1 Pɨyɛr 4 - Gabri Maja

Gɨye-lɔɔ gɨ ɨlgi dan̰ gɨ hɨrɨwa

¹ Cɨn̰-n̰age di Kɨris way a kuyoŋdi-gusi gɨŋ le kɨŋ sol kuɗa. Na toy di hɨn̰ wo̰ ma kɨŋ-gandi kalɨn̰ ma, kɨŋ ɗa gɨ ɨrɨme gɨ hɨn̰ wo̰ woy caygɨŋ bɨ. Kɨya wa ungo gɨ way cɨn̰-gɨle-cɨn̰ a kuyoŋdi-gusi gɨŋ le, kan puyonge coŋ dan̰ ɨsɨna.

² Lee gɨ ayɨn̰ toy haw kɛ na, kɨbɨ wɔlɛ gɨ ba tumoygɨŋ gɨ ni somɨn̰-bɨra a cay gɨsəŋ gaŋ le, kuɗa gɨ kɨŋ sɨma dan̰ te gɨyəŋ gɨ da kuduroy geye gɨ da Kumu. Ama na dan̰ te gɨyəŋ gɨ da tabɨlaŋdi hɨnga ga lee kalaŋ le naŋ.

³ Na cɨndi, tumɔ le kɨŋ gey na lɔɔ hɨnga nɔm ga ƴom kuduroy kalaŋ ga sɨlage Kumu gɨ cɨndi naŋ tɔgɨ. Lee gɨ kɨŋ lee hɨnga ga ɨsɨni ga tabɨlaŋdɨge woy kuduroygɨŋ bɨ, kɨŋ na ka-yɔyɛ gorɨn̰ daa bɨ, ka-kɔydɛ cɛrɛ bɨ, ka-lɔɔ harɨne bɨ, ka-sɔ cɛrɛ tɔgɨ a kɨɗɨn̰ lɔɔ kɨdɨrɛ gaŋ bɨ, ka-n̰ɨre kula ga ɨsɨn bɨ.

⁴ Na toy di hɨn̰ wo̰ ma haw kɛ na, kɔl kay kalaŋ ga sɨlage Kumu gɨ cɨndi naŋ sɛl sɛl. Kɨya wa kɨŋ laa gɨye lɔɔ gɨ ni dasi gɨ hɨn̰ wo̰ le danage naŋ, lee gɨ kan yagɨdɨgɨŋge.

⁵ Ama hɨnga ga kan ba lee le, kan kɨya dɔrɛge kardɨge nɔm tumoy Kumu ƴee. Kɨya wa ban som cay tɨbayi dɨŋ kɨya bɔyɛ kɔl cay kalaŋ ga somge-bɨra bɨ, ga mage bɨ.

⁶ Na toy di hɨn̰ wo̰ ma leen̰ cɨndi, teege bɛrnɛ Kɔl-gɨ-Ɗari bɨn̰ge kalaŋ ga haw kɛ kalɨn̰ ma mage bɨ. Kan na bɨya kɔl si cayge kɨya cay gɨye-lɔɔdɨge a cay gɨsəŋ gaŋ kɛ hɨn̰ kalaŋ nɔm wo̰ kalɨn̰ ma, kan kɨya sɔmɛ-bɨra gɨ dan̰ gɨyəŋ gɨ da Turnɔ di da Kumu.

Ka-ɗɔɔ cɨndɨge kardi hɨnga ga Kumu be kalɨn̰ le

⁷ Wɔlɛ gɨ te hɨnga nɔm kɨya ayaŋ le woy mɨnde. Na toy di hɨn̰ wo̰ ma sɨmagɨŋ dan̰ cɨn̰-muɗɔlɛ bɨ, ƴɨmagɨŋ gusɨgɨŋ usa a cay hɨnga nɔm bɨ, ɗe gɨ agɨŋ ɓal olɨn̰ Kumu dan̰ tɨwa nɔm.

⁸ Tumoy hɨnga nɔm na, geygɨŋ gusɨgɨŋ duroygɨŋ dan̰ geye gɨ ɨl cum. Kɨya wa geye na hɨnga ga kɨya tɔlɛ cay ɨsɨnan̰əŋ ga dan̰ kondige.

⁹ Kuɗa gɨ waŋ waŋ kalɨn̰ ma duroygɨŋ, ƴɨma karmii ga ɨrgage gusi dɨle yamɨn̰-kɔl.

¹⁰ Kumu bɨgɨŋ hɨnga ga ni ɗarwa ga toyge kan̰dɨge kan̰dɨge. Na hɨn̰ wo̰ ma, kuɗa gɨ waŋ waŋ kalɨn̰ ma aya kɨway hɨnga ga ni tɔrɛ-kɨbɨ ga Kumu bii le, gusɨnan̰ kamdi bɨ. Na cɨndi, kɨŋ na ka-sɔlɛ kardi hɨnga ga ni ɗarwa di da Kumu ga ɗadɨrdaŋ.

