1 Pɨyɛr 5 - Gabri Maja

Sɨgɨŋ cɨndɨgɨŋ kardi kandi-page ga da Kumu

¹ Haw kɛ na, ɨŋ gey yon̰ ka-muɗɔlɛ ga somge duroygɨŋ kɔl. Ɨŋ-bandi kalɨn̰ ma, ɨŋ na mɨgayge gɨ ba muɗɔlɛ gɨ da Ka-Daye bɨ. Ɨŋ na tɨmon̰ gɨ da cɨn̰-gɨle-cɨn̰ gɨ da Kɨris bɨ, wɔlɛ gɨ gusoŋ-tɔgɛ koyi kɨya gɨle gusi doŋ le, ɨŋ-bandi kalɨn̰ ma, ɨŋ kɨya wɔɔ hɨnge danayi bɨ. Hɨnga ga ɨŋ ɨngɨrgɨŋ kɨŋ-gandi ga muɗoldoŋ ba kɛ:

² Te gamge ga da Kumu ga beegege kobɨgɨŋ le, dɨragɨŋ tumoyge kuɗa bɨ. Ɗagɨŋ cɨndɨgɨŋ kuɗa kardɨge bɨ. Ama ɗɔɔgɨŋ gɨ ɗe ungo san̰ danagɨŋ pa dɨm ma magɨŋ lee ƴee naŋ. Ama kɨŋ sa laa dan̰ kuduroy-geye bɨ, dan̰ gɨyəŋ gɨ da Kumu bɨ. Kɨŋ laa gɨye kogɨŋ na gɨ ni won̰ nare gɨ kɨya dɨbe dasi caygɨŋ naŋ. Ama na kɨya se gɨ kɨŋ si gusɨgɨŋ kɨbɨ nee.

³ Kan ga kan beegege kobɨgɨŋ ɗe kɨŋ na sɨla kardɨge le, kɨŋ ɗɔɔ ba dɔɔ cayge hɨn̰ kɛrɨmbɛlɛŋ wo̰ naŋ. Ama kuɗa gɨ kɨŋ wɨya hɨn̰ hɨnga ga ni ƴɔlɛ gɨ da te gamge le wo̰.

⁴ Hɨn̰ gɨ kɨŋ na laa hɨn̰ wo̰ na, kɨɗɨn̰ ga Kɨris gɨ na kɨlma gɨ gumu gɨ ba sɔlɛ kardi gamge nɔm na jɨge na, kɨŋ kɨya wɔɔ jagɨwa-tɨrɨmbala gusoŋ-tɔgɛ ga jɨran̰edɨge ga toyge kɨya ayaŋ naŋ bɨrɨŋ le.

⁵ Kɨŋ marɨne kalɨn̰ ma, kuɗa gɨ kɨŋ dɨba caygɨŋ dugo bɨn̰ ga muɗoldoŋ. Bɨ kɨŋ-gandi ka-aye kudurɔ nɔm ga duroy Ka-Daye nɔm le, dɔgɛgɨŋ jurgiigɨŋ dan̰ gusɨgɨŋ naŋ. Kɨya wa walge duroy Magtubu di da Kumu dɨŋ yege hɨn̰: «Kumu jɨbɨ ka-dɔgɛ jorgiige sɛdɨ coŋ, ama ban lee ɗarwa dan̰ kan ga dɨga jorgiige naŋ.»

⁶ Naa hɨn̰ wo̰ na, dɨbagɨŋ caygɨŋ dugo tumoy dɔnɔ di da Kumu ɗe hɨn̰ gɨ wɔlɛ gɨ ban ojɨ le na bugoŋ na, ban ba kɨya aye caygɨŋ daa.

⁷ Hɨnga nɔm ga kɨŋ sol cay nee le, kɨŋ dɨra ɨrɨmedɨge caygɨŋ coŋ bɨ, kɨya gɨ ban na ba sɔlɛ kardɨgɨŋ.

⁸ Ƴɨmagɨŋ gusɨgɨŋ usa cay hɨnga nɔm bɨ, sɨmagɨŋ dan̰ toygɨŋ daa bɨ! Kɨya wa Ba-Baadɨgɨŋ haban̰ gor nɨwɨrde caygɨŋ hɨn̰ gusgo gɨ dor noyi ɨlɨn̰ malɨn̰ gɨyəŋ gɨ ni dɨn̰ ungo wo̰.

⁹ Ɨrgɨŋ usa a te aye kudurɔ gɨŋ bɨ, dɨrsɨdɨgɨŋ toygɨŋ dugo ɨrɨn̰ cɨn̰ haban̰. Sɨlagɨŋ hɨn̰ gɨ karmɨgɨŋ ga ban̰aŋ dan̰ ga kandɨ ga sugudoŋge a cay gɨsəŋ gaŋ le, somge na a duroy tabɨ di pɨnaa dɨŋ hɨn̰ togɨŋ wo̰ bɨ.

¹⁰ Kumu ba-gulɔŋ ɗarwa nɔm gɨ təgɨŋ ɗe agɨŋ na bugoŋ pɨna dan̰ Kɨris bɨ, andɨn̰ a boy gusoŋ-tɔgɛ gɨ woy dan̰ cɨndi gɨŋ bɨ le, ban kɨya bɨlgɨŋ ɗaŋ a te gɨye-lɔɔdɨgɨŋ gɨŋ nɔm. Kardi cɨn̰-gɨle-cɨn̰ di ba kɨya lɔɔgɨŋ lam wo̰ le, Kumu gusi kɨya dɨɗe kɨbɨ gɨye-lɔɔ koyi kol caygɨŋ bɨ. Ban kɨya jɨbe toygɨŋ ɗe agɨŋ na ɨrɨn̰ osɨ bɨ, kɨya bɨgɨŋ tɔgɨ bɨ, hɨnga pɨna kɨya yɨbagdɨgɨŋ naŋ bɨ.

¹¹ Dɔnɔ na toyi ɨlge dan̰ ɨlge! Ɗa-ɗe-woy-hɨn̰-wo̰!

Lapɨya di ni dɨɗɨn̰ kɨbɨ kɔl

¹² Ɨŋ wal magtubu di ɗɨgɨsɛg di kɛ le na dan̰ gɨyəŋ gɨ da kurɨndɨnagɨŋ Silbɛ̰, ɨŋ lee tɨmon̰ kol cayi gɨ ban na kurdɨna gɨ ɨre cay tɨbayi dɨŋ. Ɨŋ mal na gɨ ni dɔbɛ bandɨ kuduroygɨŋ bɨ, gɨ ni lɔɔ tɨmon̰ kol caygɨŋ gɨ kɨŋ na orɨn̰ dan̰ ɗarwa di da Kumu di cɨndi bɨ. Ɨrgɨŋ cay nee usa.

¹³ Ka-Daye ga woyge a Babilɔn, ga Kumu torge hɨn̰ gɨ ban ba torgɨŋ bɨ le, ləgɨŋge lapɨya. Kuronɨ Marg kalɨn̰ ma ləgɨŋ lapɨya bɨ.

¹⁴ Laan̰gɨŋ gusɨgɨŋ lapɨya duroygɨŋ dan̰ lapɨya di da ka-karme. Kɨŋ nɔm ga kɨŋ bugoŋ pɨna dan̰ Kɨris le, kuɗa gɨ gusi-dɔbɛ gɨ da Kumu baa danagɨŋ.