1 Tesalonigɨ 2 - Gabri Maja

Pol tee bɛrnɛ Kɔl-gɨ-Ɗari a Tesalonigɨ

¹ Ay, karmɨni ga ban̰aŋ dan̰ ga kandɨ, kɨŋ-gandi kalɨn̰ ma kɨŋ sol gɨ kɨŋ ƴɨmani gusɨgɨŋ na kalɨn̰ wo̰ dugo naŋ.

² Hɨn̰ gɨ kɨŋ ba sol le, tumɔ pa dɨm ma gɨ ni kɨya bugoŋ tagɨŋ le, gɨlnige-cɨn̰ bɨ, yagɨdɨnige bɨ, a cay ƴaa-di-gumu di Pilib dɨŋ. Ama Kumu bɨni bandɨ lee gɨ ni tee bɛrnɛ di Kɔl-gɨ-Ɗari koyi, dɨle hundɔrɔ duroy kondɨwadi kɨmbɨl.

³ Kɔl-gɨ-Ɗari gɨ ni tee bɛrnɛdi le, toy sa na te ɨrɨme gɨ ɨsɨni gɨŋ naŋ bɨ, gɨ mɨdagi gɨŋ naŋ bɨ, gɨ dan̰ jɨba naŋ bɨ,

⁴ ama Kumu gɨwasɨni pa dɨm ma bɨni gɨye tɔgɛ bɛrnɛ Kɔl-gɨ-Ɗari le ƴee. Lee gɨ ni ya kɔl na ɗe gɨ na mon̰ kalaŋ ga ɨndəŋ naŋ, ama na ɗe gɨ na mon̰ Kumu gɨ gɨwasɨ kuduroyni le.

⁵ Hɨn̰ gɨ kɨŋ ba sol le, ni ya na kɔl gɨ ɗe na or te teɗiigɨŋ naŋ bɨrɨŋ bɨ, kɔl yɔ dɨni gɨl gɨ ni na mala naa kandi-wɔɔ kol cayni naŋ bɨrɨŋ bɨ, Kumu na tɨmon̰ koni.

⁶ Ni mala na gɨ kɨŋ-gandi bɨ, kalaŋ ga ɗaŋ bɨ, na dɨbge gusoŋ-tɔgɛ a cayni naŋ.

⁷ Ni na ka-gɨre-gɨye ga da Kɨris, ni orɨn̰ dan̰ dɔnɔ di ni ɨngɨrgɨŋ hɨnga dan̰ kondiige, ama ni aya hɨnga gusɨgɨŋ naŋ. Kɨɗɨn̰ ga ni ban̰ duroy gɨŋ le, kaledɨni jal hɨn̰ karɨn̰aŋ ƴoyge di sol kardi karɨndo kuɗa wo̰.

⁸ Homni kol caygɨŋ tɔgɨ, lee gɨ ni gey gɨlgɨŋ na Kɔl-gɨ-Ɗari gɨ da Kumu ƴɔbɨ naŋ, ama aye gusɨni dɨbe coŋ kol caygɨŋ bɨ, kɨya wa kɨŋ ƴee kuduroyni gɨɗaŋ.

⁹ Ay, karmɨnɨ ga ban̰aŋ dan̰ ga kandɨ, hɨngɨŋ a cay gɨye gɨ ni ba lee ƴomɨn̰ kɨjan̰e le bɨ, cay gɨlale gɨ ni ba gɨlal danagɨŋ bɨ. Kɨɗɨn̰ ga ni ba tee bɛrnɛ di da Kɔl-gɨ-Ɗari gɨ da Kumu bɨgɨŋ le, ni lee gɨye dan̰ son̰do bɨ, tɨwa di ɨni bɨ, ɗe ani na nɨyin̰ ungo pɨna wo̰ duroygɨŋ naŋ.

¹⁰ Kɨŋ-gandi bɨ, Kumu bɨ, kɨŋ na tɨmon̰ gɨ da haldɨni gɨ ni somɨn̰ duroygɨŋ kɨŋ-gandi ka-aye kudurɔ le, na hal gɨ duroŋ mɨra bɨ, gɨ dan̰ durɔ ɗɨngar bɨ, gɨ masadi unɔ bɨ.

¹¹ Hɨn̰ gɨ kɨŋ ba sol le, hɨnga ga ni ba lee danagɨŋ le, woy na hɨn̰ hɨnga ga karɨn̰aŋ ban̰an̰ge ba lee dan̰ karɨndɨge wo̰.

