1 Korɛ̰t 9 - Gabri Maja

Kɛ ba-gɨre-gɨye gɨ bɔyɛ cay kobi gaŋ ga

¹ Kɛ ɨŋ na ungo gɨ ɨŋ sɨma dan̰ canɨ naŋ ga? Kɛ ɨŋ na ba-gɨre-gɨye naŋ ga? Kɛ Jesu gɨ na Ba-gulondɨna le ɨŋ sɨlayi dan̰ cɨnɨ naŋ ga? Gɨye hɨnge gɨ ɨŋ ba lee bɨn̰ dan̰ Ba-gulɔŋ le kɛ na kɨŋ-gandi naŋ ga?

² Hɨn̰ gɨ a cɨn̰ kalaŋ ga ɗaŋ ɨŋ naa ba-gɨre-gɨye naŋ kalɨn̰ ma, cɨndɨgɨŋ kɨŋ-gandi na ɨŋ na ba-gɨre-gɨye kol caygɨŋ leen̰ cɨndi. Kɨya wa kɨŋ na ban̰di kɔbɔŋ gɨ gɨl gɨ ɨŋ naa ba-gɨre-gɨye, kɨya wa kɨŋ bugoŋ pɨna dan̰ Ba-gulɔŋ.

³ Kɔl gɨ ɨŋ kɨya jogɨn̰ bɨn̰ ka-dɨbe kɔl canɨ ƴon̰ canɨ ba kɛ:

⁴ Kɛ Kumu bɨni gɨyəŋ gɨ ni dɔɔ bɨ sɔ bɨ naŋ ga?

⁵ Kɛ ni ɨran̰ dan̰ gɨyəŋ gɨ ni ƴɔɔ tama ɗe aye kudurɔ orɨn̰ dana kobɨni hɨn̰ ka-gɨre-gɨye ga ɗaŋ bɨ, ba-gulɔŋ karmii bɨ, Kepas bɨ, ba leen̰ge wo̰ naŋ ga?

⁶ Kɛ ojɨ gɨ ɨŋ-bandi bɨ Barnabas bɨ ƴɔbɨ naa ba laa gɨye dan̰ kobɨni ga?

⁷ Kɛ na ungo gɨ ni asɨgar gɨ ani ba bɔyɛ cay kobi dan̰ kobi koyi gaŋ ga? Kɛ na ungo gɨ ani ba busɔnɛ suru dɨle dɔɔ wɔɔdo ga? Naŋ le kɛ na ba-ame gamge gɨ ani ba-ame gamge dɨle ƴɔɔ kobɨn̰dɨge abɨn̰ kuyoŋdi-gusi ga?

⁸ Kɔl gɨ ɨŋ ba ye kɛ le ɨŋ gɨsɨn̰ na gɨye-lɔɔ gɨ da kalaŋ ƴɔbɨ naŋ. Kɛ gasɨn̰-kɔl gɨ da Moyis kalɨn̰ ma ya kɔl gɨ nee le naŋ bɨ ga?

⁹ Əw, walge duroy magtubu gasɨn̰-kɔl gɨ da Moyis dɨŋ yege hɨn̰: «Kɨɗɨn̰ ga si na ɨr laan̰ gɨye na ji gɨ dɔbɛ ɗɛngɛ kɨbi naŋ bɨ.» Kɛ Kumu sol a cay sɨn̰əŋ ga?

¹⁰ Kɛ Kumu ya kɔl gɨ nee le ujan̰ na cay na na-gandi ɗəndəŋ naŋ ga? Ho’o walge kɔl gɨ nee le ojɨn̰ na cay na. Kɨya wa naa wa wa kalɨn̰ ma ojɨ gɨ ba yage na bɨga ɨrɨmedi a cay hɨnga ga ban kɨya wɔɔ a yage gɨŋ bɨ, ba sɔmbɛ gasa na bɨga ɨrɨmedi a cay cɨn̰ gasa ga ban kɨya wɔɔ gaŋ bɨ.

¹¹ Hɨn̰ gɨ ni na gɨsɨ cɨn̰ hɨnga ga da Turnɔ duroygɨŋ ma mani na wala cay hɨnga ga ni wɔɔ kagɨŋ na, kɛ ni lee na hɨnga ga ɗɨn̰ ɔjɛ gɨ ni lɔɔ ga?

