1 Korɛ̰t 7 - Gabri Maja

Kɔl gɨ ojɨ cay gɔrɛ ƴaa

¹ Haw kɛ na ɨŋ kɨya dɨbgɨŋ cay nee cay kɔl gɨ kɨŋ ba ɨngɨrəŋ koldi le, kɨŋ wal ye hɨn̰: «Hɨn̰ gɨ bara na wɨyan̰ dan̰ tama naŋ yɔd na, na kuɗa.»

² Ama ɗe gɨ yɔyɛ gɨ dan̰ gangɨ caygɨŋ na ɨre dugo na, kuɗa gɨ bara gɨ ani ani kalɨn̰ ma ɨran̰ dan̰ tamdi bɨ, tama di ani ani kalɨn̰ ɨran̰ dan̰ kudurɔɔ bɨ.

³ Na wa wa kalɨn̰ ma kuɗa gɨ tama kudurɔɔ laa hɨnga ga da tama kudurɔɔ dan̰ tamdi bɨ, tama laa hɨnga ga tama kɨya lɔɔ dan̰ kudurɔɔ bɨ.

⁴ Tama ɨran̰ dan̰ dɔnɔ a cay kuyoŋdi-guso gɨŋ naŋ, kɨya wa kuyoŋdi-guso na gɨ da kudurɔɔ. Na hɨn̰ wo̰ kɨya cay tama kudurɔɔ bɨ. Tama kudurɔɔ ɨran̰ dan̰ dɔnɔ a cay kuyoŋdi-gusi gɨŋ naŋ, kɨya wa kuyoŋdi-gusi na gɨ da tamdi.

⁵ Narɨn̰gɨŋ gusɨgɨŋ, gusɨgɨŋ naŋ. Ama hɨn̰ gɨ kɨŋ na ɗa gusɨgɨŋ dan̰ gɨyəŋ gɨ da bugoŋ pɨna gɨ ni tɨwa lam wo̰ gɨ ni ɗon̰ gusɨgɨŋ kɨbɨ ɔlɛ Kumu gɨŋ ƴɔbɨ. Bɨ kardi nee na jɨgagɨŋ bugoŋ pɨna naŋ na, ɓale ƴɔmɛ-gusɨgɨŋ naŋ, da haŋge gɨyəŋ bɨn̰ Sidan gɨ ni gɨybɨgɨŋ dan̰ hɨnga ga ni gɨybe kaa.

⁶ Ɨŋ yəgɨŋ na gɨ kɨŋ na laa hɨn̰ wo̰ naŋ. Ama ɨŋ ye hɨn̰ gɨ kɨŋ na laa hɨn̰ wo̰ kalɨn̰ ma kuɗa.

⁷ Na cɨndi ɨŋ gey gɨ kalaŋ nɔm na wɨyage hɨn̰ ɨŋ-bandi wo̰. Ama waŋ waŋ kalɨn̰ ma, Kumu bii hɨnga ga ni bee-kalɨn̰ ga ojɨn̰ cayi. Na toy di hɨn̰ wo̰ ma, ungo pɨna way gɨ ni somɨn̰ gaba bɨ, ungo gɨ ɗaŋ way gɨ ni ƴon̰-tama bɨ.

⁸ Ama ɨŋ yen̰ ka-gaba bɨ kandɨ ga kodɨn̰ige madɨrdaŋ bɨ daa waŋ: Hɨn̰ gɨ kɨŋ na sɨma hɨn̰ ɨŋ-bandi wo̰ na, kuɗa tɔgɨ.

⁹ Ama hɨn̰ gɨ kan na ɓala gɨ ni ƴɔmɛ gusɨge naŋ na, ɗa gɨ kan ƴa gusɨge tama dan̰ bara. Kɨya wa ƴɔɔ kandɨ le golgo ɗɨn̰ ɗɔ tabɨlaŋdi kuyoŋdi gusɨgɨŋ ulgɨŋ.

¹⁰ Ama kan ga ƴeege gusɨge tama dan̰ bara ɨni le, ɨŋ dɨbɨ kɔl gɨ kɛ cay nee ɗe kan lee, na ɨŋ-bandi naŋ, ama na Ba-gulɔŋ ba dɨbe cay nee. Ɗɔɔ gɨ tama cɨroŋ te kudurɔɔ naŋ.

