1 Korɛ̰t 4 - Gabri Maja

Ka-gɨre-gɨye ga da Kɨris

¹ Naa hɨn̰ wo̰ na, kuɗa gɨ kɨŋ sɨlani laan̰ marɨne ka-gɨye ga da Kɨris bɨ, laan̰ kalaŋ ka-sɔlɛ kardi hɨnga ga da Kumu ga woy kɨɗɨn̰ wɔsɛdɨge gaŋ bɨ.

² Hɨnga ga kalaŋ mal a gusi ka-sɔlɛ kardi hɨnga le, na gɨ kan na wɨya naa kalaŋ ga ɨre a cay tɨbayge dɨŋ.

³ Gɨ ojɨ canɨ ɨŋ-bandi na, ko naa kɨŋ-gandi wala, naa ka-bɔyɛ kɔl cay kalaŋ naa ba bɨyage kɔl canɨ kalɨn̰ ma, dɨlaŋ hɨnga pɨna naŋ. Ɨŋ-bandi na, ɨŋ bɨya kɔl a cay gusɨnɨ gɨŋ naŋ.

⁴ Ko hɨn̰ gɨ ɨŋ na sɨla gɨ kɔl na unɔ canɨ kalɨn̰ ma, ɨŋ bɨl ungo gɨ dan̰ durɔ ɗɨngar na kol ban gɨ nee le naŋ. Kɨya wa ba bɔyɛ kɔl canɨ na Ba-gulɔŋ.

⁵ Kɨŋ ɗɔɔ ba bɔyɛ kɔl tumɔ tumoy wɔlɛ bɔyɛ kɔl gɨŋ, kɨŋ gama ɗe Ba-gulɔŋ bugoŋ pa dɨm. Hɨnga ga wosɨ kɨɗɨn̰ dɨlɨm dɨŋ le, ban kɨya andɨn̰ cɨn̰ tɨwa dɨŋ bɨ, hɨnga ga kalaŋ wosɨ kuduroyge le, ban kɨya gɨle doŋ bɨ. Kɨɗɨn̰ ga nee le, Kumu kɨya hɨrame kalaŋ pɨna pɨna ɗe ɓalɨn̰ dan̰ gɨye-lɔɔdɨge.

⁶ Ay, karmɨnɨ ga ban̰aŋ dan̰ ga kandɨ, ɨŋ ay Apolos bɨ ɨŋ-bandi gusɨnɨ gaŋ bɨ, hɨn̰ hɨnga ga ni ƴɔlɛ ɗe agɨŋ na solɨn̰ mɨdɨgadi-kɔl gɨ kalaŋ yen̰ge ye hɨn̰: «Kɨŋ ɗɔɔ ɨrɨmedɨgɨŋ dɔgɛ cay kɔl gɨ walge duroy magtubu dɨŋ ɗɔɔ dugo naŋ.» Na toy di hɨn̰ wo̰ ma, ungo pɨna duroygɨŋ kɨya dɔgɛ jorgii dan̰ guson̰ ba gɨlɨn̰ kalaŋ hɨnga gɨ pɨna jɨbɨn̰ ban gɨ ɗaŋ pɨrɨŋ coŋ naŋ.

⁷ Kɛ, na waŋ ba-dɔrɛ cɨndɨn̰ duroy kamdɨn̰ ga? Kɛ, na wa ma mɨn̰ way dan̰ cay gusɨn̰ dɨle gɨ Kumu gusi na ba bɨn̰ ga? Ma hɨn̰ gɨ hɨnga nɔm ga ji ba way le Kumu naa ba bɨn̰ na, kɛ na kɨya wa ma mɨn̰ de jorgɨn̰ hɨn̰ gɨ naa ji-bandi gusɨn̰ naa ba wɔɔ dan̰ cay gusɨn̰ wo̰ ga?

⁸ Kɨŋ sɨdɨldəŋ ɨni bɨ, kɨŋ way hɨnga ga ni wɔɔ tɔgɨ ɨni bɨ! Kɨŋ na kɛrɨmbɛlɛŋ, ama ni na kɛrɨmbɛlɛŋ naŋ! Ni gey tɔgɨ gɨ kɨŋ na daa cay ƴaa leen̰ cɨndi ɗe ani na dɨn̰ cay ƴaa danagɨŋ bɨ!

⁹ Kɨya wa ɨŋ sol gɨ na woy hɨn̰ gɨ Kumu na ɗeni ni-gandi ka-gɨre-gɨye a kɨɗɨn̰ ga karu gaŋ wo̰: Ni woy gɨlɨn̰ hɨn̰ kalaŋ ga boyge kɔl tɨma cayge, ɗe na dɨɗɨgege cɨn̰ dɨmdɨrdi kalaŋ wo̰. Leenige leen̰ hɨnga ga ni ase ga da kalaŋ nɔm, leenige leen̰ hɨnga ga ni ase gɨ da ka-ƴɔbɛ ga daa bɨ, gɨ da kalaŋ ga ɨndəŋ bɨ.