¹² Hɨn̰ gɨ kalaŋ ga ɗaŋ na ɨran̰ge dan̰ gɨyəŋ gɨ ni ƴon̰ hɨnga kobɨgɨŋ na, kɛ ni-gandi ni ɓala gɨ ni ƴɔɔ kobɨgɨŋ ɗɨn̰ kage naŋ ga? Ama hɨnga ga ni orɨn̰ dan̰ gɨyəŋ gɨ ni lɔɔ le ni laa naŋ, ama ni ƴom kuduroyni duroy hɨnga nɔm ɗe ani na lɨgɨn̰ gɨyəŋ gɨ da Kɔl-gɨ-Ɗari gɨ da Kɨris naŋ.

¹³ Kalaŋ ga leege gɨye duroy ƴaa-di-da-Kumu dɨŋ didege na hɨnga ga woy a duroy ƴaa-di-da-Kumu dɨŋ bɨ, kalaŋ ga leege gɨye kɨɗɨn̰ ga kan gaɗɨge kɨya bogɨn̰ kɨbar nee gaŋ le, kan gosɨngege na hɨnga ga ni bogɨn̰ kɨbar ga a cay kɨɗɨn̰ ga gaɗɨge gaŋ le bɨ le kɛ kɨŋ sɨla hɨn̰ wo̰ naŋ ga?

¹⁴ Na hɨn̰ wo̰ bɨ ma Ba-gulɔŋ ayɨn̰ noy gɨ kalaŋ ga ka-tɔgɛ bɛrnɛ gɨ da Kɔl-gɨ-Ɗari na waage hɨnga ga ni dɔɔ kage naa dan̰ gɨyəŋ gɨ da Kɔl-gɨ-Ɗari bɨ.

¹⁵ Ama hɨnga ga ɨŋ orɨn̰ dan̰ gɨyəŋ gɨ ni ƴɔɔ le, ɨŋ-bandi ɨŋ ƴa naŋ bɨrɨŋ. Haw kɛ ɨŋ wala magtubu di kɛ le na gɨ ni ɨngɨrɨn̰ naŋ bɨ. Tɨman̰nɨ kuɗa ɗɨn̰ gɨ ni ɗɔɔ ungo ƴɔɔ hɨnga ga kɔbɔŋ ga ɨŋ kɨya ayɨn̰ canɨ daa tumoy kalaŋ le.

¹⁶ Tɔgɛ bɛrnɛ Kɔl-gɨ-Ɗari na hɨnga ga kɨya bəŋ gɨyəŋ gɨ ni loon̰ gɨmɨn̰aw koldɨge naŋ, kɨya wa na hɨnga ga Kumu səŋ canɨ. Hɨn̰ gɨ ɨŋ na tɨga bɛrnɛdi Kɔl-gɨ-Ɗari naŋ na, ɓɨse ƴɨma canɨ yɔd.

¹⁷ Hɨn̰ gɨ ɨŋ na laa gɨye gɨ nee le kɨya gɨ naa kuduroy geye hɨnge ƴɔbɨ na, ɨŋ orɨn̰ dan̰ gɨyəŋ gɨ ni wɔɔ hɨnga ga ni cay kɔbɔŋ. Ama na gɨye gɨ bəŋge kɔbɔŋ bɨ, na nɨywa gɨ canɨ bɨ.

¹⁸ Naa hɨn̰ wo̰ ɨni na cay kɔbɔŋ hɨnge ba ani ga? Hɨnga ga ni cay kɔbɔŋ na gɨ ɨŋ na tɨga bɛrnɛ Kɔl-gɨ-Ɗari kalɨn̰ dɨle ƴɔɔ hɨnga ga ɨŋ orɨn̰ dan̰ gɨyəŋ gɨ ni ƴɔɔ a te tɔgɛ bɛrnɛ dɨŋ.

¹⁹ Na cɨndi ɨŋ na ungo gɨ ɨŋ som canɨ kalɨn̰, lee gɨ ɨŋ na guyɔŋ da ungo pɨna naŋ. Ama ɨŋ bɨləŋ guyɔŋ gɨ da kalaŋ nɔm ɗe aŋ na wan̰ dɨmdɨrdi kalaŋ hal a te gɨyəŋ gɨ da Kɨris gɨŋ.

