1 Timote 4 - Gabri Maja

Ka-gɨlɨn̰ kalaŋ hɨnga ga cɨndi naŋ

¹ Turnɔ di da Kumu ye daa pɨraŋ ye hɨn̰ a boy wɔlɛ kagadi gɨŋ le, kalaŋ ga pɨna kɨya ɗɔɔge aye kudurɔ koge coŋ, kɨya lun̰doŋge kardi turnɔn̰əŋ ga ka-nare kalaŋ bɨ, kardi gɨle hɨnga ga sayga gusi turnɔn̰əŋ ga ɨsɨndəŋ bɨ.

² Kan kɨya ɗɔɔ gɨ ka-yɔɔ-kɔl-kɨbɨge-sɔɔ-sɔɔ bɨ, ka-yɔ kɔl poy bɨ, kɨya bogɨge kayaŋ. Kalaŋ ga nee le, kan̰ge lɔɔ hɨnga ga ɨrɨmedɨge gɨlge coŋ. Ɨrɨmedɨge ma hɨn̰ ɨya di kan dɨɗɨge tudo dan̰ tɨwa wo̰.

³ Kan narge kalaŋ ƴɔɔ gusɨge bɨ, narge ka-aye kudurɔ ga solge kɔl gɨ cɨndi le, dɔɔ hɨnga ga pɨna ga Kumu ɗe gɨ kan na daa laan̰ge ho’o cay nee le.

⁴ Əw hɨnga nɔm ga Kumu ɗe le, na ga kuɗa. Lee gɨ ungo na daa laan̰ ho’o cay nee na, pɨna wo̰ kalɨn̰ ma ungo kɨya kan̰e naŋ.

⁵ Kɨya wa hɨnga ga nee le, bɨləŋ na hɨnga ga woy dan̰ cɨndɨge, kɨya cay kɔl gɨ da Kumu bɨ, ɔlɛ bɨ.

Ba-gɨye gɨ da Jesu-Kɨris gɨ kuɗa

⁶ Hɨn̰ gɨ ji na gɨlɨn̰ karmɨn̰ ga ban̰aŋ dan̰ ga kandɨ hɨnga ga nee le na, ji na ba-gɨye gɨ da Jesu-Kɨris gɨ kuɗa. Gɨ kan abiige dan̰ kɔl gɨ ojɨ cay aye kudurɔ bɨ, hɨnga ga ni gɨle ga kuɗa gɨ ji ba kobɨ kardɨge kuɗa le bɨ.

⁷ Ama dɔrɛ te hɨnga ga toyge bɨ cayge bɨ unɔ bɨ, dɔrɛ kɔl da kandɨ ga əsɨdəŋ bɨ le, jɨbɨge sɛdɨ coŋ. Ama ji tɨraba na gɨye-lɔɔ gɨ bugoŋ pɨna dan̰ Kumu.

⁸ Cɔgɨdɛ gusɨn̰ le, na hɨnga ga kuɗa hage ama ɗarwadɨge kunda tɔgɨ naŋ. Ama tɨrabe gɨye-lɔɔ gɨ bugoŋ pɨna dan̰ Kumu le, na hɨnga ga kuɗa tɔgɨ, kɨya cay hɨnga nɔm. Kɨya wa Kumu ye gɨ ɗi na kɨya be hɨnga kol cayi. Bɨ hɨnga ga ban ye gɨ ɗi na kɨya bee le, orɨn̰ dan̰ sɔmɛ-bɨra gɨ da sɔmɛ koyi na gɨ haw kɛ bɨ, gɨ da sɔmɛ koyi na gɨ ba kɨya caga bɨ.

⁹ Kɔl gɨ nee le, na kɔl gɨ cɨndi gɨ ojɨ gɨ kalaŋ nɔm ƴage dan̰ kuduroyge ga pɨna.

¹⁰ Əw, hɨn̰ gɨ na na laa gɨye kunda bɨ, wɨrɨn̰a bɨ na, na kɨya ɗɔɔ gɨ na ɗe ɨrɨmedɨna a cay Kumu gɨ som-bɨra dan̰ cɨndi le. Ban na ba-pɔɗɛ kalaŋ ga ɨndəŋ nɔm bɨ, kondɨwayge na, ban poɗɨ na ka-aye kudurɔ.

¹¹ Gɨlɨn̰ ka-aye kudurɔ hɨnga nɔm ga nee le bɨ, aya non̰ bɨge ɗe kan ayge leen̰ gɨye bɨ.

¹² Ɗɔɔ gɨ ungo hagɨrɨn̰ kɨya gɨ ji naa marɨna naŋ. Ama kuɗa gɨ kɔl yɔdɨn̰ bɨ, gɨye-lɔɔdɨn̰ bɨ, ƴɔmɛ wandɨ ton̰ bɨ, aye kudurɔ kon̰ bɨ, haldɨn̰ gɨ duroŋ mɨra bɨ, wɨya na hɨnga ga ni gɨle, kɨya cay ka-aye kudurɔ.

¹³ Ɗa gusɨn̰ a kɨbɨ ɗɔngɨsɛ Magtubu di da Kumu di kan walge tumoy kalaŋ bɨ, kɨbɨ gɨlɨn̰ kalaŋ kɔl bɨ, kɨbɨ bɔgɛ kɔl gɨ ɗari kuduroy kalaŋ bɨ, bɨrɨŋ gɨsɨn̰ gɨ ɨŋ kɨya cagan̰.

¹⁴ Hɨnga ga Kumu bɨn̰ kalɨn̰ dan̰ gɨyəŋ gɨ da kɔl gɨ kan ɗege kɨbɨ ka-yɔɔ-kɔl-gɨ-Kumu-ba-yɔɔ gɨ kan yege kol can̰ bɨ, dan̰ gɨyəŋ gɨ da dayaŋ gɨ da kan ga muɗoldoŋ ga ɗege kobɨge can̰ bɨ le, ji ɗɔɔ ba aye ɨrɨmedɨn̰ cay nee coŋ naŋ.

¹⁵ Hɨnga ga ojɨ gɨ ji gɨ lɔɔ ba kɔ, ɗa gusɨn̰ kɨbɨ nee. Na kɨɗɨn̰ ga nee le ma, kalaŋ nɔm kɨya solɨn̰ge cɨn̰ ɔrɛ tumɔ ton̰ bɨ.

¹⁶ Ɗa cɨndɨn̰ kardi gusɨn̰ kon̰ bɨ, kardi gɨle kɔl kon̰ bɨ. Ƴɨma gusɨn̰ usa cay hɨnga nɔm ga nee le. Kɨɗɨn̰ ga ji na laa hɨn̰ wo̰ na, ji kɨya pɔɗɛ gusɨn̰ kon̰ bɨ, ji kɨya pɔɗɛ kan ga jege kɔl kɨbɨn̰ bɨ.