1 Korɛ̰t 12 - Gabri Maja

Hɨnga ga Turnɔ ɗe-kuduroy-bɛrɛ bee kalɨn̰

¹ Ay, karmɨnɨ ga ban̰aŋ dan̰ ga kandɨ, ojɨn̰ cay hɨnga ga da Turnɔ ɗe-kuduroy-bɛrɛ le, ɨŋ gey gɨ kɨŋ na sɨla duroyge kuɗa.

² Kɨŋ sol kuɗa gɨ kɨɗɨn̰ ga kɨŋ ba ban̰ solɨn̰ Kumu gɨ cɨndi ƴee le, kɨŋ n̰ɨre kulan̰əŋ ga toyge kan̰dɨge kan̰dɨge bɨ, kɨŋ godɨrde badɨ badɨ gusi kulan̰əŋ ga kɨbɨge munduŋ ga nee le.

³ Na toy di hɨn̰ wo̰ ma ɨŋ gey gɨ kɨŋ na sɨla duroy kuɗa gɨ ungo gɨ na ya kɔl dan̰ gɨyəŋ gɨ da Turnɔ di da Kumu le, kɨya yɔ gɨ: «Ɓɨse na ƴɨma cay Jesu» naŋ bɨrɨŋ. Bɨ ungo gɨ ɓale yɔ hɨn̰: «Jesu naa Ba-gulɔŋ» dɨle gɨ Turnɔ ɗe-kuduroy-bɛrɛ naa ba ɗa kɨbi bɨ.

⁴ Hɨnga ga Turnɔ di da Kumu bɨn̰ kalaŋ kalɨn̰ le toyge kondɨ, ama na Turnɔ di da Kumu di pɨnaa di nee le ba bɨge.

⁵ Gɨye le toyge kondɨ ama na Ba-gulɔŋ gɨ pɨna hayi gɨ nee le ma, mani lee gɨye bii.

⁶ Gɨyəŋ gɨ kalaŋ leen̰ge gɨye toy kondɨ, ama na Kumu gɨ pɨna hayi gɨ nee le ma, mana ba lɔɔdɨge nɔm a kuduroyna nɔm.

⁷ Waŋ waŋ kalɨn̰ ma Kumu bii hɨnga ga ni bee-kalɨn̰ ga ojɨn̰ cayi ɗe na gɨlɨn̰ dɔnɔ di da Turnɔ di da Kumu jɨn̰ doŋ ɗe na laa dan̰ kalaŋ nɔm.

⁸ Turnɔ di da Kumu bɨn̰ ungo gɨ pɨna gɨyəŋ gɨ ni yon̰ kɔl dan̰ cɨn̰-muɗɔlɛ bɨ, Turnɔ di da Kumu di pɨnaa di nee le bɨn̰ ungo gɨ ɗaŋ yɔɔ kɔl dan̰ gɨyəŋ gɨ ni hɨnga-sɔlɛ bɨ.

⁹ Turnɔ di da Kumu di pɨnaa di nee le bɨn̰ ungo gɨ pɨna aye kudurɔ gɨ woy gɨlɨn̰ kan̰di bɨ, bɨn̰ ungo gɨ ɗaŋ dɔnɔ di ni poɗɨn̰ ka-hɔmɨn̰ɛ bɨ,

¹⁰ bɨn̰ ungo gɨ ɗaŋ dɔnɔ di ni loon̰ beli bɨ, bɨn̰ ungo gɨ ɗaŋ dɔnɔ di ni yon̰ kɔl-gɨ-Kumu-ba-yɔɔ bɨ, bɨn̰ ungo gɨ ɗaŋ coŋ dɔnɔ di ni dorɨn̰ cɨn̰ turnɔn̰əŋ bɨ, bɨn̰ ungo gɨ ɗaŋ dɔnɔ di ni yon̰ kɔl dan̰ kɨbɨ gɨ toy kan̰di kan̰di gɨ ungo sɨla naŋ bɨ, bɨn̰ ungo gɨ ɗaŋ coŋ dɔnɔ di ni solɨn̰ duroy kɨbɨ gɨ ungo sɨla naŋ gɨ toy kan̰di kan̰di gɨ nee le bɨ.

