1 Korɛ̰t 14 - Gabri Maja

Hɨnga ga da Turnɔ ɗe-kuduroy-bɛrɛ duroy Ka-Daye

¹ Hɨn̰ wo̰ na ƴɨmagɨŋ te geye bɨ, ɗaŋ coŋ, ɨran̰gɨŋ dan̰ kurɔŋdi wɔɔ hɨnga ga da Turnɔ ɗe-kuduroy-bɛrɛ dan̰ ɗugoygɨŋ ga pɨna. Duroy hɨnga ga ni tɔrɛ-kɨbɨ ga nee le, ɨran̰gɨŋ na dan̰ kurɔŋdi yɔɔ-kɔl-gɨ-Kumu-ba-yɔɔ ɗe cɨla coŋ.

² Ungo gɨ ye kɨbɨ gɨ ungo sɨla naŋ le, ya kɔl na dan̰ ungo naŋ, ama na dan̰ Kumu, kɨya wa ungo gɨ ba sɔlɛ duroy kɔl yɔdi unɔ. Ban ye kɔl gɨ woy kɨɗɨn̰ wɔsɛdi gɨŋ na dan̰ gɨyəŋ gɨ da Turnɔ di da Kumu.

³ Ama ba-yɔɔ-kɔl-gɨ-Kumu-ba-yɔɔ le ye kɔl na dan̰ kalaŋ ɗe togɨyge na san̰ cay mɨga dɨŋ bɨ, na gɨ ni dobɨn̰ bandɨ kuduroyge bɨ, na gɨ ni jalɨn̰ kuduroyge bɨ.

⁴ Ungo gɨ ye kɨbɨ gɨ ungo sɨla naŋ le, jɨb na te aye kudurɔ koyi ban gaŋ, ama ba-yɔɔ-kɔl-gɨ-Kumu-ba-yɔɔ le jɨb na te Ka-Daye nɔm.

⁵ Ɨŋ gey tɔgɨ gɨ kɨŋ-gandi nɔm kɨŋ na ya kɨbɨ gɨ ungo sɨla naŋ. Ama hɨn̰ gɨ kɨŋ na ya-kɔl-gɨ-Kumu-ba-yɔɔ na kɨya mɔŋ tɔgɨ cɨla nee ƴee coŋ. Ba-yɔɔ-kɔl-gɨ-Kumu-ba-yɔɔ ɗɨn̰ ba yɔ kɨbɨ gɨ ungo sɨla naŋ. Ama hɨn̰ gɨ ba yɔ kɨbɨ gɨ ungo sɨla naŋ na dɨra duroy kɔl le ɗe jɨbɨn̰ te Ka-Daye nɔm na, ba-yɔɔ-kɔl-gɨ-Kumu-ba-yɔɔ ɗii naŋ

⁶ Ay, karmɨnɨ ga ban̰aŋ dan̰ ga kandɨ, hɨn̰ gɨ ba woy kɛ le hɨn̰ gɨ ɨŋ na ɨra gusɨgɨŋ, ma ɨŋ na ya kɔl danagɨŋ dan̰ kɨbɨ gɨ ungo sɨla naŋ na kɛ kɨŋ kɨya wɔɔ na wa a duroy kɔl gɨ ɨŋ ba ye danagɨŋ le ga? Kɨŋ kɨya wɔɔ hɨnga pɨna duroy nee naŋ. Ama hɨn̰ gɨ ɨŋ na yagɨŋ hɨnga ga Kumu wasɨn̰ cayge bəŋ, naŋ le hɨnga ga ɨŋ sol, naŋ le ɨŋ na yagɨŋ naa kɔl-gɨ-Kumu-ba-yɔɔ, naŋ le ɨŋ na gɨlgɨŋ naa hɨnga na, kɨŋ kɨya wɔɔ hɨnga duroy kɔl yɔnɨ gɨŋ.

⁷ Aya nagɨŋ kɨradi-kɔl gɨ da hɨnga ga ni dɨɗe ga hɨn̰ tɛgɛ wo̰ naŋ le jange wo̰, hɨn̰ gɨ noyge na ya arɨn̰a naŋ na ungo gɨ dɔrɛ cɨn̰ noy tɛgɛ na mɨna bɨ, noy jange na mɨna bɨ ga?

⁸ Hɨn̰ gɨ noy burun̰ji na ya dan̰ gɨyəŋdo naŋ na, na waŋ ba kɨya ƴɔmɛ cay tɨbay kɨya kɨmbɨl ga?

