1 Korɛ̰t 2 - Gabri Maja

Tɔgɛ bɛrnɛ di da Pol

¹ Ɨŋ-bandi kalɨn̰ ma, karmɨnɨ ga ban̰aŋ dan̰ ga kandɨ, kɨɗɨn̰ ga ɨŋ-bandi ɨŋ baga gusɨgɨŋ le, ɨŋ gɨlgɨŋ hɨnga ga woy kɨɗɨn̰ wɔsɛdɨge gaŋ gɨ da Kumu na dan̰ kɔl gɨ kɨɗɨn̰ ga ni sɔlɛ duroy osu tɔgɨ wala, na dan̰ cɨn̰-muɗɔlɛ naŋ.

² Kɨya wa ɨŋ uja gɨ ni sɔlɛ-hɨnga ga ɗaŋ kɨɗɨn̰ ga ɨŋ ban̰ duroygɨŋ le naŋ, ama na Jesu-Kɨris ƴɔbɨ, ban gɨ kan gagɨliige a cay sɨya-gɨ-dagɨli gɨŋ le.

³ Lee gɨ kɨɗɨn̰ ga ɨŋ ba ɨre tumoygɨŋ le, togɨnɨ unɔ bɨ, ɨŋ hɨndar bɨ, ɨŋ saydɨde paɗɨ paɗɨ bɨ.

⁴ Kɔl hɨnge bɨ, tɔgɛ bɛrnɛ tɨnge bɨ le na dan̰ gɨyəŋ gɨ da kɔl gɨ ni cɨn̰-muɗɔlɛ gɨ da kalaŋ naŋ, ama na dan̰ dɔnɔ di da Turnɔ di da Kumu gɨ gɨl jɨn̰ doŋ gɨ kɔl hɨnge naa kɔl gɨ cɨndi.

⁵ Lee gɨ aye kudurɔ kogɨŋ ɨsɨgɨ guso na a cay cɨn̰-muɗɔlɛ da kalaŋ dɨŋ naŋ, ama na a cay dɔnɔ di da Kumu dɨŋ.

Cɨn̰-muɗɔlɛ da Kumu

⁶ Ama kɔl gɨ ni gɨlɨn̰ kalaŋ ga da Kɨris ga cɨndɨge na le na cɨn̰-muɗɔlɛ. Ama na cɨn̰-muɗɔlɛ di a cay gɨsəŋ gaŋ kɛ naŋ bɨ, na cɨn̰-muɗɔlɛ gɨ da kɨlma gɨ a cay gɨsəŋ gaŋ kɛ naŋ bɨ, ga woy kɨya mundoŋ coŋ.

⁷ Ni gɨlɨn̰ kalaŋ na cɨn̰-muɗɔlɛ da Kumu di woy a kɨɗɨn̰ ga ungo wasɨn̰a cayge naŋ ga wosi, gɨ Kumu a boy ɨlge ga tumɔ gaŋ, ƴom cay tɨbayge tumɔ hayi kɨya gusoŋ-tɔgɛ tona.

⁸ Ungo pɨna wo̰ duroy kɛrɨmbɛlɛŋ ga a cay gɨsəŋ gaŋ kɛ gɨ sol cɨn̰-muɗɔlɛ di nee le unɔ. Hɨn̰ gɨ kan ni na sɨlage na, Ba-gulɔŋ gɨ gusoŋ-tɔgɛ na toy le, kan ni kɨya gagɨliige a cay sɨya-gɨ-dagɨli gɨŋ naŋ.

⁹ Ama walge a duroy Magtubu di da Kumu dɨŋ yege hɨn̰: «Na hɨnga ga cɨn̰ ungo sɨla naŋ bɨ, Sɨman̰ ungo ja naŋ bɨ, Ungo ɨrɨm cay nee naŋ bɨ, Ma Kumu ƴom cay tɨbayge kol kan ga geyige.»

¹⁰ Ama Kumu wasɨn̰ cay hɨnga ga woy kɨɗɨn̰ ɓurɔŋgɛdɨge gaŋ le bɨni dan̰ gɨyəŋ gɨ da Turnɔ toyi. Kɨya wa Turnɔ ɓal kɔbɛ te hɨnga pɨna pɨna nɔm. Ko naa hɨnga ga Kumu wosɨ a kɨɗɨn̰ ɓurɔŋgɛdɨge gaŋ ƴee kalɨn̰ ma, hɨndi ɓal kɔbɛ pɨna pɨna.

¹¹ Na waŋ duroy kalaŋ ba sɔlɛ-hɨnga ga a kuduroy ungo gɨ ɨndi le ga? Kɛ na turnoyi ungo gɨ a kuduroy le ƴɔbɨ naŋ ga? Na hɨn̰ wo̰ bɨ, ungo pɨna wo̰ gɨ ba sɔlɛ-hɨnga ga a kuduroy Kumu unɔ, na Turnoyi Kumu ƴɔbɨ.

¹² Ama na-gandi na, na waa na turnɔ da kalaŋ ga a cay gɨsəŋ gaŋ kɛ naŋ, ama na Turnɔ di sayga gusi Kumu ɗe ana na solɨn̰ hɨngan̰əŋ ga Kumu bɨna dan̰ ɗarwa toy.

¹³ Ni-gandi ni ye koldi ɗarwa di nee le bɨn̰ kalaŋ. Ama ni ya koldɨge na dan̰ kɔl cɨn̰-muɗɔlɛ gɨ ungo ba gɨlni naŋ, ni ye na dan̰ kɔl gɨ Turnɔ ba gɨlni. Na toy di hɨn̰ wo̰ ma, ni dor te hɨnga ga da Turnɔ bɨn̰ kan ga Turnɔ di da Kumu woy kuduroyge.

¹⁴ Ungo gɨ kalɨn̰ gɨ Turnɔ di da Kumu wɨya kuduroy naŋ le, kɨya ɓale ƴɔɔ hɨnga ga sayga gusi Turnoyi Kumu naŋ. Hɨnga ga da Turnoyi Kumu woy gɨlɨn̰ na hɨn̰ hɨnga ga ni dɨngale a cɨndi. Ban ɓala sɔlɛ toyge naŋ, kɨya wa na Turnoyi Kumu ba kɨya ɗɔɔ cɨn̰ ungo sagaŋ a cayi a cay dɔrɛ cɨn̰ hɨnga gaŋ.

¹⁵ Ama ungo gɨ orɨn̰ dan̰ Turnɔ le, kɨya ɓale dɔrɛ cɨn̰ hɨnga nɔm. Hɨn̰ wo̰ na, ungo pɨna kalɨn̰ ma kɨya ɓale dɨbe kɔl cayi naŋ.

¹⁶ Walge duroy Magtubu di da Kumu dɨŋ yege hɨn̰: «Kɛ na waŋ ba sɔlɛ ɨrɨme gɨ da Ba-gulɔŋ ga? Kɛ na waŋ ba kɨya ɓale gɨlii hɨnga ga?» Ama ni-gandi na, ni orɨn̰ dan̰ ɨrɨme gɨ da Kɨris.