1 Timote 5 - Gabri Maja

Hɨnga ga ni lɔɔ ojɨn̰ cay ka-aye kudurɔ

¹ Ji ɗɔɔ ba ale ungo gɨ esi dan̰ togɨn̰ naŋ, ama bɨgay kɔl gɨ ɗari kuduroy hɨn̰ ban̰ wo̰. Yan̰ marɨne kɔl hɨn̰ gɨ kan na karmɨn̰ wo̰ bɨ,

² Kandɨ ga esɨdəŋ, hɨn̰ gɨ kan naa ƴon̰ɨn̰in̰ wo̰ bɨ, kambɨle, hɨn̰ gɨ kan na karmɨn̰ ga kandɨ wo̰ bɨ, dan̰ gɨye-lɔɔ gɨ duroŋ mɨra.

³ Sɨla kardi kandɨ ga kodɨn̰ige ma ga ka-jɨbe toyge unɔ leen̰ cɨndi, dan̰ hurɔmɔ.

⁴ Hɨn̰ gɨ tama di kudurɔ ma na ɨran̰ dan̰ karɨndo wala, dan̰ kongɨn̰ɔɔ na, ojɨ gɨ kan ba kɨya sɔlɛge kardi kandɨge cay wase. Hɨnga ga kandɨge lee danage le, kuɗa gɨ kan jɨga lɔɔ bɨge bɨ. Kɨya wa na hɨnga ga nee le ba mon̰ Kumu.

⁵ Tama di kudurɔ ma di ungo kɔɔ unɔ bɨ, som kan̰do bɨ le, ɗe ɨrɨmedo na cay Kumu bɨ, ol Kumu bɨ, loɗɨde toyi daa daa duroy son̰do dan̰ tɨwa di ɨni bɨ.

⁶ Ama tama di kudurɔ ma di ɗe-gɨre kardi mɔwa le, naa gɨ hɨndi na sɨma naa bɨra ƴee kalɨn̰ ma, hɨndi na di mari.

⁷ Sɨla! Hɨnga ga ojɨ gɨ ji gɨ yoge ɗe kan lee bɨ, ɗe masadɨge unɔ bɨ ba kɛ.

⁸ Hɨn̰ gɨ ungo na sɨla kardi ka-wandɨ kayi naŋ ɗɨn̰ kɨɗɨn̰ coŋ le bɨ, sɨla kardi kalaŋ ga duroy ƴaadi gɨŋ naŋ bɨ na, ungo gɨ nee le na ungo gɨ nongɨ aye kudurɔ koyi ɗe coŋ bɨ, na ungo gɨ ɨsɨni ɗɨn̰ ungo gɨ aya kuduroy naŋ bɨ.

⁹ Bɨndɨ kandɨ ga kodɨn̰ige ma ga ɨlgedɨge toyi-jii orɨn̰ tumɔ bɨ, di ƴee bara na cay pɨna ƴɔbɨ bɨ.

¹⁰ Kuɗa gɨ ɗe kalaŋ solge gɨye-lɔɔdo gɨ kuɗa bɨ. Kuɗa gɨ hɨndi aba karɨn̰aŋ bɨ, ƴɨma kalaŋ kuɗa gusoo bɨ, pɨl tɨbay kalaŋ ga da Kumu bɨ, jɨbɨ te kalaŋ ga somge duroy n̰age dɨŋ bɨ, ɗe-gusoo kɨbɨ gɨye nɔm ga kuɗa bɨ.

¹¹ Ama kandɨ ga kodɨn̰ige ma ga baage kambɨle ƴee le, ji ɗɔɔ ba bɨndɨge. Kɨya wa kɨɗɨn̰ ga tabɨlaŋ di bara na laage na, kan kɨya ɗɔɔ gɨye gɨ da Kɨris coŋ bɨ, kɨya geyege na ƴɔɔ bara bɨ.

¹² Na toy di hɨn̰ wo̰ ma, kɔl ƴom cayge le. Kɨya wa te tumoyge di kan ay tumɔ gɨ ni leen̰ gɨye le, kan ɨr cay nee naŋ.

¹³ Ɗaŋ coŋ, kɨɗɨn̰ ga gɨye gɨ kan kɨya lɔɔ na unɔ na, ayge na te gɔrɛ kɨbɨ kalaŋ. Ama gɨ ɨsɨn ɗɨn̰ gɨ nee le na, kan na ka-hurɔɗɛ-kɔl bɨ, ka-sɔlɛ game kɔl kuduroyge naŋ bɨ, ka-yɔɔ-kɔl gɨ wɨyan̰ gɨ ni yɔ naŋ bɨ.

