1 Tesalonigɨ 3 - Gabri Maja

¹ Na toy di hɨn̰ wo̰ ma, kɨɗɨn̰ ga ni waa kɨɗɨn̰ ga ni dɨbɨn̰ ɗugoyni naŋ na, ni ɨrɨm gɨ na golgo gɨ ni na sɨma kan̰dɨni a Atɛn,

² ama kurɨndɨni Timote gɨ na mɨgayna ba-lɔɔ gɨye gɨ da Kumu, kɨɗɨn̰ tɔgɛ bɛrnɛ Kɔl-gɨ-Ɗari gɨ da Kɨris gɨŋ le, ni gɨyii ɗe na or bɨgɨŋ tɔgɨ ɗe agɨŋ ɨrɨn̰ osu bɨ, dobɨn̰ bandɨ kuduroygɨŋ te aye kudurɔ kogɨŋ gɨŋ bɨ.

³ Ɗe hɨnga ga ni gɨwase ga ba leeni kɛ le, gabe ungo pɨna duroygɨŋ naŋ. Kɨya wa kɨŋ sol gɨ Kumu ɗe hɨnga ga ni gɨwase ga hɨn̰ wo̰ le, woy duroy hɨnga ga Kumu ƴom cay tɨbayige ojɨn̰ cayna.

⁴ Lee gɨ kɨɗɨn̰ ga ni ba ban̰ duroygɨŋ ƴee le, ni ni yəgɨŋ tumɔ gɨ hɨnga ga ni gɨle-cɨn̰ na kɨya loogɨŋ. Na hɨnga ga nee le ba lɔɔ gusɨge, lee gɨ kɨŋ sol kuɗa.

⁵ Na ban ma ɨŋ waa kɨɗɨn̰ ga ni dɨbɨn̰ ɗugonɨ naŋ, lee gɨ ɨŋ gɨy Timote ɗe na je kɔl gɨ ojɨ cay aye kudurɔ kogɨŋ le. Ɨŋ hɨndar gɨ Ba-gɨybe kalaŋ na da gɨybɨgɨŋ ɗe gɨlaledɨni da ban̰ gusɨni.

⁶ Ama haw kɛ na, Timote sayga gusɨgɨŋ jɨga bugoŋ gusɨni ɓala wɔlɛ naŋ ƴee, yeni kɔl gɨ ɗari gɨ ojɨ cay aye kudurɔ kogɨŋ bɨ, geye kogɨŋ bɨ. Yeni gɨ kɨŋ na ɨrɨm cayni kuɗa ban̰ nee bɨ, tabɨlaŋ sɔlɛdɨni na leegɨŋ hɨn̰ toni wo̰ bɨ.

⁷ Lee gɨ, karmɨnɨ ga ban̰aŋ dan̰ ga kandɨ, aye kudurɔ kogɨŋ dobɨ bandɨ kuduroyni duroy hɨnga ga bɨrɨn̰e cayni gaŋ bɨ, hɨnga ga ni gɨwase kani gaŋ bɨ.

⁸ Lee gɨ haw kɛ na, turnoyni jɨga gusɨni, kɨya wa kɨŋ ɨre osu te bugoŋ pɨna kogɨŋ dan̰ Ba-gulɔŋ.

⁹ Gusi-mɔwa nɔm di ni way kol caygɨŋ le, ni gɨ lɔɔ na mɨna ma mani gɨ leen̰ Kumu ho’o ɗe ɓal kɨɗɨn̰di gaŋ ga?

¹⁰ Son̰do dan̰ tɨwa di ɨni le, hɨnga ga ni olɨn̰ Kumu jɨn̰ nee nee ba kɛ: Na gɨ ban na bɨni gɨyəŋ ɗe ani na jogɨ solgɨŋ ɗaŋ bɨ, ɗe ani na bɨgɨŋ hɨnga ga wɨygɨŋ duroy aye kudurɔ kogɨŋ gɨŋ bɨ.

¹¹ Kuɗa gɨ Bayni Kumu gusi bɨ, Ba-gulondɨni Jesu bɨ, dɨra tumoyni ɨran̰ danani gusɨgɨŋ.

¹² Kuɗa gɨ Ba-gulɔŋ laa gɨ geye gɨ kɨŋ gey gusɨgɨŋ duroygɨŋ le malga bɨ ɨra dan̰ cɨndi jɨn̰ tumɔ tumɔ, hɨn̰ geye koni gɨ ni ba orɨn̰ kol caygɨŋ wo̰ bɨ.

¹³ Kuɗa gɨ ban laa gɨ ɗugoygɨŋ usa ɗe agɨŋ won̰ kalaŋ ga woy dan̰ cɨndɨge bɨ, kalaŋ ga masadɨge unɔ bɨ, tumoy Bayna Kumu, kɨɗɨn̰ ga Ba-gulondɨna Jesu kɨya ɨrga dan̰ kalaŋ kayi nɔm le. Ɗa-ɗe-woy-hɨn̰-wo̰!