1 Timote 3 - Gabri Maja

Ka-dɔrɛ tumoy Daye

¹ Kɔl gɨ kɛ le na kɔl gɨ cɨndi, ɓal gɨ ungo kɨya bɔgɛ kuduroy cay nee. Hɨn̰ gɨ ungo na mala gɨye gɨ ni dorɨn̰ tumoy Ka-Daye na, gey na gɨye gɨ kuɗa.

² Ɨni na, kuɗa gɨ ban wɨya na ungo gɨ masadi unɔ bɨ, tamdi na pɨnaa bɨ, ban na ungo gɨ ba ƴɔmɛ gusi osɨwa cay hɨnga bɨ, ba sɔlɛ-hɨnga ga ɗari dɨm ma kɨya lɔɔ bɨ, na ungo gɨ gɨye-lɔɔdi ƴee cɨn̰ kalaŋ bɨ, na ungo gɨ ba ƴɔmɛ kɨrge gusi kuɗa bɨ, gɨ sol gɨlɨn̰ kalaŋ hɨnga bɨ.

³ Na guyɔŋ gɨ da cɛrɛ naŋ bɨ, ba-wɔrn̰ɛ dan̰ kalaŋ naŋ bɨ, ama na ungo gɨ kaledi jal bɨ, ba-bɔjɨn̰ɛ dan̰ kalaŋ naŋ bɨ, gɨ tabɨlaŋ di gursu ƴɨmayi naŋ bɨ.

⁴ Sol dɔrɛ tumoyi kalaŋ ga duroy ƴaadi dɨŋ kuɗa bɨ, sol lɔɔ ɗe karɨndi beeyige kɔl nee kuɗa bɨ, dan̰ hurɔmɔ bɨ.

⁵ Na cɨndi, ungo gɨ na sɨla dɔrɛ tumoy kalaŋ ga a duroy ƴaadi dɨŋ naŋ na, kɛ kɨya sɔlɛ kardi Ka-Daye ga da Kumu na mɨna ga?

⁶ Ɗɔɔ gɨ ban wɔyɛ ba-aye-kudurɔ gɨ hɨrɨwa naŋ ƴee, naŋ na dɔgɛ-jɔrgɔ kɨya lɔɔ ɗe gɨ Kumu kɨya bon̰ kɔl cay, hɨn̰ gɨ ban ba bon̰ kɔl cay Haban̰ wo̰.

⁷ Ɗaŋ coŋ, naa wa wa kalɨn̰ ma, kuɗa gɨ kalaŋ ga doŋ yage koldi kuɗa, naŋ na dasi kɨya bɔɔ cayi bɨ, ban kɨya bɔɔ boy boy da Haban̰ dɨŋ bɨ.

Ka-lɔɔ gɨye game hɨnga

⁸ Ka-lɔɔ gɨye game hɨnga le, koge kalɨn̰ ma, na hɨn̰ wo̰ bɨ. Kuɗa gɨ kan wɨyage na kalaŋ ga kalaŋ beege kɔl cayge bɨ, kalaŋ ga kɨbɨge sɔɔ sɔɔ naŋ bɨ, ka-ɗɔɔ gusɨge bɨn̰ cɛrɛ di suru naŋ bɨ, ka-male wɔɔ gɨ dan̰ gɨyəŋdi naŋ, naŋ bɨ.

⁹ Kuɗa gɨ kan amɨn̰ bɛrnɛ di Kumu haŋgɨ cɨndɨge haw kɛ cay nee ojɨn̰ cay hɨnga ga na beegɨŋ kuduroynagɨŋ cay nee le, dan̰ ɨrɨme gɨ arɨn̰ cərərə.

¹⁰ Kuɗa gɨ kan gɨwasage sɨla pa dɨm ma, hɨn̰ gɨ ungo na dɨbɨ kɔl cayge naŋ na, kan kɨya lɔɔ gɨye game hɨnga le ƴee.

¹¹ Gɨ da kandɨ kalɨn̰ ma koge na hɨn̰ wo̰ bɨ. Kuɗa gɨ kan woyge hɨn̰ kandɨ ga kalaŋ hɨndar turnoyge bɨ, ka-yɨle kɨɗɨn̰ naŋ bɨ, ka-ƴɔmɛ gusɨge cay hɨnga bɨ, lee gɨ kalaŋ bee kuduroyge cayge kɨya cay hɨnga nɔm.

¹² Kuɗa gɨ ba-lɔɔ gɨye game hɨnga le, na ungo gɨ tamdi pɨna bɨ, sol dɔrɛ tumoy karɨndi bɨ, kalaŋ ga a duroy ƴaadi dɨŋ kuɗa bɨ.

¹³ Əw, kan ga leege gɨye game hɨnga kuɗa le, kalaŋ kɨya dɨbe hurɔmɔ a cayge bɨ, kɨya ɓalege yɔɔ kɔl gɨ da aye kudurɔ gɨ beenagɨŋ pɨna dan̰ Jesu-Kɨris le, dan̰ Dɔnɔ bɨ.

Hɨnga ga woy kɨɗɨn̰ wɔsɛdɨge gaŋ ga gumu ga da Kumu

¹⁴ Ɨŋ wal magtubu di kɛ le bɨn̰, ama ɨŋ ɨrɨm gɨ ni ɔrɛ jɨn̰ gusɨn̰ mɨnde.

¹⁵ Ama hɨn̰ gɨ ɨŋ na bugoŋ haw kɛ naŋ kalɨn̰ ma, ɨŋ wal kol hɨnga ga kɛ le bɨn̰ an̰ solɨn̰ gɨyəŋ gɨ ni loon̰ gɨye a duroy ƴaa-di-da-Kumu dɨŋ. Ƴaa le, na Ka-Daye ga na kalaŋ ga da Kumu gɨ som-bɨra. Na hɨndi mana ɗe ƴɔmɛ kɔl gɨ cɨndi daa hɨn̰ sɨya gɨ ni duroy ƴaa wo̰ bɨ ɗe jɨbe te kɔl gɨ cɨndi daa bɨ.

¹⁶ Na cɨndi, gɨye-lɔɔ gɨ bugoŋ pɨna dan̰ Kumu gɨ woy kɨɗɨn̰ wɔsɛdi gɨŋ le, gumu tɔgɨ. Kɨris bɨləŋ ungo, gɨl gusi ɗe kalaŋ soliige, Turnɔ di da Kumu haŋgɨ cɨn̰ kalaŋ cay nee, Gɨ ban naa ungo gɨ dan̰ durɔ bɨ, Ka-ƴɔbɛ ga daa nii soliige bɨ, Kalaŋ teege bɛrnɛdi duroy te wɔɔ gɨ da kalaŋ bɨ, Kalaŋ beege kuduroyge cayi a cay gɨsəŋ gaŋ kɛ bɨ, Kumu ayi orɨn̰ danayi daa nii duroy gusoŋ-tɔgɛ gɨŋ bɨ.