1 Timote 6 - Gabri Maja

Gɔyɔŋ bɨ ka-gulondɨge bɨ

¹ Kuɗa gɨ ka-aye kudurɔ nɔm ga na gɔyɔŋ le, sɨlage ka-gulondɨge hɨn̰ kalaŋ ga kan ɓalge dɨbɨge hurɔmɔ nɔm a cayge, ɗe ungo yagɨdɨn̰ guson̰ Kumu naŋ bɨ, ungo yon̰ kɔl gɨ ɨsɨni cay kɔl gɨ ni gɨle gɨŋ naŋ bɨ.

² Kan ga ka-gulondɨge na ka-aye kudurɔ le, ɗɔɔ gɨ kan ɗɔɔ gusɨge kardi tɔgɛ gɨ na teen̰ gusɨnagɨŋ karme bɨ, kan̰ɨn̰ hɨndarɨn̰ turnoy ka-gulondɨge le naŋ bɨ. Ama kɨɗɨn̰ ga kan ga kan lee gɨye bɨge le, naa ka-aye kudurɔ bɨ, ka-wandɨ bɨ le, kuɗa gɨ kan laa gɨye kuɗa ɗɨn̰ gɨ tumɔ coŋ, bɨge. Na hɨnga ga nee le ma kuɗa gɨ ji tɨraban̰ kalaŋ bɨ, dɨbage bandɨ kuduroyge, ɗe ayge leen̰ gɨye bɨ.

Ka-pɔyɛ kɔl poy gɨlɨn̰ kalaŋ bɨ hɨnga wɔɔ ga leen̰ cɨndi bɨ

³ Hɨn̰ gɨ ungo na gɨlɨn̰ kalaŋ hɨnga tɨrabe ga ɗaŋ na, ban ɗe na kɔl gɨ cɨndi gɨ da Ba-gulondɨna Jesu-Kɨris coŋ bɨ, ɗe na gɨle hɨnga ga or pɨna dan̰ aye kudurɔ kona coŋ bɨ,

⁴ ban na ungo gɨ dɔgɛ-jɔrgɔ bibii bɨ, sɨla hɨnga naŋ bɨ. Ban orɨn̰ dan̰ ləgɨnə di ni man̰e-kɔl di woy naa hɨn̰ hɔmɨn̰ɛ wo̰ bɨ, di ni bɔjɨn̰ɛ cay maanadi kɔl nɔm bɨ. Na hɨnga ga nee le ba ɨrgan̰ dan̰ jangɨ bɨ, gange kɔl bɨ, yagɨde kɨɗɨn̰ bɨ, ɨrɨme ga ɨsɨni a cay gusɨna bɨ,

⁵ dan̰ man̰e-kɔl gɨ toy ayaŋ naŋ, gɨ da kalaŋ ga ɨrɨmedɨge mundoŋ coŋ, kɨya wa kɔl gɨ cɨndi le, unɔ gusɨge. Kalaŋ ga nee le, ɨrɨmge gɨ gɨye-lɔɔ gɨ bugoŋ pɨna dan̰ Kumu le, naa gɨyəŋ gɨ ni wan̰ hɨnga.

⁶ Na cɨndi, gɨye-lɔɔ gɨ bugoŋ pɨna dan̰ Kumu le, na hɨnga wɔɔ ga kondi, ama na kɨɗɨn̰ ga ungo sol lɔɔ gusi-mɔwa dan̰ hɨnga ga ban orɨn̰ kobi le.

⁷ Əw, kɨɗɨn̰ ga na ɨrgagɨŋ cay gɨsəŋ gaŋ le, na ɨren̰gɨŋ dan̰ hɨnga pɨna wo̰ kobɨnagɨŋ naŋ bɨ, na kɨya son̰gɨŋ dan̰ hɨnga pɨna wo̰ a cay gɨsəŋ gaŋ jogɨn̰ daa nii naŋ bɨ.

⁸ Hɨn̰ gɨ na na waagɨŋ hɨnga ga ni dɔɔ bɨ, badɨge ga ni dɔbɛ bɨ na, kan ga nee le ɓalnagɨŋ.

⁹ Ama kan ga geyge wɔɔ hɨnga tɔgɨ le, kɨya bugoŋge a boy boy di da hɨnga ga ni gɨybe gaŋ bɨ. Kɨya bugoŋge boy kondɨwadi tabɨlaŋ da hɨnga ga ni dɨngale ga dɨmbɨri gaŋ bɨ, ga na hɨnga ga kɨya mɔndɛ ungo muɗɔgɨ muɗɔgɨ coŋ bɨ, bogɨge kayaŋ bɨ.

¹⁰ Kɨya wa tabɨlaŋ di gursu le, na te sarnay hɨnga ga ɨsɨni nɔm. Kɨɗɨn̰ ga kalaŋ na aya gusɨge bɨn̰ gursu ɨni na, kɨya ɗɔɔge aye kudurɔ coŋ bɨ, kɨya kayaŋge hen̰ bɨ, hɨnga ga ni mɨrɨn̰tɨn̰i ga toyge kan̰dɨge kan̰dɨge kɨya looge bɨ.

