1 Korɛ̰t 3 - Gabri Maja

Marɨna ba-gɨye gɨ da Kumu

¹ Ay, karmɨnɨ ga ban̰aŋ dan̰ ga kandɨ, kɨɗɨn̰ ga ɨŋ ba baa duroygɨŋ le, ɨŋ ɓala yogɨŋ kɔl hɨn̰ kalaŋ ga orɨn̰ dan̰ Turnɔ ɗe-kuduroy-bɛrɛ wo̰ naŋ. Ama ɨŋ yəgɨŋ kɔl gɨlɨn̰ na hɨn̰ kalaŋ ga ka-kɔbɛ lɔɔ hɨnga dan̰ gɨyəŋ gɨ da kuyoŋ-gusu wo̰ bɨ, hɨn̰ karɨn̰aŋ ga n̰ən̰əŋ a te bugoŋ pɨna dan̰ Kɨris wo̰ bɨ.

² Na toy di hɨn̰ wo̰ ma, ɨŋ gɨlgɨŋ hɨnga ga ni gɨle ga hɨmbaɗɨdaŋ hɨn̰ kobɨn̰ wo̰. Ama na dan̰ hɨnga ga ni gɨle ga osi hɨn̰ dɔɔ gɨ da sere wo̰ naŋ, kɨya wa kɨŋ ɓala ƴɔɔ hɨnga ga ni gɨle ga osi naŋ. Gɨsɨn̰ haw kɛ kalɨn̰ ma kɨŋ ɓala naŋ.

³ Kɨya wa kɨŋ ɨre lee hɨnga na dan̰ gɨyəŋ gɨ da kuyoŋ-gusu ƴee. Kɨɗɨn̰ ga jangɨ bɨ bɔjɨn̰ɛ bɨ woy duroygɨŋ le, kɛ kɨŋ na ka-lɔɔ hɨnga dan̰ gɨyəŋ gɨ da kuyoŋ-gusu naŋ ga? Kɛ gɨye-lɔɔdɨgɨŋ gɨlɨn̰ pɨna na dan̰ gɨ da kalaŋ ga ɨndəŋ naŋ ga?

⁴ Kɨɗɨn̰ ga ungo pɨna ye hɨn̰: «Ɨŋ-bandi ɨŋ na gɨ da Pol», gɨ ɗaŋ: «Ɨŋ-bandi ɨŋ na gɨ da Apolos» le kɛ, gɨye-lɔɔdɨgɨŋ gɨlɨn̰ pɨna na dan̰ gɨ da kalaŋ ga ɨndəŋ naŋ ga?

⁵ Ɨni na, Apolos na waŋ bɨ Pol na waŋ bɨ ga? Kan na marɨne ka-lɔɔ gɨye ga da Kumu ga kɨŋ ay kuduroygɨŋ dan̰ gɨyəŋ koge ƴɔbɨ. Waŋ waŋ kalɨn̰ ma duroyge lee gɨye na dan̰ gɨyəŋ gɨ da tɔgɨ gɨ Ba-gulɔŋ bii.

⁶ Ni woy na hɨn̰ ka-yage wo̰. Ɨŋ-bandi ɨŋ buson bɨ Apolos na ba-bɔgɛ kaŋ toy nee bɨ, ama Kumu na ba lɔɔ malge.

⁷ Lee gɨ ba-busɔnɛ na hɨnga naŋ bɨ, ba-bɔgɛ kaŋ toy nee na hɨnga naŋ bɨ, ama na Kumu ba lɔɔ malge ma na hɨnga.

⁸ Ba-busɔnɛ bɨ, ba-bɔgɛ kaŋ toy nee bɨ ɓalɨn̰ge. Waŋ waŋ kalɨn̰ ma kɨya wɔɔ hɨnga ga ni cay kobi ga ɓal cay gɨye-lɔɔdi.

⁹ Kɨya wa ni lee gɨye na pɨna boy gɨye gɨ da Kumu gɨŋ bɨ, kɨŋ na yage gɨ da Kumu bɨ. Kɨŋ na ƴaa gɨ Kumu ba ɗɔɔ bɨ.

¹⁰ Kumu lee ɗarwa danaŋ lee gɨ ɨŋ ɗe te ƴaa hɨn̰ ba-gaɗe ƴaa gɨ sol gɨye koyi kuɗa wo̰ bɨ, ungo gɨ ɗaŋ gaɗɨ cay nee. Ama ɗa gɨ waŋ waŋ kalɨn̰ ma ɗa muɗɔlɛ a te gɨyəŋ gɨ ban kɨya gaɗɨn̰ ƴaa cay nee.

