1 Korɛ̰t 8 - Gabri Maja

Kɔl gɨ ojɨ cay kuyoŋ gɨ n̰ɨrɨn̰ge kula

¹ Haw kɛ, kɔl gɨ ojɨ cay kuyoŋ gɨ da nare gɨ been̰ge kɨbar bɨn̰ kulan̰əŋ le, na sol gɨ na-gandi nɔm na orɨn̰ dan̰ hɨnga ga ni sɔlɛ ojɨn̰ cayge. Hɨnga-sɔlɛ na hɨnga ga kɨya lɔɔ gɨ ungo gɨ ɨndi kɨya dogɨn̰ jorgii, ama wandɨ na hɨnga ga kɨya lɔɔ gɨ kalaŋ kɨya orɨn̰ge cɨndɨge tumɔ tumɔ te aye kudurɔ gɨŋ.

² Hɨn̰ gɨ ungo na ɨrɨm kuduroy gɨ ban na ba sɔlɛ-hɨnga na, ban sɨla hɨnga hɨn̰ gɨ ojɨ gɨ ban gɨ sɔlɛ naŋ ƴee.

³ Ama hɨn̰ gɨ ungo na gey Kumu na, ungo gɨ nee le Kumu solii ɨni.

⁴ Naa hɨn̰ wo̰ na, kɛ ni gɨ ɓale dɔɔ culom gɨ been̰ge kɨbar bɨn̰ kulan̰əŋ ga? Ni sol kuɗa, gɨ kula pɨna wo̰ kalɨn̰ ma unɔ a cay gɨsəŋ gaŋ kɛ bɨ, ni sol gɨ Kumu kalɨn̰ ma na pɨna hayi kəɗ kəɗ bɨ Kumu gɨ ɗaŋ unɔ.

⁵ Ko, hɨn̰ gɨ kalaŋ ga pɨna na yage hɨn̰ kumun̰əŋ na woyge gɨɗɨgɨ-Kumu gɨŋ, naŋ le na woyge cay gɨsəŋ gaŋ kɛ kalɨn̰ ma, kumun̰əŋ kondɨge leen̰ cɨndi bɨ, ka-gulɔŋn̰əŋ kondɨge leen̰ cɨndi bɨ.

⁶ Ama ojɨn̰ cayna na-gandi na, Kumu na pɨna hayi kəɗ kəɗ. Ban na Bayna gɨ hɨnga nɔm sayga gusii bɨ, na kɨya ɔrɛ na gusii bɨ. Ba-gulɔŋ na pɨna hayi kəɗ kəɗ ƴɔbɨ, na Jesu-Kɨris gɨ hɨnga nɔm woy na kol cayi bɨ, na som na kol cayi bɨ.

⁷ Ama na kalaŋ nɔm ba sɔlɛ kɔl gɨ cɨndi gɨ kɛ le naŋ. Kalaŋ ga pɨna na, kula andaŋ coŋ kuduroyge naŋ. Lee gɨ haw kɛ kalɨn̰ ma, hɨn̰ gɨ kan na dage kuyoŋ gɨ kalaŋ been̰ge kɨbar bɨn̰ kulan̰əŋ na, woy hɨn̰ gɨ kan naa ba bɔgɛ kɨbar bɨn̰ kulan̰əŋ wo̰. Dan̰ gɨyəŋ gɨ da ɨrɨmedɨge gɨ usa naŋ le, kan sol gusɨge hɨn̰ hɨnga ga lee kɨni tumoyi Kumu, kɨya kuyoŋ gɨ kan dii le.

⁸ Na cɨndi, na dɔɔ ba kɨya sɨygɨna mɨnde gusi Kumu naŋ. Hɨn̰ gɨ na na da hɨnga naŋ kalɨn̰ ma, na kɨya wɔɔ hɨnga ga ɗaŋ boy nee naŋ bɨ, hɨn̰ gɨ na na da kalɨn̰ ma, hɨnga ga kɨya laa danana tɔgɨ ɗɨn̰ gɨ nee le unɔ nee bɨ.

⁹ Ama ɗagɨŋ muɗɔlɛ a cay gusɨgɨŋ ɗe sɔmɛ cay-kalɨn̰ di kɨŋ ba orɨn̰ le, bɨle gundi sɨya gɨ kɨya dɔgɛ tɨban̰ kan ga togɨyge unɔ ɗe laydaŋge boy ɨsɨna gɨŋ naŋ.

¹⁰ Kɨya wa ungo gɨ ɨrɨmedi usa naŋ na sɨlan̰ ji gɨ ba sɔlɛ-hɨnga a te dɔɔ hɨnga a duroy ƴaa kula gɨŋ na, kɛ ban kɨya wɔɔ togii kol can̰ gɨ ni dɨn̰ kuyoŋ gɨ kan been̰ge kɨbar bɨn̰ kulan̰əŋ le naŋ ga?

¹¹ Lee gɨ kurɨndɨn̰ gɨ bara dan̰ tɨmdɨn̰ di tama ga togiige unɔ gɨ Kɨris ma kol cayge le, kɨya mundoŋge coŋ kɨya cay hɨnga-sɔlɛ kan̰.

¹² Kɨɗɨn̰ ga kɨŋ na laa ɨsɨna ga hɨn̰ wo̰ dan̰ karmɨgɨŋ ga togɨyge unɔ bɨ, kɨŋ na bɨge ɨya a ɗugoyge bɨ le, na Kɨris magɨŋ lee ɨsɨna danayi.

¹³ Na toy di hɨn̰ wo̰ ma, hɨn̰ gɨ hɨnga ga ni dɔɔ naa hɨnga ga kɨya lɔɔ gɨ kurɨnɨ na kɨya bɔɔ boy ɨsɨna gɨŋ na, ɨŋ kɨya dɔɔ kuyoŋ gɨ nee le naŋ bɨrɨŋ dan̰ cɨnɨ, kuɗa ɗɨn̰ gɨ ni lɔɔ gɨ kurɨnɨ gɨ bɔɔ.