¹¹ Na Turnɔ di da Kumu di pɨnaa di nee le ba lɔɔ hɨnga ga nee le nɔm. Hɨndi gosɨn hɨnga ga ni bee-kalɨn̰ ga nee le bɨn̰ waŋ waŋ kalɨn̰ ma dan̰ kuduroy geye kɔɔ.

Kuyoŋdi-gusɨna na pɨna hayi ama kɨway kondɨ

¹² Kɨŋ sol gɨ kuyoŋdi-gusɨna na pɨna hayi ama kɨway kondɨ. Bɨ kɨway gusɨna ga kondi na dayaŋge daa na bɨləŋge na kuyoŋdi-gusu gɨ pɨna ƴɔbɨ. Woy gɨlɨn̰ na hɨn̰ wo̰ bɨ kɨya cay Kɨris.

¹³ Ho’o Kumu leena batɛm nɔm na dan̰ Turnoyi di pɨna haa ɗe ana na bɨləŋ kuyoŋdi-gusu gɨ pɨna hayi gɨ na kuyoŋdi-gusu Kɨris. Ban lee hɨnga ga pɨna hage ga nee le kol cayna nɔm, ko na naa Jubɨ wala kalaŋ ga toyge na Jubɨ naŋ, ko na naa gɔyɔŋ wala kalaŋ ga cayge-kalɨn̰ kalɨn̰ ma, Kumu lee gɨ Turnoyi bɨləŋ hɨn̰ hɨnga ga ni sɔ ga pɨna hage ga na si boy nee wo̰.

¹⁴ Kuyoŋdi-gusɨna le ɨran̰ dan̰ kɨway gusi na pɨna ɗɔ ƴɔbɨ naŋ, ama na dan̰ kondiige.

¹⁵ Hɨn̰ gɨ tɨba na ya ya hɨn̰: «Ɨŋ na kɔbɔ naŋ, na toy di hɨn̰ wo̰ ma ɨŋ na duroy kɨway gusu gɨŋ naŋ», kɔl gɨ nee le kɨya dorii a duroy kuyoŋdi-gusu gɨŋ coŋ naŋ

¹⁶ Hɨn̰ gɨ sɨma na ya hɨn̰: «Ɨŋ na ti naŋ, na toy di wo̰ ma ɨŋ na duroy kuyoŋdi-gusu gɨŋ naŋ», kɔl gɨ nee le kɨya dorii a duroy kuyoŋdi-gusu gɨŋ coŋ naŋ.

¹⁷ Ɗaŋ coŋ hɨn̰ gɨ kuyoŋdi-gusu nɔm na bɨləŋ ti na, ban gɨ jɔɔ kɔl na mɨna ga? Hɨn̰ gɨ kuyoŋdi-gusu nɔm na bɨləŋ sɨma na, ban gɨ ɗɔn̰ɛ gasɨm na mɨna ga?

¹⁸ Ama Kumu si kɨway gusɨna pɨna pɨna gusɨna na dan̰ kuduroy geye koyi.

¹⁹ Hɨn̰ gɨ kɨway gusɨna nɔm na bɨləŋ kɨway gusɨna pɨna ɗɔ ƴɔbɨ na, kɛ kuyoŋdi-gusu ba ani ga?

²⁰ Leen̰ cɨndi na kɨway gusɨna kondɨ ama kuyoŋdi-gusɨna na pɨna hayi ƴɔbɨ.

²¹ Lee gɨ ti kɨya ɓale yon̰ kɔbɔ hɨn̰: «Ɨŋ ɨran̰ dan̰ n̰agedɨn̰ naŋ», wala ca kɨya ɓale yon̰ dan̰ tɨba hɨn̰: «Ɨŋ ɨran̰ dan̰ n̰agedɨgɨŋ naŋ bɨ.»

