni narɨn̰ kɨɗɨn̰

⁷ Ka-nare cɨn̰-kɨɗɨn̰ kondɨ andaŋge a cay gɨsəŋ gaŋ. Kan kan̰ge yɔ daa pɨraŋ hɨn̰ gɨ Jesu-Kɨris na ɨrga naa hɨn̰ ungo gɨ ɨndi wo̰ a cay gɨsəŋ gaŋ. Ungo gɨ na ya kɔl gɨ hɨn̰ wo̰ na, ban na ba nare kɨɗɨn̰ bɨ na ba-baa gɨ da Kɨris bɨ.

⁸ Ɗagɨŋ muɗɔlɛ a cay gusɨgɨŋ gɨŋ ɗe agɨŋ kayɨn̰ cay kɔbɔ gɨ da gɨye-lɔɔdɨgɨŋ naŋ, ama ɗe agɨŋ wan̰ cay kobɨgɨŋ ɗəndəŋ.

⁹ Waŋ waŋ gɨ na ɨr usa a te hɨnga ga ni gɨle ga da Kɨris gaŋ naŋ, ama na dɨbɨ kɔl gɨ hɨrɨwa a cay hɨnga ga ni gɨle ga da Kɨris gaŋ na, Kumu unɔ danayi. Ungo gɨ na ɨr usa a te hɨnga ga ni gɨle gaŋ na, ban ma na ungo gɨ bugoŋ pɨna dan̰ Baynagɨŋ Kumu bɨ dan̰ Kurondi bɨ.

¹⁰ Hɨn̰ gɨ ungo na ɨre gusɨgɨŋ ma na ɨran̰ dan̰ hɨnga ga ni gɨle ga nee le naŋ na, kɨŋ ɗɔɔ ba ƴomii gusɨgɨŋ a duroy ƴaadɨgɨŋ gɨŋ bɨ, looyiigɨŋ lapɨya naŋ bɨ.

¹¹ Ma hɨn̰ gɨ ungo na laayi lapɨya na, ban bugoŋ danayi pɨna a cay gɨye-lɔɔdi gɨ ɨsɨni gɨŋ.

Kɔl gɨ ni dɨɗɨn̰ kɨbi

¹² Ɨŋ orɨn̰ dan̰ kɔl kondɨ gɨ ni yogɨŋ, ama ɨŋ gey wale nɔm a duroy magtubu dɨŋ naŋ. Ɨŋ ojɨ gɨ ni ɔrɛ gusɨgɨŋ are-kɔl wo̰ wo̰ danagɨŋ dan̰ kɨbɨnɨ, ɗe gusi-mɔwa tona duroŋ cɨrɛɗ.

¹³ Karɨn̰ tɨmde di Kumu dɔrɔɔ leenege lapɨya.