1 Pɨyɛr 2 - Gabri Maja

Kɔl gɨ yege ojɨn̰ cay oru

¹ Hɨn̰ wo̰ na, ɗagɨŋ kuduroy-ɨndɨwa bɨ, lɔɔ hɨnga dan̰ jɨba bɨ, yɔɔ-kɔl-kɨbɨn̰-sɔɔ-sɔɔ bɨ, lɔɔ ɗəngi bɨ, yɔɔ kɔl gɨ ɨsɨni kardi ungo bɨ coŋ.

² Hɨn̰ gɨ kɨye gɨ n̰əŋ ba orɨn̰ dan̰ tabɨlaŋdi kobɨn̰ ƴoyi le, kɨŋ-gandi kalɨn̰ ma ɨran̰gɨŋ dan̰ tabɨlaŋdi kobɨn̰ ga arɨn̰ cərərə gɨ na kɔl gɨ da Kumu le. Kan kɨya malgɨgɨŋ bɨ, kol cayge na kɨŋ kɨya wan̰ pɔɗɛ bɨ.

³ Leen̰ cɨndi, kɨŋ tal ɗarwa di da Ba-gulɔŋ sol ɨni.

⁴ Sɨygɨŋ gusi Ba-gulɔŋ. Ban na oru gɨ woy-bɨra gɨ kalaŋ kan̰iige coŋ. Ama Kumu dorii kɨya gɨ Kumu solii gɨ ban na oru gɨ ƴee-cɨndi tɔgɨ.

⁵ Kɨŋ-gandi kalɨn̰ ma, kɨŋ woy gɨlɨn̰ na hɨn̰ oru gɨ woy-bɨra gɨ Kumu lobɨgɨŋ leen̰ ƴaa-sɔmɛ gɨ da Turnɔ wo̰. Lee gɨ kɨŋ bɨle ka-bɔgɛ kɨbar ga woy dan̰ cɨndɨge bɨn̰ Kumu, ga kɨŋ lee gɨye n̰ɨre bii dan̰ gɨyəŋ gɨ da Turnɔ ɗe-kuduroy-bɛrɛ. N̰ɨre kogɨŋ dan̰ gɨyəŋ gɨ da Jesu-Kɨris le, kɨya mon̰ Kumu.

⁶ Walge duroy Magtubu di da Kumu dɨŋ yege hɨn̰: «Sɨlagɨŋ, ɨŋ dor oru pɨna gɨ ƴee-cɨnɨ tɔgɨ, Ɨŋ ɗe a cay garma gɨ Sin̰o gɨŋ hɨn̰ oru gɨ ni tɨbɨn̰ ƴaa wo̰. Ungo gɨ na bɨga kuduroyi a cay oru gɨ nee le, Hɨnga ga kɨya tobii duroy nee ɗe dasi na dii kɨya unɔ.»

⁷ Kogɨŋ kɨŋ-gandi ka-aye kudurɔ na, Kɨris na oru gɨ ƴee cɨndɨgɨŋ tɔgɨ. Ama ojɨn̰ cay kalaŋ ga na ka-aye kudurɔ naŋ na, «Oru gɨ tumɔ ka-gaɗe ƴaa tumɔ dɨbɨge pɨrɨŋ coŋ le, Say bɨle na oru gɨ kuɗa tɔgɨ ɗɨn̰ kamdi, Gɨ kan ɗege tɨbɨn̰ ƴaa dɨŋ.»

⁸ Bɨ walge duroy Magtubu di da Kumu dɨŋ ɗaŋ coŋ yege hɨn̰: «Na oru gɨ kɨya dɔgɛ tɨbay ungo bɨ, Na garma gɨ kɨya lɔɔ gɨ ungo kɨya bɔɔ bɨ.» Kalaŋ ga nee le, dege tɨbayge oru gɨŋ le na kɨya gɨ kan kan̰ge bɔgɛge kɔl a cay kɔl gɨ da Kumu gɨŋ. Na toy di hɨn̰ wo̰ ma, hɨnga ga kan ojɨ kol cayge le andaŋ cayge.

