1 Tesalonigɨ 4 - Gabri Maja

Gɨye-lɔɔ gɨ ƴee cɨn̰ Kumu

¹ Ay, karmɨnɨ ga ban̰aŋ dan̰ ga kandɨ, jagɨŋ kɔl hɨnge coŋ. Gɨye-lɔɔ gɨ ƴee cɨn̰ Kumu le kɨŋ tɨrabɨ na gusɨni, lee gɨ na ban ma magɨŋ lee. Ama haw kɛ na, ni ɨngɨrgɨŋ bɨ, dobɨ bandɨ kuduroygɨŋ dan̰ guson̰ Ba-gulɔŋ Jesu, ɗe gɨ kɨŋ na ɨra cɨndɨgɨŋ tumɔ ɗɨn̰ gɨ tumɔ coŋ.

² Kɨya wa kɨŋ sol hɨnga ga Ba-gulɔŋ Jesu bɨni gɨ ni na gɨlgɨŋ le, kuɗa.

³ Hɨnga ga Kumu gey le, na gɨ gɨye-lɔɔdɨgɨŋ na wɨya dan̰ cɨndi jɨn̰ tumɔ tumɔ bɨ, gɨ kɨŋ na ƴɨma gusɨgɨŋ na cay yɔyɛ dan̰ gangɨ caygɨŋ bɨ.

⁴ Ɗe waŋ waŋ duroygɨŋ tɨrabɨ gɨyəŋ gɨ ni somɨn̰ dan̰ tamdi dan̰ gɨye-lɔɔ gɨ woy dan̰ cɨndi bɨ, dan̰ bɔgɛ hurɔmɔ bɨ.

⁵ Dɨle ɗɔɔ kurɔŋdi hɨnga ga kuduroygɨŋ ƴɔɔ caygɨŋ, hɨn̰ kalaŋ ga toyge na Jubɨ naŋ ga sɨlage Kumu naŋ ba leen̰ge wo̰ naŋ.

⁶ Ojɨ cay kɔl gɨ nee le na, ɗɔɔ gɨ ungo mɔndɛ kuduroy kurɨndi wala tɨmdi naŋ bɨ, nare cɨndɨgɨŋ malɨn̰ gusɨgɨŋ kardi gusɨgɨŋ naŋ bɨ. Kɨya wa Ba-gulɔŋ kɨya gɔjɛ-baa di da hɨnga nɔm ga nee le. Ni yəgɨŋ kɔl gɨ nee le tumɔ bɨ, ni gɨlgɨŋ gɨ naa cɨndi bɨ.

⁷ Na cɨndi, Kumu tɨgani na gɨ ni na laa naa hɨnga ga ni dasi naŋ, ama ɗe gɨ ni na wɨya naa kalaŋ ga gɨye-lɔɔdɨge woy dan̰ cɨndi.

⁸ Na toy di hɨn̰ wo̰ ma, waŋ waŋ gɨ na kan̰a hɨnga ga ni gɨlgɨŋ ga nee le na, kan̰a na ungo gɨ ɨndi naŋ, ama kan̰ na Kumu gɨ ba bɨgɨŋ Turnɔ toyi ɗe-kuduroy-bɛrɛ le.

⁹ Kɔl gɨ ojɨ cay geye gɨ a duroy ka-karme na, kɨŋ ɨra n̰agedi gɨ ungo gɨ wale magtubu koldi bɨgɨŋ naŋ ɨni, kɨya wa Kumu gɨlgɨŋ kɨŋ-gandi gusɨgɨŋ gɨyəŋ gɨ ni geyɨn̰ gusɨgɨŋ duroygɨŋ.

¹⁰ Na hɨnga ga nee le ma magɨŋ lee, kɨya wa kɨŋ gey karmɨgɨŋ ga ban̰aŋ dan̰ ga kandɨ nɔm ga a cay gɨsəŋ ga Masedɨwan gaŋ. Ama ni bəgɨŋ kɔl-gɨ-ɗari kuduroygɨŋ gɨ kɨŋ na gey gusɨgɨŋ jɨn̰ tumɔ nee coŋ.

¹¹ Malagɨŋ sɔmɛ dan̰ gusi-dɔbɛ dan̰ gusɨgɨŋ bɨ, ɗagɨŋ kuduroygɨŋ kardi gɨye kogɨŋ kɨŋ-gandi gusɨgɨŋ bɨ. Laagɨŋ gɨye dan̰ kobɨgɨŋ hɨn̰ gɨ ni ba ayɨn̰ noyni bɨgɨŋ le.

¹² Hɨn̰ gɨ kɨŋ na laa hɨn̰ wo̰ na, kalaŋ ga doŋ kɨya dɨbege hurɔmɔ cay gɨye-lɔɔdɨgɨŋ bɨ, kɨŋ kɨya nɨn̰in̰ ungo pɨna naŋ bɨ.

Bɔyɛ lɨbe da kan ga beege kuduroyge cay Jesu

¹³ Ay karmɨnɨ ga ban̰aŋ dan̰ ga kandɨ, ni gey gɨ kɨŋ sɔmɛ dɨle sɔlɛ-hɨnga ga ojɨ cay kan ga mage le naŋ, ɗe agɨŋ leen̰ n̰age hɨn̰ kalaŋ ga hɨnga ga ni bɔgɛ ɨrɨmedɨge cay nee kage unɔ wo̰ naŋ.

¹⁴ Leen̰ cɨndi na, na bee kuduroyna cay mare gɨ da Jesu bɨ, cay bɔyɛ lɨbe koyi bɨ. Kɨya cay hɨnga ga nee le na, na sol leen̰ cɨndi gɨ Kumu kɨya bɔyɛ kan ga mage le lɨbe bɨ, kan ga beege kuduroyge cay Jesu bɨ. Ɨni na, kan kɨya sɔmɛge dan̰ Jesu.

¹⁵ Na Ba-gulɔŋ ba yoni kɔl gɨ ni ba gey yogɨŋ haw kɛ le: Na-gandi ga na kɨya sɔmɛ dan̰ cɨndɨna ƴee kɨɗɨn̰ ga Ba-gulɔŋ kɨya jɨga le, na kɨya dɔgɛ tumoy kan ga mage le naŋ.

¹⁶ Kɨya wa gumu gɨ da marɨne ga daa nii kɨya aye noyi be bɨ, burun̰ji di da Kumu kɨya yɔ bɨ, ɨni na Ba-gulɔŋ gusi kɨya andɨgaŋ gɨɗɨgɨ-Kumu gɨŋ kɨya ɨrga. Lee gɨ kalaŋ ga bugoŋge pɨna dan̰ Kɨris pa dɨm ma mage le, kɨya bɔyɛge lɨbe tumɔ.

¹⁷ Kardi nee ɨni na, na-gandi ga na baa dan̰ cɨndɨna a cay gɨsəŋ gaŋ ƴee le, Kumu kɨya orɨn̰ danana pɨna danage nɔm duroy gɨrɨmbale gaŋ, ɗe ana na yalɨn̰ cɨn̰ Ba-gulɔŋ duroy gɨɗɨgɨ-Kumu gɨŋ bɨ, ɗe ana na somɨn̰ dan̰ Ba-gulɔŋ dan̰ tumoyna bɨ.

¹⁸ Hɨn̰ wo̰ na, dɨbagɨŋ bandɨ kuduroy gusɨgɨŋ duroygɨŋ dan̰ kɔl gɨ nee le.