⁹ Kɨŋ-gandi kalɨn̰ ma kogɨŋ na hɨn̰ wo̰ bɨ: Hɨn̰ gɨ kɨbɨ kɔl gɨ kɨŋ ba ye na arɨn̰a naŋ na, ungo gɨ sɔlɛ duroy kɔl yɔdɨgɨŋ na mɨna ga? Kɔl kogɨŋ or na hɨn̰ kal wo̰.

¹⁰ Te kɨbɨ kɔl kondɨ a cay gɨsəŋ gaŋ kɛ, ama gɨ pɨna wo̰ gɨ kan ba sɔlɛ duroy unɔ.

¹¹ Ama hɨn̰ gɨ ungo na ya kɔl dan̰ kɨbɨ gɨ ɨŋ sɨla naŋ na, ɨŋ kɨya sɔlɛ duroy naŋ. Ɨŋ bɨle na hɨn̰ kɨrga cɨn̰ ungo gɨ ba yɔ bɨ, ban na kɨrga cɨnɨ bɨ.

¹² Kɨŋ-gandi kalɨn̰ ma kogɨŋ na hɨn̰ wo̰ bɨ: Ɨran̰gɨŋ dan̰ kurɔŋdi wɔɔ hɨnga ga da Turnɔ ɗe-kuduroy-bɛrɛ dan̰ ɗugoygɨŋ ga pɨna bɨ, malagɨŋ ɗe agɨŋ way cay mɨga dɨŋ hɨnga ga kɨya jɨbe te Ka-Daye ɗe na malgɨn̰ge te aye kudurɔ gɨŋ bɨ.

¹³ Na toy di hɨn̰ wo̰ ma kuɗa gɨ ba yɔ kɨbɨ gɨ ungo sɨla naŋ le ula Kumu ɗe na bii gɨyəŋ gɨ ni dorɨn̰ duroy.

¹⁴ Hɨn̰ gɨ ɨŋ na ula Kumu dan̰ kɨbɨ gɨ ungo sɨla naŋ na, turnonɨ ol Kumu ɨni haa, ama gɨrɨn̰ canɨ laa gɨye naŋ.

¹⁵ Naa hɨn̰ wo̰ na ɨŋ kɨya lɔɔ na mɨna ɨni ga? Ɨŋ kɨya ɔlɛ Kumu dan̰ Turnɔ bɨ, ɔlɛ Kumu dan̰ gɨrɨn̰ canɨ bɨ. Ɨŋ kɨya kɨbe kɨra dan̰ Turnɔ bɨ, ɨŋ kɨya kɨbe kɨra dan̰ gɨrɨn̰ canɨ bɨ.

¹⁶ Hɨn̰ gɨ ji na laan̰ Kumu ho’o naa dan̰ kɨbɨ gɨ toy kan̰di ƴɔbɨ na, ungo gɨ kalɨn̰ gɨ som duroy Ka-Daye ma sɨla duroy naŋ na kɨya dɨbɨn̰ cay nee yon̰ hɨn̰: «Ɗa-ɗe-woy-hɨn̰-wo̰» na mɨna ga?

¹⁷ Gajanaŋ ji leen̰ Kumu ho’o kuɗa tɔgɨ han̰i, ama kurɨndɨn̰ le ji jɨb te aye kudurɔ toy naŋ.

¹⁸ Ɨŋ leen̰ Kumu ho’o kɨya wa ɨŋ ye kɨbɨ gɨ ungo sɨla naŋ ɗɨgɨŋ kɨŋ-gandi nɔm.

¹⁹ Ama duroy Ka-Daye na, ɨŋ gey yɔ na kɔl pɨna dan̰ gɨrɨn̰ canɨ gɨ ni gɨlɨn̰ kalaŋ ɗɨn̰ gɨ ni yɔ kɨbɨ gɨ ungo sɨla naŋ dubu-mɔjɨ.

²⁰ Ay, karmɨnɨ ga ban̰aŋ dan̰ ga kandɨ, ɗɔɔ gɨ kɨŋ bɨle karɨn̰aŋ ga n̰ən̰əŋ ojɨn̰ cay bɔyɛ kɔl naŋ. Kɨŋ bɨl karɨn̰aŋ ga n̰ən̰əŋ ujan̰ na cay hɨnga ga ɨsɨn, ama ojɨn̰ cay bɔyɛ kɔl na ɗa gɨ kɨŋ bɨl kalaŋ ga cɨndɨge naa cɛ̰ɛ̰.