¹¹ Gɨ ojɨn̰ cay te ƴaa na, ungo gɨ kɨya ɓale ɗɔɔ gɨ ɗaŋ unɔ, na ban gɨ ɗege le ƴɔbɨ: Na Jesu-Kɨris.

¹² Hɨn̰ gɨ ungo na gaɗa ƴaa a cay te ƴaa gɨŋ le, naa dan̰ lɔr, wala naa dan̰ nare gɨ ni arja̰, wala naa dan̰ garma gɨ kɨledi osu tɔgɨ, wala naa dan̰ sɨya, wala naa dan̰ mu, wala naa dan̰ hɛɗɨmɛ na,

¹³ Kumu kɨya andɨn̰ dan̰ gɨye-lɔɔ gɨ da kalaŋ pɨna pɨna cɨn̰ tɨwa dɨŋ. Wɔlɛ gɨ ni bon̰ kɔl kɨya lɔɔ gɨ ɗe kan na sɨla gɨye le, kɨya wa wɔlɛ gɨ nee le kɨya te hɨnga nɔm daa na dan̰ tɨwa bɨ, na tɨwa ba kɨya gɨwase gɨye gɨ da kalaŋ pɨna pɨna bɨ.

¹⁴ Ungo gɨ gɨye-lɔɔdi na wɨya jaŋ na, kɨya wɔɔ cay kobi.

¹⁵ Ama ungo gɨ tɨwa na ul gɨye-lɔɔdi coŋ na, kɨya nariige hɨnga ga ni cay kobi. Ban ba kɨya pɔɗɛ, ama na hɨn̰ ungo gɨ de kɨɗɨn̰ andaŋ a duroy tɨwa dɨŋ wo̰.

¹⁶ Kɨŋ na ƴaa-di-da-Kumu, lee gɨ Turnoy Kumu som kuduroygɨŋ le kɛɛ, kɨŋ sɨla wo̰ naŋ ga?

¹⁷ Hɨn̰ gɨ ungo na mɨnda ƴaa-di-da-Kumu na, Kumu kɨya mondii coŋ bɨ. Kɨya wa ƴaa-di-da-Kumu na gɨ woy dan̰ cɨndi, ama ƴaa le na kɨŋ-gandi.

¹⁸ Ɗɔɔ gɨ ungo pɨna wo̰ cɨndi narii naŋ. Hɨn̰ gɨ ungo duroygɨŋ na ɨrɨm gɨ ban naa ba cɨn̰-muɗɔlɛ hɨn̰ kalaŋ ga cay gɨsəŋ gaŋ kɛ na, ɗa gɨ ban bɨl ba dɨngale kɨya bɨlɨn̰ ungo gɨ ba cɨn̰-muɗɔlɛ.

¹⁹ Kɨya wa cɨn̰-muɗɔlɛ da kalaŋ ga cay gɨsəŋ gaŋ kɛ, woy dɨngal cɨn̰ Kumu. Kɨya wa walge duroy Magtubu di da Kumu dɨŋ yege hɨn̰: «Kumu ƴom ka-cɨn̰-muɗɔlɛ dan̰ jɨba toge gaŋ.»

²⁰ Kɨya wa walge ɗaŋ coŋ yege hɨn̰: «Ba-gulɔŋ sol ɨrɨme kɔl gɨ da ka-cɨn̰-muɗɔlɛ, ban sol gɨ na hɨnga ga kalɨn̰ wo̰ dugo.»

²¹ Hɨn̰ wo̰ na, ɗɔɔ gɨ ungo dɔgɛ jorgii dan̰ guson̰ mɨgay ungo gɨ ɨndi naŋ. Kɨya wa hɨnga nɔm na kagɨŋ:

²² Hɨn̰ gɨ naa Pol, wala naa Apolos, wala naa Kepas, wala naa hɨnga ga cay gɨsəŋ gaŋ, wala naa sɔmɛ-bɨra, wala naa tɨma, wala naa hɨnga ga haw kɛ, wala naa hɨnga ga ba kɨya ɨrga ƴee, hɨnga ga nee le nɔm na kagɨŋ,

²³ ama kɨŋ na ga da Kɨris bɨ, Kɨris na gɨ da Kumu bɨ.