¹⁰ Ni na kalaŋ ka-dɨngale kol cay Kɨris, ama kɨŋ na ka-cɨn̰-muɗɔlɛ dan̰ gɨyəŋ gɨ da bugoŋ gɨ kɨŋ bugoŋ pɨna dan̰ Kɨris. Ni na kalaŋ ga usa naŋ, ama kɨŋ na kalaŋ ga dan̰ tɔgɨ. Kalaŋ hɨramgɨŋge, ama ni-gandi na hagɨrnige.

¹¹ Bɨrɨŋ gɨsɨn̰ labɨde kalɨn̰ ma, kuroŋ leeni bɨ, gɨmase dɨni bɨ, ni or toyni kalɨn̰ bɨ, tenige bɨ, ni dɨbde daa bɨ,

¹² ni lee gɨye dan̰ kobɨni koni gɨlalɨn̰ toy nee bɨ. Hɨn̰ gɨ kalaŋ na yagɨdani na, ni torna-kɨbɨni cayge. Hɨn̰ gɨ kalaŋ na gɨlni-cɨn̰ na, ni ƴom na kuduroyni osu.

¹³ Hɨn̰ gɨ kalaŋ na pɨya kɔl si cayni na, ni dɨbɨge kɔl cay nee dan̰ te tumɔ di jali. Bɨrɨŋ gɨsɨn̰ labɨde kalɨn̰ ma, ni woy gɨlɨn̰ na hɨn̰ cay gubu gɨ da kalaŋ ga cay gɨsəŋ gaŋ wo̰. Ni woy gɨlɨn̰ na hɨn̰ hɨnga ga beege coŋ wo̰ bɨ.

¹⁴ Ɨŋ wal kɔl gɨ kɛ le na kɨya dɨbɨn̰ dasi caygɨŋ naŋ, ama na kɨya halgɨŋ hɨn̰ karɨnɨ ga ɨŋ lee-toyge wo̰.

¹⁵ Ko hɨn̰ gɨ gɨmdəŋ ga ka-gɨlgɨŋ gɨyəŋ gɨ ni gorɨn̰ te bugoŋ pɨna dan̰ Kɨris naa dubu-mɔjɨ kalɨn̰ ma, kɨŋ-gandi na baygɨŋ na pɨna hayi. Na ɨŋ-bandi pɨna hange ma na baygɨŋ gɨ ba woogɨŋ dan̰ gɨyəŋ gɨ da Kɔl-gɨ-Ɗari gɨ da Jesu-Kɨris le.

¹⁶ Na toy di hɨn̰ wo̰ ma, ɨŋ dobɨ bandɨ kuduroygɨŋ. Ayagɨŋ cay tɨbanɨ.

¹⁷ Na toy di hɨn̰ wo̰ ma, maŋ gɨyɨn̰ dan̰ Timote gusɨgɨŋ le. Ban na kuronɨ gɨ ɨŋ lee-toyi tɔgɨ gɨ ɨre a cay tɨbayi dɨŋ te Ba-gulɔŋ. Hal ga ɨŋ kobɨ kardɨge a te bugoŋ pɨna dan̰ Kɨris le, ban kɨya hɨne kuduroygɨŋ cay nee. Na hɨnga ga ɨŋ gɨlɨn̰ kalaŋ duroy Ka-Daye gaŋ nɔm le.

¹⁸ Kalaŋ ga pɨna duroygɨŋ ɨrɨmge gɨ ɨŋ na kɨya jɔgɛ tagɨŋ naŋ, lee gɨ kan dege jorgiige tɔgɨ.

¹⁹ Ama hɨn̰ gɨ Ba-gulɔŋ na gey na, ɨŋ kɨya jɔgɛ tagɨŋ mɨnde. Kɨɗɨn̰ ga nee le, kan ga ka-dɔgɛ jorgiige tɔgɨ le, ɨŋ kɨya sɔlɛ na kɔl yɔdɨge ƴɔbɨ naŋ, ama na gɨye-lɔɔdɨge.

²⁰ Kɨya wa dɔɔ-ƴaa gɨ da Kumu le gɨl guso na dan̰ kɔl gɨ da kalaŋ naŋ, ama na dan̰ dɔnɔ.

²¹ Hɨnga ga kɨŋ gey le na wa ga? Na gɨ ɨŋ na ɨra gusɨgɨŋ naa dan̰ suroy wala, naa dan̰ geye bɨ, naa dan̰ kale ga jali bɨ ga?