²¹ Kɔl gɨ walge duroy magtubu gasɨn̰-kɔl gaŋ ba kɛ: «Na kalaŋ ga kɨbɨ kɔl koge ɗaŋ Ma maŋ kɨya donge gɨ ni yon̰ kɔl Dan̰ te wɔɔ gɨ da kalaŋ ga nee le bɨ. Na kɨrge ma maŋ kɨya ƴɔlɛ kɔl kɨbɨge Gɨ ni yon̰ kɔl danage bɨ. Ko na hɨn̰ wo̰ kalɨn̰ ma kan kɨya jɔɔ kɔl kɨbɨnɨ naŋ. Na kɔl gɨ nee le ma Ba-gulɔŋ ye.»

²² Naa hɨn̰ wo̰ na, yɔɔ kɔl dan̰ kɨbɨ gɨ ungo sɨla naŋ le yan̰ na kan ga ayge kuduroyge ɨni kɔl naŋ, ama yen̰ na kan ga baa aye kuduroyge ƴee, kɔl. Yɔɔ-kɔl-gɨ-Kumu-ba-yɔɔ le yen̰ na kan ga ayege kuduroyge ɨni kɔl, ama yan̰ na kan ga baa ayege kuduroyge ƴee, kɔl naŋ.

²³ Kɨradi-kɔl, hɨn̰ gɨ kɨŋ-gandi nɔm kɨŋ na ɨr kɨɗɨn̰ dayaŋ gaŋ ma kɨŋ-gandi nɔm kɨŋ na aya te yɔ kɨbɨ gɨ ungo sɨla naŋ na. Kɛ kalaŋ ga sɨla hɨnga naŋ, naŋ le kan ga ayage kuduroyge naŋ na andaŋge ƴen̰ kardɨgɨŋ na kɨya solgɨŋge leen̰ na ka-sɨwage naŋ ga?

²⁴ Ama hɨn̰ gɨ ka-aye kudurɔ nɔm na yage naa kɔl-gɨ-Kumu-ba-yɔɔ, ma ungo ba-aye-kudurɔ naŋ, naŋ le ungo gɨ sɨla hɨnga naŋ na andaŋ toygɨŋ na, kɔl gɨ ban je le kɨya lɔɔ gɨ ban kɨya sɔlɛ ɨsɨna toyi. Kɔl nɔm gɨ ban je le kɨya bɔyɛ kɔl danayi bɨ,

²⁵ hɨnga nɔm ga woy kuduroy kɨɗɨn̰ wɔsɛdɨge gaŋ le toyge sɨɗɨge daa nɔm bɨ. Kɨɗɨn̰ ga nee le ban kɨya bɔɔ jɨbe gɨbayi dugo tumon̰ Kumu n̰ɨrii bɨ yon̰ daa waŋ hɨn̰: «Leen̰ cɨndi Kumu woy duroygɨŋ.»

Dayaŋ gɨ da Ka-Daye

²⁶ Hɨn̰ wo̰ na, karmɨnɨ ga ban̰aŋ dan̰ ga kandɨ, kɛ na wa ba ɔjɛ gɨ ni lɔɔ ga? Kɨɗɨn̰ ga kɨŋ ba dayaŋ le, ɗa gɨ waŋ waŋ kalɨn̰ ma ɨrɨn̰ dan̰ hɨnga ga ban ba-orɨn̰ le. Ungo gɨ pɨna orɨn̰ dan̰ kɨra, ungo gɨ ɗaŋ orɨn̰ dan̰ kɔl gɨ ni gɨle, ungo gɨ ɗaŋ coŋ orɨn̰ dan̰ hɨnga ga Kumu boy cɨndi cay nee hɨn̰ dḛḛ wo̰, gɨ ɗaŋ coŋ orɨn̰ dan̰ kɨbɨ gɨ ungo sɨla naŋ, naŋ le dɔrɛ toyge. Hɨnga nɔm ga kɨŋ ba kɨya lɔɔ le ɗa ɗe jɨbɨ te Ka-Daye ɗe orɨn̰ge jɨn̰ tumɔ tumɔ.

²⁷ Hɨn̰ gɨ kalaŋ na ya kɔl dan̰ kɨbɨ gɨ ungo sɨla naŋ na, ɗa gɨ sɔɔ naŋ le sɨbɨ ƴɔbɨ ba yage kɨbɨ gɨ nee le kardi gusɨge. Ɗa gɨ ungo dɨra te kɨbɨ kɔl koge le.