²⁰ Hɨn̰ gɨ ɨŋ na sɨma duroy Jubɨn̰əŋ na, ɨŋ lee gusɨnɨ leen̰ Jubɨ bɨ, kɨya wan̰ Jubɨn̰əŋ bɨn̰ Kɨris. Ɨŋ sɨma te gasɨn̰-kɔl gɨŋ naŋ. Ama hɨn̰ gɨ ɨŋ na sɨma duroy ka-bɔgɛ kɔl cay gasɨn̰-kɔl gɨ da Moyis na, ɨŋ bee kɔl cay gasɨn̰-kɔl gɨ da Moyis gɨŋ. Ɨŋ lee hɨn̰ wo̰ ɗe aŋ na wan̰ kan ga somge te gasɨn̰-kɔl gɨŋ bɨn̰ Kɨris.

²¹ Hɨn̰ gɨ ɨŋ na sɨma dan̰ kan ga sɨmage te gasɨn̰-kɔl gɨ da Moyis gaŋ naŋ na, ɨŋ lee gusɨnɨ leen̰ hɨn̰ ungo gɨ sɨma te gasɨn̰-kɔl gɨ da Kumu naŋ wo̰ bɨ. Ɨŋ na ungo gɨ ɨŋ som te gasɨn̰-kɔl gɨ da Kɨris gɨŋ hange, ama ɨŋ lee hɨn̰ wo̰ ɗe aŋ na wan̰ kan ga somge dɨle gasɨn̰-kɔl le bɨ.

²² Kɨɗɨn̰ ga ɨŋ na sɨma duroy kalaŋ ga hɨmbaɗɨdaŋ gaŋ na, ɨŋ bɨle gusɨnɨ leen̰ hɨn̰ ungo gɨ hɨmbaɗɨ bɨ. Ɨŋ lee hɨn̰ wo̰ ɗe aŋ na wan̰ kalaŋ ga hɨmbaɗɨdaŋ bɨn̰ Kɨris. Ɨŋ lee gusɨnɨ hɨn̰ kalaŋ nɔm a te gɨye-lɔɔ gɨ ani ani gɨŋ, ɗe naa dan̰ gɨyəŋ gɨ ani ani kalɨn̰ ma kan ga pɨna duroyge na waage pɔɗɛ.

²³ Ɨŋ lee hɨnga ga nee le nɔm na kɨya cay Kɔl-gɨ-Ɗari ɗe aŋ na wan̰ ɗarwa di woy a boy nee le.

²⁴ Kɨŋ sol gɨ ka-bɔgɛ sɨwa kɨɗɨn̰ gɨre gaŋ le, gɨrege nɔm hage. Ama na ungo pɨna hayi gɨ gɨre ɗɨn̰ kamdi ba wɔɔ cay kobi. Ayagɨŋ mana di kɔl gɨ nee le gɨsɨn̰ dan̰ gɨyəŋ gɨ da aye kudurɔ ɗe agɨŋ wan̰ cay kobɨgɨŋ.

²⁵ Ka-bɔgɛ sɨwa ga ani ani kalɨn̰ ma kɨɗɨn̰ ga kan ɨre pol gusɨge ƴee le, dan̰ gusɨge koge dobɨge cayge te gasaŋ ga osɨdəŋ osɨdəŋ. Kan leege hɨnga ga nee le na kɨya wan̰ gɔyɛ di kɨya mundoŋ haw wo̰ coŋ. Ama na-gandi na, na bee sɨwa na kɨya wan̰ jagɨwa-tɨrɨmbala di kɨya mundoŋ naŋ bɨrɨŋ.

²⁶ Na toy di hɨn̰ wo̰ ma maŋ gɨre na dan̰ duroy. Ɨŋ ɨsɨgɨ kɔbɔŋ na kɨya dogɨn̰ kɨɗɨn̰ kalɨn̰ wo̰ naŋ.

²⁷ Ho’o ɨŋ lee gɨ kuyoŋdi-gusɨnɨ sunoŋ dan̰ hɨnga ga osu bɨ, ɨŋ ƴomii a te dɔnɔ tɨnge dɨŋ bɨ. Kɨya wa hɨn̰ gɨ ɨŋ na ƴɨma gusɨnɨ usa naŋ na gajanaŋ ɨŋ da tɔgɛ bɛrnɛ bɨn̰ kalaŋ ga ɗaŋ, ama hɨn̰ gɨ ɨŋ na curoŋ a te gɨyəŋ gɨ da Kɔl-gɨ-Ɗari gɨŋ na, ɨŋ kɨya wɔɔ cay kɔbɔŋ naŋ.