⁹ Ama kogɨŋ kɨŋ-gandi na, kɨŋ na te wɨn̰je ga Kumu torgɨŋ bɨ, kɨŋ na ka-bɔgɛ kɨbar ga da kɨlma bɨ, te kalaŋ ga torgege ɗege dan̰ cɨndɨge bɨ. Kɨŋ na te kalaŋ ga Kumu torge ɗe agɨŋ na teen̰ bɛrnɛ di da hɨnga ga ɗadɨrdaŋ ga ban lee. Kumu təgɨŋ ɗe agɨŋ na andɨn̰ duroy dɨlɨm dɨŋ coŋ bɨ, ɗe gɨ agɨŋ na ɨrgan̰ duroy asɨn̰a toyi di kuɗa tɔgɨ dɨŋ bɨ.

¹⁰ Tumɔ kɨŋ na te kalaŋ ga da Kumu naŋ, ama haw kɛ kɨŋ na te kalaŋ kayi. Tumɔ le Kumu sɨla cɨn̰-n̰age togɨŋ naŋ, ama haw kɛ ban sol cɨn̰-n̰age togɨŋ.

Wɨyagɨŋ ka-lɔɔ gɨye ga da Kumu

¹¹ Ay kɨŋ karmɨnɨ ga ɨŋ lee-toygɨŋ, kɨŋ ga kɨŋ som cay gɨsəŋ gaŋ hɨn̰ ka-dɔrɔŋ wo̰ bɨ, kɨrge wo̰ bɨ le, jagɨŋ kɔl hɨnge. Tabɨlaŋdi hɨnga ga ɨsɨni ga dɨbɨ kɨmbɨl danagɨŋ tɔgɨ le jɨbɨgegɨŋ sɛdɨ coŋ bɨ.

¹² Ɗagɨŋ gɨ gɨye-lɔɔdɨgɨŋ gɨ a duroy kalaŋ ga sɨlage Kumu gɨ cɨndi naŋ le ɗe woy kuɗa. Hɨn̰ wo̰ na hɨn̰ gɨ kan na pɨya kɔl si caygɨŋ yan̰ gɨ kɨŋ naa ka-lɔɔ ɨsɨna kalɨn̰ ma, kan kɨya sɔlɛge gɨye-lɔɔdɨgɨŋ gɨ kuɗa gɨ kɨŋ lee bɨ, kan kɨya hɨramege Kumu a wɔlɛ gɨ ban kɨya cagan̰ gɨŋ bɨ.

¹³ Kɨya cay Ba-gulondɨna le, jagɨŋ kɔl kɨbɨ ungo gɨ ani ani gɨ orɨn̰ dan̰ tɨrɨmbala. Jagɨŋ kɔl kɨbɨ kɨlma ba-dɔɔ cay ƴaa.

¹⁴ Jagɨŋ kɔl kɨbɨ ka-kɨbɨ kɛrɨmbɛlɛŋ ga gɨmdəŋ ga kan gɨygɨge ɗe na boyge kɔl a cay ka-lɔɔ ɨsɨna, bɨ, ɗe na hɨramge ka-lɔɔ hɨnga ga kuɗa bɨ le.

¹⁵ Kɨya wa hɨnga ga Kumu gey le, na gɨ kɨŋ na laa hɨnga ga ɗari agɨŋ na ƴɔmɨn̰ kɨbɨ kalaŋ ka-sɔlɛ hɨnga naŋ bɨ, ga dɨngaldaŋ bɨ.

¹⁶ Laagɨŋ gɨye-lɔɔ gɨ da kalaŋ ga cayge kalɨn̰. Ama kɨŋ ɗɔɔ ba aye gɔrɛ cay-kalɨn̰ le loon̰ badɨge ga ni tolɨn̰ cay ɨsɨna naŋ. Ama kɨŋ hale gɨybəŋ gɨ kɨŋ naa gɔyɔŋ ga da Kumu naŋ.