²⁸ Ama hɨn̰ gɨ ungo gɨ ba ɓale dɔrɛ te kɨbɨ kɔl koge le na unɔ na, ɗa gɨ kan sɨmage kɨbɨge munduŋ duroy Ka-Daye. Ɗa gɨ kan yan̰ge Kumu kɔl na dan̰ te tumoyge di dugo.

²⁹ Ɗa gɨ sɔɔ naŋ le kalaŋ sɨbɨ yage-kɔl-gɨ-Kumu-ba-yɔɔ bɨ, ɗa gɨ toyge ga ba kɨbage duroy kɔl koge.

³⁰ Hɨn̰ gɨ ungo gɨ ɗaŋ na sɨma te jɔɔ kɔl ma kɔl gɨ da Kumu gɨsɨn cayi na, ɗa gɨ ungo gɨ ba-yɔɔ kɔl le sɨgɨya dugo.

³¹ Kɨya wa kɨŋ-gandi nɔm kɨŋ ɓal yɔɔ-kɔl-gɨ-Kumu-ba-yɔɔ. Ama ɗa gɨ kɨŋ ya kardi gusɨgɨŋ gusɨgɨŋ. Hɨn̰ wo̰ na waŋ waŋ kalɨn̰ ma kɨya wɔɔ hɨnga ga ni sɔlɛ gusi mɨgay bɨ, kɨya dɔbɛ bandɨ kuduroy kalaŋ nɔm bɨ.

³² Ungo gɨ ba-yɔɔ-kɔl-gɨ-Kumu-ba-yɔɔ le orɨn̰ dan̰ dɔnɔ a cay kɔl gɨ ban ye.

³³ Na cɨndi, Kumu na Kumu ba lɔɔ hɨnga ga ɨra dan̰ gɨyəŋdɨge gɨyəŋdɨge naŋ, naŋ ama na Kumu ba gusi-dɔbɛ. Hɨn̰ gɨ ba leege a kɨɗɨn̰ Daye ga da kalaŋ ga da Kumu nɔm le,

³⁴ ɗa gɨ kandɨ sɨmage kɨbɨge munduŋ duroy Ka-Daye gaŋ, kɨya wa ɗage gɨyəŋ bɨge gɨ kan yan̰ kɔl naŋ. Ɗa gɨ kan dɨba cayge dugo hɨn̰ gɨ gasɨn̰-kɔl gɨ da Moyis ba ye.

³⁵ Hɨn̰ gɨ kan na ɨran̰ dan̰ kɔl gɨ ni ɨngɨre ojɨn̰ cay hɨnga ga ni gɨle na, ɗa gɨ kan ɨngɨrɨn̰ kodɨn̰ige duroy ƴaadɨge gɨŋ. Hɨn̰ gɨ tama na ya kɔl duroy Ka-Daye gaŋ na, na dasi yɔd.

³⁶ Kɛ na mɨna ga? Kɛ a bon̰ ɨrɨmedɨgɨŋ gɨŋ tɔgɛ bɛrnɛ gɨ da kɔl gɨ da Kumu sayga na duroygɨŋ cay wase ga? Naŋ le na kɨŋ-gandi kan̰dɨgɨŋ hagɨŋ ba jɔɔ kɔl gɨ da Kumu ga?

³⁷ Hɨn̰ gɨ ungo na ya gɨ ban naa ba-yɔɔ-kɔl-gɨ-Kumu-ba-yɔɔ, naŋ le naa ungo gɨ da Turnɔ ɗe-kuduroy-bɛrɛ na, ɗa gɨ ban sɨla kɔl gɨ ɨŋ ba wal bɨgɨŋ kɛ le naa te tumɔ da Ba-gulɔŋ.

³⁸ Ama hɨn̰ gɨ ungo na aya cɨndi coŋ a cay te tumɔ di kɛ le na, Kumu kalɨn̰ ma kɨya aye cɨndi cayi coŋ bɨ.

³⁹ Naa hɨn̰ wo̰ na, karmɨnɨ ga ban̰aŋ dan̰ ga kandɨ, ɨran̰gɨŋ dan̰ kuroŋ gɨ ni bɨle ka-yɔɔ-kɔl-gɨ-Kumu-ba-yɔɔ bɨ, kɨŋ ɗɔɔ ba nare kalaŋ yɔ kɨbɨ gɨ ungo sɨla toy naŋ naŋ bɨ.

⁴⁰ Ama kɨŋ laa hɨnga nɔm duroy Ka-Daye dan̰ hurɔmɔ bɨ, dan̰ gɨyəŋdɨge gɨyəŋdɨge bɨ.