¹¹ Hɨn̰ gɨ hɨndi na cɨroŋ na, ɗɔɔ gɨ hɨndi ƴɔɔ bara gɨ ɗaŋ naŋ, naŋ na ɗa gɨ hɨndi jɨga bugoŋ pɨna dan̰ kudurɔɔ. Ɗɔɔ gɨ bara kan̰e tamdi naŋ bɨ.

¹² Kɨŋ toygɨŋ ga ba na na ɨŋ-bandi ba yogɨŋ, na Ba-gulɔŋ naŋ ɨni: Hɨn̰ gɨ kurɨndɨgɨŋ na ɨran̰ dan̰ tama di ɗe-aye kudurɔ naŋ, ma tama le na gey gɔrɛ ƴaa danayi ƴee na, ɗɔɔ gɨ ban kan̰oo naŋ.

¹³ Hɨn̰ gɨ tama na ɨran̰ dan̰ kudurɔɔ gɨ ba-aye kudurɔ naŋ, ma ban na gey gɔrɛ ƴaa danaa na, ɗɔɔ gɨ hɨndi kan̰ii naŋ.

¹⁴ Kɨya wa bara gɨ aya kuduroy naŋ le doriige sii dan̰ cɨndi dan̰ gɨyəŋ gɨ da tamdi bɨ, tama di aya kudurɔ naŋ le dɔrɔɔge soo dan̰ cɨndo dan̰ gɨyəŋ gɨ da kudurɔɔ bɨ. Naa hɨn̰ wo̰ naŋ na, karɨndɨgɨŋ na karɨn̰aŋ ga duroŋ mɨra naŋ, ama leen̰ cɨndi na, kan na karɨn̰aŋ ga woy dan̰ cɨndɨge.

¹⁵ Ama hɨn̰ gɨ ungo gɨ ba-aye kudurɔ naŋ na gey puyoŋ na, ɗa ɗe ban lee. Hɨn̰ gɨ ban na laa na, ungo gɨ ba-aye kudurɔ le, naa bara wala tama kalɨn̰ ma, hɨnga saɗage pɨna naŋ. Ama kɨŋ-gandi na, Kumu təgɨŋ gɨ kɨŋ na sɨma dan̰ gusi-dɔbɛ.

¹⁶ Me-hɨndi tama, gajanaŋ kudurɛɛ gɨ wɔɔ pɔɗɛ kol cɛɛ. Ji bara, gajanaŋ tamdin̰ gɨ wɔɔ pɔɗɛ kol can̰.

Gɨye-lɔɔdɨgɨŋ wɨya hɨn̰ gɨ Kumu ba gey

¹⁷ Gasi kɔl ba kɛ, ɗa gɨ waŋ waŋ kalɨn̰ ma sɨma hɨn̰ gɨ tumɔ Ba-gulɔŋ ba bii gɨ ni somɨn̰ kɨɗɨn̰di gaŋ pa dɨm ma Kumu ba teeyi ƴee le. Na hɨnga ga nee le ma na te tumɔ di ɨŋ bɨn̰ Ka-Daye a kɨɗɨn̰ gaŋ nɔm.

¹⁸ Hɨn̰ gɨ ungo tumɔ na wala ban̰a pa dɨm ma Kumu na tɨgay na, ɗɔɔ gɨ ban lɔɔ hɨnga ga ni tɨlmɨn̰ cay ban̰a toy naŋ. Hɨn̰ gɨ ungo tumɔ na wala ban̰a naŋ pa dɨm ma Kumu na tɨgay na, ɗɔɔ gɨ kan waliige ban̰a naŋ.

¹⁹ Hɨn̰ gɨ ungo na wala ban̰a, naŋ le na wala ban̰a kalɨn̰ ma, hɨnga ga nee le kɨya lɔɔ hɨnga naŋ. Hɨnga ga ojɨ gɨ ban kɨya kɔbɛ na, na te tumɔ da Kumu.

²⁰ Ɗa gɨ waŋ waŋ kalɨn̰ ma sɨma hɨn̰ gɨ tumɔ pa dɨm ma Kumu ba teey ƴee le.

²¹ Hɨn̰ gɨ ji naa guyɔŋ kɨɗɨn̰ ga Kumu ba teen̰ na, ji ɗɔɔ sɔlɛ koldo naŋ. Ama hɨn̰ gɨ kan na bɨn̰ gɨyəŋ gɨ ni andaŋ coŋ guyɔŋdu dɨŋ na, ya əw cay nee dan̰ gɨre gɨ daa.

