1 Pɨyɛr 3 - Gabri Maja

Gɔrɛ ƴaa di da ka-aye kudurɔ

¹ Kɨŋ kandɨ, kogɨŋ ba kɛ: Dɨbagɨŋ caygɨŋ dugo bɨn̰ kodɨn̰igɨŋ, ɗe hɨn̰ gɨ kan ga pɨna duroyge na kan̰age bɔgɛ kuduroyge cay kɔl gɨ da Kumu kalɨn̰ ma, na bɨgan̰ge kuduroyge cayi kol gɨye-lɔɔdɨgɨŋ dɨle gɨ kan kɨya yɔɔ kɔl.

² Kɨya wa kan solge gɨye-lɔɔdɨgɨŋ naa gɨye-lɔɔ gɨ kɔl gɨ ni yɔɔ na unɔ cay nee bɨ. Solge gɨ kɨŋ na orɨn̰ dan̰ hurɔmɔ bɨ.

³ Ɗɔɔ gɨ hɨnga ga ni majɨmɨn̰ gusɨgɨŋ wɔyɛ na hɨnga ga ni majɨmɨn̰ kuyoŋdi-gusɨgɨŋ gɨ doŋ ƴɔbɨ naŋ, hɨn̰ dɔgɛ da caa naŋ le, gambaŋ ga ni sɨma ga ni lɔr naŋ le, badɨge ga ni tɔbɛ ga ɗadɨrdaŋ ɗadɨrdaŋ.

⁴ Ama ɗagɨŋ gɨ majɨme togɨŋ saya na a kuduroygɨŋ. Majɨme di sayga a kuduroygɨŋ le ba kɛ: Kaledi ungo gɨ jal bɨ, ɨrɨme gɨ woy kɨɗɨn̰ pɨna bɨ. Kɨya wa lɔɔ hɨnga ga hɨn̰ wo̰ le, na majɨme di kɨledo ɗɨn̰ cɨn̰-kɨɗɨn̰ a cɨn̰ Kumu.

⁵ Kandɨ ga kan torge sɨge dan̰ cɨndɨge ga jɨne ga beege ɨrɨmedɨge cay Kumu, majɨmdege gusɨge na hɨn̰ wo̰, kɨya wa kan dobɨge cayge dugo bɨn̰ kodɨn̰ige.

⁶ Hɨn̰ Sara ba been̰ kɔl cay Abɨraham wo̰, lee gɨ hɨndi teeyi ba-gulonɨ. Haw kɛ, hɨn̰ gɨ kɨŋ na laa ɗarwa bɨ, ɗa hundɔrɔ pɨna wo̰ laagɨŋ naŋ bɨ na, kɨŋ kɨya bɨle na karɨndo ga kandɨ.

⁷ Kogɨŋ kɨŋ-gandi kandɨ kodɨn̰ige ba kɛ: Kɨɗɨn̰ ga kɨŋ na sɨma dan̰ kandɨn̰igɨŋ na, kuɗa gɨ kɨŋ sɨla gɨ kan na kalaŋ ga usa tɔgɨ naŋ. Kɨŋ bɨge hurɔmɔ kɨya wa naa wa wa kalɨn̰ ma, kan kɨya wɔɔ sɔmɛ-bɨra gɨ Kumu be kalɨn̰ le danagɨŋ bɨ. Kɨŋ laa hɨn̰ wo̰ ɗe hɨnga pɨna lɨgɨ gɨyəŋ ɔlɛ Kumu kogɨŋ naŋ.

Sɔlɛ cɨn̰-gɨle-cɨn̰ te lɔɔ hɨnga ga dan̰ durɔ

⁸ Gɨ ni dɨɗɨn̰ kɨbi na, kɨŋ-gandi nɔm le, kuɗa gɨ kuduroygɨŋ bugoŋ pɨna bɨ, kuɗa ɨrɨmedɨgɨŋ gɨ ƴen̰ kuduroygɨŋ ɨra pɨna bɨ, geygɨŋ gusɨgɨŋ hɨn̰ ka-karme ga geyge gusɨge wo̰ bɨ, sɨlagɨŋ cɨn̰-n̰age di da kamdɨgɨŋ bɨ, tɨbagɨŋ caygɨŋ dugo bɨn̰ gusɨgɨŋ bɨ.

⁹ Hɨn̰ gɨ kan na laagɨŋ hɨnga ga ɨsɨni na, kɨŋ ɗɔɔ ba jogɨn̰ dan̰ ɨsɨna ban̰di nee naŋ bɨ, hɨn̰ gɨ kan na yagɨdagɨŋ na, kɨŋ ɗɔɔ ba jogɨn̰ dan̰ yagɨde ban̰di nee naŋ bɨ. Ama kɨŋ tɨra na kɨbɨgɨŋ cayge. Kɨya wa Kumu təgɨŋ na a te gɨyəŋ gɨ ni torɨn̰-kɨbɨgɨŋ cay kalaŋ bɨ, agɨŋ na wan̰ tɔrɛ-kɨbɨ gɨ na hɨnga wɔɔ ga ni ban̰di-gulɔŋ ga Kumu kɨya bɨgɨŋ bɨ.

¹⁰ Kɨya wa walge duroy magtubu Kɨbe-Kɨra dɨŋ yege hɨn̰: «Ungo gɨ na gey sɔmɛ-bɨra gɨ kuɗa bɨ, Gey sɔlɛ wɔlɛn̰əŋ ga ni gusi-mɔwa bɨ na, Kuɗa gɨ ban ƴɨma kɨbi a cay kɔl gɨ ɨsɨni bɨ, A cay kɔl gɨ ni narɨn̰ kɨɗɨn̰ bɨ.