¹⁷ Dɨbɨn̰gɨŋ kalaŋ nɔm hurɔmɔ bɨ, geygɨŋ karmɨgɨŋ ga ban̰aŋ dan̰ ga kandɨ ga ka-aye kudurɔ bɨ, bɨgan̰gɨŋ Kumu kɔl bɨ, dɨbɨn̰gɨŋ kɨlma gɨ gumu hurɔmɔ cayi bɨ.

Hɨnga ga ni cɨn̰-n̰age ga lee Kɨris le bɨle hɨnga ga ni gɨle

¹⁸ Kɨŋ-gandi marɨne ka-gɨye le, dɨbagɨŋ caygɨŋ dugo bɨn̰ ka-gulondɨgɨŋ bɨ, kuɗa gɨ kɨŋ bɨgage kɔl gɨɗaŋ bɨ. Hɨn̰ gɨ kan na kuɗa bɨ kaledɨge na jala wala, hɨn̰ gɨ kɔl koge na dɨja tɔgɨ kalɨn̰ ma, bɨgagegɨŋ kɔl bɨ.

¹⁹ Sɨlagɨŋ, waŋ waŋ gɨ na ƴɨma kuduroy usa dan̰ dɨbe ɗugɔ, kɨya gɨ ban ɨrɨm cay Kumu kɨɗɨn̰ ga kalaŋ leeyige ɨsɨna cay naji toyi dɨŋ na, ungo gɨ nee le Kumu kɨya tɔrɛ kɨbi a cayi.

²⁰ Hɨn̰ gɨ kɨŋ na wa tɔgɛ kɨya cay hɨnga ga ɨsɨni ga kɨŋ lee ma magɨŋ na ƴɨma kuduroygɨŋ dɨbɨn̰ ɗugoygɨŋ na, kɛ kan kɨya dɨbe gusoŋ-tɔgɛ caygɨŋ na kɨya wa ga? Ama hɨn̰ gɨ kɨŋ na laa hɨnga ga ɗari ma kalaŋ na laagɨŋ hɨnga ga homi kol cayge, ma magɨŋ na ƴɨma kuduroygɨŋ dɨbɨn̰ ɗugoygɨŋ na, Kumu kɨya tɔrɛ kɨbi caygɨŋ.

²¹ Na gɨyəŋ gɨ nee le ma Kumu təgɨŋ koldi. Kɨya wa Kɨris kalɨn̰ ma way cɨn̰-gɨle-cɨn̰ kol caygɨŋ bɨ, na hɨnga ga ni gɨle agɨŋ na ayɨn̰ cay tɨbayi.

²² Ban laa hɨnga ga ɨsɨni pɨna naŋ bɨ, ungo ja kɔl gɨ ni nare cɨn̰-kɨɗɨn̰ kɨbi naŋ bɨ.

²³ Kɨɗɨn̰ ga kan yagɨdiige le, ban jɨga yagɨdage ban̰di nee naŋ bɨ. Kɨɗɨn̰ ga kan ɗɨndɨriige le, ban jɨga tɨgage gɨm naŋ bɨ. Ama ban ɗe gusi kobɨ Kumu gɨ boy kɔl dan̰ durɔ ɗɨngar.

²⁴ Kɨris dan̰ gusi koyi gaŋ lobɨ ɨsɨna konagɨŋ cayi a cay sɨya-gɨ-dagɨli gɨŋ, ɗe ana na ɗen̰gɨŋ ɨsɨna coŋ yɔd bɨ, leen̰gɨŋ gɨye lɔɔ gɨ da kalaŋ ga dan̰ durɔ ɗɨngar. Kɨŋ way pɔɗɛ na dan̰ gɨyəŋ gɨ da ɨya di ban wayi.

²⁵ Kɨya wa tumɔ kɨŋ woy na hɨn̰ gamge ga kayaŋ wo̰, ama haw kɛ kɨŋ jɨga gusi ba-abɨgɨŋ bɨ, ba-sɔlɛ kardɨgɨŋ bɨ.