¹⁴ Kuɗa gɨ kandɨ ga kodɨn̰ige ma ga baage kambɨle ƴee le, ɨŋ gey gɨ kan ƴage ban̰aŋ bɨ, wɔɔge karɨn̰aŋ bɨ, ɗage cɨndɨge kardi kalaŋ ga a duroy ƴaadɨge gɨŋ kuɗa bɨ. Na hɨn̰ wo̰ ma kɨya bɨn̰ ka-baadɨnagɨŋ gɨyəŋ yon̰ kɔl gɨ ɨsɨni caynagɨŋ naŋ.

¹⁵ Kɨya wa ga pɨna duroyge kayaŋge haw kɛ kobɨn̰ge kardi Sidan ɨni.

¹⁶ Ɨŋ ye ɗaŋ coŋ, hɨn̰ gɨ ɗe-aye kudurɔ pɨna di tama na ɨran̰ dan̰ kandɨ ga kodɨn̰ige ma duroy kando na, ɗa gɨ hɨndi guso jɨbɨ toyge daa. Kuɗa gɨ jɨbe te kandɨ ga kodɨn̰ige ma gɨ nee le nɨn̰in̰ Ka-Daye naŋ, ɗe gɨ Ka-Daye wan̰ gɨyəŋ gɨ ni jɨbɨn̰ te kandɨ ga kodɨn̰ige ma gɨ ka-jɨbe toyge unɔ.

¹⁷ Kan ga muɗoldoŋ ga dorge tumoy Daye kuɗa le, ɗa gɨ kalaŋ bɨge hɨnga ga ni cay kobɨge kɨɗɨn̰ sɔɔ. Ama gɨ kondi tɔgɨ na, na kan ga ɗege gusɨge kɨbɨ gɨye gɨ nɨye-tɔgɨ, gɨ na gɨye-tɔgɛ bɛrnɛ bɨ, gɨlɨn̰ kalaŋ kɔl gɨ da Kumu le bɨ.

¹⁸ Əw, Magtubu di da Kumu di jine di kan walge ye hɨn̰: «Kɨɗɨn̰ ga si na ɨr laan̰ gɨye na, Ji gɨ dɔbɛ ɗɛngɛ kɨbi naŋ bɨ.» «Ungo gɨ ba-lɔɔ gɨye le, Kuɗa bii cay kobi bɨ.»

¹⁹ Ji ɗɔɔ ba geye kɔl gɨ sige cay ungo gɨ muɗol naŋ. Ama hɨn̰ gɨ naa tɨmon̰ sɔɔ, wala sɨbɨ na ba yage kol cayi pa dɨm ma mɨn̰ gey danage ƴee.

²⁰ Kan ga ba leege hɨnga ga ɨsɨni le, ji ɗalage cɨn̰ kamdɨge nɔm, ɗe toyge ga baa hɨndarge.

²¹ Ɨŋ olɨn̰ tumoy Kumu bɨ, tumoy Jesu-Kɨris bɨ, tumoy ka-ƴɔbɛ ga daa nii ga torgege bɨ, ji laa hɨnga ga ɨŋ ba gɨlɨn̰ kɛ le dɨle bɔɔ te ungo pɨna naŋ bɨ, dɨle lɔɔ hɨnga pɨna kɨya dorɨn̰ cɨn̰ ungo naŋ bɨ.

²² Ji ɗɔɔ ba sɔ kɨrɛd dɨbe kobɨn̰ cay ungo gɨ ni bogii gɨye kobi naŋ. Dɔbɛ gusɨn̰ boy ɨsɨna gɨ da ungo gɨŋ naŋ. Ɗa muɗɔlɛ cay gusɨn̰, mɔndɛ gɨye-lɔɔdɨn̰ gɨ arɨn̰ cərərə le coŋ naŋ.

²³ Ji ɗɔɔ ba sɔɔ kaŋ ƴɔbɨ naŋ, ama sa cɛrɛ di suru lam kɨya cay hɔmɨn̰ɛ gɨ a kuduron̰ gɨ ba gɨlalɨn̰ daa daa le.

²⁴ Kalaŋ ga pɨna ɨsɨna koge woy na cɨn̰ kalaŋ nɔm pa dɨm ma, bon̰ge kɔl cayge ƴee. Ama kalaŋ ga pɨna na, ɨsɨna koge cɨn̰ kalaŋ sagaŋ cay nee na kardi nee.

²⁵ Kɨya wa gɨye-lɔɔ gɨ kuɗa le woy cɨn̰ kalaŋ na hɨn̰ wo̰ bɨ. Ban gɨ wɨya cɨn̰ kalaŋ naŋ kalɨn̰ ma, kɨya wɔsɛ gusi kardi hen̰ naŋ.