²² Ungo gɨ tumɔ na guyɔŋ pa dɨm ma Kumu teey ƴee le, bɨləŋ na ungo gɨ da Ba-gulɔŋ gɨ som cay-kalɨn̰. Ungo gɨ tumɔ som cay-kalɨn̰ pa dɨm ma Ba-gulɔŋ teey ƴee le, bɨləŋ na guyɔŋ gɨ da Kɨris.

²³ Kɨŋ-gandi na, Kumu bee nare caygɨŋ bon̰ caygɨŋ ɨni, na toy di hɨn̰ wo̰ ma, bɨləŋ gɨŋ gɔyɔŋ ga da kalaŋ naŋ.

²⁴ Ay, karmɨnɨ ga ban̰aŋ dan̰ ga kandɨ, ɗa gɨ waŋ waŋ kalɨn̰ ma sɨma hɨn̰ gɨ tumɔ pa dɨm ma Kumu ba teey ƴee le.

Kɔl gɨ ojɨ cay ka-gaba

²⁵ Kɔl gɨ ojɨ cay kan ga sayge ma ƴage gusɨge tama dan̰ bara naŋ ƴee le, kɔl gɨ Ba-gulɔŋ yəŋ ɗe aŋ na dɨbgɨŋ cay nee unɔ, ama na ɨrɨmenɨ maŋ yəgɨŋ dan̰ gɨyəŋ gɨ da ungo gɨ Ba-gulɔŋ sol cɨn̰-n̰age toyi gɨ kɨŋ ɓal bɔgɛ kuduroygɨŋ cayi.

²⁶ Kɨya cay hɨnga ga ni gɨle-cɨn̰ ga a boy tɨwa di haw kɛ dɨŋ le, ɨŋ-bandi ɨŋ ɨrɨm ye hɨn̰ kuɗa tɔgɨ gɨ waŋ waŋ kalɨn̰ ma na sɨma hɨn̰ wo̰ le kɔ.

²⁷ Hɨn̰ gɨ ji na ƴa tama na, ji ɗɔɔ ba ɨrɨme gɨ ni puyoŋ danaa. Hɨn̰ gɨ ji na ƴa tama naŋ na, ji ɗɔɔ ba male ƴɔɔ tama.

²⁸ Ama hɨn̰ gɨ ji na ƴa tama na, ji laa na hɨnga ga ɨsɨn naŋ bɨ, hɨn̰ gɨ tɨmbali na ƴa bara na, hɨndi laa na hɨnga ga ɨsɨn naŋ bɨ. Ama kan ga ƴee gusɨge le, kɨya wɔɔge hɨnga ga ni ɗɔsɛ-ɗugɔ kɨya looge dan̰ wɔlɛ pɨna pɨna, ama ɨŋ-bandi na ɨŋ gey dorgɨŋ kɨbɨ nee.

²⁹ Ay, karmɨnɨ ga ban̰aŋ dan̰ ga kandɨ, kɔl gɨ ɨŋ ba gey yogɨŋ ba kɛ: Jaman di ni ba somɨn̰ nee le sɨngɨɗɨ tɔgɨ naŋ ɨni. Haw kɛ orɨn̰ tumɔ na, ɗa gɨ kan ga ƴeege kandɨ jɨgage sɨma hɨn̰ kalaŋ ga ƴa gusɨge naŋ wo̰.

³⁰ Ɗa gɨ kan ga ka-ɨle ƴɔmɛge te ɨle ƴɔbɨ naŋ. Ɗa gɨ kan ga ka-lɔɔ gusi-mɔwa ƴɔmɛge te lɔɔ gusi-mɔwa ƴɔbɨ naŋ. Ɗa gɨ kan ga ka-kɨle hɨnga ƴɔmɛge te kɨle hɨnga ƴɔbɨ naŋ.

³¹ Ɗa gɨ kan ga diige dɔɔ kuɗa a cay gɨsəŋ gaŋ ƴɔmɛge kardi dɔɔ kuɗa a cay gɨsəŋ ga ƴɔbɨ naŋ. Kɨya wa hɨnga ga a cay gɨsəŋ gaŋ kɛ le kɨya pɨde coŋ.