¹¹ Kuɗa gɨ ban bɨl kardi bɨn̰ hɨnga ga ɨsɨni bɨ, Ama laa hɨnga ga kuɗa bɨ, Ƴɨma gusi usa te male gusi-dɔbɛ bɨ.

¹² Kɨya wa cɨn̰ Ba-gulɔŋ woy a cay kalaŋ, Ga ka-lɔɔ hɨnga ga dan̰ durɔ ɗɨngar bɨ, ban dor sɨmayi kɨya jon̰ ɔlɛ Kumu koge bɨ. Ama ban ay cɨndi vbiŋ coŋ a cay ka-lɔɔ hɨnga ga ɨsɨni.»

¹³ Hɨn̰ gɨ kɨŋ na gɨl gusi-hɨmbalwa kogɨŋ doŋ kol cay ɗarwa dan̰ kalaŋ na, kɛ na waŋ ba kɨya sɔ loogɨŋ hɨnga ga ɨsɨni ga?

¹⁴ Ma hɨn̰ gɨ kɨŋ na wa cɨn̰-gɨle-cɨn̰ kɨya cay hɨnga ga dan̰ durɔ ɗɨngar ga kɨŋ lee kalɨn̰ ma, tumoy wolwa woy kol caygɨŋ. Hundorgegɨŋ naŋ bɨ, ɗɔɔgɨŋ ɗugoygɨŋ algɨŋ naŋ bɨ.

¹⁵ Ama Kɨris gɨ na Ba-gulɔŋ le, dɨrayigɨŋ sigɨŋ dan̰ cɨndi a ɗugoygɨŋ. Sɨmagɨŋ a cay tɨbaygɨŋ dɨŋ dan̰ wɔlɛ pɨna pɨna, ɗe agɨŋ dorɨn̰ te hɨnga ga kɨŋ ba bee ɨrɨmedɨgɨŋ cay nee le, tumoy kalaŋ ga ka-ɨngɨrgɨŋ toyge le.

¹⁶ Ama gɨlgegɨŋ kardɨge dan̰ kaledɨgɨŋ ga jali bɨ, hurɔmɔ bɨ. Laagɨŋ hɨnga nɔm dan̰ ɨrɨmedɨgɨŋ gɨ arɨn̰ cərərə. Hɨn̰ wo̰ na, dasi kɨya dɔɔ kalaŋ ga ka-pɔyɛ kɔl se caygɨŋ bɨ, ga ka-yagɨdɨgɨŋ kɨya gɨye-lɔɔdɨgɨŋ gɨ ɗari gɨ kɨŋ way te bugoŋ pɨna dan̰ Kɨris le.

¹⁷ Kɨya wa wɔɔ cɨn̰-gɨle-cɨn̰ te lɔɔ hɨnga ga ɗari gaŋ dan̰ gɨyəŋ gɨ kuduroy Kumu gey le, golgo tɔgɨ ɗɨn̰ wɔɔ cɨn̰-n̰age te lɔɔ hɨnga ga ɨsɨni gaŋ.

¹⁸ Kɨya wa Kɨris gusi koyi ma na kol cay ɨsɨna gɨ kalaŋ leege. Ban kɨya mare tɨma di ɗaŋ naŋ ɨni. Ban gɨ na ungo gɨ dan̰ durɔ ɗɨngar le, ma kɨya cay kalaŋ ga dan̰ durɔ ɗɨngar naŋ, kɨya orɨn̰ danana gusi Kumu. Dɨɗɨge kuyoŋdi-gusi, ama Turnɔ di da Kumu boyi lɨbi.

¹⁹ Na toy di hɨn̰ wo̰ ma kalaŋ ga mage, ma turnoyge woy dangay dɨŋ le kalɨn̰ ma, ban or tɔgɛ bɛrnɛ bɨge dan̰ gɨyəŋ gɨ da Turnɔ di da Kumu di nee le.

²⁰ Duroy na ojɨ na cay turnoy kalaŋ ga tumɔ ka-baa ga da Kumu, kɨɗɨn̰ ga Kumu dɨbɨn̰ ɗugoy ƴee boy wɔlɛ gɨ Nɨwe gaɗɨn̰ koburo gɨ gumu taa taa hɨn̰ ƴaa wo̰ le. Na kalaŋ lagɨɗe wo̰, lee gɨ nɔm toge dɨŋ na kalaŋ margɨm ƴɔbɨ, ba andaŋge boy koburo gɨ gumu taa taa gɨŋ le, poɗɨn̰ge kɨbɨ kaŋ ga kondi.

²¹ Kaŋ ga kondi ga nee le na hɨnga ga ni gɨle ga ƴee ban̰di batɛm di haw kɛ poɗɨna le. Batɛm di nee le, na batɛm pɨle hɨnga ga ni kɨni ga woy gusi ungo coŋ naŋ. Ama na ungo gɨ ay tumoyi bɨn̰ Kumu dan̰ ɨrɨme gɨ arɨn̰ cərərə. Batɛm le poɗɨgɨŋ na dan̰ gɨyəŋ gɨ da bɔyɛ lɨbe gɨ da Jesu-Kɨris.

²² Jesu le say or a gɨɗɨgɨ-Kumu gɨŋ bɨ, som haw kɛ durdi Kumu a cay kobi gɨ bara gɨŋ bɨ. Ban som nee din̰-ƴaa a cay ka-ƴɔbɛ ga daa nii bɨ, cay ka-dɔɔ cay ƴaa ga ɗaŋ ga a gɨɗɨgɨ-Kumu gaŋ bɨ, cay ka-dɔnɔn̰əŋ ga gɨɗɨgɨ-Kumu gaŋ bɨ.