¹¹ Waŋ waŋ gɨ na yan̰ karmii kɔl a kɨɗɨn̰ daye gaŋ na, ɗa gɨ ban yage dan̰ gɨyəŋ gɨ da kɔl gɨ da Kumu. Waŋ waŋ gɨ naa ba lɔɔ gɨye bɨn̰ mɨgayi na, kuɗa ban lee dan̰ tɔgɨ di Kumu bii. Ɗe hɨnga nɔm ga kɨŋ lee dan̰ gɨyəŋ gɨ da Jesu-Kɨris le dɨbɨ gusoŋ-tɔgɛ a cay Kumu. Gusoŋ-tɔgɛ bɨ, dɔɔ tɨrɨmbala bɨ, woy ojɨn̰ na cayi, ɨlge dan̰ ɨlge. Ɗa-ɗe-woy-hɨn̰-wo̰!

Cɨn̰-gɨle-cɨn̰ di lee kalaŋ ga da Kɨris kɨya cay Kɨris

¹² Ay karmɨnɨ ga ɨŋ lee-toygɨŋ, cɨn̰-gɨle-cɨn̰ di ƴee hɨn̰ tɨwa wo̰ duroygɨŋ kɨya gɨwasɨgɨŋ le, kɨŋ ɗɔɔ gɨ kɔl kaygɨŋ sɛl sɛl kol caa hɨn̰ na hɨnga ga ni bɨrane naa ba loogɨŋ wo̰ naŋ.

¹³ Ama kɨŋ laa gusi-mɔwa kɨya cay cɨn̰-gɨle-cɨn̰ di leegɨŋ hɨn̰ gɨ ba leen̰ Kɨris wo̰ bɨ le. Ɗe wɔlɛ gɨ gusoŋ-tɔgɛ koyi na gɨl gusi doŋ na, gusɨgɨŋ kɨya moogɨŋ bɨ, kɨŋ kɨya tɔgɛ pɨre bɨ.

¹⁴ Hɨn̰ gɨ kalaŋ na yagɨdagɨŋge kɨya cay guson̰ Kɨris na, kɨŋ orɨn̰ dan̰ tumoy wolwa. Kɨya wa Turnɔ di da gusoŋ-tɔgɛ gɨ na Turnoy Kumu le som caygɨŋ.

¹⁵ Ɗɔɔ gɨ ungo pɨna duroygɨŋ sɔlɛ cɨn̰-gɨle-cɨn̰ kol dɨɗe ungo naŋ bɨ, hase naŋ bɨ, hɨnga ga ɨsɨn ga ban lee naŋ bɨ, dɔbɛ gɨ ban dobɨ kɨbi boy kɔl gɨ da kalaŋ gɨŋ naŋ bɨ.

¹⁶ Ama hɨn̰ gɨ ungo na sɨla cɨn̰-gɨle-cɨn̰ kɨya gɨ ban naa ungo gɨ ba-kɔbɛ Kɨris na, ɗɔɔ gɨ dasi doyi naŋ. Ama kuɗa gɨ ban hɨrama Kumu kɨya guson̰ ba-kɔbɛ Kɨris gɨ ba ye cayi le.

¹⁷ Kɨya wa tɨwa di ni bon̰ kɔl ɓal ɨni. Ama na kalaŋ ga da Kumu ma kan kɨya aye toyi cayge. Ama hɨn̰ gɨ bɔyɛ kɔl na kɨya aye toy cayna na, kan ga kan̰ge bɔgɛ kuduroyge a cay Kɔl-gɨ-Ɗari le, kan gɨ dɨɗe kɨbi koge na mɨna ga?

¹⁸ Hɨn̰ gɨ naa dan̰ gɨlale ma ungo gɨ dan̰ durɔ ɗɨngar na wayan̰ pɔɗɛ na, ungo gɨ ba terɨn̰ bɨ, ba-lɔɔ ɨsɨna bɨ le, kɛ koyi gɨ wɔyɛ na mɨna ga?

¹⁹ Naa hɨn̰ wo̰ na, kan ga solge cɨn̰-gɨle-cɨn̰ kɨya ɨre gɨ kan ɨre kardi kuduroy-geye gɨ da Kumu le, kuɗa gɨ kan ɨr kɨɗɨn̰ lɔɔ ɗarwa dɨŋ dan̰ tumoyge bɨ, ayage kuduroyge gɨ cɨndi bɨn̰ Kumu gɨ ba ɗɔɔ hɨnga nɔm bɨ, ba-lɔɔ te tumoyi di ban ay bɨ le.