²² Naŋ, kɨya wɔyɛ hɨn̰ wo̰ naŋ, kɨya wa kɨway gusɨna ga pɨna ga woy duroy kuyoŋdi-gusɨna gaŋ le usage naŋ, ama na sol gɨ dɨle kan na kuyoŋdi-gusɨna kɨya andaŋ hɨnga naŋ.

²³ Kɨway gusɨna ga na ba solge laan̰ hɨnga ga ni hɨrame naŋ le, na kan ma mana sol kardɨge ɗɨn̰ toyge ga ba nɔm. Kɨway gusɨna gɨ na ba ɓala gɨle doŋ cɨn̰ kɔndɨwadi kalaŋ naŋ le, na cɨb cɨndɨna kardɨge tɔgɨ ɗɨn̰ kan ga ɗaŋ nɔm.

²⁴ Kɨway gusɨna ga ɗaŋ ga da dasi naŋ le dɨlage a cay hɨnga ga nee le naŋ. Ama Kumu lee kuyoŋdi-gusɨna dan̰ gɨyəŋ gɨ kɨway gusɨna ga wɨyan̰ hɨrame naŋ le, hɨramgege tɔgɨ.

²⁵ Hɨn̰ wo̰ ɗe puyoŋ na unɔ duroy kuyoŋdi-gusɨna ama ɗe kuyoŋdi-gusɨna nɔm na sɨlage kardi gusɨge ɗe ɓadɨlɨn̰.

²⁶ Hɨn̰ gɨ kɨway gusɨna gɨ pɨna na gɨl-cɨn̰ na te kɨway gusɨna nɔm gɨlge-cɨn̰ pɨna danayi bɨ. Hɨn̰ gɨ kɨway gusɨna gɨ pɨna na wa hɨrame na te kɨway gusɨna ga ba nɔm leege gusi-mɔwa pɨna danayi bɨ.

²⁷ Kɨŋ-gandi nɔm kɨŋ na kuyoŋdi Kɨris ɨni bɨ, kɨŋ-gandi pɨna pɨna na karɨn̰ gusi bɨ.

²⁸ Kalaŋ ga cay wase ga Kumu sige a cay Ka-Daye kay gaŋ le na ka-gɨre-gɨye. Kan ga kobɨ kardɨge na ka-yɔɔ-kɔl-gɨ-Kumu-ba-yɔɔ. Kalaŋ ga ni sɨbɨdɨge na ka-gɨlɨn̰ kalaŋ hɨnga. Kardi nee na, na ka-lɔɔ hɨnga ga ni beli. Kardi nee ɗaŋ coŋ na, na ka-orɨn̰ dan̰ dɔnɔ gɨ ni poɗɨn̰ ka-hɔmɨn̰ɛ bɨ, ka-jɨbe te karmɨge bɨ, ka-dɔrɛ tumon̰ kamdɨge bɨ, ka-yɔ kɨbɨ gɨ ungo sɨla naŋ bɨ,

²⁹ kɛ kan nɔm na ka-gɨre-gɨye ga? Kɛ kan nɔm na ka-yɔɔ-kɔl-gɨ-Kumu-ba-yɔɔ ga? Kɛ kan nɔm na ka-gɨlɨn̰ kalaŋ hɨnga ga? Kɛ kan nɔm na ka-lɔɔ belin̰əŋ ga?

³⁰ Kɛ kan nɔm na ka-orɨn̰ dan̰ dɔnɔ di ni poɗɨn̰ ka-hɔmɨn̰ɛn̰əŋ ga? Kɛ kan nɔm na ka-yɔ kɨbɨ gɨ ungo sɨla naŋ bɨ ga? Kɛ kan nɔm na ka-dɔrɛ te kɨbɨ gɨ toy kan̰di kan̰di le ga?

³¹ Ɗa gɨ kurɔŋdi wɔɔ hɨnga ga Turnɔ ɗe-kuduroy-bɛrɛ ba bee-kalɨn̰ ga kuɗa ɗɨn̰ ba loogɨŋ. Ama haw kɛ na ɨŋ gey gɨlgɨŋ gɨyəŋ gɨ kuɗa ɗɨn̰ kamdi nɔm coŋ.