¹² Ni bee kɔl-gɨ-ɗari kuduroygɨŋ bɨ, dobɨ bandɨ kuduroygɨŋ bɨ, olgɨŋ jɨn̰ nee nee bɨ, ɗe gɨye-lɔɔdɨgɨŋ na bugoŋ pɨna dan̰ Kumu gɨ təgɨŋ, ɗe agɨŋ na andɨn̰ a boy dɔɔ-ƴaa toyi dɨŋ bɨ, gusoŋ-tɔgɛ koyi gɨŋ bɨ.

¹³ Toy di ni ba leen̰ Kumu ho’o, kol caygɨŋ dan̰ tumoyni le ba kɛ: Kɨɗɨn̰ ga ni ba tee bɛrnɛ kɔl gɨ da Kumu bɨgɨŋ le, kɨŋ je bɨ, kɨŋ ƴee bɨ, kɨŋ ƴa na hɨn̰ gɨ naa kɔl gɨ da ungo gɨ ɨndi wo̰ naŋ, ama na hɨn̰ kɔl gɨ da Kumu gusi. Na cɨndi, na kɔl gɨ da Kumu, ban lee gɨye kuduroygɨŋ kɨŋ-gandi ka-aye kudurɔ.

¹⁴ Ay, karmɨnɨ ga ban̰aŋ dan̰ ga kandɨ, kɨŋ ay cay tɨban̰ gɨyəŋ gɨ nee le, hɨn̰ Ka-Daye ga da Kumu ga bugoŋge pɨna dan̰ Jesu-Kɨris, ga somge a cay gɨsəŋ ga Jude gaŋ le. Kɨŋ woy na hɨn̰ kan wo̰ bɨ. Kalaŋ ga a cay gɨsəŋ kagɨŋ gaŋ gɨlgɨŋge cɨn̰ na hɨn̰ gɨ Jubɨn̰əŋ kalɨn̰ ma ba gɨlɨn̰ge kalaŋ ga da Jesu ga a cay gɨsəŋ kage gaŋ cɨn̰ wo̰ bɨ.

¹⁵ Jubɨn̰əŋ ga nee le, kan naa ba dɨɗege Ba-gulɔŋ Jesu bɨ, ka-yɔɔ-kɔl-gɨ-Kumu-ba-yɔɔ ga tumoyi bɨ, gɨlnige ni-gandi kalɨn̰ ma cɨn̰ tɔgɨ bɨ. Mondɨge kuduroy Kumu bɨ, bɨlege ka-baa ga da kalaŋ nɔm bɨ.

¹⁶ Ni-gandi ni tee bɛrnɛ bɨn̰ kalaŋ ga toyge na Jubɨ naŋ ɗe na poɗɨn̰ge, ama Jubɨn̰əŋ ga nee le narnige coŋ. Hɨn̰ wo̰ na, kan kɨya dɨɗe kɨbɨ hada gɨ da ɨsɨna koge yɔd. Ama kagadi gɨŋ na, kuduroy-hɔmɛ di da Kumu ba cayge.

Pol gey jɔgɛ sɔlɛ kalaŋ ga Tesalonigɨ

¹⁷ Ay, karmɨnɨ ga ban̰aŋ dan̰ ga kandɨ, na sɨla gusɨnagɨŋ naŋ kardɨ na ɓal kɔl lam, lee gɨ tabɨlaŋdɨgɨŋ leeni. Na sɨla gusɨnagɨŋ dan̰ cɨndɨnagɨŋ naŋ ama ɗugoynagɨŋ na mɨndege. Tabɨlaŋdi solgɨŋ leeni tɔgɨ lee gɨ ni mal gɨyəŋ gɨ ni ɔrɛ solgɨŋ.

¹⁸ Ni mal jɔgɛ tagɨŋ. Ɨŋ-bandi Pol na, ɨŋ mal ɔrɛ tagɨŋ na tɨba kondɨ. Ama Sidan narni ɔrɛ coŋ.

¹⁹ Na cɨndi, wɔlɛ gɨ Ba-gulondɨni Jesu-Kɨris kɨya caga le, hɨnga kani ga ni bee ɨrɨmedɨni cay nee, wala gusi-mɔwa toni, wala jagɨwa ga ni tɨrɨmbala kani le, na ga ani ga? Na kɨŋ-gandi naŋ ga?

²⁰ Ho’o, na kɨŋ-gandi ma na gusoŋ-tɔgɛ koni bɨ, gusi-mɔwa toni bɨ.