1 Timote 2 - Gabri Maja

Kɔl gɨ ojɨ cay ɔlɛ Kumu

¹ Tumoy hɨnga nɔm na, ɨŋ dobɨ bandɨ kuduroygɨŋ gɨ ɗe kalaŋ ɨngɨrɨn̰ge Kumu hɨnga bɨ, ulan̰ge Kumu hɨnga bɨ, ɨlge cayi bɨ, laayige ho’o bɨ, kɨya cay kalaŋ nɔm.

² Kɨya cay kɛrɨmbɛlɛŋ bɨ, ka-dɔɔ cay kalaŋ nɔm bɨ. Ɗe gɨ ana somɨn̰gɨŋ kɨɗɨn̰ pɨna bɨ, dan̰ gusi-dɔbɛ bɨ, boy gɨye-lɔɔ gɨ bugoŋ pɨna dan̰ Kumu bɨ, boy bɔgɛ kɔl a cay hɨnga nɔm gaŋ bɨ.

³ Ɔlɛ Kumu gɨ hɨn̰ wo̰ le ba kuɗa bɨ, ba-ƴɔ cɨn̰ Kumu Ba-poɗɨnagɨŋ bɨ.

⁴ Ban gey gɨ kalaŋ nɔm na pɨɗage bɨ, ɨran̰ge bɨrɨŋ sɨlan̰ge kɔl gɨ cɨndi kuɗa bɨ.

⁵ Kɨya wa Kumu na pɨna hayi kəɗ kəɗ bɨ, Ba-ɨre duroy Kumu dan̰ kalaŋ kalɨn̰ ma, Na pɨna hayi kəɗ kəɗ. Ungo gɨ nee le, Na Jesu-Kɨris.

⁶ Ban ay gusi bee kɨya bon̰ cay kalaŋ nɔm. Kɨɗɨn̰ ga tɨwadi ɓal na, Ban lee tɨmon̰ toyi di nee le. Gɨlɨn̰ gɨ Kumu na gey pɔɗɛ gɨ da kalaŋ nɔm.

⁷ Na kɨya cay kɔl gɨ nee le ma, kan səŋge ba-tɔgɛ bɛrnɛ bɨ, ba-gɨre-gɨye bɨ, na kɨya kɔl koyi gɨ cɨndi gɨ nee le. Ɨŋ ye na kɔl gɨ cɨndi wala ɨŋ ya na kɔl poy naŋ. Ɨŋ na ba-gɨlɨn̰ kalaŋ ga toyge na Jubɨ naŋ hɨnga ga ɗe ungo na bee kuduroy cay nee bɨ, kɔl gɨ cɨndi bɨ.

⁸ Lee gɨ ɨŋ gey gɨ ban̰aŋ na dɨnage kobɨge daa, ulan̰ge Kumu kɨɗɨn̰ gaŋ nɔm. Kuɗa gɨ kan ulage Kumu dan̰ kuduroyge ga bɛrɛ kən̰jəŋ, dɨle kuduroy-hɔmɛ bɨ, dɨle bɔjɨn̰ɛ bɨ.

⁹ Ɨŋ gey gɨ kandɨ kalɨn̰ ma, kuɗa gɨ kan tɨbage badɨge ga dan̰ gɨyəŋdɨge bɨ, tɨbage hɨnga gusɨge dan̰ tɔbɛ hɨnga ga orɨn̰ dan̰ hurɔmɔ bɨ, ga wɨya gɨ ni gɨlɨn̰ gusɨge naŋ bɨ. Kuɗa gɨ kan tɨbage badɨge dan̰ ƴɔmɛ caa di dojɨ naŋ bɨ, dan̰ hɨnga ga ni lɔr naŋ bɨ, dan̰ mon̰ naŋ bɨ, dan̰ badɨge ga kɨledɨge osɨ naŋ bɨ.

¹⁰ Ama kuɗa gɨ kan gɨl kambɨladɨge dan̰ gɨye-lɔɔ gɨ kuɗa, hɨn̰ kandɨ ga gɨye-lɔɔdɨge bugoŋ pɨna dan̰ Kumu wo̰.

¹¹ Kuɗa gɨ kandɨ nɔm sɨmage kɨbɨge mundoŋ kɨya jon̰ kɔl gɨ ni gɨle dan̰ dɔbɛ caa dugo.

¹² Ɨŋ bɨn̰ dan̰ tama te gɨyəŋ gɨ ni gɨlɨn̰ ungo hɨnga naŋ bɨ, te gɨyəŋ gɨ ni dɔɔ cay ungo gɨ bara naŋ bɨ. Kuɗa gɨ hɨndi sɨma kubo mundoŋ.

¹³ Kɨya wa gɨ na Adam ma Kumu leeyi cay wase pa dɨm ma lee Ɛbə ƴee.

¹⁴ Bɨ, na Adam ma kumbulo naray naŋ, ama na tama ma kumbulo naaroo, ma hangɨɗɨn̰ cay gasɨn̰-kɔl.

¹⁵ Ama tama kɨya wɔɔ pɔɗɛ na kɨya cay kɨye gɨ hɨndi kɨya wɔɔ, naa gɨ hɨndi na ƴɨma guso usa te gɨyəŋ gɨ da aye kudurɔ gɨŋ bɨ, wandɨ dɨŋ bɨ, gɨye-lɔɔ gɨ woy dan̰ cɨndi bɨ, dan̰ gɨle guso naŋ bɨ.