Hɨnga ga Pol yen̰ Timote ɗe na lee

¹¹ Ama ji ungo gɨ da Kumu na, aya gusɨn̰ coŋ cay hɨnga nɔm ga nee le. Ji mala na lɔɔ hɨnga ga dan̰ durɔ ɗɨngar bɨ, gɨye-lɔɔ gɨ bugoŋ pɨna dan̰ Kumu bɨ, aye kudurɔ bɨ, geye bɨ, ƴɔmɛ kuduroy-osɨwa bɨ, kale ga jali bɨ.

¹² Wɨrɨn̰a wɔrɨn̰ɛ gɨ kuɗa gɨ da aye kudurɔ bɨ, ƴɨma sɔmɛ-bɨra gɨ dan̰ cɨndi gɨ Kumu ba teen̰ koldi le bɨ. Hɨn̰ gɨ ji ba yen̰ kɔl aye kudurɔ kon̰ kuɗa tumoy tɨmon̰ ga kondi gaŋ le.

¹³ Kumu gɨ ba lɔɔ gɨ hɨnga nɔm som-bɨra bɨ, Jesu-Kɨris gɨ lee tɨmon̰ tumoy Po̰s Piladɨ, lee gɨ ban ye kɔl aye kudurɔ gɨ kuɗa tɔgɨ daa pɨraŋ bɨ le, ɨŋ yen̰ hɨnga ga kɛ le tumoy Kumu dan̰ Jesu-Kɨris ɗe gɨ an̰ lee:

¹⁴ Ji bɨga kɔl cay te tumɔ da Kumu, ɗe gɨ an̰ somɨn̰ dɨle hɨnga pɨna ga ɨsɨni ɨsɨbɨn̰ naŋ bɨ, dɨle kɔl pɨna ƴɔmɛ can̰ naŋ bɨ, bɨrɨŋ gɨsɨn̰ wɔlɛ gɨ Ba-gulondɨna Jesu-Kɨris kɨya cagan̰.

¹⁵ Ban kɨya gɨle gusi doŋ na duroy tɨwa di Kumu ba ojɨ ɨni. Na Ban pɨna hayi ma na Ba-cay hɨnga bɨ, Kumu gɨ orɨn̰ dan̰ tumoy wolwa bɨ, Kɨlma cay kɛrɨmbɛlɛŋ bɨ, Ba-gulɔŋ cay ba-gulɔŋn̰əŋ bɨ.

¹⁶ Na Ban ƴɔbɨ ma na ungo gɨ kɨya mare naŋ. Ban som na boy kɨɗɨn̰ ga asɨn̰ ɗen̰ ɗen̰ gaŋ, Ga ungo kɨya ɓale sɔlɛ naŋ bɨ, Ɓale ɔrɛ nee naŋ bɨ. Gusoŋ-tɔgɛ na koyi bɨ, Dɔnɔ di woy dan̰ cɨndo na toyi bɨ. Ɗa-ɗe-woy-hɨn̰-wo̰.

¹⁷ Yan̰ ka-wɔɔ hɨnga tɔgɨ ga a cay gɨsəŋ gaŋ kɛ le, ɗe dege jorgɨyge naŋ. Yage ɗe kan ɗe ɨrɨmedɨge a cay hɨnga ga ni wɔɔ ga kɨya pɨde gaŋ naŋ. Ama ɗe kan ɗe ɨrɨmedɨge a cay Kumu gɨ na ba bɨnagɨŋ hɨnga nɔm bɨ, ɗe ana na solɨn̰gɨŋ mɔwadɨge bɨ.

¹⁸ Yage ɗe kan lee kuɗa dan̰ kalaŋ bɨ, ɗe kan lee gɨye gɨ kuɗa tɔgɨ bɨ, ɗe kan bɨn̰ kalaŋ hɨnga tɔgɨ bɨ, ɗe kan gosɨn hɨnga kage bɨn̰ kamdɨge bɨ.

¹⁹ Na hɨn̰ wo̰ ma kan kɨya dayɨn̰ge cay hɨnga wɔɔ ga kuɗa bɨ, ga cɨndi bɨ pɨna kɨya cay wɔlɛ gɨ wan̰do bɨ ɗe kan wan̰ge sɔmɛ-bɨra gɨ dan̰ cɨndi.

²⁰ Ay Timote, gama hɨnga ga Kumu ba day been̰ kobɨn̰ kuɗa. Ji kan̰a are-kɔl ga badɨ badɨ wo̰ dugo ga ɨra dan̰ aye kudurɔ pɨna naŋ le. Man̰e-kɔl gɨ da ka-sɔlɛ hɨnga ga ni poy le kalɨn̰ ma, ji kan̰a coŋ bɨ.

²¹ Hɨnga ga ni sɔlɛ ga ni poy ga nee le, kalaŋ ga pɨna yege gɨ ke na orɨn̰. Lee gɨ kan kayaŋge a te aye kudurɔ koge gɨŋ orɨn̰ge gehɛn dɨŋ. Kuɗa gɨ ɗarwa di da Kumu ba danagɨŋ nɔm.