³² Ɨŋ gey gɨ kɨŋ na gɨ sɔlɛ a cay hɨnga ga a cay gɨsəŋ gaŋ kɛ naŋ. Ungo gɨ na gura ƴaa naŋ na, sol na a cay gɨye gɨ da Ba-gulɔŋ bɨ, ban mal na gɨyəŋ gɨ ni ƴɔɔ cɨn̰ Ba-gulɔŋ bɨ.

³³ Ama ungo gɨ gor ƴaa na, sol na a cay gɨye gɨ cay gɨsəŋ gaŋ, bɨ ban mal na gɨyəŋ gɨ ni ƴɔɔ cɨn̰ tamdi,

³⁴ lee gɨ ɨrɨmedi cudroŋ. Na hɨn̰ wo̰ bɨ, tama di gura ƴaa naŋ, naŋ le tɨmbali di sɨla bara naŋ ƴee le, sol na a cay gɨye gɨ da Ba-gulɔŋ ɗe aa na won̰ dan̰ cɨndo a boy gɨye-lɔɔdɨge gɨŋ bɨ, ɨrɨmedɨge gɨŋ bɨ. Ama tama di gor ƴaa na, sol na a cay gɨye gɨ a cay gɨsəŋ gaŋ, hɨndi mal na gɨyəŋ gɨ ni ƴɔɔ cɨn̰ kudurɔɔ.

³⁵ Ɨŋ yəgɨŋ kɔl gɨ nee le ojɨn̰ na cay ɗarwa togɨŋ kɨŋ-gandi gaŋ, ɨŋ gey na dɨbgɨŋ gangɨ kordɨgɨŋ naŋ ama ɨŋ yəgɨŋ kɔl gɨ nee le na gɨ ni gɨlgɨŋ gɨyəŋ gɨ ni kobɨn̰ gɨyəŋ gɨ da Ba-gulɔŋ dan̰ kuduroygɨŋ ga pɨna bɨ, leen̰ gɨye bii dɨle orɨn̰ dan̰ ɨrɨmedi gɨ cudroŋ.

³⁶ Hɨn̰ gɨ ungo na sɨla gɨ kan̰e ƴɔɔ-turmɔ di kan ba ƴom caa bii naa hɨnga ga ɨsɨn bɨ, hɨn̰ gɨ tabɨlaŋdi turmɔ di kan ba ƴom caa bii le na laayi tɔgɨ bɨ na. Ɗa gɨ kan ƴa gusɨge. Kan laage na ɨsɨna naŋ.

³⁷ Ama hɨn̰ gɨ kɨye marɨna na uja a kuduroy dan̰ kuduroy ga pɨna bɨ, na ƴɨmayge dan̰ dɔnɔ naŋ bɨ, da ƴaa a cay gusɨgɨŋ kuɗa bɨ, uja a kuduroy gɨ ban na kɨya ɨsɨbe gusi turmɔ di kan ƴom caa bii naŋ bɨ na, ban lee na hɨnga ga kuɗa.

³⁸ Hɨn̰ wo̰ na ungo gɨ na ƴa-turmɔ di kan ƴom caa bii na lee na hɨnga ga kuɗa bɨ, ungo gɨ na ƴa naŋ na, lee na hɨnga ga kuɗa ɗɨn̰ cɨla coŋ.

³⁹ Gasɨn̰-kɔl saɗɨ tama dan̰ kudurɔɔ pɨna, na boy wɔlɛ nɔm gɨ kudurɔɔ somɨn̰-bɨra dan̰ cɨndi. Ama hɨn̰ gɨ kudurɔɔ na mara na, hɨndi som na caa kalɨn̰, lee gɨ hɨndi ɓal ƴɔɔ bara gɨ kudurɔ gey, ama ɗa gɨ bara le wɨya ungo da Kɨris ƴɔbɨ.

⁴⁰ Ama hɨnge ɨŋ-bandi na, hɨn̰ gɨ hɨndi na sɨma dɨle ƴɔɔ bara na, guso kɨya mɔɔ tɔgɨ ɗɨn̰ gɨ tumɔ. Ɨŋ ɨrɨm gɨ ɨŋ-bandi kalɨn̰ ma ɨŋ orɨn̰ dan̰ Turnoy Kumu bɨ.